Aagundjuka, tsikileni okuninga ehumokomeho nokonima ngele mwa ninginithwa

1. Iinima iiwanawa yini aagundjuka oyendji ya ninga?

OMUMVO kehe, aagundjuka oyendji Aakriste ohaya ninginithwa. Mbela nangoye owa ninginithwa? Ngele osho, aamwatate naamwameme oye ku nyanyukilwa nosho wo tuu Jehova! (Omayel. 27:11) Dhiladhila owala kiinima iiwanawa mbyoka wa ninga nale. Pashiholelwa, owa konakona Ombiimbeli nuukeka, tashi vulika nokuli omimvo dhontumba. Okukonakona kwoye Ombiimbeli okwe ku kwathela wu uve ko kutya Ombiimbeli, Oohapu dhaKalunga. Shimwe ishewe, owa tseya Omunyoli gwembo ndika eyapuki kutya olye. Ohole yoye yokuhola Jehova oya koko sigo to kala wa gwana oku mu iyapulila nokuninginithwa. Owa ninga lela etokolo ewanawa!

2. Oshike tatu ka kundathana moshitopolwa shika?

² Kapu na omalimbililo kutya manga inoo ninginithwa, owa li wu na omashongo ngoka ge shi ningitha oshidhigu wu kale omudhiginini kuJehova. Ihe sho to koko, oto ki iyadha momashongo ngoka ino tsakaneka nando onale. Satana ota ka kambadhala okunkundipaleka ohole yoye yokuhola Jehova note ke ku ningitha wu ethe po oku mu longela. (Ef. 4:14) Ihe ino etha shoka shi ku ningilwe. Oshike tashi vulu oku ku kwathela wu kale omudhiginini kuJehova nowu tsikile okukala metsokumwe negano lyoye lyoku mu longela? Owa pumbwa okutsikila okuninga ehumokomeho ‘mokulalakanena’ okuninga Omukriste a pyokoka. (Heb. 6:1) Ihe ongiini to vulu oku shi ninga?

SHOKA TASHI KU KWATHELE WU NINGE OMUKRISTE A PYOKOKA

3. Aakriste ayehe oye na okuninga ehumokomeho lini konima ngele ya ninginithwa?

³ Konima ngele twa ninginithwa, atuheni otwa pumbwa okutula miilonga omayele gaPaulus ngono a li a pe Aakriste yomuEfeso. Okwa li e ya ladhipike ya ‘koke’ ye li Aakriste. (Ef. 4:13) Shono osha hala okutya, oya li ye na ‘okutsikila okuninga ehumokomeho.’ Paulus okwa yelekanitha ehumokomeho lyOmukriste nomukalo moka okanona haka koko. Aavali ohaya kala ye hole noyu uvitile uuntsa okahanona kawo. Ihe okanona hoka ihaka kala okahanona sigo aluhe. Mokweendela ko kwethimbo, ohaka thigi po “ayihe yopakanona.” (1 Kor. 13:11) Shoka osha faathana nAakriste. Konima ngele twa ninginithwa, otu na okutsikila okuninga ehumokomeho. Natu ka taleni omaetopo gamwe ngono taga vulu oku tu kwathela tu shi ninge.

4. Uukwatya wuni tawu ke tu kwathela tu ninge ehumokomeho lyopambepo? Shi yelitha. (Aafilippi 1:9)

⁴ Kokeka ohole yoye yokuhola Jehova. Owu hole nale Jehova noonkondo. Ihe ohole yoye yoku mu hola otayi vulu natango okukoka. Ngiini mbela? Omuyapostoli Paulus okwa popya omukalo gumwe ngoka tagu vulu oku ku kwathela gu li mAafilippi 1:9. (Lesha.) Paulus okwa li a galikana opo ohole yAafilippi yi ‘koke nokutana.’ Onkee ano, ohole yetu otayi vulu okukoka. Oshike tashi vulu oku tu kwathela? Otatu vulu oku shi ninga mokumona ‘ontseyo noondunge.’ Shi thike ngaa pokutseya kwetu Jehova, opo ngaa tapu ka kala pu thike ohole yetu yoku mu hola, okukala tu hole omaukwatya ge nosho wo tuu omukalo moka ha ningi iinima. Ohatu kala twa hala oku mu nyanyudha shi vulithe nale noihatu kala twa hala oku mu yemateka. Ohatu ningi ngaashi tatu vulu tu uve ko kutya okwa hala tu ninge shike nankene tu na oku shi ninga.

