Longitha uuvidio sho to konakona naakonakonimbiimbeli yoye

Iinima mbyoka aantu haya kala ye wete, ngaashi uuvidio nomathano ohayi ya ningitha ya gandje eitulomo kuyo. Ohayi ya kwathele yu uve ko shoka tayi ilongo noye shi dhimbulukwe. Jehova, Omulongi gwetu a shiga ko, okwa li e yi longitha a longe aantu iinima ya simana. (Gen 15:5; Jer 18:1-6) Omulongi dhingi, Jesus, naye okwa li e yi longitha. (Mat 18:2-6; 22:19-21) Kunena, uuvidio owo shimwe shomiinima mbyoka hayi pondola noonkondo mokulonga aantu. Mbela oho wu longitha ngaa uuna to konakona naakonakonimbiimbeli yoye?

Opwa longekidhwa uuvidio 10 wu tu kwathele uuna tatu konakona naantu iileshwa yomokambo Onkundana ombwanawa ya za kuKalunga. Konyala oshipalanyolo shokavidio kehe osha pambathana nalimwe lyomomapulo ngoka ga luudhikwa mokambo. Mokambo hoka ke li kointaneta omu na oolinka ndhoka tadhi tu kwathele tu mone kutya oposhileshwa shini tu na okudhana okavidio. Shimwe ishewe, opu na uuvidio wulwe mboka tawu gandja uuyelele wa gwedhwa po, wa za miileshomwa yetu yilwe mbyoka hatu longitha tu longe aantu.

Mbela otamu ka kundathana oshinima shontumba mOmbiimbeli shoka omukonakoni gwoye tashi vulika a ka nyengwe okuuva ko? Nenge mbela omukonakoni gwoye okwa taalela eshongo lyontumba? Konga uuvidio ko-jw.org® nokopolohalama yetu yotiivii JW® wu mone okavidio hoka take mu kwathele. Otamu vulu oku ka tala pamwe e tamu ka kundathana.

Omwedhi kehe ohapu piti uuvidio uupe. Ngele to wu tala, kala ho dhiladhila kunkene to vulu oku wu longitha uuna to longo yalwe Ombiimbeli.