“Kaleni mwa hwama mombepo”
1. Uukwatya wuni tu na okukala tu na uuna tatu uvitha?
1 Iilonga yetu yopaKriste kayi na okukala ya thikama. Pehala lyaashono otatu ladhipikwa: “Kaleni mwa hwama mombepo. Longeleni Omuwa.” (Rom. 12:11, OB-1954) Ihe opu na iinima oyindji mbyoka tayi vulu okushunitha pevi uulaadhi wetu muukalele. Ongiini tatu vulu ‘okuhwameka’ uulaadhi wetu miilonga yUukwaniilwa? — 2 Tim. 1:6, 7, OB-1954.
2. Ekonakono lyopaumwene olya pambathana ngiini nokukala omulaadhi muukalele?
2 Ekonakonombiimbeli lyopaumwene: Omuuvithi omunekeka gwUukwaniilwa oye ngoka e hole ompango yaKalunga, nooshili ndhoka dhi li mo ohadhi gumu omutima gwe noonkondo. (Eps. 119:97) Uuna tatu ilongo ooshili dhOmbiimbeli pethimbo lyekonakono lyopaumwene, ohashi hwameke omitima dhetu nokuhumitha komeho uulaadhi wetu. Ohole yokuhola Omugandji gwooshili ndhoka nehalo lyetu okupopya nayalwe kombinga yonkundana ombwanawa ohayi tu inyengitha tu hambelele Kalunga nokuhempulula edhina lye montaneho. (Heb. 13:15, OB-1954) Ngele otatu uvitha onkundana ombwanawa nomutima aguhe, otashi ulike kutya otwe yi lenga shili.
3. Ombepo yaKalunga ohayi nwetha mo ngiini uukalele wetu?
3 Galikana wu pewe ombepo yaKalunga: Ihatu pondola koonkondo dhetu yene muukalele. Opo tu kale aalaadhi, otwa pumbwa ombepo yaKalunga yi kunguluke nopwaahe na omangambeko monkalamwenyo yetu. (1 Pet. 4:11) Ngele tatu hedha popepi nOnzo ‘yoonkondo oonenenene,’ otashi ke tu koleka pambepo tu gandje uunzapo nuulaadhi. (Jes. 40:26, 29-31) Omuyapostoli Paulus sho a li a taalelwa komaudhigu muukalele we, ‘Kalunga okwa li e mu kwatha.’ (Iil. 26:21, 22) Ombepo ondjapuki yaJehova otayi vulu oku tu kwathela tu kale twa hwama muukalele wetu. Onkee ano, otu na okupula megalikano tu yi pewe. — Luk. 11:9-13.
4. Uulaadhi otawu vulu okweetitha iizemo iiwanawa yini, ihe otu na okukala twa kotokela shike?
4 Ngele tu na uulaadhi wa hwama okuuvitha Uukwaniilwa, olundji ohashi hwahwameke noonkondo Aakriste ooyakwetu. (2 Kor. 9:2) Uuna tu li muukalele, aantu olundji ohayi inyenge ketumwalaka ndyoka tali gandjwa nuulaadhi noneinekelo lya kola. Ihe uulaadhi wetu owu na aluhe okweendela pamwe nondjaalela nonombili. (Tit. 3:2) Otu na aluhe okutumbaleka omunegumbo nokusimaneka etokolo lye.
5. Eladhipiko lya nwethwa mo lini tu na okukambadhala okutula miilonga?
5 Tu li aauvithi yUukwaniilwa, natu kale aluhe ‘twa hwama mombepo.’ Natu kokeke uulaadhi wetu okupitila mekonakonombiimbeli lyopaumwene nokugalikana nehwamo kuJehova, ngoka ta vulu oku tu pa ombepo ondjapuki ye ndjoka tayi tu nyatipaleke. Kungeyi, otatu ka kala aalaadhi muukalele wetu ‘mombepo ondjapuki nomeinekelo lya kola.’ — 1 Tes. 1:5, OB-1954.