Oshimpungu Shomapulo

◼ Omuuvithi inaa ninginithwa oku na okukala ha gongala nokuya muukalele shi thike peni, opo a kale a gwana okuninginithwa?

Okuninginithwa oku li etokolo lya simanenenena ndyoka omuntu e na okuninga. Onkee ano, omanga omuntu inaa ninginithwa oku na okukala e na ontseyo yaashoka Kalunga a tegelela kuye. Shimwe ishewe, oku na okukala u ulika nale kutya okwa tokola okukala metsokumwe niitegelelwa yaKalunga.

Aakriste otaya kumagidhwa kaaye ethe po okugongala pamwe. Onkee ano, omuuvithi inaa ninginithwa oku na okukala u ulika nale kutya ye omulaadhi ngele tashi ya pokugongala kwegongalo kehe. (Heb. 10:24, 25) Oku na okukala ha kutha ombinga pokugongala. Oku na wo okukala i inyolitha mOsikola yOkudheula Aauvithi, nonando shika itashi dhengele.

Aakriste oya pewa oshilonga shokuuvitha onkundana ombwanawa nosho wo okuninga aantu aalongwa. Onkee ano, omuuvuthi inaa ninginithwa naye oku na oku kala ha kutha ombinga muukalele manga inaa ninginithwa. (Mat. 24:14; 28:19, 20) Oku na okukala uule woomwedhi ngapi e li omuuvithi, opo a vule okuninginithwa? Omuntu oku na okupewa ethimbo lya gwana u ulike kutya ye okwiinekela Kalunga nokwa tokola toko okukala ha kutha ombinga muukalele te shi ningi pandjigilile nonuulaadhi omwedhi nomwedhi. (Eps. 78:37) Inashi pumbiwa pu pite ethimbo ele unene okuza sho a ningi omuuvithi, opo a kale a gwana okuninginithwa. Uule woomwedhi dhontumba otashi vulika dhi kale dha gwana. Oku na okukala ha lopota oowili dhi thike peni? Kapu na oowili dhokondandalunde. Aakuluntugongalo oye na okutala onkalo yomuuvithi kehe nokukala ye na ondjele moshinima shika. — Luk. 21:1-4.

Aakuluntugongalo (nenge aayakuligongalo momagongalo moka mu na aakuluntugongalo ashona lela) mboka taya ka pula omuninginithwa oye na okukala ye shi kutya aantu inaaya faathana. Oye na okulongitha oondunge dhokuyoolola uuna taya tala ngele omuntu okwa gwana okuninginithwa. Shoka ye na okukaleka momadhiladhilo osho kutya omuninginithwa oku na okukala a halelela okukala Oonzapo yaJehova. Omuninginithwa oku na okukala e na olupandu sho e na uuthembahenda wokukala te endathana nehangano lyaJehova nosho wo sho ha kutha ombinga muukalele. Aakuluntugongalo oye na okukala ye shi kutya omuntu ngoka ina koka natango pambepo noke na ontseyo ndjoka yi niwe kaauvithi aanekeka mboka ya ninginithwa nale. Ngele aakuluntugongalo oye wete kutya omuntu inaa gwana okuninginithwa oye na oku mu lombwela omatompelo gopamanyolo newi etalala, nokuninga wo omalongekidho a kwathelwe pambepo.