Kwathela omukonakoni a ninge ehumokomeho noku ninginithwe — Oshitopolwa 2

1. Otu shi shi ngiini kutya iilonga yokuninga aantu aalongwa ohayi hupitha oomwenyo?

IILONGA yokuninga aantu aalongwa ohayi hupitha oomwenyo. Shoka otu shi shi ngiini? Sho Jesus a gandja elombwelo ndyoka tali adhika muMateus 28:19, 20, okwa ti: “Indeni . . . ka ningeni aantu ayehe aalongwa yandje, mu ya [ninginithe, NW].” Oshike tu shi kombinga yankene eninginitho lya simana? Otwa pumbwa okuninginithwa ngele otwa hala okuhupithwa. Ngoka a hala okuninginithwa oku na okwiitaala kutya ota vulu owala oku ka mona omwenyo gwaaluhe, omolweso lyaJesus. Omuyapostoli Petrus okwa li a lombwele Aakriste ooyakwawo a ti: ‘Eninginitho olyo tali mu hupitha ngashingeyi omolweyumuko lyaJesus Kristus.’ (1 Pet. 3:21, yelekanitha NW) Onkee ano, uuna omulongwa omupe a ninginithwa, oha kala e na etegameno kutya ota ka mona omwenyo gwaaluhe.

2. Shi ikolelela kuTimoteus omutiyali 4:1, 2, otu na okukala aalongi ya tya ngiini?

² Opo tu ninge aantu aalongwa, otwa pumbwa okwiilonga okukala “aalongi ye na owino.” (NW) (Lesha 2 Timoteus 4:1, 2.) Omolwashike mbela? Omolwaashoka Jesus okwe tu pa elombwelo a ti: “Indeni, . . . ka ningeni aantu ayehe aalongwa yandje, . . . ne mu ya longe.” Omuyapostoli Paulus okwa ti kutya ‘dhiginina’ iilonga mbyoka, “oshoka ngele to shi ningi, oto ki ihupitha nosho wo mboka taye ku pulakene.” Omolwetompelo ndyoka Paulus a ti: ‘Tonatela . . . elongo lyoye.’ (1 Tim. 4:16) Molwaashoka okulonga aantu okwa kwatela mo oku ya ninga aalongwa, otwa hala elongo lyetu li kale lya dhenga mbanda.

3. Moshitopolwa shika otatu ka kundathana shike shi na ko nasha nokuninga omakonakonombiimbeli?

³ Ohatu longo aantu omamiliyona oshili ndjoka tayi adhika mOmbiimbeli. Ihe ngaashi sha popiwa moshitopolwa sha tetekele, otwa hala okukala tu shi nkene tu na okukwathela oyendji yomuyo ya ninge aalongwa yaJesus Kristus ya ninginithwa. Moshitopolwa shika, otatu ka kundathana iinima itano ya gwedhwa po, mbyoka omulongi kehe a pumbwa okuninga, opo a kwathele omukonakoni a ninge ehumokomeho noku ninginithwe.