5-6. Ongiini tatu vulu okukokeka ohole yetu yokuhola Jehova? Shi yelitha.

⁵ Ohole yetu yokuhola Jehova otayi vulu okukoka, ngele otwa tseya nawa Omwana, molwaashoka okwa li ha holele He. (Heb. 1:3) Omukalo gumwe ngoka tatu vulu oku shi ninga tu tseye Jesus, omokukonakona omambo gane gOmavaangeli. Ngele iho lesha Ombiimbeli esiku kehe, omolwashike itoo tameke oku shi ninga ngashingeyi? Sho to lesha omahokololo ngoka kombinga yaJesus, ndhindhilika omaukwatya ge. Okwa li ha popiwa naye nuupu. Okwa li e hole uunona noku wu papata momaako ge. (Mark. 10:13-16) Aalongwa ye oya li ya manguluka oku mu lombwela shoka tayi ipula nasho. (Mat. 16:22) Shono ngawo otashi ulike kutya Jesus okwa li ha holele Tate gwe gwomegulu. Jehova oha popiwa naye nuupu. Otatu vulu okugalikana kuye. Uuna tatu galikana otatu vulu oku mu mbumbulila omitima dhetu. Otu na einekelo kutya ite ke tu pangula. Oku tu hole noku na ko nasha natse. — 1 Pet. 5:7.

⁶ Jesus okwa li hu uvile aantu olukeno. Omuyapostoli Mateus okwe mu popi a ti: “Sho a tala oongundu dhaantu, okwa li e ya uvitile ohenda, oshoka oya li ya hepekwa noya loloka ya fa oonzi dhaa na omusita.” (Mat. 9:36) Jehova oha kala u uvite ngiini? Jesus okwa ti: “Kali shi ehalo lyaHo megulu, ku kane nando okamwe kaambuka uushona.” (Mat. 18:14) Shono itashi tu hekeleke tuu! Ngele otwa tseya Jesus nawa, ohole yetu yokuhola Jehova otayi ka koka.

7. Ngele oho kala ethimbo pamwe nAakriste ya pyokoka, otashi ke ku kwathela ngiini?

⁷ Oto vulu wo okwiilonga okuulika ohole shi vulithe nale nokuninga Omukriste a pyokoka, ngele owa kala ho kala ethimbo naamwatate naamwameme yomegongalo lyeni noku ya tseya nawa. Ndhindhilika nkene ya nyanyukwa. Ihayi ipe uusama, omolwetokolo ndyoka ya ninga lyokulongela Jehova. Ya pula ye ku lombwele kombinga yiimoniwa yawo, sho ya kala taya longele Jehova. Ngele owa hala okuninga na etokolo lya simana, pula omayele. Dhimbulukwa kutya “maagandjimayele oyendji omu na ehupitho.” — Omayel. 11:14.

8. Oshike to vulu okuninga ngele owu na omalimbililo kombinga yaashoka Ombiimbeli tayi ti?

⁸ Sinda omalimbililo goye. Ngaashi sha popiwa mokatendo okatiyali paragraph 2, Satana ota ka kambadhala oku ku keelela, opo waa hedhe popepi naJehova nowu kale kuu na eitaalo lya kola. Omukalo gumwe moka ta vulu oku shi ninga, omokukuna omalimbililo mungoye kombinga yiinima yimwe mbyoka wi ilonga mOmbiimbeli. Pashiholelwa, otashi vulika aantu yamwe ya kambadhale oku ku tompa kutya Kalunga haye e tu shita. Otwe ya po owala okupitila moevolusi. Otashi vulika sho wa li okanona kwa li ho dhiladhila kombinga yoshinima shoka, ihe ngashingeyi sho wa koka, otashi vulika ho shi longwa kosikola. Aalongi otashi vulika ya popye oshinima shoka tashi yambidhidha elongo lyoevolusi, shoka tashi monika sha fa shi li mondjila. Nonando ongawo, otashi vulika inaaya konakona uumbangi mboka wu li po, mboka tawu ulike kutya oku na Omushiti. Dhimbulukwa ekotampango ndyoka li li mOmayeletumbulo 18:17, ndyoka tali ti: “Nakuthika tango koompangu oku na uuthemba, ihe mukwawo ote ya note mu konakona nawa.” Pehala lyokwiitaala owala kehe shimwe shoka to longwa kosikola, konakona nuukeka shoka Oohapu dhaKalunga tadhi ti. Ninga omapekapeko miileshomwa yetu. Popya naamwatate naamwameme mboka ya li yi itaala melongo lyoevolusi monakuziwa. Ya pula shoka she ya tompa yi itaale kutya oku na Omushiti, ngoka e tu hole. Oonkundathana ndhoka tadhi tungu otadhi vulu oku ku kwathela wu mone kutya oku na Omushiti.

