Kwathela mboka inaaya tameka natango okukonakona embo Omalongo gOmbiimbeli
1. Mbela aantu ayehe ohaya taamba ko ngaa embo Omalongo gOmbiimbeli petameko? Shi yelitha.
1 Opo omuntu a ninge omulongeli gwaJehova, oku na okwiilonga omalongo ngoka ge li mOmbiimbeli. Ihe opu na aantu yamwe mboka ye li iilyo yomalongelokalunga ngoka kaage shi gopaKriste, noinaya tala ko Ombiimbeli yi li Oohapu dhaKalunga. Yalwe inayi itaala muKalunga, nolundji ohaya kala ya dhina Ombiimbeli. Iileshomwa yini tayi vulu okukwathela aantu mboka petameko haya kala inaaya hala okupewa embo Omalongo gOmbiimbeli? Omaetopo taga landula oga za kaauvithi 20 ya za miilongo ya yoolokathana.
2. Ngele gumwe okwe tu lombele kutya ini itaala muKalunga, oshike tu na okukambadhala okumona, nomolwashike?
2 Mboka inaayi itaala muKalunga: Ngele omuntu okwa ti ini itaala muKalunga, oshi li nawa wu uve kutya omolwashike. Mbela okwi itaala kutya iinima oye ya po kuyo yene? Mbela okwaahenuuyuuki hoka ku li apuhe muuyuni nosho wo iihelele yomalongelokalunga oyo ye mu ningitha a kale kee na eitaalo muKalunga? Mbela okwa za miilongo moka aantu mboka yi itaala muKalunga haya thindilwa kongudhi? Otashi vulika ita patana kutya Kalunga ke ko, ihe oku uvite owala kutya inashi pumbiwa okwiitaala muKalunga. Opo ya mone kutya omuntu ngoka okwa thikama peni aauvithi oyendji ohaya pula aantu yoludhi ndoka taya ti: “Mbela osho wa kala wi itaala ngawo?” Pulakena nawa sho ta yamukula, na ino mu kwata melaka. Uuna wa mono kutya omolwashike omuntu ini itaala muKalunga, oto ka tseya nkene to ke mu yamukula nosho wo kutya oshileshomwa shini to ke mu pa. — Omayel. 18:13.
3. Ongiini tatu vulu okuulika kutya otwa simaneka omuntu nosho wo eitaalo lye?
3 Ngele to yamukula, henuka okuningitha omuntu a kale e wete wa fa wu li ompinge netaloko lye. Eetopo limwe lya za koAmerika otali ti: “Oshi li emanguluko lyomuntu pauhandimwe okuhogolola eitaalo lye, nosha simana opo kehe gumwe a simaneke etokolo ndyoka omuntu a ninga paumwene. Onawa tu kale hatu pula aantu omapulo ngoka tage ya kwathele ya dhiladhile, yo ya vule okuthika pehulithodhiladhilo kuyo yene, pehala lyokukala tatu tamanana owala nayo.” Omutonatelishikandjo gumwe ngele a pulakene shoka omunegumbo a popi, olundji oku hole okuyamukula ta pula ta ti: “Mbela oshinima shono owe shi konakona ngaa nawa wu mone ngele opu na omikalo dhilwe?”
4. Ongiini tatu vulu okukwathela aantu yeitaalo lyOshibudha?
4 Aantu oyendji yeitaalo lyOshibudha oshitya Kalunga kaye shi shi naanaa. Aauvithi yamwe moBritania oye hole okulongitha okabroshure Lasting Peace and Happiness — How to Find Them ngele taya uvithile aantu mboka. Ngele ya ningi efalomo ohaya kundathana oshitopolwa “Is There Really a Most High Creator?” nosho wo “A Guidebook for the Blessing of All Mankind.” Konima yaashono, ohashi vulika yu ulukile omunegumbo embo Omalongo gOmbiimbeli noku mu lombwela taya ti: “Nonando ino itaala muKalunga, okukonakona Ombiimbeli oku na uuwanawa molwashono muyo omu na omayele omawanawa.” Omumwatate gumwe ngoka ta kokolondjila moAmerika moshitopolwa moka ha mu kala Aachina okwa ti: “Aantu oyendji moshitopolwa shetu oye hole okulesha. Olundji sho to shuna kuyo oho adha ya mana ko okulesha oshileshomwa ashihe. Ihe otashi vulika ya kale kaa yu uvite ko kutya okukonakona Ombiimbeli osha hala lela okutya shike. Onkee ano, ondi hole okupa aanegumbo okabroshure Onkundana ombwanawa petalelopo lyotango, molwaashoka ko oka nyolwa momukalo gomapulo nomayamukulo.” Omutonatelishikandjo gumwe ngoka e li ta longo moshitopolwa moka hamu popiwa elaka lyOshichina moAmerika okwa ti kutya oshi li tashi vulika okuulukila omunegumbo embo Omalongo gOmbiimbeli petalelopo lyotango. Ihe ino tameka okukonakona ontopolwa 1 naye ndjoka tayi popi kombinga yaKalunga, pehala lyaashono, tamekeni nontopolwa 2 ndjoka tayi popi kombinga yOmbiimbeli.