LONGITHA OMBIIMBELI UUNA TO LONGO AANTU

4. Omolwashike omulongi a pumbwa okukala e na eipangelo, uuna ta ningi ekonakonombiimbeli? (Tala wo enyolo lyopevi.)

⁴ Otu hole shoka hatu longo aantu okuza mOohapu dhaKalunga. Onkee ano, otashi vulika hatu kala twa hala okukundathana kombinga yaashoka tu hole, ethimbo ele. Nonando ongawo, kutya nduno otatu kwatele komeho ekonakono lyOshungolangelo, Ekonakonombiimbeli lyegongalo, nenge tatu konakona nomuntu pegumbo, ngoka ta kwatele komeho haye e na okukala ta popi unene. Ombiimbeli oyo yi na okulonga omuntu. Onkee ano, omulongi gwaantu oku na okukala e na eipangelo. Oku na okuyanda okuyelitha uuyelele awuhe mboka e shi kombinga yenyolo lyontumba, nenge kombinga yaashoka taya kundathana.b (Joh. 16:12) Yelekanitha ontseyo yOmbiimbeli ndjoka wa li wu na sho opo wa ninginithwa naandjoka wu na ngashingeyi. Pethimbo opo wa ninginithwa, otashi vulika wa li wu shi owala omalongo gOmbiimbeli gopetameko. (Heb. 6:1) Oshe ku pula oomvula odhindji wu ilonge ashihe shoka wu shi kunena. Onkee ano, ino kambadhala okulonga omukonakoni omupe iinima ayihe mesiku limwe.

5. (a) Metsokumwe nAatessalonika yotango 2:13, oshike twa hala aakonakoni yetu ya kale ye shi kombinga yaashoka tayi ilongo? (b) Ongiini tatu vulu okuladhipika omukonakonimbiimbeli a kale ha kundathana natse kombinga yaashoka ti ilongo?

⁵ Otwa hala aakonakoni yetu yu uve ko kutya shoka tayi ilongo osha za mOmbiimbeli. (Lesha 1 Aatessalonika 2:13.) Ongiini tatu vulu oku shi ninga? Ladhipika omukonakoni gwoye a kale ha kundathana nangoye kombinga yaashoka ti ilongo. Pehala lyokukala aluhe ongoye to mu yelithile shoka tamu kundathana, mu pula oye e shi ninge. Kwathela omukonakoni a mone nkene ta vulu okutula miilonga Oohapu dhaKalunga monkalamwenyo ye. Mu pula omapulo ngoka taga vulu oku mu kwathela a popye nkene u uvite kombinga yomanyolo ngoka ta lesha. (Luk. 10:25-28) Pashiholelwa, mu pula to ti: “Enyolo ndika olye ku kwathela ngiini wu mone uukwatya mboka Jehova e na?” “Uuwanawa wuni to vulu okumona moshili ndjika yOmbiimbeli?” “Owu uvitile ngiini shoka opo owala wi ilongo?” (Omayel. 20:5) Shoka sha simanenena, kasha shi ontseyo oyindji ndjoka omukonakoni e na, ihe okukala e yi hole noku yi tula miilonga.

6. Omolwashike shi li pandunge okuya nomuuvithi ngoka a pyokoka komukonakonimbiimbeli gwoye?

⁶ Uuna to ka konakona Ombiimbeli naantu, mbela oho yi ngaa nomuuvithi ngoka a pyokoka? Ngele owe shi ningi, oto vulu oku mu pula etaloko lye kombinga yankene ho konakona naantu Ombiimbeli, nongele oho longitha ngaa Ombiimbeli ngaashi tashi vulika. Owa pumbwa okukala omwiifupipiki ngele owa hala okuhwepopaleka omukalo gwoye gwokulonga aantu. (Yelekanitha Iilonga 18:24-26.) Konima yaashono, pula omuuvithi ngoka a pyokoka ngele oku wete omukonakoni gwoye u uvite ko shoka ti ilongo. Oto vulu wo oku mu pula a konakone nomukonakoni gwoye ngele oto zi po uule woshiwike nenge yi vule po. Ino kala wa tala ko omukonakonimbiimbeli e li eliko lyoye ongoye awike, nokapu na ngoka e na okukonakona naye. Odhoshili kutya okuninga iinima ayihe mbyoka, oku lile po uuwanawa womukonakoni gwoye, opo a tsikile okuninga ehumokomeho.

