Oshikonga shi ikalekelwa shokutameka omakonakonombiimbeli muSeptemba

MuSeptemba, otatu ka longa nuudhiginini tu ninge omakonakonombiimbeli naamboka tatu tsakaneke, tatu longitha okambo Kala nonkalamwenyo ombwanawa sigo aluhe. Aauvithi otaya vulu okuhogolola ya kuthe uukwathelikokolindjila, mboka hawu pula owala oowili 30. Ongiini tatu ka kutha ombinga moshikonga shika shi ikalekelwa?

• Petalelopo lyotango: Longitha uuyelele mboka wu li konima yokambo, opo wu ningithe omuntu a kale e na ohokwe, e to kambadhala okuninga ekonakonombiimbeli. Inda wo kwaamboka ya li yu ulika ohokwe nale, mwa kwatela nomaishunoko. Nonando otashi vulika ya li inaaya hala okukonakona monakuziwa, ngashingeyi otashi vulika ya kale ye na ohokwe mokambo nomomukalo omupe gwokukonakona. Inatu pumbwa okuthiga okambo pomagumbo ngoka kaage na aantu nenge tu ka tume pamwe noontumwafo kwaamboka ya li inaaya ulika ohokwe. Okomitiye yIilonga yEgongalo otashi vulika yi longekidhe okugongala kwa gwedhwa po kwiilonga yomomapya momwedhi ngoka.

• Poompito dhilwe: Ngele egongalo lyeni ohali longitha uutemba wiileshomwa, tulii mo okambo Kala nonkalamwenyo ombwanawa sigo aluhe. Tseyithila mboka taya ulike ohokwe kutya ohatu konakona naantu oshali mokambo hoka. Yu ulukila paufupi nkene hashi ningwa nenge wu ninge elongekidho mu shi ninge lwanima. Omutonateli gwiilonga ota vulu okuninga omalongekidho, opo aauvithi mboka ya pyokoka ya ye moongeshefa ndhoka dhi li moshitopolwa, ya ka ninge omakonakonombiimbeli. Oto vulu wo okutameka ekonakonombiimbeli naaniilonga pamwe nangoye nenge naantu mboka to tsakaneke, sho to gandja uunzapo wontukuluka.

Jesus okwe tu lombwela tu ‘ninge aantu aalongwa’ tse tu “ya longe.” (Mat 28:19, 20) Oshikonga shika shi ikalekelwa nashi tu kwathele tu gwanithe po oshilonga shoka, tatu longitha okambo Kala nonkalamwenyo ombwanawa sigo aluhe.