Natu longeni aantu momukalo omupu
1. Omukalo gumwe gwa simana gwokulonga nawa aantu oguni?
1 Opo tu pondole mokulonga aantu osha simana tu shi ninge momukalo omupu. Okutala komukalo ngoka Omulongi Omunene, Jesus a longo aantu, otaku vulu oku tu kwathela tu ‘longe aantu’ nuunkulungu. — 2 Tim. 4:2; Joh. 13:13.
2. Oshike sha kwatelwa mokulonga aantu momukalo omupu, nelongo ndyoka ohali ya nwetha mo ngiini?
2 Popya momukalo omupu: Meuvitho lyokondundu, Jesus okwa popya ooshili dhomuule ndhoka inadhi popiwa nando onale komuntu gwontumba, ihe odha popiwa momukalo omupu. (Mat., ontopolwa 5-7) Ongundu yaantu mboka ya li taye mu pulakene “oya kuminwa elongo lye.” Aalangeli mboka ya tumwa ye ke mu kwate oya li ya gumwa koohapu dhe e taya ti: “Noshitonale inaku monika omuntu ta popi ngashika omulumentu ngwiyaka.” (Mat. 7:28, 29; Joh. 7:46) Inashi pumbiwa tu longithe iitya iidhigu, uutumbulilo wa kitakana nenge omathaneko omale unene opo tu tompe aantu noshili. Oto vulu okuyelitha nawa oshili mokulongitha iitya mbyoka yi shiwike.
3. Opo tu yande okupopya uuyelele owundji naapulakeni yetu, otwa pumbwa okuninga shike?
3 Ino popya iinima oyindji: Jesus okwa li e shi nawa okuyeleka uuyelele mboka aapulakeni ye ya pumbwa poshikando. (Joh. 16:12) Otu na okukala hatu lundulula okupopya kwetu shi ikolelela kaapulakeni yetu, unene tuu ngele tatu gandja uunzapo kaapambele, kaantu aape mboka ye na ohokwe nenge kaanona. Otu na okukala twa kotoka opo ka tu popye uuyelele owundji, nonando otashi vulika taya pulakene nawa. Mboka ye na omitima dhu uka otaya ka tsikila okwiilonga ontseyo yaJehova, Kalunga kashili. — Joh. 17:3; 1 Kor. 3:6.
4. Omolwashike sha simana tu ukithe eitulomo kiitsa ya simana, pehala lyokupopya uuyelele owundji?
4 Ukitha eitulomo kiitsa ya simana: Elongo lyaJesus olya li hali uviwa ko nuupu, molwaashoka ka li ha popi unene iinima oyindji. Sho a ti: “Ayehe mboka ye li [moombiladhimbuluko, NW] . . . oyo notaa ka za mo” kasha li ethimbo kuye opo a popye oshindji kombinga yoongundu mbali ndhoka tadhi ka yumuka. (Joh. 5:28, 29) Uuna tatu ningi omakonakonombiimbeli, otu na okutsa omuthindo iitsa ya simana nokuhenuka okupopya uuyelele mboka wu li kokule naashoka tashi kundathanwa.
5. Omayambeko geni tatu ka mona ngele tatu longo aantu momukalo omupu?
5 Katu na tuu olupandu sho Jehova e tu longa momukalo omupu iinima ayihe mbyoka twa pumbwa okutseya! (Mat. 11:25) Natu ningeni ngaashi tatu vulu tu longe aantu momukalo omupu opo tu nyanyukilwe uukalele mboka tawu eta iizemo iiwanawa.