Embo Hedha popepi naJehova otali tsikile natango okulongithwa pEkonakonombiimbeli lyEgongalo
1. Ompito yini tu na natango yoku tu kwathela tu hedhe popepi naJehova?
1 Jehova okwa hala tu hedhe popepi naye. (Jak. 4:8) Opo e tu kwathele tu shi ninge, omumvo tu uka otatu ka tsikila natango nokukonakona embo Hedha popepi naJehova pEkonakonombiimbeli lyEgongalo. Elalakano lyembo ndika olya popiwa petameko, mokatendo okatiyali, mpoka pu na okapalanyolo “Komuleshi omusimanekwa” taku ti: “Okutedhatedha nkene Jehova hu ulike uukwatya we kehe, nokutala nkene Jesus e wu ulike wo momukalo gwa gwanenena nokukala tu shi nkene tatu vulu oku wu kokeka otashi ke tu hedhitha lela popepi naKalunga.” Ngaashi twe shi mona moontopolwa dhimwe ndhoka twa konakona nale, omaukwatya gaJehova oga kundathanwa ombahu nokawawa membo ndika. Otali tu kwathele wo tu kokeke shili olupandu lwetu lwokupandula omaukwatya gaJehova.
2. Embo Hedha popepi naJehova oli okukonakonwa ngiini?
2 Nkene li na okukonakonwa: Ngoka ta kwatele komeho ota ka ninga efalomo paufupi, tashi vulika te shi ningi mokupopya etumbulo limwe nenge gaali. Embo inali popya kutya omanyolo geni ge na okuleshwa. Onkee ano, pethimbo lyEkonakonombiimbeli lyEgongalo nakukwatela komeho oye ta ka hogolola omanyolo ngoka ge na okuleshwa. Pehulilo lyoshiilongomwa kehe otapu vulu okuningwa epulo limwe nenge gaali molupe lweendululo. Membo Hedha popepi naJehova omu na okampungu ke na oshipalanyolo: “Omapulo gokutedhatedha” hoka taka ka longithwa mokweendulula ontopolwa ndjoka twa zi nokukonakona. Ngoka ta kwatele komeho ota ka pula omanyolo ngoka ge li mokampungu ga leshwe nota ka pula wo aapulakeni omapulo, opo ya vule okugandja omatyokosha gawo omolwomapulo ngoka ga gwedhwa po.
3. Oshike tu na okuninga sho embo tali konakonwa, nomolwashike tu na oku shi ninga?
3 Mona uuwanawa mokukonakona embo Hedha popepi naJehova: Kala ho ilongekidha komeho yethimbo, nonando embo owe li konakona nale. Kala ho kutha ombinga pokugongala, molwaashoka oku shi ninga otaku simanekitha Jehova notaku ku kwathele wu dhimbulukwe uuyelele mboka tawu kundathanwa. Okugandja omayamukulo ohaku etele uuwanawa mboka ye li pokugongalo. (Eps. 35:18; Heb. 10:24, 25) Oto ka hedha popepielela naJehova uuna to kala ho tedhatedha komaukwatya ge ngoka ga dhenga mbanda. (Eps. 77:11-13) Shimwe ishewe, oto ka kala wa tokola wa mana wu kale to vulika kiipango ye. Oto ka kala wo wu na omukumo gwa gwedhwa po gwokulombwela yalwe kombinga yaJehova. — Eps. 150:1-6.