Oolye ookuume koye komakwatathano gopaintaneta?

Kuume ota fatululwa kutya “omuntu ngoka mwa mangelwa kumwe kohole nenge mwa simanekathana lela.” Pashiholelwa, Jonatan naDavid oya li ya panga uukuume wa kola, konima sho David a dhipaga Goliat. (1Sam 18:1) Ayehe yaali oya li ye na omaukwatya ngoka tage ya ningitha ya kale yi inekelathana. Onkee ano, uukuume mboka wa kolelela owa kankamena kontseyo yashili. Olundji opo wu tseye omuntu gwontumba, ohashi pula ethimbo noonkambadhala. Nonando ongawo, aantu ohaya vulu okupanga “uukuume” komakwatathano gopaintaneta mepathimo ashike lyeho. Molwaashoka aantu komakwatathano gopaintaneta ohaya vulu okuninga oompangela dhaashoka taya ka popya nokuningitha yalwe ye ya tale ko nawa, ohashi kala oshipu kaaya holole nkene lela ya tya. Onkee ano, oshi li nawa wu kale wa kotoka, uuna to tala kutya oolye wa hala ya kale ookuume koye. Kala wa manguluka okutinda okupanga uukuume naantu mboka kuu shi nawa. Yamwe oya tokola nokuli kaaya longithe omakwatathano gopaintaneta, nelalakano lyokuyanda iiponga ya kwata miiti. Ihe ngele owa tokola okulongitha omakwatathano gopaintaneta, oshike wu na okukaleka momadhiladhilo?

TALA OKAVIDIO KOTOKELA OMAKWATATHANO GOPAINTANETA, E TO YAMUKULA OMAPULO TAGA LANDULA:

• 

  Oshike wu na okukaleka momadhiladhilo, manga inoo ninga etyokosha nenge inoo tula ko omathano?

• 

  Omolwashike wu na okuhogolola pandunge ookuume koye komakwatathano gopaintaneta?

• 

  Omolwashike wu na okungambeka ethimbo lyoye lyokukala komakwatathano gopaintaneta? — Ef 5:15, 16