ULIKA KUTYA OWU HOLE NOWI ITAALA SHOKA TO LONGO

7. Oshike tashi ka kwathela omukonakoni a kale ha nyanyukilwa shoka ti ilongo?

⁷ Omukonakoni oku na okumona kutya owi itaala nowu hole shoka Ombiimbeli tayi longo. (1 Tes. 1:5) Shoka otashi vulu oku mu kwathela a kale e hole shoka ti ilongo. Ngele otashi wapa, mu lombwela nkene okutula miilonga omakotampango gOmbiimbeli kwe ku kwathela monkalamwenyo yoye. Kungawo ota ka mona kutya Ombiimbeli otayi vulu wo oku mu kwathela.

8. Oshike ishewe to vulu okuninga wu kwathele omukonakonimbiimbeli gwoye, nomolwashike wu na oku shi ninga?

⁸ Sho tamu konakona, lombwela omukonakoni gwoye kombinga yiiholelwa yaantu yopethimbo lyetu mboka ya li ya taalela omashongo ga fa ge, e taye ga sindi. Oto vulu okuya nagumwe megongalo, ngoka e li oshiholelwa shoka tashi vulu okukwathela omukonakoni gwoye. Oto vulu wo oku mu ulukila iimoniwa tayi tsu omukumo mbyoka tayi adhika kepandja lyetu lyokointaneta, jw.org, kohi yoshitopolwa: “Ombiimbeli ohayi lundulula onkalamwenyo yaantu.”c Iitopolwa mbyoka nuuvidio, otayi vulu okukwathela omukonakoni gwoye a mone nkene shi li pandunge okutula miilonga omakotampango gOmbiimbeli monkalamwenyo ye.

9. Ongiini to vulu okuladhipika omukonakoni gwoye a lombwele aakwanezimo ye nosho wo ookuume ke shoka ti ilongo?

⁹ Ngele omukonakoni okwa hokana nenge a hokanwa, mbela kuume ke kopandjokana naye oha konakona? Ngele hasho, mu hiya e mu wayimine pekonakonombiimbeli lyeni. Ladhipika omukonakoni gwoye a kale ha lombwele aakwanezimo nosho wo ookuume ke shoka ti ilongo. (Joh. 1:40-45) Ongiini to vulu oku shi ninga? Oto vulu oku mu pula to ti: “Oshili ndjika oto ke yi yelithila ngiini aakwanezimo yoye? Nenge wu mu pule to ti: “Enyolo lini to ka longitha, opo wu tompe kuume koye kombinga yoshinima shika?” Momukalo ngoka oto dheula omukonakoni gwoye a ninge omulongi. Opo nduno, uuna a gwanitha po iitegelelwa, ota vulu okutameka okukutha ombinga muukalele e li omuuvithi inaa ninginithwa. Oto vulu wo oku mu pula ngele oku shi omuntu ngoka a hala okukonakona Ombiimbeli. Ngele oku shi po gumwe, kwatathana nomuntu ngoka nziya, e to mu pula mu konakone naye. Mu ulukila okavidio Mbela Ombiimbeli ohayi konakonwa ngiini?d

LADHIPIKA OMUKONAKONI GWOYE A PANGE UUKUUME MEGONGALO

10. Ngaashi sha popiwa mAatessalonika yotango 2:7, 8, ongiini tatu vulu okulandula oshiholelwa shaPaulus?

¹⁰ Otwa pumbwa okukala tu na lela ohokwe maakonakonimbiimbeli yetu. Kala we ya tala ko kutya nayo masiku otaya ka ninga aamwatate naamwameme. (Lesha 1 Aatessalonika 2:7, 8.) Kashi shi oshipu kuyo okweetha po ookuume yomuuyuni nokuninga omalunduluko agehe ngoka ga pumbiwa, opo ya longele Jehova. Otwa pumbwa oku ya kwathela ya mone ookuume kashili megongalo. Panga uukuume nomukonakoni gwoye mokukala ho kutha ethimbo wu kale naye, kaashi shi owala uuna tamu konakona, ihe nopoompito dhilwe wo. Ngele owa kala ho mu dhengele, ho mu tumine omatumwalaka nenge ho ke mu talela po paufupi, otashi ke mu ulukila kutya owu na ko nasha naye lela.

