Ino kala wu na uumbanda wokuuvitha
1. Ohashi kala oshidhigu okuninga shike, nomolwashike?
1 Mbela opu na ethimbo limwe wa li wu na uumbanda wokuuvitha kosikola molwaashoka wa li wa tila okushekwa? Ngele owu na ohoni ohashi pula wu ninge oonkambadhala opo wu uvithe. Oshike tashi vulu oku ku kwathela?
2. Otu na okulongitha ngiini oondunge dhokuyoolola ngele tashi ya pokuuvitha kosikola?
2 Longitha oondunge dhokuyoolola: Nonando osikola oyo ehala lyoye li ikalekelwa lyokuuvitha, ino tegelelwa wu uvithile kehe gumwe ngaashi ho shi ningi sho tu uvitha egumbo negumbo. Longitha oondunge dhokuyoolola opo wu tseye kutya uunake wu na okupopya. (Omuuv. 3:1, 7) Oto vulu okulombwela aanasikola ooyakweni kombinga yeitaalo lyoye shi ikwatelela kutya oshike tashi kundathanwa mongulu nenge kwaashoka mwa thigilwa komulongi. Nenge ngele omunasikola omukweni e ku pula kutya omolwashike ihoo kutha ombinga miinima yontumba. Petameko lyomvula aanasikola yamwe ohaya pe omulongi iileshomwa mbyoka tayi kundathana eitaalo lyawo noku ya lombwela kutya yo Oonzapo dhaJehova. Yalwe ohaya tula iileshomwa piitaafula yawo opo aanasikola ooyakwawo ye ya pule omapulo.
3. Ongiini to vulu okwiilongekidha opo wu ka gandje uunzapo kosikola?
3 Kala wi ilongekidha: Ngele oho ilongekidha manga kuyele, shika otashi ke ku kwathela wu kale wu na uulaadhi. (1 Pet. 3:15) Kambadhala okudhiladhila komapulo ngoka tashi vulika aanasikola ooyakweni ye ku pule nankene to ke ya yamukula. (Omayel. 15:28) Ngele otashi vulika, kala ho yi kosikola nomambo ngaashi Reasoning, Young People Ask, nosho wo iileshomwa yi na ko nasha neshito opo wu vule oku ya leshela mo. Pula aavali yoye mu kwatele mo omaidheulo pethimbo lyElongelokalunga lyUukwanegumbo kombinga yaashoka to vulu oku ka popya kosikola.
4. Omolwashike wu na okutsikila nokuuvitha kosikola?
4 Kala wu na etaloko li li nawa: Ino kala ho dhiladhila kutya aanasikola ooyakweni aluhe otaye ke ku sheka uuna to popi kombinga yoshili. Yamwe otaya ka kala ye ku simaneka omolwuulaadhi woye notashi vulika ya tameke okupulakena kungoye. Ino sholola ngele opu na yamwe inaaya hala okupulakena. Jehova ota ka nyanyukilwa oonkambadhala dhoye. (Heb. 13:15, 16) Tsikila okugalikana kuye e ku kwathele wu ‘popye nuulaadhi auhe waa na uumbanda.’ (Iil. 4:29; 2 Tim. 1:7, 8) Itashi ke ku nyanyudha tuu ngele gumwe gwomaanasikola ooyakweni okwa tameke okupulakena! Otashi vulika omuntu ngoka a ninge nokuli omupiya gwaJehova.