5. Omolwashike tu na okukala aaidhidhimiki uuna tatu popi naantu mboka inayi itaala muKalunga?
5 Ohashi pula ethimbo nuule, opo omuntu a kale e na eitaalo muKalunga. Onkee ano, osha simanenena tu kale aaidhidhimiki. Itashi ti kutya ngele otwa kundathana nomuntu oshikando shimwe, ota zi po i itaala kutya oku na Omushiti. Ihe mokweendela ko kwethimbo otashi vulika e ke shii itaale, nenge a tye oku uvite ko kutya omolwashike yamwe ye ya pehulithodhiladhilo kutya oku na Kalunga.
6. Oshike hashi vulu okuningitha aantu yamwe ya kale kaaye na ohokwe mOmbiimbeli?
6 Mboka kaaye na ohokwe nenge einekelo mOmbiimbeli: Aantu mboka yi itaala kutya Kalunga oko e li, olundji ihaya kala lela ye na ohokwe melongo lyOmbiimbeli, molwaashoka yo inayi itaala kutya oyi li Oohapu dhaKalunga. Aantu ya tya ngawo, otashi vulika haya kala miilongo moka kaamu na omaitaalo ngoka hagi iti ogopaKriste. Otashi vulika ya kale ya tala ko Ombiimbeli nUukwakriste kutya ekuvu nela. Nenge otashi vulika aantu ya tya ngaaka ya kale miilongo moka mu na omaitaalo ngoka hagi iti ogopaKriste ge li apuhe, nohashi vulika ya dhiladhile kutya Ombiimbeli itayi ya kwatha sha. Ongiini tatu vulu okukwathela aantu yoludhi ndono ya kale ye na ohokwe mOmbiimbeli noya tameke okukonakona embo Omalongo gOmbiimbeli?
7. Omukalo guni tatu vulu okulongitha ngoka tagu ningitha aantu ya kale ya hokwa etumwalaka lyOmbiimbeli?
7 Oshitayimbelewa shaGreka osha nyola tashi ti: “Omukalo omwaanawa okukwathela aantu mboka kaaye na ohokwe metumwalaka lyOmbiimbeli, ogwo oku yi penuna e to ya ulukile shoka shi li mo. Aauvithi oyendji oye shi ndhindhilika kutya etumwalaka lyOmbiimbeli oli na oonkondo okunwetha mo omitima dhaantu, shi vulithe kehe shimwe shoka haya popi. (Heb. 4:12) Aantu oyendji mboka ya li yu ulukilwa edhina lyaKalunga mOmbiimbeli oshe ya kwathela ya kale ya hala oku yi lesha.” Oshitayimbelewa shaIndia osha nyola sha ti: “Aantu oyendji yeitaalo lyOshihindu oye hole okupulakena kombinga yiinima ya pamba onkalamwenyo neso nosho wo keuvaneko lyOmbiimbeli lyuuyuni moka itaamu ka kala okatongo kasha.” Olundji aauvithi ohaya popi unene shoka aantu momudhingoloko tayi ipula nasho, naashoka ohashi ya pe ompito yu ulike okuza mOmbiimbeli kutya Uukwaniilwa waKalunga otawu ka ukitha iinima.
