Holathaneni nomwenyo aguhe

1. Oshipango shokondandalunde shini Jesus a li a pe aalongwa ye? (Tala ethano lyokombanda.)

ONGULOHI ndjoka ya tetekele eso lye, Jesus okwa pe aalongwa ye oshipango shokondandalunde. Okwe ya lombwele a ti: “Ngaashi naanaa nangame nda kala ndi mu hole, osho nane wo omu na okuholathana.” Opo nduno okwa gwedha ko a ti: “Ngele omu holathane, nena aantu ayehe otaa ka dhimbulula kutya one aalongwa yandje.” — Joh. 13:34, 35.

2. Omolwashike sha simana okuulukilathana ohole?

² Jesus okwa ti kutya aalongwa ye otaya ka dhimbululwa mo, ngele oya kala ye hole yalwe ngaashi ye a li e shi ningi. Oohapu ndhoka odha li dha longo methelemimvo lyotango, notadhi longo wo nokunena. Inashi simana tuu tu kondjithe eshongo kehe notu ulukilathane ohole!

3. Oshike tatu ka kundathana moshitopolwa shika?

³ Okwaagwanenena kwetu, ohaku shi ningitha oshidhigu tu kale tu holathane nomutima aguhe. Nonando ongawo, otwa pumbwa okukambadhala tu holele Kristus. Moshitopolwa shika, otatu ka kundathana nkene ohole hayi tu kwathele tu kale aakondjeli yombili, kaatu na okatongo nohatu yakula yalwe. Sho to konakona oshitopolwa shika, ipula to ti: ‘Oshike tandi vulu okwiilonga kaamwatate naamwameme mboka ya kala nokutsikila okuulukila yalwe ohole, nonando kasha li oshipu?’

KALA OMUKONDJELI GWOMBILI

4. Shi ikolelela kuMateus 5:23, 24, omolwashike tu na okupanga ombili nomumwatate nenge nomumwameme ngoka twa ningathana naye?

⁴ Jesus okwe tu longa nkene sha simana okupanga ombili nomumwatate nenge nomumwameme ngoka twa ningathana naye. (Lesha Mateus 5:23, 24.) Okwa tsu omuthindo kutya otwa pumbwa okukala tu na ekwatathano ewanawa nayalwe, ngele otwa hala okukala twa hokiwa kuKalunga. Jehova oha kala a nyanyukwa, uuna tatu ningi ngaashi tatu vulu tu pange ombili nooitaali ooyakwetu. Ita ka taamba ko oku mu longela kwetu, ngele otwa kala tu nine yalwe onkone noinatu hala nokuli okukambadhala tu pange ombili nayo. — 1 Joh. 4:20.

5. Oshike sha li she shi ningitha oshidhigu komumwatate gumwe a pange ombili namukwawo?

⁵ Otashi vulika shi kale oshidhigu kutse okupanga ombili nayalwe. Omolwashike? Natu ka taleni kwaashoka sha li sha ningilwa Mark.b Okwa li lela a yemata, sho omumwatate gumwe e mu pe uusama noku mu popila muuwinayi kuyalwe megongalo. Mark okwa li i inyenge ngiini? Ota ti: “Onda li nda geye, e tandi mu ula nayi.” Ihe lwanima, Mark okwi ipe uusama, e ta kambadhala okupa ombili omumwatate ngoka nokukala naye nombili ishewe. Ihe omumwatate ngoka okwa tindi. Petameko, Mark okwa li a dhiladhila ta ti: ‘Omolwashike ndi na okukala tandi kambadhala okupanga ombili naye, ngele ina hala?’ Nonando ongawo, omutonatelishikandjo gwawo okwa li e mu ladhipike kaa teke omukumo. Mark okwa ningi po shike?

6. (a) Ongiini Mark a li a lalakanene ombili? (b) Mark okwa li a tula ngiini miilonga Aakolossa 3:13, 14?

⁶ Sho Mark a lundulula okudhiladhila kwe, okwa mono kutya ka li e na eifupipiko nokwa li i itala ko omuyuuki. Okwe shi dhimbulula mo kutya okwa pumbwa okulundulula iikala ye. (Kol. 3:8, 9, 12) Opo nduno, okwi ifupipike nokwa yi ishewe komumwatate ngoka, e te mu pe ombili, omolweihumbato lye. Mark okwa li wo e mu nyolele oontumwafo, te mu pe ombili noku mu pula ya kale ishewe ye na ekwatathano ewanawa. Okwa li wo e mu pe omagano gontumba, ngoka a li e wete kutya omumwatate ngoka ote ke ga panda. Shiyemateka, omumwatate ngoka okwa tsikile owala okukala e mu kwatela onkone. Nonando ongawo, Mark okwa tsikile okuvulika koshipango shaJesus shokukala e hole omumwahe nokukala ha dhimine po yalwe. (Lesha Aakolossa 3:13, 14.) Nonando yalwe oya tsikile okukala inaaya hala okupanga ombili natse, ohole yashili yopaKriste otayi ke tu kwathela tu tsikile oku ya dhimina po nokugalikana ya kale ishewe ye na ombili natse. — Mat. 18:21, 22; Gal. 6:9.

