Dhimbulukweni aahunganeki — Jona
1. Jona okwa li e na uukwatya wuni uuwanawa?
1 Oshike hashi ya momadhiladhilo goye ngele owu uvu Jona ta popiwa? Yamwe otashi vulika ya tye okwa li omumbanda nenge e na omutima omukukutu. Ihe osha yela kutya okwa li u ulike eifupipiko, uulaadhi nombepo yeiyambo. Ongiini tatu vulu ‘okudhimbulukwa’ omaukwatya gaJona omawanawa? — Jak. 5:10.
2. Ongiini tatu vulu okuholela eifupipiko lyaJona?
2 Eifupipiko: Petameko Jona okwa li a fadhukile koshilando shilwe. Shika itashi kumitha, oshoka Aayassur oya li ya tseyikila onyanya yitilitha, na Ninive osha ka kala hashi ithanwa “oshilando oshidhipagi.” (Nah. 3:1-3) Ihe Jona okwa li u ulike eifupipiko sho a pewa egeeloputudho kuJehova e ta taamba ko oshinakugwanithwa she sho e shi peululwa. (Omayel. 24:32; Jona 3:1-3) Nonando petameko okwa li inaa hala, okwa ka gwanitha po ehalo lyaJehova. (Mat. 21:28-31) Mbela natse otwa tokola ngaa twa mana mo okuuvitha onkundana ombwanawa nonando otu pewe egeeloputudho nenge hatu longo moshitopolwa moka mu na aantu ihaaya pulakene?
3. Uunake twa pumbwa uulaadhi nombepo yeiyambo muukalele?
3 Uulaadhi neiyambo: Jona okwa li a halelela okuhupula omwenyo gwe sho etokolo lye ewinayi lya tula oomwenyo dhaathayili moshiponga. (Jona 1:3, 4, 12) Konima sho ta longo oshilonga she muNinive, okwa yi pondingandinga yoshilando, tashi vulika a li ta kongo ehala tali opalele okuuvithila epangulo lyaJehova. Onkatu ndjoka a katuka kaya li tayi ulike uumbanda, ihe otayi ulike kutya omupolofeti gwaKalunga nguka okwa li omulaadhi. (Jona 3:3, 4) Ongiini kutse kunena? Otwa pumbwa uulaadhi mboka hawu zi kuKalunga, opo tu uvithe nomukumo uuna tatu patanekwa. (Iil. 4:29, 31) Opo tu longithe ethimbo lyetu nosho wo iiniwe yetu muukalele, otwa pumbwa ombepo yeiyambo. — Iil. 20:24.
4. Omolwashike twa pumbwa okukutha ethimbo tu tedhatedhe kiiholelwa yaapolofeti yaJehova?
4 Ethimbo kehe to lesha ehokololo kombinga yagumwe gwomaapolofeti yaJehova, oto ka mona mo uuwanawa ngele owi itula monkalo ye. Ipula to ti: ‘Ando ongaye, ando ondi inyenge ngiini? Ongiini tandi vulu okuholela omaukwatya ge omawanawa monkalamwenyo yandje?’ (Heb. 6:11, 12) Iitopolwa mUukalele Wetu wUukwaniilwa womonakuyiwa otayi ka kundathana iiyilongomwa ya simana mbyoka tatu vulu okwiilonga kaapolofeti yalwe aadhiginini yaJehova.