Oshikonga shi ikalekelwa shokuhiya aantu kEdhimbuluko
1. Aauvithi yUukwaniilwa otaya ka kala yi ipyakidhila nashike muuyuni auhe okutameka mo 21 gaMaalitsa 2009 nomolwashike?
1 Metine mo 9 Apilili 2009, aalongeli yaJehova Kalunga muuyuni auhe otaya ka gongala okudhimbulukwa oshiningwanima shohole onenenene ndjoka yu ulukilwa aantu. (Rom. 5:6-8) Otu na etegameno kutya aantu omamiliyona mboka ye na ohokwe otaya ka gongala pamwe natse sho tatu dhimbulukwa eso lyaJesus. Okambapila kokuhiya aantu kEdhimbuluko ota ka gandjwa muuyuni auhe okutameka mo 21 Maalitsa.
2. Oshike wu na okukaleka momadhiladhilo uuna to gandja okambapila kehiyo?
2 Shoka tu na okukaleka momadhiladhilo: Longitha nawa omathano, omapulo nomanyolo ngoka ge li mokambapila kehiyo. Pashiholelwa oto vulu okuulika efano ndyoka li li petameko e to ti: “Onda hala oku ku hiya wu ka kale pamwe natse kEdhimbuluko lyeso lyaJesus, ndyoka tali ka dhimbulukiwa mEtine mo 9 gaApilili 2009.” Ulika oshipalanyolo shokambapila kehiyo nosho wo omapulo ngoka ge li po. Lombwela omunegumbo kutya ota vulu okweetelela uukwanegumbo we nayalwe mboka ta vulu okuya nayo.
3. Konima ngele twa hiya aantu kEdhimbuluko otu na okukala hatu ningi shike ethimbo nethimbo?
3 Ngele egongalo lyeni oli na oshitopolwa oshinene, aakuluntugongalo otaya vulu oku mu lombwela mu thige uumbapila pomagumbo ngoka kaapu na aantu. Mehuliloshiwike gandja iifo pamwe nokambapila kehiyo. Itulila po elalakano wu hiye aatalelwapo yoye, aakonakonimbiimbeli, aakwanezimo, aanasikola ooyakweni, aaniilonga ooyakweni, aashiinda nayalwe mboka wu shi. Omumvo gwa zi ko omumwameme gumwe okwa li a hiya aakwanezimo ye ye li 30 nokwa kala he ya dhimbulukitha ethimbo nethimbo esimano lyoshiningwanima shoka. Ka li tuu a nyanyukwa sho 25 ya li ya kala po naasho yane yomuyo ya taamba ko ekonakonombiimbeli konima yethimbo!
4. Omalongekidho geni tu na okuninga ngashingeyi nomolwashike?
4 Ilongekidha ngashingeyi: Aauvithi oyendji otaya vulu okuninga oshindji muukalele muMaalitsa naApilili. Ngele owu na aanona nenge aakonakonimbiimbeli taya humu komeho, ndjika otayi vulu okukala ompito ombwanawa kuyo ya ninge aauvithi inaaya ninginithwa. Ngashingeyi oli li ethimbo okutameka okwiilongekidha opo tu kuthe ombinga moshikonga shokuhiya aantu koshiningwanima sheuliko lyohole ya dhenga mbanda ndjoka yu ulikwa kuJehova naJesus. — Joh. 3:16; 15:13.