◼ Ethimbo lyoshigongi: Omusika ndjoka hayi tetekele omutumba otayi ka tameka po 9:00 gwongula omasiku agehe gatatu. Pethimbo ndyoka, atuheni natu kuutumbeni opo opolohalama yi tameke momukalo tagu simanekitha. Eimbilo lyahugunina negalikano otali ka tameka lwopo 4:25 komatango mEtitano nomOlyomakaya, nomOsoondaha lwopo 3:20 komatango.
◼ Iigongi yopaigwana: Miilongo yimwe otamu ka kala iigongi yopaigwana, notu na oku shi kaleka momadhiladhilo kutya oshitayimbelewa osha hiya omagongalo gontumba nosho wo aantu ya za kiilongo yilwe konima sho sha yalula iipundi, ehala lyopaakinga, nosho wo omahala ngoka ge li po moohotela. Ngele aauvithi oya yi koshigongi shopaigwana hoka inaaya hiywa, otashi vulika shi ka udhe sha pitilila. Ngele omolwonkalo yontumba to pumbwa okuya koshigongi shilwe kaashi shi shegongalo lyeni, ino hogolola po oshigongi shopaigwana.
◼ Opaakinga: Pomahala agehe giigongi mpoka opaakinga yi li metonatelo lyetu, iiyenditho otayi ka thikama nopwaahe na okufuta nomelandulathano shi ikolelela kwaangoka e ya tango. Molwaashoka olundji oopaakinga odha ngambekwa, osheenditho kehe nashi kale shi na aantu ya gwana ngele otashi vulika.
◼ Omahala gokulala: Aauvithi mboka ya pumbwa omahala gokulala oye na okuudhitha ofooloma yedhina Special Needs Room Request (CO-5a) ya kongelwe. Okomitiye yIilonga yEgongalo oyi na okutala ngele aauvithi oya gwanitha po iitegelelwa, taya landula omalombwelo ngoka ge li mofooloma moka nosho wo montumwafo yo 27 Kotoba 2013, ndjoka ya li ya nyolelwa olutu lwaakuluntugongalo. Omahala otaga kongelwa owala aauvithi mboka ye na edhina ewanawa noyana mboka hayi ihumbata nawa.
◼ Okuyaleka omahala: Uuna omiyelo dhehala lyoshigongi dha patululwa ongula kehe, alikana ino endelela wu ka yaleke omahala ngoka wa hala okukuutumba wa fa to ningi shanamutango nayakweni. Ombepo yeiyambo ndjoka hayi tu inyengitha tu pitithe komeho uuwanawa wayalwe ohayi tu dhimbululitha mo tu li Aakriste yashili nohayi inyengitha aakalipo ya tange Kalunga. (Joh. 13:34, 35; 1 Kor. 13:4, 5; 1 Pet. 2:12) Omahala gokukuutumba otaga vulu owala okuthigilwa mboka we ya pamwe nayo mosheenditho shimwe nenge mboka mu li nayo megumbo limwe nosho wo aakonakonimbiimbeli yoye. Opu na iipundi yi ikalekelwa ya nuninwa aakokele naamboka kaaye na uukolele. Molwaashoka iipundi mbika oya ngambekwa, omuntu owala gumwe nenge yaali taya vulu okukuutumba po mboka taya ambidhidha omukokele nenge ngoka kee na uukolele taya vulu okukuutumba naye.
◼ Omwiha: Etelela omwiha gwoye opo kuu ka thige po ehala lyoshigongi pethimbo lyomwiha wu ka konge iikulya. Oto vulu okulongitha okandjato okashona kokukaleka iinima ya talala hoka taka vulu okutulwa kohi yoshipundi shoye. Oondjato oonene dhokukaleka iinima ya talala odhi na okutulwa pehala mpoka tamu ulukilwa kaayakuli. Iikwatelwa yiikwamakende niikolitha inayi pitikilwa mehala lyoshigongi.
◼ Omayambidhidho: Otatu vulu okuulika kutya otwa pandula elongekidho lyoshigongi mokugandja nehalo ewanawa omayambidhidho giilonga yeuvitho muuyuni awuhe poshigongi. Ngele owa hala okuyambidhidha notyeke, nyola ko “Christian Congregation of Jehovah’s Witnesses of Namibia.” Iigongi oyindji otayi ka taamba omayambidhidho ngoka taga ningwa nuukalata wombaanga.
◼ Omiti: Ngele owu na omiti we dhi pewa kundohotola, etelela dha gwana, molwaashoka pehala lyoshigongi itadhi ka kala po. Oonane dhoowenda ndhoka hadhi longithwa kwaamboka ye na uuvu wosuuka, nadhi ekelwehi momukalo moka dhi na okweekelwahi, ihe inadhi ekelwahi moondoloma dhiiyagaya poshigongi nenge pohotela, molwaashoka odha nika oshiponga.
◼ Okuyanda iiponga: Kaleka momadhiladhilo oonkalo ndhoka tadhi vulu okuthenenukitha omuntu nenge oku mu hata po. Omumvo kehe ohapu holoka iiponga mbyoka hayi etithwa koongaku, unene tuu ootyookola. Oshi li nawa okuzala oongaku ndhoka to vulu okweenda nadho kootalapa nenge pomilondo nosho tuu.
◼ Uutemba waanona niipundi hayi tonywa: Uutemba mboka niipundi hayi tonywa kayi na okweetwa mehala lyoshigongi. Ihe uupundi wokukuutumba aanona ya mangelwa mo owa pitikwa okukala wa mangelwa koshipundi ontega naavali.
◼ Omagadhi gokwiishasha: Iigongi oyindji ohayi ningilwa momahala ngoka kaage na omakende nohamu longithwa owala omashina gokugandja ombepo. Onkee ano, oshi li nawa kaatu longithe omagadhi gokwiishasha nogokugwaya nakehe shimwe shi na ezimba li na oonkondo ndyoka tali vulu okuninga nayi mboka ye na uupyakadhi wokufudha nenge omaupyakadhi galwe. — 1 Kor. 10:24.
◼ Ofooloma hayi ithanwa Please Follow Up (S-43): Ofooloma ndjika oyi na okulongithwa okugandja uuyelele kombinga yakehe ngoka u ulika ohokwe sho a pewa uunzapo wontukuluka pethimbo lyoshigongi. Oofooloma ndhoka dhu udhithwa odhi na okugandjwa pondunda yomambo nenge kuamushanga gwegongalo ngele wa galuka koshigongi.
◼ Oorestolanda: Simanekitha edhina lyaJehova mokwiihumbata nawa poorestolanda. Natu zale momukalo ngoka tagu opalele omukalele Omukriste. Gandja olupandu lwokamaliwa pomahala mpoka shi li omukalondjigilile.
◼ Iilonga yOkwiiyamba: Kehe ngoka a hala okwiiyamba na ye kOshikondo shIilonga yOkwiiyamba poshigongi. Aanona mboka ye li meni lyoomvula 16 nayo otaya vulu okukwathela poshigongi taya longo metonatelo lyaavali nenge lyaatekuli yawo nenge lyaakuluntu yalwe ngele oya pewa epitikilo kugumwe gwomaavali.