Mbela oho longitha muukalele iitopolwa ayihe yomOshungonangelo yOshingiilisa yo-public edition?

¹ Sho omumwameme gumwe a li a lesha Oshungonangelo ye 1 Januali 2008 okwa nyola a ti: “Onda halelela oku yi longitha momapya.” Mbela owa dhiladhila okulongitha iitopolwa yimwe mbyoka hayi holoka aluhe moshifo sho-public edition nowa mona ompito yoku yi gandja kuyalwe muukalele?

² “Shoka tatu ilongo kuJesus”: Otashi vulika we shi mona kutya iitopolwa mbika otayi vulu oku ku kwathela wu tameke omakonakonombiimbeli. Ngele ino shi ninga natango, kambadhala wu leshele omunegumbo oshipalanyolo shoshitopolwa opo nduno to mu ulikile shoka Jesus a ti kombinga yasho, ngaashi sha kundathanwa mokatendo kotango moshifo. Ngele omunegumbo otu ulike ohokwe tsikila noonkundathana to longitha uupalanyolo mboka wu li moludhi lwomapulo taga pendutha ohokwe. Pula omuntu a gandje etyokosha kombinga yepulo. Yelitha paufupi omafano ngoka ga pamba shoka ta mu kundathana e to yi kokatendo ka landula ko. Otashi vulika wu vule oku kundathana naye etata lyoshitopolwa shoka metalelopo lyotango, e to galuka wu manithe shoka sha hupa ko. Kala wi ilongekidha wu tsikile ekonakono membo Omalongo gOmbiimbeli.

³ “Shoka tashi eta enyanyu muukwanegumbo”: Iitopolwa mbyoka hayi holoka mo konima yoomwedhi ndatu, oya nuninwa aasamane, aakulukadhi naavali ya mone nkene taya vulu okutula miilonga omakotampango gOmbiimbeli uuna taya ungaunga nomaupyakadhi ngoka taga yono po ombili yuukwanegumbo. Oto vulu wo okulongitha iitopolwa mbyoka wu kwathele mboka kaaye shi Oonzapo ya mone uunongo mboka wu li mOmbiimbeli. — 2 Tim. 3:16, 17.

⁴ Iitopolwa ya pamba aagundjuka: Oshitopolwa “For Our Young People” otashi gandja ompito kaaleshi ya dhiladhile komahokololo gokondandalunde gomOmbiimbeli. Oto vulu okulongitha iitopolwa mbyoka wu kwathele aagundjuka mboka to tsakaneke muukalele ya mone ongushu yokukonakona Oohapu dhaKalunga. (Eps. 119:9, 105) Uuna to kundathana naavali oto vulu oku ukitha eitulomo koshitopolwa “Teach Your Children” shoka hashi holoka mo konima yoomwedhi mbali. Iitopolwa mbyoka otayi vulu okukwathela aanona yi ilonge iimoniwa ya simana yaantu yopethimbo lyOmbiimbeli. Mbela owu na esiku wa kuthile ompito wu leshe iitopolwa mbika pamwe naanona yoye?

⁵ Iitopolwa yilwe: Omwedhi kehe, oshitopolwa “Aaleshi yoshifo shetu taya pula” ohashi kundathana omapulo ngoka mboka kaaye shi Oonzapo haya pula olundji. Oto vulu okulongitha iitopolwa mbyoka uuna to gandja iifo miilonga yegumbo negumbo. Oshitopolwa “A Letter From . . . ” ohashi kala nomahokololo taga popi omaupyakadhi ngoka aatumwa naamwatate yamwe haya tsakaneke sho taya gwanitha po uukalele wawo. Iitopolwa mbyoka otayi vulu okukwathela mboka ye na ohokwe ya mone kutya onkundana ombwanawa otayi uvithwa muuyuni auhe, shoka shi li egwanitho lyendhindhiliko lyokukala po kwaKristus. — Mat. 24:3, 14, NW.

⁶ Oshitopolwa “Draw Close to God,” shoka hashi piti omwedhi kehe nosha kankamena kelesho lyOmbiimbeli lyOsikola yUukalele woPauteokratika otashi vulu okwiinyengitha mboka ye na omitima dhu uka ya kale ya hala okwiilonga kombinga yaJehova. Oshitopolwa “Imitate Their Faith,” shoka tashi kala hashi holoka lune momumvo, osha longekidhwa shi kwathele aaleshi kunena ya kale ya fa ye wete aantu mboka ya hokololwa mOmbiimbeli nkene ya li haya ningi omahogololo gawo, haya ungaunga nomaupyakadhi nosho wo nkene ya li yu ulike eitaalo lyawo.

⁷ Kashi li tuu enyanyu kutse okumona oshifo shoka sha nuninwa uukalele omwedhi kehe! Natu kale tu shi nawa oshikalimo shasho noku shi longitha nawa muukalele wetu.