Oto vulu okukala omulongi omwaanawa
1. Omuuvithi kehe gwonkundana yUukwaniilwa oku na uuthembahenda washike?
1 Okulonga gumwe oshili oku li ondjambi ya dhenga mbanda ndjoka hayi zi muukalele wetu. Ohashi nyanyudha okumona gumwe ti inyenge nawa ketumwalaka lyUukwaniilwa noku mu kwathela a hedhe popepi nOmupangeli gweshito alihe. (Jak. 4:8) Oshi na okukala elalakano lyomuuvithi kehe gwUukwaniilwa okulonga gumwe ngoka a sa ondjala yoshili nokumona sho ta ningi omalunduluko gi iwetikile momaukwatya, miikala nomeihumbato lye. — Mat. 28:19, 20.
2. Omolwashike tashi vulika yamwe kaaye na aakonakoni, noshike tashi ke ya kwathela ya sinde uupyakadhi mboka?
2 Inekela muJehova: Methimbo lya pita, aapiya yaJehova aadhiginini oya li ye wete inaaya gwana okulonga iilonga mbyoka e ya pa. Molwaashoka Moses, Jeremia, Amos nayalwe mboka ya li aaifupipiki oya li yi inekela muJehova Kalunga oya li ya longo iilonga ya simana, nonando oya li ye wete inaaya gwana oku yi longa. (Eks. 4:10-12; Jer. 1:6, 7; Amos 7:14, 15) Omuyapostoli Paulus okwa li wo e na “omukumo.” Olye a li e mu kwathele? Okwe shi holola kutya ‘oKalunga.’ (1 Tes. 2:2) Eeno, atuheni otatu vulu okwiinekela muJehova e tu pe ekwatho, uunongo noonkondo ndhoka twa pumbwa tu kale tu na aakonakoni taya humu komeho. — Jes. 41:10; 1 Kor. 1:26, 27; 1 Pet. 4:11.
3, 4. Edheulo lini hatu mono oku tu kwathela tu kale aalongi yOohapu dhaKalunga?
3 Taamba edheulo ndyoka to pewa: Omulongi gwetu Omunenenene, Jehova Kalunga oha gandja edheulo okupitila melongo lyopambepo opo tu kale aalongi ya pyokoka. (Jes. 54:13; 2 Tim. 3:16, 17) Taamba ko edheulo ndyoka opo wu humithe komeho euvoko lyoye lyopamanyolo nokuhwepopaleka uunkulungu woye wokulonga aantu ooshili dhOmbiimbeli. Nonando elalakano lyOsikola yUukalele woPauteokratika nOkugongala kwoPailonga oku tu kwathela unene tuu tu kale aalongi ya pyokoka, okugongala kehe ohaku tu dheula tu kale aalongi yOohapu dhaKalunga.
4 Kambadhala wu ilonge okukala ho yelitha momukalo omupu ooshili dhomuule dhopambepo. Embo Ministry School, pepandja 227 otali yelitha tali ti: “Owu na okuuva ko nawa shoka to ka popya opo wu vule oku shi yelithila yalwe.” Okugandja omatyokosha pokugongala kehe ohashi tu kwathele tu kaleke iitsa ya simana momadhiladhilo opo tu ke yi longithe monakuyiwa. Onkee ano, ilongekidha nawa, noto ka kala wu na einekelo olindji muunkulungu woye wokulonga.
5. Edheulo lini lya gwedhwa po tu na megongalo oku tu kwathela tu kale aalongi taya humu komeho?
5 Shimwe natango, aakalele Aakriste ohayi ilongo kuyalwe uuna ye li miilonga yokuninga aantu aalongwa. (Luk. 10:1) Ngele otashi wapa, inda pamwe naauvithi mboka ye na owino ngaashi aakokolindjila, aakuluntugongalo naatonateli aayendi kaakonakoni yoye. Tala nkene taya longitha omathaneko nomathano ngoka ge li moshileshomwa shoka tashi konakonwa okuyelitha ooshili dhopamanyolo. Ya pula nkene wu na oku shi enda opo wu kale omulongi omwaanawa. (Omayel. 1:5; 27:17) Molwashoka edheulo ndyoka otali zi kuKalunga otu na okupandula aamwatate naamwameme mboka taye tu kwathele. — 2 Kor. 3:5.
6. Oshike sha pumbiwa lela opo wu kale omulongi gwOohapu dhaKalunga?
6 Inekela muJehova, nokumona uuwanawa medheulo ndyoka ha gandja. Galikana kuye e ku kwathele wu hume komeho. (Eps. 25:4, 5) Nangoye oto vulu okunyanyukiwa okukwathela gumwe a ninge omulongi gwOohapu dhaKalunga ngaashi ngoye.