Oto ka ninga shike momasiku gomafudho?

Omasiku gomafudho kutya nduno ogomalongelokalunga nenge ogopashigwana ohaga kala ethimbo ewanawa okugandja uunzapo, molwaashoka aantu oyendji omo haya kala momagumbo. Omagongalo otaga ladhipikwa ga kale haga ningi omalongekidho gi ikalekelwa oku ka uvitha momasiku gomafudho. Aantu yamwe moshitopolwa otashi vulika shi kale ethimbo lyawo lyokukotha nawa momasiku ngoka. Ngele osho shi li ngawo, otashi ka kala shi li nawa ngele ethimbo lyelongekidho lyiilonga yomomapya tali lundululwa. Otamu vulu okuninga omatseyitho pOkugongala kwoPailonga mu lombwele egongalo kutya otapu ka kala omalongekidho goku ka gandja uunzapo mesiku lyefudho. Ladhipikeni ayehe mboka taya vulu ya kuthe ombinga. Otu shi shi kutya omasiku gomafudho natse omo hatu mono ethimbo lyokuvululukwa po nenge lyokuninga shika naashiyaka. Ihe omolwashike itaatu longitha ethimbo limwe muukalele? Kungawo otatu ka nyanyukilwa etalaleko ndyoka hali zi mokukutha ombinga miilonga iyapuki. — Mat. 11:29, 30.