8. Oshike tatu vulu okutya tu kwathele mboka ya kenyanana Ombiimbeli she etithwa kUukwakriste?
8 Ngele omuntu okwa kenyanana Ombiimbeli she etithwa kUukwakriste, mu yelithila kutya Uukwakriste owa pengitha Ombiimbeli nosho wo omalongo gayo. Oshitayimbelewa shaIndia osha nyola sha ti: “Omathimbo gamwe otwa pumbwa okukwathela oohandimwe ya mone kutya oongeleka hadho ooyene yOmbiimbeli.” Oshitayimbelewa osha ti ishewe aantu yeitaalo lyOshihindu ohaya fuulwa koshitopolwa oshi-4 mokabroshure Elalakano longhalamwenyo olashike? Ongahelipi to dulu okushiiva kombinga yalo? shoka tashi yelitha nkene oongeleka dha kala nokuhaula Oohapu dhaKalunga noku dhi hulitha po. Omumwatate gumwe ngoka ta kokolondjila muBrazil oha pula aantu ta ti: “Mbela ino hala okumona uuyelele owundji mboka wu li mOmbiimbeli? Aantu oyendji ohaye yi konakona, noihaya kala ya tokola nale kutya otaye ki itaala shike nenge ya kale tayi ipula kutya ongeleka yontumba otayi ti shike. Otashi vulika wu ka kale wa kuminwa ontseyo ndjoka to ka mona.”
9. Omolwashike kaatu na okusa uunye ngele gumwe inaa hala okupulakena komalongo gOmbiimbeli petameko?
9 Jehova oha tala shoka shi li momutima gomuntu kehe. (1 Sam. 16:7; Omayel. 21:2) Ohe eta mboka ye na omitima dhu uka kelongelokalunga lyashili. (Joh. 6:44) Oyendji yomuyo kaya li ya longwa sha kombinga yOmbiimbeli. Yamwe oya li ye na owala ontseyo onshona yOmbiimbeli. Sho tatu ya uvithile otashi ke ya pa ompito “ya hupithwe noya tseye oshili.” (1 Tim. 2:4) Onkee ano, ngele yamwe kaye na ohokwe yokupulakena komalongo gOmbiimbeli petameko, inashi ku sitha uunye. Longitha shimwe shomiinima mbyoka yi li melaka lyeni wu penduthe ohokwe maantu ya pulakene ketumwalaka lyOmbiimbeli. Konima yethimbo, otashi vulika wu ka tameke okukundathana nayo membo Omalongo gashili gOmbiimbeli ogeni naanaa?, embo ndyoka hatu longitha okukonakona naantu Ombiimbeli.
[Oshimpungu pepandja 4]
Ngele omunegumbo okwa ti kutya ini itaala muKalunga, popya naye ngaashi tashi landula:
• Mu pula to ti: “Mbela osho wa kala wi itaala ngawo?”
• Ngele ogweitaalo lyOshibudha, longitha okabrochure Lasting Peace and Happiness — How to Find Them, epandja 9-12.
• Ngele okwi itaala kutya iinima oye ya po kuyo yene, oto vulu okulongitha uuyelele tawu landula:
Iitopolwa yo-Awake! yi na oshipalanyolo “Was It Designed?”
Okavidio The Wonders of Creation Reveal God’s Glory
Okabroshure A Satisfying Life — How to Attain It, oshitopolwa oshi-4; Was Life Created?; nosho wo The Origin of Life — Five Questions Worth Asking
• Ngele okwa kanitha eitaalo muKalunga omolwokwaahenuuyuuki nokumona iihuna, oto vulu okulongitha uuyelele tawu landula:
Ontopolwa 10 yembo Is There a Creator Who Cares About You?
Oshitopolwa 6 shokabroshure Mbela Kalunga oku na ko ngoo nasha nafye shili? noshitopolwa 6 shokabroshure Elalakano longhalamwenyo olashike? Ongahelipi to dulu okushiiva kombinga yalo?
• Ngele owu wete kutya momunegumbo otashi vulika muye mwe ya edhiladhilo kutya Kalunga oko e li, lundulukila membo Omalongo gOmbiimbeli. Otashi ka kala shi li nawa okutameka nontopolwa 2 nenge noshikundathanwa shilwe shoka tashi mu opalele.
[Oshimpungu pepandja 5]
Ngele omunegumbo ini itaala mOmbiimbeli popya naye to longitha uuyelele tawu landula:
• Ontopolwa 17 no 18 yembo Life — How Did It Get Here? By Evolution or by Creation?
• Ngele ogweitaalo lyOshihindu longitha okabroshure Why Should We Worship God in Love and Truth?