9. Owi ilongo shike moshimoniwa shaMelissa?

⁹ Omumwameme Melissa okwa mona lela uuwanawa, sho a ningi omapekapeko kombinga yeshito.b Okwa ti: “Kosikola, aalongi ohaya yelitha oevolusi momukalo ngoka tagu ningitha aantu ya dhiladhile kutya oshinima shoshili. Petameko kanda li nda hala okuninga omapekapeko, oshoka onda li nda tila kutya otandi ka mona uuyelele mboka tawu ulike kutya oevolusi oshinima shoshili. Ihe onda thiki pehulithodhiladhilo kutya Jehova ina hala tu mu longele kaatu na uumbangi waashoka twa itaala. Onkee onda tameke okuninga omapekapeko. Onda lesha embo, Is There a Creator Who Cares About You?, okambo Was Life Created? nosho wo okambo Omapulo gatano ga simanenena — nkene iinima yi na omwenyo ye ya po. Uuyelele mbuka owo naanaa nda li nda pumbwa. Andola onde wu leshele nale.”

10-11. Oshike tashi vulu oku ku kwathela wu kale wa yogoka pamikalo? (1 Aatessalonika 4:3, 4)

¹⁰ Yanda eihumbato ewinayi. Pethimbo lyokamukondapweyu, omahalo gopamilalo ohaga kala ge na oonkondo notashi vulika yamwe ye ku thiminike wu ye momilalo. Satana osho a hala wu ninge. Oshike tashi vulu oku ku kwathela wu yande eyeleko lya tya ngawo? (Lesha 1 Aatessalonika 4:3, 4.) Uuna to galikana kuJehova, mu lombwela nkene wu uvite noku mu pula e ku nkondopaleke. (Mat. 6:13) Dhimbulukwa kutya Jehova okwa hala oku ku kwathela, ihe ina hala oku ku pangula. (Eps. 103:13, 14) Ombiimbeli otayi vulu wo oku ku kwathela. Melissa ngoka a popiwa metetekelo, naye okwa li ha kondjo nomadhiladhilo ga nyata. Okwa ti: “Okulesha Ombiimbeli esiku kehe, okwa kwathela ndje ndi kondjithe omadhiladhilo ga nyata. Okwa dhimbulukitha ndje kutya ngame ogwaJehova nonda hala oku mu longela monkalamwenyo yandje.” — Eps. 119:9.

¹¹ Ino kambadhala okukandula po omaupyakadhi goye kungoye mwene. Lombwela aavali yoye kombinga yago. Odhoshili kutya ihashi kala oshipu okupopya kombinga yiinima yopaumwene, ihe osha simana oku shi ninga. Melissa okwa ti: “Onda galikana ndi pewe uulaadhi. Opo nduno onda ka popya naTate kombinga yuupyakadhi wandje. Konima yaashono, onda li ndu uvite nda pepelelwa. Onda li ndi shi kutya Jehova okwa nyanyukilwa ndje.”