11. Oshike twa hala aakonakoni yetu ya mone megongalo, nomolwashike?

¹¹ Opu na eyeletumbulo hali ti: “Poyendji ihapu liwa ndimba nalufufu.” Otatu vulu okutya: “Okuninga omuntu omulongwa ohashi pula egongalo alihe.” Onkee ano, uuna twa kwathele aakonakoni yetu ya tseye aamwatate naamwameme megongalo, otaya vulu oku ya kwathela ya hedhe popepi naJehova. Aakonakoni otaya ka tyapula eendathano naamwatate naamwameme, notaye ke ya tsa omukumo noku ya kwathela uuna ya taalela omaupyakadhi. Otwa hala omukonakoni kehe a kale u uvite a gwana okukala megongalo, noku li oshitopolwa shuukwanegumbo wetu wopambepo. Otwa hala wo a kale a halelela okukala e li oshitopolwa shuumwayinathana wetu wopaKriste. Opo nduno otashi ka kala oshipu kuye okweetha po okweendathana naantu mboka ihaaye mu kwathele a kale e hole Jehova. (Omayel. 13:20) Ngele ookuume ke aakulu oya tameke okukala ye mu tonde, ota ka kala e shi kutya ota vulu okumona ookuume kashili mehangano lyaJehova. — Mark. 10:29, 30; 1 Pet. 4:4.

KALA ALUHE HO POPI KOMBINGA YOKWIIYAPULILA JEHOVA NOKUNINGINITHWA

12. Omolwashike twa pumbwa okukala hatu popi nomukonakoni gwetu kombinga yeiyapulo lyopaKriste neninginitho?

¹² Kala aluhe ho tsu omuthindo nkene okwiiyapulila Jehova nokuninginithwa kwa simana. Ohatu konakona naantu Ombiimbeli nelalakano lyoku ya kwathela ya ninge aalongwa yaJesus ya ninginithwa. Muule woomwedhi oonshona sho omukonakoni a tameke okukonakona, unene tuu sho a tameke okuya kokugongala, oku na okukala e shi kutya elalakano lyekonakonombiimbeli, oku mu kwathela a tameke okulongela Jehova e li Onzapo ye.

13. Omukonakoni oku na okuninga shike, opo a kale a gwana okuninginithwa?

¹³ Kashona nakashona, omukonakonimbiimbeli ngoka i itula mo, ota vulu okwaadha elalakano lye lyokuninginithwa! Tango, omukonakoni oha tseya nokukala e hole Jehova, e ta kala e na eitaalo muye. (Joh. 3:16; 17:3) Opo nduno oha panga uukuume naJehova, e ta tameke wo okupanga uukuume naamwatate naamwameme megongalo. (Heb. 10:24, 25; Jak. 4:8) Mokweendela ko kwethimbo, omukonakoni ohe etha po eihumbato lya nyata, e ti iyele ombedhi omolwomayono ge. (Iil. 3:19) Shimwe ishewe, eitaalo lye ohali mu inyengitha a lombwele yalwe kombinga yoshili ndjoka i ilonga. (2 Kor. 4:13) Okuza mpono ohi iyapulile Jehova noku shi ulika montaneho peninginitho lye. (1 Pet. 3:21; 4:2) Esiku ndyoka ohali kala li nyanyudha kukehe gumwe. Sho omukonakoni te ende ta katuka oonkatu a adhe elalakano lye, kala ho mu pandula tashi zi komutima noku mu ladhipika a tsikile okuninga ehumokomeho.