• Ngele ogweitaalo lyOshijuda longitha okabroshure Will There Ever Be a World Without War?, epandja 3-11.*
• Kundathana omakotampango gOmbiimbeli taga landula. Iileshomwa nuuvidio mboka to vulu okulongitha wu ulukile gumwe kutya Ombiimbeli oyi na omayele taga longo ongaashi:
Iitopolwa yo-Awake! “Help for the Family”
Okavidio The Bible — Its Power in Your Life
Oshitopolwa 9 no 11 shokabroshure Onkundana ombwanawa ya za kuKalunga; A Book for All People, epandja 22-26*; nosho wo oshitopolwa 2 shokabroshure A Satisfying Life — How to Attain It
Ngele omuntu ogweitaalo lyOshibudha longitha okabroshure The Pathway to Peace and Happiness, epandja 3-7.
Ngele omuntu ogweitaalo lyOshimoslema, longitha oshitoplwa 3 shokabroshure Real Faith — Your Key to a Happy Life
Uuna to uvithile moshitopolwa moka aantu kaaye hole Ombiimbeli, onawa kuu popye kutya etumwalaka lyoye olya kankamena kembo lini sigo wa ningi omaishunoko lwiikando yontumba.
• Yelitha nkene omahunganeko gOmbiimbeli ga gwanithwa. Iileshomwa nuuvidio mboka to vulu okulongitha:
Okavidio The Bible — Accurate History, Reliable Prophecy
Okabroshure A Book for All People,* epandja 27-29
• Ngele omuntu oha pula omapulo gi ili nogi ili kombinga yOmbiimbeli, lundulukila membo Omalongo gOmbiimbeli.
[Oshimpungu pepandja 6]
Shoka to vulu okutya uuna omunegumbo a ti: “Inandi itaala muKalunga.”
• “Mbela nandi ku kuthile ko paufupi sho sha tompa ndje ndi itaale kutya oku na Omushiti?” Ngele okwa ti oshi li nawa mu ulukila iitsa yontumba membo Reasoning epandja 84-86, nenge wu ninge omalongekidho wu mu etele iileshomwa mbyoka ya li yi hokitha sho to yi lesha.
• Oto vulu oku mu pula to ti: “Andola okwa li ku na Kalunga, ando owa hala mbela a kale e na omaukwatya ga tya ngiini?” Oyendji ohaya yamukula taya ti kutya oya hala a kale omunahole, omuuyuuki, omunahenda nokukala kee na okatongotongo. Mu ulukila mOmbiimbeli kutya Kalunga oku na omaukwatya ngoka. (Uuna tashi vulika onawa wu longithe ontopolwa 1 yembo Omalongo gOmbiimbeli, to tameke nokatendo 6.)
Shoka to vulu okutya uuna omunegumbo a ti: “Inandi itaala mOmbiimbeli.”
• “Haangoye awike, ihe opu na aantu oyendji yu uvite ngaaka. Yamwe ohaya ti kutya Ombiimbeli itayi tsu kumwe nuunongononi nenge kutya omayele gayo oga kulupa. Pitika ndje ndi ku pule: Mbela Ombiimbeli owe yi lesha nale? [Tegelela a yamukule. Mu ulukila efalomo pepandja 3 lyokabroshure A Book for All People. Ke mu pa nenge wu ke mu pilintile okuza ko-Watchtower Library.] Aantu oyendji oya dhina Ombiimbeli omolwomalongelokalunga ngoka ga pengitha elongo lyayo. Oshikando tashi ya onda hala ndi ye ndi ku ulukile oshiholelwa shoka shi li pepandja 4 ne 5.”
• “Opu na aantu oyendji ye na etaloko lya fa lyoye. Ino hala mbela ndi ku ulukile shoka sha li sha kumitha ndje kombinga yOmbiimbeli. [Lesha Job 26:7 nenge Jesaja 40:22, wu mu ulukile kutya Ombiimbeli oya popya paushili iinima yopaunongononi.] Ombiimbeli oyi na wo omayele ge li pandunge ngoka taga kwathele aanamagumbo. Oshikando tashi landula onda hala ndi ku ulukile oshiholelwa shontumba.”
• “Onda pandula sho inoo holeka ndje oshinima shoka. Nandi ku pule: Andola Kalunga okwa nyolelele aantu embo lyasha, ando sho to tala otali ka kala lya kwatela mo shike?” Opo ihe ulukila omuntu okuza mOmbiimbeli shoka tashi tsu kumwe nedhiladhilo lye.