12. Ongiini to vulu okuninga omatokolo omawanawa?

¹² Wilikwa komakotampango gOmbiimbeli. Sho to ende to koko, aavali yoye otaye ke ku etha wu ninge omatokolo goye mwene. Ihe opu na iinima oyindji wa pumbwa natango okutseya. Ongiini to vulu okuyanda okuninga epuko ndyono tali gumu ekwatathano lyoye naJehova? (Omayel. 22:3) Omumwameme Kari okwa popi kombinga yaashoka she mu kwathele, opo a ninge omatokolo omawanawa. Okwe shi ndhindhilike kutya ngele owu li Omukriste a pyokoka, ino pumbwa oompango moshinima kehe monkalamwenyo. Okwa ti: “Onda li nda pumbwa okuuva ko omakotampango gOmbiimbeli, ihe haampango owala.” Uuna to lesha Ombiimbeli, ipula ngeyi: ‘Ovelise ndjino otayi lombwele ndje shike kombinga yetaloko lyaJehova? Mbela oyi na omakotampango ngono taga vulu okukwathela ndje ndi ninge shono shi li mondjila? Ngele osho, uuwanawa wuni tandi ka mona ngele onda ningi shono Ombiimbeli tayi ti?’ (Eps. 19:7; Jes. 48:17, 18) Ngele owa kala ho lesha Ombiimbeli nokutedhatedha komakotampango gayo, oto ke shi mona oshipu okuninga omatokolo ngoka taga nyanyudha Jehova. Sho to tsikile okuninga ehumokomeho, oto ke shi mona kutya ino pumbwa ompango yontumba monkalo kehe, molwaashono owu shi kutya Jehova iinima okwe yi tala ko ngiini.

13. Ookuume aawanawa otaya vulu ngiini oku ku kwathela? (Omayeletumbulo 13:20)

¹³ Hogolola ookuume mboka ye hole Jehova. Ngaashi sha popiwa metetekelo, ookuume mboka to ka hogolola otaya vulu oku ku kwathela wu ninge Omukriste a pyokoka. (Lesha Omayeletumbulo 13:20.) Omumwameme gwedhina Sara okwa li a kanitha enyanyu lye. Ihe opwa ningwa sha shoka sha li she mu kwathele a kale ishewe a nyanyukwa. Sara okwa hokolola a ti: “Onda mono ookuume aawanawa pethimbo lyo opala. Ngame nomumwameme gumwe omugundjuka otwa li hatu ya pamwe oshiwike kehe tu konakone Oshungolangelo. Kuume kandje gumwe okwa kwathele ndje ndi tameke okukala handi yamukula pokugongala. Omolwekwatho lyookuume mboka, onda tameke okukala ndi na ekonakono lyopaumwene nohandi galikana ndi itula mo. Onda tameke okukala ndi na ekwatathano lya kola naJehova, nonda kala ishewe nda nyanyukwa.”

14. Julien okwa li a mono ngiini ookuume ye li nawa?

¹⁴ Ongiini to vulu okupanga uukuume naamboka taya vulu oku ku nwetha mo nawa? Julien, ngoka ngashingeyi e li omukuluntugongalo, okwa ti: “Sho nda li omugundjuka, onda li nda panga uukuume naamboka nda li tandi longo pamwe nayo muukalele. Ookuume mbono oya li aalaadhi noya li ya kwathela ndje ndi mono nkene iilonga yokuuvitha hayi eta enyanyu. Ondi itulile po elalakano lyokuya miilonga yethimbo lyu udha. Onda li nda ndhindhilike wo kutya onda li tandi iyimbi okumona ookuume aawanawa, oshoka onda li owala handi hogolola mboka yepipi lyandje. Lwanima, onda ka panga uukuume nayalwe kObetel. Oshiholelwa shawo osha kwathela ndje ndi hwepopale, uuna tashi ya pokuhogolola omainyanyudho, nosha hedhitha ndje popepyeelela naJehova.”

15. Paulus okwa li a pe Timoteus omayele geni kombinga yeendathano? (2 Timoteus 2:20-22)

¹⁵ Ongiini ngele owa mono kutya gumwe megongalo oku li eendathano ewinayi? Paulus okwa li e shi shi kutya oohandimwe yamwe yomegongalo lyomethelemumvo lyotango kaya li haya dhiladhila nenge hayi ihumbata ngaashi Aakriste. Onkee okwa li a londodha Timoteus a kale kokule nayo. (Lesha 2 Timoteus 2:20-22.) Uukuume wetu naJehova owo oshinima shi na ondilo. Onkee katu na nando okupitika omuntu gwontumba a nkundipaleke uukuume wetu mboka twa panga naTate yetu gwomegulu. — Eps. 26:4.

