Auguste otagu ka kala omwedhi gwiilonga mondjokonona!

1. Oshikonga shini shi ikalekelwa tashi ka ningwa muuyuni awuhe sho Uukwaniilwa wu li popepi nokugwanitha oomvula 100?

¹ Uukwaniilwa waKalunga owu li popepi nokugwanitha oomvula 100. Itashi ka kala tuu shi li mondjila tu simanekithe Jehova okupitila moshikonga shi ikalekelwa! MuAuguste otatu ka kutha ombinga mokwaandjaganeka okatraktate okape muuyuni awuhe, hoka ke na oshipalanyolo Openi tatu vulu okwaadha omayamukulo gomapulo ga simanenena monkalamwenyo? Okatraktate haka otaka ladhipike aaleshi ya tale omayamukulo mOmbiimbeli notaka yelitha nkene o-jw.org tayi vulu oku ya kwathela.

2. Ongiini tatu vulu okukutha ombinga ‘meigidho lyopombanda lyokuhambelela Jehova’ ndyoka tali ka igidhwa pombandeelela muAuguste?

² Eigidho lyopombanda lyokuhambelela: Opo aauvithi ya kwathelwe ya tamunune mo uukalele wawo, opwa longekidhwa esiloshimpwiyu li ikalekelwa lyaamboka ya hala okukutha uukwathelikokolindjila momwedhi gwaAuguste. Momwedhi ngoka, aauvithi ya ninginithwa otaya ka pitikilwa ya kuthe uukwathelikokolindjila woowili 30 ndhoka odho dhi li oshitegelelwa. Molwaashoka Auguste oku na Omatitano, Oolyomakaya nOosondaha ntano, aauvithi oyendji mboka haya longo iilonga yokwiikongela omboloto nenge haya yi kosikola mokati koshiwike otaya ka vula okukutha uukwathelikokolindjila. Ngele owu na omukonakonimbiimbeli ta humu komeho nenge okanona hoka ka hala okuninga okauvithi, popya nomuunganeki gwolutu lwaakuluntugongalo nziya. Itashi ka kala tuu etsomukumo kwaamboka taye ke tu wayimina ye li aauvithi momwedhi nguka omundhindhilikwedhi! Nonando aakokolindjila yondjigilile oyendji ohaya kutha efudho momwedhi nguka konima sho ya gwanithwa po oowili dhawo ndhoka dhi li oshitegelelwa shokomumvo, otashi vulika ya ninge elunduluko momaipyakidhilo gawo opo ya kale ye na ombinga pakuudha moshikonga shika shi ikalekelwa. Ngashingeyi olyo ethimbo komaukwanegumbo ga kundathane kombinga yankene taga ka kutha ombinga ‘meigidho lyopombanda lyokuhambelela Jehova’ ndyoka tali ka igidhwa pombanda muAuguste. — Esra 3:11, yelekanitha NW; Omayel. 15:22.

3. Etegameno lyashike tu na shi na ko nasha noshikonga shika shi ikalekelwa?

³ Nonando otwa kutha nale ombinga miikonga ya faathana monakuziwa, otu na etegameno kutya shika itashi ka dhimbiwa pandjokonona. Mbela itatu vulu okwaadha oshitsa shopombanda oshipe shoowili, shaauvithi, nosho wo shaakwathelikokolindjila momwedhi gwaAuguste? Sho tatu thiki pehulilo lyomumvo gwiilonga 2014, Jehova na laleke nuuyamba oonkambadhala dhoshigwana she kombanda yevi muuyuni awuhe opo shi ninge omwedhi gwaAuguste gu kale omwedhi omundhindhilikwedhi gwokuuvitha. — Mat. 24:14.