OMATHIMBO NOMATHIMBO KALA HO TALA EHUMOKOMEHO LYOMUKONAKONI

14. Ongiini to vulu okutala ngele omukonakoni ota humu komeho?

¹⁴ Otwa pumbwa okukala aaidhidhimiki sho tatu kwathele omukonakoni a ninge ehumokomeho, noku kale a gwana okuninginithwa. Ihe otu na wo okutseya ngele oku na ngaa ehalo lyokulongela Jehova Kalunga. Mbela omukonakoni ohe shi ulike ngaa kutya ota kambadhala okuvulika komalombwelo gaJesus? Nenge okwa hala owala okwiilonga iinima iihokithi okuza mOmbiimbeli?

15. Oshike tashi ku ulika kutya omukonakoni okwa gwana okuninginithwa?

¹⁵ Kala ho tala kutya omukonakoni ota ningi ehumokomeho shi thike peni. Pashiholelwa, mbela ohe shi ulike ngaa kutya oku uvitile ngiini Jehova? Mbela oha galikana ngaa kuJehova? (Eps. 116:1, 2) Mbela okuhole ngaa okulesha Ombiimbeli? (Eps. 119:97) Oha yi ngaa kokugongala pandjigilile? (Eps. 22:22) Mbela okwa ninga ngaa omalunduluko monkalamwenyo ye ngoka tagu ulike kutya ota tula miilonga shoka ti ilongo? (Eps. 119:112) Mbela okwa tameka okulombwela aakwanezimo ye nookuume ke shoka ti ilongo? (Eps. 9:1) Shoka sha simanenena, mbela okwa hala ngaa okuninga Onzapo yaJehova? (Eps. 40:8) Ngele omukonakoni ita ningi ehumokomeho miinima ayihe mbyoka, kambadhala okutseya kutya omolwashike itaa ningi ehumokomeho e to shi kundathana naye momukalo gwombili.e

16. Uunake wu na okuhulitha po okukonakona nomuntu?

¹⁶ Omathimbo nomathimbo kala ho tala ngele owa pumbwa ngaa okutsikila okukonakona nomuntu. Ipula to ti: ‘Mbela omukonakoni gwandje oha kala ngaa aluhe i ilongekidhila ekonakono? Mbela oha kala inaa hala okuya kokugongala? Mbela natango oku na omikalondjigilile inaadhi yogoka? Mbela natango oku li oshilyo shelongelokalunga lyiifundja?’ Ngele eyamukulo komapulo agehe ngoka oeeno, nena okutsikila okukonakona naye otaku ka kala kwa fa owala to kambadhala okulonga omuntu okumbwinda ngoka inaa hala okututa. Ngele omukonakoni ina lenga lela shoka ti ilongo noke na ehalo lyokuninga omalunduluko, omolwashike wu na okutsikila okukonakona naye?

17. Shi ikolelela kuTimoteus gwotango 4:16, aalongi yOmbiimbeli ayehe oye na okuninga shike?

¹⁷ Otwa tala ko oshinakugwanithwa shetu shokuninga aantu aalongwa sha simana. Otwa hala aakonakonimbiimbeli yetu ya ninge ehumokomeho noya ninginithwe. Omolwetompelo ndyoka, Ombiimbeli oyo hayi kala onzo yaashoka tatu longo aantu. Onkee ano, uuna tatu ya longo ohatu shi ningi nuupenda notu na enyanyu. Otwa pumbwa okuladhipika aakonakoni yetu ya pange uukuume nayalwe megongalo. Otatu ke ya ladhipika wo ya adhe elalakano lyawo lyokwiiyapulila Jehova nokuninginithwa, nokutala kutya otaya ningi ehumokomeho shi thike peni. (Tala oshimpungu “Shoka aalongi yOmbiimbeli ye na okuninga, opo aakonakonimbiimbeli yawo ya ninge ehumokomeho noya ninginithwe.”) Inatu nyanyukwa tuu sho hatu kutha ombinga miilonga mbika yokuhupitha oomwenyo dhaantu! Otwa hala tu ninge ngaashi tatu vulu tu kwathele aakonakonimbiimbeli yetu ya ninge ehumokomeho, noya ninginithwe.