7. (a) Jesus okwe tu ladhipika tu ninge shike? (b) Omumwameme gumwe okwa li a taalele onkalo yini ondhigu?

⁷ Jesus okwe tu ladhipika tu kale hatu ungaunga nayalwe momukalo moka twa hala tu ungaungiwe natse. Okwa gwedha ko a ti kutya katu na owala okukala tu hole mboka ye tu hole. (Luk. 6:31-33) Nonando haaluhe hashi ningwa, ongiini ngele gumwe megongalo ohe ku yanda noihe ku popitha? Shoka osho sha li sha ningilwa Lara. Ota ti: “Omumwameme gumwe okwa kala ha henuka ndje, nokanda li ndi shi kutya omolwashike. Shoka osha li sha uvitha ndje lela nayi nokanda li handi nyanyukilwa okuya kokugongala.” Petameko, Lara okwa li e na eipopilo lyokutya: ‘Epuko kali shi lyandje. Shimwe ishewe, yalwe megongalo oye mu shi kutya osho e li ngawo.’

8. Lara okwa li a ningi po shike, opo a pange ombili nomumwameme omukwawo, noshike tatu vulu okwiilonga mo moshimoniwa she?

⁸ Lara okwa li a katuka oonkatu a pange ombili nomumwameme ngoka. Okwa galikana Jehova, e ta tokola a ka popye naye. Oya popi kombinga yuupyakadhi mboka wa li pokati kawo, oyi ipapatele nokupanga ombili. Ekwatathano lyawo olya li tali monika lya fa li li nawa. Lara ota ti: “Ihe lwanima, omumwameme ngono okwa kala ishewe ti ihumbatele ndje nayi ngaashi nale. Shoka osha li lela sha teya ndje omukumo.” Petameko, Lara okwa li e uvite kutya ota vulu owala okukala a nyanyukwa, ngele omumwameme ngoka okwa lundulula iikala ye. Ihe mokweendela ko kwethimbo, Lara okwe shi mono mo kutya oshinima sha simana ta vulu okuninga, okutsikila okuungaunga nomumwameme ngoka pahole noku mu ‘dhimina po tashi zi komutima.’ (Ef. 4:32–5:2) Lara okwa li a dhimbulukwa kutya ohole yashili yopaKriste “ihayi dhimbulukwa uuwinayi ye u ningilwa. Ohole ihayi tonyala, ihe otayi itaale, tayi tegamene e tayi idhidhimike sigo okehulilo.” (1 Kor. 13:5, 7) Lara okwa vulu ishewe okukala e na ombili yopamadhiladhilo. Mokweendela ko kwethimbo, omumwameme ngoka okwa kala e na ombili naye. Ngele owa kala to lalakanene okukala wu na ombili naamwatate naamwameme nokutsikila okukala wu ya hole, oto vulu okukala wu na uushili kutya “Kalunga kohole nokombili ota kala pamwe [nangoye].” — 2 Kor. 13:11.

INO KALA WU NA OKATONGO

9. Shi ikolelela kIilonga 10:34, 35, omolwashike inaatu pumbwa okukala tu na okatongo?

⁹ Jehova ke na okatongo. (Lesha Iilonga 10:34, 35.) Uuna kaatu na okatongo, ohatu ulike kutya tse oyana. Ohatu vulika koshipango shoka tashi ti otu na okukala tu hole aantu ooyakwetu ngaashi tu ihole tse yene, nohatu kaleke po ombili pokati ketu naamwatate naamwameme. — Rom. 12:9, 10; Jak. 2:8, 9.

10-11. Omumwameme gumwe okwa ningi po shike, opo kaa kale we e na etaloko ewinayi?

