Ilonga kuJesus nkene wu na okuuvitha nuulaadhi

1. Uukwatya wuni hawu yoolola ko oshigwana shaJehova kaantu yomuuyuni?

OSHINIMA shimwe shoka hashi yoolola ko oshigwana shaJehova kuyamwe mboka haya iti Aakriste, uulaadhia wawo wokuuvitha. (Tit. 2:14) Ihe omathimbo gamwe otashi vulika wu shi mone oshidhigu okukala nuulaadhi wokuuvitha. Otashi vulika to tsu kumwe nomukuluntugongalo ngoka a zimine kutya: “Omathimbo gamwe ihandi kala ndi na ehalo lyokuuvitha.”

2. Omathimbo gamwe oshike tashi vulu oku shi ningitha oshidhigu tu kaleke po uulaadhi wetu wokuuvitha?

² Otashi vulika hatu nyanyukilwa okuninga iinima yimwe miilonga yaJehova, shi vulithe okukutha ombinga miilonga yokuuvitha. Omolwashike mbela? Omolwaashoka uuna twa kutha ombinga mokutunga nokukaleka monkalo ombwanawa omatungo gehangano, twa kwathele miiponga yopaunshitwe nokuladhipika aamwatate naamwameme, ohatu mono iizemo iiwanawa nziya, naashono ohashi tu nyanyudha. Ohatu nyanyukilwa ombili nohole ndjoka hatu ulukilathana sho tatu longo naamwatate, notu shi kutya ohaye tu pandula omolwiinima mbyoka hatu ya ningile. Mepingathano naashoka, otashi vulika twa kala nokuuvithila omimvo odhindji moshitopolwa shimwe moka aantu ihaaya ulike naanaa ohokwe. Nenge tashi vulika twa tsakanena naantu yamwe mboka haya tindi etumwalaka lyetu. Otu shi wo kutya sho ehulilo tali ende tali hedha popepi, etumwalaka lyetu otashi vulika kaali ka kale ehokithi koyendji. (Mat. 10:22) Oshike tashi vulu oku tu kwathela tu kaleke po, nenge tu kale tu na uulaadhi wokuuvitha shi vulithe nale?

3. Oshike tatu vulu okwiilonga kombinga yaJesus methaneko ndyoka tali adhika muLukas 13:6-9?

³ Otatu vulu okwiilonga nkene tu na okuuvitha nuulaadhi koshiholelwa shaJesus. Pethimbo lyuukalele we, ka li a etha po okulonga nuudhiginini a uvithile aantu. Nokuli nomokweendela ko kwethimbo, okwa ningi oshindji miilonga ye yokuuvitha. (Lesha Lukas 13:6-9.) Ngaashi omulongi gwomoshikunino a kala ta kambadhala uule womimvo ndatu a likole oonkwiyu komukwiyu ngoka ihaagu imi, Jesus naye okwa kala nokuuvithila Aajuda uule womimvo ndatu, noyendji yomuyo kaya li ya inyenge nawa ketumwalaka lye. Ngaashi owala omulongi gwomoshikunino a kala e na einekelo kutya omukwiyu otagu ka ima iiyimati, Jesus ka li a etha po okuuvithila aantu, nenge a kale kee na uulaadhi miilonga ye yokuuvitha. Pehala lyaashono, okwa tsikile okuninga oonkambadhala a adhe omitima dhawo.

4. Iinima yini ine tatu vulu okwiilonga koshiholelwa shaJesus?

⁴ Moshitopolwa shika, otatu ka kundathana nkene Jesus a li a ulike uulaadhi, unene tuu momukokomoko gwoomwedhi hamano dha hugunina dhuukalele we. Okwiilonga kwaashoka a longo aantu nokuholela shoka a li a ningi, otashi ke tu kwathela tu kale aalaadhi kunena. Ngashingeyi otatu ka tala kiinima ine mbyoka tatu vulu okwiilonga kuJesus. (1) Okwa li a gandja eitulomo kokulonga ehalo lyaJehova, (2) okwa li a gandja eitulomo kehunganeko lyOmbiimbeli, (3) okwa li a inekele Jehova e mu kwathele, (4) okwa kala e na etaloko ewanawa kutya yamwe otaya ka pulakena kuye.

