Nkene iita nelongithonkondo tayi ka hula po

KALUNGA OTA KA KUTHA PO OMAPANGELO AGEHE GOPANTU

Kalunga ota ka hulitha po omapangelo gopantu, piita mbyoka Ombiimbeli hayi ithana Armagedon.a (Ehololo 16:16) Pethimbo ndyoka, “aakwaniilwa yokombanda yevi alihe,” otaya ka hangana ya ka hinge iita “mesiku enene lyaKalunga Omunankondoadhihe.” (Ehololo 16:14) Kalunga ota ka longitha iita yaArmagedon, a hulithe po iita ayihe.

Kalunga ota ka pingena po omapangelo gopantu nUukwaniilwa we, nenge nepangelo lye ndyoka tali ka pangela okuza megulu, nokali na siku li ka hanagulwe po. (Daniel 2:44) Kalunga okwa hogolola Omwana, Jesus Kristus, e li Omukwaniilwa gUukwaniilwa mboka. (Jesaja 9:6, 7; Mateus 28:18) Epangelo ndyoka, olyo Uukwaniilwab mboka Jesus a li a longo aalanduli ye, ya galikane kombinga yawo. (Mateus 6:9, 10) Aantu ayehe otaya ka kala ya hangana kohi yepangelo limwe muuyuni auhe, taya lelwa kuJesus.

Jesus okwa yooloka ko kaapangeli yopantu, oshoka ita ka longitha oonkondopangelo dhe a humithe komeho uuwanawa we mwene. Molwaashoka Jesus omuyuuki noke na ontondo, kapu na ngoka ta ka kala e uvite kutya ota ungaungiwa naye kaashi li pauyuuki omolwomuhoko gwe, uukwashigwana we, nenge eputuko lye. (Jesaja 11:3, 4) Aantu itaya ka pumbwa okukondjela omauthemba gawo. Omolwashike mbela? Oshoka Jesus ota ka kala e na ko nasha nonkalonawa yakehe gumwe. “Ota hupitha ohepele ngo te mu lilile, omuthiminikwa ngo kee na ngo te mu kwatha. . . . Ote ya hupitha methiminiko nomepiyagano. — Episalomi 72:12-14.

Uukwaniilwa waKalunga otawu ka hanagula po iikondjitho ayihe mbyoka hayi dhipaga aantu. (Mika 4:3) Otawu ka hulitha po wo aantu ayehe aakolokoshi, mboka haya tindi okweetha po okukondja nenge okupiyaganeka ombili yayalwe. (Episalomi 37:9, 10) Omulumentu, omukiintu nomunona kehe, otaya ka kala ye uvite ya gamenwa, kehe pamwe mpoka ye li kombanda yevi. — Hesekiel 34:28.

Aantu otaya ka tyapula onkalamwenyo ombwanawa kohi yepangelo lyaKalunga. Otali ka hulitha po omaupyakadhi agehe ngoka haga ningitha aantu ya kondje, ngaashi oluhepo, ondjala nosho wo ompumbwe yomagumbo. Kehe gumwe ota ka kala e na iikulya yi na uundjolowele ya gwana lela, nota ka kala e na ehala ewanawa lyokukala. — Episalomi 72:16; Jesaja 65:21-23.

Kohi yUukwaniilwa waKalunga, iilanduliko ayihe iiwinayi yiita otayi ka hulithwa po. Shika inashi kwatela mo owala iilalo yoyene yene, ihe osha kwatela mo wo uuwehame wopamadhiladhilo nosho wo wopamaiyuvo, mboka aantu haya kala ye na omolwiinima iiwinayi mbyoka ya ningilwa miita. Nokuli naamboka ya sa, otaya ka yumudhwa ya kale ishewe nomwenyo kombanda yevi. (Jesaja 25:8; 26:19; 35:5, 6) Aanegumbo otaya ka hangana ishewe, naantu itaya ka dhimbulukwa we iinima iiwinayi mbyoka ya etithwa kiita “oshoka iikulu oya hula po.” — Ehololo 21:4.

KALUNGA OTA KA KUTHA PO UULUNDE

Uukwaniilwa waKalunga otawu ka hanganitha aantu ya longele Kalunga awike kashili, Jehovac, “Kalunga kohole nokombili.” (2 Aakorinto 13:11) Aantu otaye ki ilonga nkene ye na okukala pamwe nombili. (Jesaja 2:3, 4; 11:9) Ayehe mboka haya tula miilonga shoka yi ilonga, otaya ka mangululwa ko kiilanduliko yuulunde. — Aaroma 8:20, 21.

KALUNGA OTA KA HULITHA PO SATANA NOONDEMONI DHE

Uukwaniilwa waKalunga otawu ka hanagula po shoka hashi etitha iita, ano Satana noondemoni dhe. (Ehololo 20:1-3, 10) Molwaashoka itaya ka nwetha mo we aantu, “ombili otayi ka indjipala.” — Episalomi 72:7, yelekanitha NW.

Oto vulu okukala wu na einekelo kutya euvaneko lyaKalunga lyokuhulitha po iita nelongithonkondo, otali ka gwanithwa shili. Oku na oonkondo nehalo lyokuhulitha po iita.

• Kalunga oku na owino nomatha, a hulithe po iita nelongithonkondo. (Job 9:4) Kapu na shoka itaa vulu okugwanitha po. — Job 42:2.

• Kalunga oku tonde okumona aantu taya mono iihuna. (Jesaja 63:9) Shimwe ishewe, “oku tonde unene ookakombwiilitha.” — Episalomi 11:5.

• Kalunga oha gwanitha po aluhe oohapu dhe, oshoka iha fundju. — Jesaja 55:10, 11; Titus 1:2.