¹⁰ Okukala kaatu na okatongo, otashi vulika shi kale oshidhigu kuyalwe. Pashiholelwa, natu taleni kwaashoka sha li sha ningilwa omumwameme Ruth. Sho a li omugundjuka, okwa li a ningilwa oshinima oshiwinayi komuntu gwokoshilongo shilwe. Osha li she mu gumu ngiini? Ruth ota ti: “Onda tameke okukala ndi tonde kehe shimwe kombinga yoshilongo shoka. Onda li tandi dhiladhila kutya aantu ayehe yokoshilongo hoka oya faathana, mwa kwatelwa nokuli aamwatate naamwameme.” Ruth okwa etha po ngiini etaloko ndyoka ewinayi?

¹¹ Okwa li e shi mono kutya oku na okukondjitha omadhiladhilo ngoka omawinayi. Okwa lesha iimoniwa noolopota mo-Yearbook (embo lyokomumvo) kombinga yoshilongo shoka. Ota ti: “Onda ningi oonkambadhala ndi kale ndi na etaloko ewanawa kombinga yaantu yokoshilongo hoka. Onda tameke oku shi dhimbulula mo kutya aamwatate naamwameme yaahoka, ohaya longele Jehova nuulaadhi. Osha yelele ndje kutya nayo oye li oshitopolwa shuumwayinathana womuuyuni awuhe.” Lwanima, Ruth okwa li e shi mono mo kutya okwa pumbwa okuninga oshindji. Okwa ti: “Uuna nda tsakanene naamwatate naamwameme yokoshilongo hoka, onda li handi kambadhala ngaashi tandi vulu ndi ungaunge nayo nombili. Onda kala handi popi nayo nonde ya tseya nawa.” Oshizemo? Ruth ota ti: “Mokweendela ko kwethimbo, omaiyuvo ngoka omawinayi naampoka ngaa ga ningine.”

12. Omumwameme gwedhina Sarah okwa li e na uupyakadhi wuni?

¹² Yamwe otashi vulika ya kale ye na okatongo nopwaa na oku shi nongela. Pashiholelwa, Sarah okwa li ta dhiladhila kutya ke na okatongo, molwaashoka ka li ha pangula aantu shi ikolelela komihoko dhawo, kiimaliwa mbyoka ye na nenge kiinakugwanithwa mbyoka ye na mehangano. Okwa zimine a ti: “Onda tameke oku shi mona mo kutya onda li ndi na okatongo.” Omomukalo guni mbela? Sarah okwa za muukwanegumbo wa longwa nokwa li e hole okweendathana naamboka ya longwa. Nokuli pompito yimwe, okwa li a lombwele kuume ke a ti: “Ngame ohandi endathana owala nooitaali ooyakwetu mboka ya longwa. Ihe mboka inaaya longwa, ohandi ya kala kokule.” Osha yela kutya Sarah okwa li a pumbwa okulundulula iikala ye. Omomukalo guni?

13. Oshike tatu ilongo kunkene Sarah a lundulula iikala ye?

¹³ Omutonatelishikandjo okwa li a kwathele Sarah a konakone iikala ye. Sarah ota ti: “Okwa li a pandula ndje, omolwiilonga yandje yuudhiginini, omatyokosha gandje omawanawa nokutseya kwandje Omanyolo. Opo nduno okwa yelithile ndje kutya sho ontseyo yetu tayi ende tayi koko, otwa pumbwa wo okukokeka omaukwatya gopaKriste, ngaashi eifupipiko, ondjele nohenda.” Sarah okwa tula miilonga shoka a lombwelwa komutonatelishikandjo. Ota ti: “Onde shi mono mo kutya oshinima shoka sha simanenena, okukala tu na ombili notu na ohole.” Oshizemo, okwa tameke okutala ko aamwatate naamwameme momukalo gwi ili. Okwa ti: “Onda kambadhala okutseya omaukwatya ngoka ge ya ningitha ya kale ye na ongushu momeho gaJehova.” Ongiini kombinga yetu? Katu na nando okukala twi itala ko tu vule yalwe, omolwelongo lyetu! Ngele otwa kala tu ‘hole ooitaali ooyakwetu’ tashi zi komutima, otatu ka yanda okukala tu na okatongo. — 1 Pet. 2:17.

KALA HO YAKULA YALWE

14. Shi ikolelela kAahebeli 13:16, Jehova oha kala e uvite ngiini, uuna tatu yakula yalwe?

¹⁴ Jehova oha kala a nyanyukwa noonkondo, uuna tatu yakula yalwe. (Lesha Aahebeli 13:16.) Okwa tala ko okuyakula yalwe ku li oshitopolwa shoku mu longela, unene tuu ngele tatu kwathele mboka ye li mompumbwe. (Jak. 1:27; 2:14-17) Onkee ano, Omanyolo otage tu ladhipike tu kale hatu ‘yakula oondjendi momagumbo getu.’ (Rom. 12:13) Ohatu ulike kutya otu na ko nasha nayalwe, otu ya hole notwa hala okuninga ookuume kawo, uuna tatu ya yakula. Jehova oha kala a nyanyukwa, uuna tatu pe yalwe sha shokwiinyangusha, shokunwa, shokulya nenge ethimbo lyetu noku ya ulukila kutya otu na ko nasha nayo. (1 Pet. 4:8-10) Nonando ongawo, otashi vulika pu kale iinima mbyoka tayi vulu oku shi ningitha oshidhigu kutse tu yakule yalwe.

