Nkene tatu vulu okuhwepopaleka uunkulungu wetu muukalele — Dheula aauvithi aape

Omolwashike sha simana?: Aalongwa yaJesus aape oye na okwiilonga okudhiginina ‘iinima ayihe’ mbyoka e ya lombwela. Shimwe shomuyo, okulonga yalwe oshili yOmbiimbeli. (Mat. 28:19, 20) Aantu oyendji mboka aape oyi inyolitha nale mOsikola yOkudheula Aauvithi. Otashi vulika ya tameka nale okuuvithila aakwanezimo yawo, noya hala okuninga aauvithi. Oshike hashi yi inyengitha? Ohole yawo yaashoka yi ilonga, ndjoka tayi koko muyo, nontseyo yokutseya kutya Jehova okwa hala aantu ayehe yu uve onkundana ombwanawa. (Rom. 10:13, 14) Konima ngele omuntu a ningi omuuvithi inaa ninginithwa, okwa pumbwa okudheulwa nawa, opo a kwathelwe a kale e na omukumo sho a katuka onkatu ndjoka ya simanenena monkalamwenyo ye. — Luk. 6:40.

Nkene tatu vulu oku shi ninga:

Kwathela omuuvithi omupe a kale niileshomwa mbyoka a pumbwa sho tu uvithile aantu noku ya longa. Mu ulukila nkene ho unganeke nawa ondjato yoye yuukalele. Mu yelithila elalakano lyoshileshomwa kehe wu na.
Longitha oshiholelwa shimwe shefalomo okuza mUukalele Wetu wUukwaniilwa, e tamu iyenditha po naye. Mu kwathela nkene e na oku shi popya niitya ye mwene. Iyendithii po piinima mbyoka ya ha unene moshitopolwa sheni, membo Ofikola yOukalele, pepandja 82. Mu kwathela a kale ha zala nawa nokwiiyopaleka wo. — 2 Kor. 6:3, 4.
Tsikila nokudheula omuuvithi omupe. Mu ulukila iinima tayi landula: Okakalata koshitopolwa nonkene e na okuninga omandhindhiliko mokambo ke, nenge moshikwaelektronika she. Na kale e shi okunyola uuyelele womuntu ngoka e na ohokwe, nokulongitha okambo Good News for People of All Nations nepandja lyetu, jw.org, muukalele. Mu ulukila nkene e na okukwathela mbo ye na ohokwe. — 1 Kor. 3:6.
Kala omwiidhidhimiki noho pandula. (Omayel. 25:11) Tulila po omuuvithi omupe oshiholelwa oshiwanawa. Uulaadhi woye nohokwe ndjoka to mu ulukile otayi ke mu nwetha mo nawa sho omimvo tadhi humu komeho.

Kambadhala wu shi ninge momwedhi ngu:

Longa pamwe nomuuvithi omupe egumbo negumbo. Inda pamwe naye komaishunoko goye nokaakonakonimbiimbeli yoye. Ongiini ngele megongalo lyeni kamu na omuuvithi omupe? Oto vulu okuninga oshilage mu ka longe pamwe nomuuvithi ngoka inaa pyokoka nawa.