Kala wa kotoka uuna wu li muukalele
1. Omolwashike tu na okukala twa kotoka uuna tu li muukalele?
1 “Ongoonzi mokati komambungu” aapiya yaKalunga otaya uvithile mokati ‘kaantu ya pilaala noya goyoka.’ (Mat. 10:16; Fil. 2:15) Oonkundana tadhi halutha dhi na ko nasha nomakuyunguto gaakwashigwana, omiyonena tadhi longwa kongundu yaantu, nomakwato po goombambyona ganyanyalitha otayi uvika apehe, shoka tashi ulike kutya aantu aakolokoshi otaa tsikile “okuza muuwanawa yu uka muuwinayi.” (2 Tim. 3:13) Omakotampango gOmbiimbeli geni tage ke tu kwathela tu ‘kale twa kotoka’ uuna tu li muukalele? — Mat. 10:16.
2. Oonkalo dhini hadhi vulu okuningitha aauvithi ya thige po ehala limwe e taya yi ye ku uvithile kekwawo?
2 Katuka noondunge: Omayeletumbulo 22:3 otaga tsu omuthindo kutya otu na okukala tu na oondunge, tu shi ‘okuholama’ iiponga. Kala wa tonata! Nonando pehala mpoka tatu uvithile ohapu kala shito pu na egameno, onkalo ohashi vulika yi lunduluke inaatu shi tegelela. Otashi vulika mu mone aapolisi oyendji mepandaanda nenge mu mone oongundu dhaantu tadhi ende tadhi indjipala mepandaanda. Omathimbo gamwe omunegumbo ngoka e li nawa otashi vulika e mu londodhe. Pehala lyokukala mu li pehala tamu tala omolwokatalekonawa, oshi li nawa mu ze po e tamu ka longela kehala lilwe. — Omayel. 17:14; Joh. 8:59; 1 Tes. 4:11.
3. Omayele ngoka ge li mOmuuvithi 4:9 otaga longo ngiini shi na ko nasha nuukalele wetu?
3 Kala ho longo pamwe nayalwe: Omuuvithi 4:9 ota ti ‘yaali oye vule gumwe.’ Otashi vulika wa li wi igilila okulonga ongoye awike muukalele inoo ningilwa nando oshiponga sha sha, ihe mbela ngashingeyi osho ngaa shi li ngawo natango? Momahala gamwe osho shi li ngaaka. Ihe momahala gamwe, otashi vulika kaamu kale mu li nawa nokulongwa komumwameme nenge komugundjuka oye awike egumbo negumbo, unene tuu ngele etango olya ningina. Otu shi shi nawa kutya kuume ngoka e na ko nasha ota vulu oku ku kwathela. (Omuuv. 4:10, 12) Kala to tala wu shilipaleke kutya mboka yomongundu yeni kaye li moshiponga. Ngele oto zi mo moshitopolwa, kala aluhe ho lombwele mboka tamu longo nayo.
4. Ongiini tatu vulu okushilipaleka kutya Aakriste ooyakwetu megongalo itaya gwile moshiponga?
4 Aakuluntugongalo oye na oshinakugwanithwa shokugandja omayele taga tungu ge na ko nasha noonkalo ndhoka dhi li momudhingoloko molwaashoka oyo taya ‘tonatele oomwenyo dhetu.’ (Heb. 13:17) Otu na uushili kutya Jehova ote ke tu laleka nuuyamba ngele otwa kala hatu ulike eifupipiko nohatu longele kumwe nayo tu li Aakriste. (Mika 6:8; 1 Kor. 10:12) Tu li aapiya yaJehova natu kuthe ombinga mokugandja uunzapo uuwanawa moshitopolwa shetu, ihe natu kale twa kotoka.