ONGIINI TO VULU OKWIITULILA PO OMALALAKANO NGOKA TAGE KU KWATHELE WU NINGE EHUMOKOMEHO?

16. Omalalakano geni wu na okwiitulila po?

¹⁶ Itulila po omalalakano taga ti sha. Hogolola omalalakano ngoka taga koleke eitaalo lyoye notage ku kwathela wu ninge Omukriste a pyokoka. (Ef. 3:16) Pashiholelwa, otashi vulika wu tokole wu hwepopaleke okukonakona kwoye nosho wo tuu okulesha kwoye Ombiimbeli paumwene. (Eps. 1:2, 3) Nenge wu gandje eitulomo kokukala ho galikana olundji notashi zi komutima. Otashi vulika wa pumbwa okukala wu na eipangelo mokuhogolola omainyanyudho goye nokulongitha ethimbo lyoye nawa. (Ef. 5:15, 16) Uuna Jehova a tala nkene to longo nuudhiginini wu ninge ehumokomeho, ota ka kala a nyanyukwa.

17. Uuwanawa wuni to ka mona, ngele owa kala ho kwathele yalwe?

¹⁷ Ngele owa kala ho kwathele yalwe, oto ka ninga Omukriste a pyokoka. Jesus okwa ti: “Okugandja oku na elago ku vule okutaamba.” (Iil. 20:35) Oto ka kala wa nyanyukwa noonkondo, ngele owa longitha ethimbo lyoye nosho wo oonkondo dhoye wu kwathele yalwe. Pashiholelwa, oto vulu okwiitulila po elalakano lyokukwathela aanamimvo nosho wo mboka kaaye na uukolele megongalo lyeni. Oto vulu oku shi ninga moku ya kwathela mokulanda iipumbiwa yawo nosho wo moku ya kwathela nkene ye na okulongitha iikwaelektronika yawo. Ngele ngoye omumwatate, itulila po elalakano lyokuninga omuyakuligongalo, opo wu kwathele aamwatate naamwameme shi vulithe nale. (Fil. 2:4) Oto vulu wo okuulukila yalwe ohole moku ya uvithila onkundana ombwanawa yUukwaniilwa. (Mat. 9:36, 37) Ngele otashi vulika, itulila po elalakano lyokulongela Jehova miilonga yethimbo lyu udha.

18. Iilonga yethimbo lyu udha otayi vulu oku ku kwathela ngiini wu ninge ehumokomeho?

¹⁸ Iilonga yethimbo lyu udha otayi vulu oku ku pa oompito odhindji wu ninge ehumokomeho. Okulonga wu li omukokolindjila otaku vulu oku ku pa ompito wu ye kOsikola yAauvithi yUukwaniilwa. Oto ka vula wo okulonga mObetel nenge mooproyeka dhokutunga omatungo gehangano. Omumwameme omukokolindjila Kaitlyn okwa ti: “Sho nda kala handi kala ethimbo olindji miilonga yokuuvitha naamwatate naamwameme mboka ye na owino, osho oshinima shoka sha kwathele ndje lela ndi ninge ehumokomeho konima sho nda ninginithwa. Oshiholelwa shawo oshi inyengitha ndje ndi kale handi konakona Ombiimbeli shi vulithe nale nondi hwepopale mokulonga yalwe.”

19. Omayambeko geni to ka mona, sho to tsikile okuninga ehumokomeho?

¹⁹ Sho to tsikile okuninga ehumokomeho, oto ka mona omalaleko nuuyamba ogendji. Oto ka yanda okulongitha ethimbo lyoye miinima yaa na oshilonga. (1 Joh. 2:17) Ito ka mona iilanduliko mbyoka hayi zi mokuninga omatokolo omawinayi. Pehala lyaashono, oto ka kala wa nyanyukwa noto ka pondola. (Omayel. 16:3) Oshiholelwa shoye oshiwanawa otashi ka tsa ooitaali ooyakweni ayehe omukumo. (1 Tim. 4:12) Ihe shoka sha simanenena, oto ka kala wu na ombili ndjoka hayi zi mokunyanyudha Jehova nomokukala wu na ekwatathano lyopothingo naye. — Omayel. 23:15, 16.