Iilonga yetu yokuuvitha oye endelela!
1. Pethimbo lyetu otu na okupulakena kekumagidho lyaPaulus lini?
1 “Uvitha ohapu, shi ninga neendelelo.” (2 Tim. 4:2, NW) Omolwashike ekumagidho lyaPaulus ndyoka lya simana noonkondo pethimbo lyetu? Ongiini oohapu ndhika tadhi vulu okunwetha mo onkalamwenyo yetu nosho wo yayamwe?
2. Omolwashike hatu ningi oonkambadhala dha mana mo okukonga mboka inaayu uva onkundana ombwanawa?
2 Oomwenyo dhaantu odhi li moshiponga: Aantu omamiliyona muuyuni inayu uva natango onkundana ombwanawa ndjoka tayi vulu oku ya etela ehupitho. (Rom. 10:13-15; 1 Tim. 4:16) Oyendji mboka ye na omitima dhu uka otaya adhika miitopolwa mbyoka ihaayi longwa unene. Ngele ohatu shuna ko omasiku nopomathimbo ga yooloka otashi vulika tu ka adhe mo aantu yi ili. Ngele tatu ningi oonkambadhala dha mana mo, otatu ka kala tu na eiyuvo lya yela nokatu na ondjo yombinzi. — Iil. 20:26.
3. Ongiini tatu vulu okulongitha ethimbo lyetu nawa muukalele?
3 Aakriste yomethelemumvo lyotango oya li yu ‘udha Jerusalem ashihe elongo lyawo, nonando oya li taya tidhaganwa.’ (Iil. 5:28) Mbela owa tokola toko wu “uvithile aantu ayehe evaangeli”? (Iil. 10:42) Mbela ohatu longitha nawa ethimbo lyetu uuna tu li muukalele? Ngele otwa tegelela yamwe mboka taya ningi omaishunoko, mbela ohatu longitha ngaa ompito ndjoka okupopya naamboka taya piti po?
4. Iilonga yetu yokuuvitha mbyoka ye endelela otayi tu kwathele ngiini tu kale twa tonata?
4 Natu kale twa tonata: Molwaashoka onkalelo yiinima ndjika oyi li kuunyegenyege, otu na okukala twa tonata notwa kotoka. (1 Tes. 5:1-6) Ngele ohatu popi aluhe kombinga yetegameno lyetu lyUukwaniilwa, iimpwiyu yuuyuni mbuka itayi ke tu gwilila po. (Luk. 21:34-36) Ngele tatu kaleke “momadhiladhilo,” esiku lyaJehova otashi ke tu inyengitha tu kuthe ombinga pakuudha miilonga yokuhupitha oomwenyo. — 2 Pet. 3:11, 12.
5. Okukala twa simaneka oomwenyo otashi ke tu inyengitha tu ninge shike muukalele?
5 Uuna tatu uvitha etumwalaka lyetu ndyoka lye endelela, otashi ulike kutya otu na etaloko lya fa lyaJehova kombinga yomwenyo. Jehova “ina hala, ku kale nando ogumwe ta geelwa, ihe okwa hala, aantu ayehe ye ethe uulunde wawo.” (2 Pet. 3:9; Hes. 33:11) Natu ninge oonkambadhala okupopya naantu oyendji ngaashi tashi vulika moshitopolwa shetu opo nayo ya hambelele Jehova. — Eps. 109:30.