15-16. (a) Omolwashike yamwe tashi vulika ya kakadhale okuyakula yalwe? (b) Oshike sha kwathele Edit a kale e na ehalo lyokuyakula yalwe?

¹⁵ Otashi vulika tu kakadhale okuyakula yalwe, omolwoonkalo dhetu. Natu tale koshiholelwa shomuselekadhi gwedhina Edit. Manga inaa ninga Onzapo, ka li naanaa ha endathana nayalwe. Okwa li e uvite kutya yalwe oyo owala taya vulu okuyakula aantu.

¹⁶ Sho Edit a ningi Onzapo, okwa lundulula okudhiladhila kwe hoka. Okwa li a ningi oonkambadhala a yakule yalwe. Ota ti: “Pethimbo Oshinyanga shUukwaniilwa shetu oshipe sha li tashi tungwa, omukuluntugongalo gumwe okwa lombwele ndje kutya opu na aaihokani yamwe mboka taye ya okukwathela mokutunga, nokwa li a pula ndje ngele otaya vulu okukala pungame, uule wiiwike iyali. Onda dhimbulukwa nkene Jehova a li a yambeke omuselekadhi gwokuSarefat.” (1 Aak. 17:12-16) Edit okwa zimine ye ye ya ze puye. Mbela shoka osha li she mu etele omayambeko? Okwa ti: “Kaya li we ya kala po iiwike iyali, ihe oomwedhi mbali. Pethimbo ndyoka, otwa li twa panga uukuume wopothingo.” Eyambeko limwe ndyoka Edit a li wo a mono, ookuume megongalo. Ngashingeyi oku li omukokolindjila, noku hole okuhiya mboka haya longo pamwe naye momapya, kegumbo lye. Ota ti: “Okugandja ohaku uvitha ndje nawa! Nuushili owo kutya okwa etela ndje omayambeko ogendji.” — Heb. 13:1, 2.

17. Luke nomukadhi oya li ya dhimbulula shike?

¹⁷ Otashi vulika hatu yakula nale yalwe, ihe natango otatu vulu okuhwepopala. Pashiholelwa, Luke nomukadhi, aaihokani mboka ye hole okuyakula yalwe. Oya li ye na ondjigilile yokuhiya aavali yawo, aapambele, ookuume kawo kopothingo nosho wo omutonatelishikandjo nomukadhi, kegumbo lyawo. Nonando ongawo, Luke ota ti: “Otwa li twe shi dhimbulula mo kutya ohatu hiya owala mboka tu shi nawa.” Luke nomukadhi oya li ya hwepopala ngiini mokuyakula yalwe?

18. Luke nomukulukadhi gwe, oya hwepopala ngiini mokuyakula yalwe?

¹⁸ Luke nomukulukadhi gwe oya li ya lundulula etaloko lyawo, konima sho ya tedhatedha koohapu dhaJesus ndhoka tadhi ti: “Ngele mu hole owala mboka ye mu hole, otamu ka pewa ondjambi yashike?” (Mat. 5:45-47) Oya li ye shi mono mo kutya oya pumbwa okuholela Jehova, ngoka ha pe ayehe. Onkee ano, oya tokola okukala haya hiya aamwatate naamwameme mboka inaaya hiya nando onale. Luke ota ti: “Atuhe ngashingeyi ohatu nyanyukilwa noonkondo oompito ndhika. Kehe gumwe oha kala e uvite a tsuwa omukumo nokwa tungwa.”

19. Ongiini tatu vulu okuulika kutya tse aalongwa yaJesus, nowa tokola toko okuninga shike?

¹⁹ Otwa konakona nkene okuholathana nomwenyo aguhe, taku vulu oku tu kwathela tu kale aakondjeli yombili, kaatu na okatongo nohatu yakula yalwe. Natu sinde omaiyuvo omawinayi, e tatu kala tu hole aamwatate naamwameme lelalela nomutima aguhe. Ngele otwe shi ningi, otatu ka kala twa nyanyukwa notatu ka ulika kutya tse aalongwa yaJesus shili. — Joh. 13:17, 35.