OKWA LI A GANDJA EITULOMO KOKULONGA EHALO LYAJEHOVA

5. Ongiini Jesus a ulike kutya ota gandja eitulomo kokulonga ehalo lyaKalunga?

⁵ Jesus okwa li a uvitha nuulaadhi “onkundana ombwanawa yUukwaniilwa waKalunga,” molwaashoka okwa li e shi kutya Kalunga okwa hala a longe iilonga mbyoka. (Luk. 4:43) Jesus okwa li a pititha komeho iilonga yokuuvitha monkalamwenyo ye. Nokuli nopehulilo lyuukalele we, okwa ende “oshilando noshilando nosho wo omukunda nomukunda,” ta longo aantu. (Luk. 13:22) Okwa li wo a dheula aalongwa ya gwedhwa po, ya longe pamwe naye ye li aauvithi. — Luk. 10:1.

6. Ongiini iilonga yokuuvitha ya pambathana niilonga yilwe mbyoka tashi vulika tu na? (Tala wo ethano.)

⁶ Nokunena wo, iilonga yokuuvitha onkundana ombwanawa, oyo iilonga yotango Jehova naJesus ya hala tu longe. (Mat. 24:14; 28:19, 20) Iilonga yokuuvitha oya pambathana niinakugwanithwa yilwe mehangano lyaJehova. Pashiholelwa, ohatu tungu omatungo gehangano, nenge tu longe koBetel, opo tu yambidhidhe iilonga yokuuvitha. Ohatu kwathele miiponga yopaunshitwe, tu yambidhidhe aamwatate naamwameme niinima mbyoka ya pumbwa nohatu ya kwathele wo ya ninge ishewe iinima yopambepo, mwa kwatelwa okuuvitha. Uuna twa ndhindhilike kutya iilonga yokuuvitha oya simana shi thike peni nokudhimbulukwa kutya oyo iilonga ya simana mbyoka Jehova naJesus ya hala tu ninge, otashi ke tu inyengitha tu kale twa hala oku kutha ombinga muyo pandjigilile. János, ngoka e li omukuluntugongalo moHungary, okwa ti: “Ohandi i dhimbulukitha kutya kapu na we iilonga yimwe ya simana mehangano lyaJehova tayi vulu okupingena po iilonga yokuuvitha, molwaashoka osho oshinakugwanithwa shetu shotango shoka tu na okuninga.”

7. Omolwashike Jehova a hala tu tsikile nokuuvitha? (1 Timoteus 2:3, 4)

⁷ Otatu vulu okukoleka uulaadhi wetu wokuuvitha, mokutala ko aantu ngaashi Jehova he ya tala ko. Okwa hala aantu oyendji ya uve onkundana ombwanawa ngaashi tashi vulika, noku yi taamba ko. (Lesha 1 Timoteus 2:3, 4.) Onkee ohe tu kwathele, moku tu dheula tu taandeleke etumwalaka ndika tali hupitha oomwenyo. Pashiholelwa, okambo Kala wu hole aantu ya ninga aalongwa, otaka gandja omaetopo taga longo ngoka taga vulu oku tu kwathela tu tameke oonkundathana naantu. Nokuli nonando aantu inaya taamba ko etumwalaka lyetu ngashingeyi, otashi vulika ya ka kale ye na ompito yoku shi ninga manga uudhigu uunene inaawu hula. Shoka tatu ya lombwele ngashingeyi, otashi vulika osho shi ke yi inyengithe ya taambe ko onkundana ombwanawa monakuyiwa. Ihe shoka otashi vulu owala okuningwa, ngele otwa tsikile nokuuvitha.

