Aakalele aalaadhi oya pumbwa okugalikana nokutedhatedha
1. Oshike sha li sha kwathele Jesus a kale itaa tengauka miilonga ye?
1 Ongulohi yimwe Jesus okwa li i ipyakidhila nokwaaludha aantu nokutidha mo oompwidhuli muyo. Sho aalongwa ye ye mu mono esiku lya landula, oya ti: “Ayehe otaye ku kongo” noye mu ladhipike a tsikile niilongankondo ye. Ihe shoka inashi imba Jesus a kale i ipyakidhila niilonga ye mbyoka e endela yokuuvitha onkundana ombwaanawa. Okwe ya yamukula a ti: “Tu yeni momikunda dhopuushiinda, opo ndi uvithile mo wo, oshoka osho tuu shika nde shi endela.” Oshike sha li sha kwathele Jesus a kale itaa tengauka? Egalikano nokutedhatedha. (Mark. 1:32-39) Egalikano nokutedhatedha ohayi tu kwathele ngiini tu kale aalaadhi?
2. Opo tu kale aalaadhi muukalele, otu na okutedhatedha kombinga yashike?
2 Shoka tu na okutedhatedha kusho: Jesus okwa li e wete kutya aantu oya “hepekwa noya loloka ya fa oonzi dhaa na omusita.” (Mat. 9:36) Ngaashi Jesus, natse natu kale hatu ipula kutya aantu oya pumbwa okuuvithilwa, nokukaleka momadhiladhilo kutya ethimbo olye endelela. (1 Kor. 7:29) Otu na wo okukala hatu dhiladhila kiinenelonga yaJehova nokomaukwatya ge nosho wo kelongo lyopambepo ndyoka li na ondilo twi ilonga okuza mOohapu dhe. Aantu oyendji moshitopolwa shetu kaye na ontseyo yOmbiimbeli. — Eps. 77:11-13; Jes. 43:10-12; Mat. 13:52.
3. Uunake tu na okutedhatedha?
3 Ethimbo lyo opala nokutedhatedha: Ngaashi Jesus, yamwe ohaya tedhatedha ongula onene manga kwa tya thilu. Yalwe ohaye shi ningi kongulohi omanga inaaya ka lala. (Gen. 24:63) Otatu vulu okukonga ethimbo lyokutedhatedha, nonando otu na omaipyakidhilo ogendji. Yamwe ohaye shi ningi uuna ye li miiyenditho yaayehe. Yalwe ohaye shi ningi pethimbo lyomwiha uuna kaapu na omapiyagano gasha. Oyendji oye shi mona kutya, ngele ya tedhatedha uule wokathimbo okashona omanga inaaya ya muukalele, ohashi ya kwathele yu uvithe nuulaadhi nonomukumo.
4. Omolwashike tu na okutedhatedha?
4 Okutedhatedha pamwe negalikano otashi ke tu kwathela tu kale twa halelela okulongela Jehova, okukala twa lenga iinima yopambepo nokutsikila okuuvitha nuulaadhi. Ngele ohatu tedhatedha, otatu ka mona uuwanawa twa fa Jesus ngoka e li Omukalele dhingi gwaKalunga.