Longa omukonakoni ‘nomwenyo gwoye’ aguhe
1. Okukwathela omukonakonimbiimbeli otashi pula shike?
1 Kakele owala kokukala ho ningi ekonakonombiimbeli ihaali faula, otashi pula oonkambadhala dha mana mo opo wu kwathele omukonakoni i iyapulile Jehova. Omuyapostoli Paulus okwa li e hole mboka a li ha longo oohapu dhaKalunga, ngaashi meme omuyamuthi ha kala e hole oyana. Otashi ka kala sho opala okukwathela aakonakoni yetu ya koke pambepo ngele tatu ya longo ‘noomwenyo dhetu’ adhihe. — 1 Tes. 2:7-9.
2. Omolwashike tu na okuulukila aakonakoni yetu ohokwe pauhandimwe, nongiini tatu vulu oku shi ninga?
2 Kala wu na ko nasha naye pauhandimwe: Sho omukonakonimbiimbeli ta tameke okutula miilonga shoka ti ilongo, eiyuvo lye otali tameke oku mu nyenyetela opo a hulithe po eendathano naamboka ihaaya simaneke omakotampango gOmbiimbeli. (1 Pet. 4:4) Otashi vulika yaandjawo ya kale kaaye na naye. (Mat. 10:34-36) Otu na oku mu kwathela pamaiyuvo moku mu ulukila ohole yashili. Omumwatate gumwe omutumwa okwa ti: “Konima ngele mwa mana ekonakono ino ya nziya. Ngele otashi vulika kala po nokupopya naye okathimbo.” Kala wi ilongekidha okukwathela omukonakoni gwoye. Pashiholelwa, mbela ito vulu oku mu dhengela ongodhi noku mu talela po ngele te ehama? Mbela ito vulu okukuutumba pamwe naye pokugongala noku mu kwathela naanona ye mpoka tashi vulika?
3. Ongiini tatu vulu okukwathela aakonakoni yetu ya mone eladhipiko kiilyo yegongalo?
3 Egongalo nalyo otali vulu okukwathela: Uuna mu li muukalele popepi negumbo lyomukonakoni gwoye, omolwashike itoo piti po puye opo a tseyathane naangoka to longo pamwe naye? Kala ho yi naauvithi ya yoolokathana, mwa kwatelwa aakuluntugongalo komukonakoni gwoye mpoka tashi vulika. Ino kakadhala okulombwela omukonakoni gwoye a kale he ya kokugongala kOshinyanga shUukwaniilwa. Shika otashi ke mu kwathela a nyanyukilwe eendathano tali tungu niilyo yegongalo mbyoka tashi vulika yi ka ninge aamwahe yopambepo. — Mark. 10:29, 30; Heb. 10:24, 25.
4. Iizemo yashike tatu ka mona omolwoonkambadhala dhetu dha mana mo?
4 Aavali mboka hayi idhipagele po okukwathela oyana pambepo ohaya kala ya nyanyukwa ngele oyana taya longele Jehova notaye ende mondjila yashili. (3 Joh. 4) Otatu ka mona enyanyu lya fa ndyoka ngele otatu kwathele aakonakoni yetu nomwenyo aguhe.