OKWA LI A GANDJA EITULOMO KEHUNGANEKO LYOMBIIMBELI

8. Omahunganeko geni gOmbiimbeli ga kwathele Jesus a longithe nawa ethimbo lye?

⁸ Jesus okwa li a uvu ko nawa nkene omahunganeko gOmbiimbeli taga ka gwanithwa. Okwa li e shi kutya ota ka uvitha owala uule womimvo ndatu netata. (Dan. 9:26, 27) Okwa li wo e shi shoka sha hunganekwa kombinga yankene nuunake ta ka sa. (Luk. 18:31-34) Jesus okwa li a etha shoka e shi, shi mu inyengithe a longithe ethimbo lye nawa. Oshizemo, okwa uvitha nuulaadhi, opo a gwanithe po iilonga mbyoka a pewa a longe.

9. Omolwashike omahunganeko gOmbiimbeli hage tu inyengitha tu uvithe nuulaadhi?

⁹ Okukala tu uvite ko omahunganeko gOmbiimbeli, otaku vulu oku tu inyengitha tu uvithe nuulaadhi. Otu shi kutya masiku uuyuni mbuka owu li pokuhula po. Otu shi kutya iiningwanima mbyoka tayi ningwa, niikala yaantu otayi ulike shoka Ombiimbeli ya hunganeka shi na ko sha nendhindhiliko lyomasiku gahugunina. Otu uvite ko uutondwe mboka wu li pokati kEpangelo Enankondo mUuyuni lyaAmerika naRusia nosho wo iilongo yimwe mbyoka tayi longele kumwe nayo. Uutondwe mboka ota wu gwanitha po ehunganeko kombinga womukwaniilwa wokuumbangalantu nomukwaniilwa wokuumbugantu, ‘pomasiku ga hugunina.’ (Dan. 11:40) Otu uvite ko wo kutya oompadhi dhoshiyelekela ndhoka dha popiwa muDaniel 2:43-45, otadhi thaneke Epangelo Enankondo mUuyuni lyaAmerika. Otwa tompwa kutya ngaashi omahunganeko tage shi ulike, masiku Uukwaniilwa waKalunga otawu ka hanagula po omapangelo gopantu. Omahunganeko agehe ngaka otaga ulike kutya otu li lela pethimbo lyehulilo, onkee natu konge ethimbo tu uvithe onkundana ombwanawa.

10. Omomikalo dhimwe dhini omahunganeko gOmbiimbeli taga vulu oku tu ladhipika tu tsikile nokuuvitha?

¹⁰ Omahunganeko gOmbiimbeli, ohage tu pe wo etumwalaka ndyoka twa halelela okuuvitha. Omumwameme Carrie, ngoka ha longele moRepablika yaDominican okwa ti: “Omahunganeko gaJehova gonakuyiwa ombwanawa, ohaga inyengitha ndje ndi uvithile yalwe onkundana ombwanawa.” Okwa gwedha ko a ti: “Uuna nda mono shoka aantu taya ungaunga nasho kunena, ohandi mono kutya Jehova hangaye owala a uvanekela iinima iiwanawa ihe nayo wo.” Omahunganeko gOmbiimbeli ohage tu ladhipike kaatu kale twa tila okuuvitha, molwaashoka otu shi kutya Jehova ote ke tu yambidhidha miilonga mbyoka. Leila, ngoka ha zi moHungary, okwa ti: “Jesaja 11:6-9, oha ladhipike ndje ndi uvithile aantu onkundana ombwanawa nokuli naamboka taya monika ya fa kaaye yi taambe ko. Ondi shi kutya kehe gumwe ota vulu okulunduluka kekwatho lyaJehova.” Christopher, omumwatate ngoka ha zi moZambia, okwa ti: “Ngaashi Markus 13:10 a uvaneka, onkundana ombwanawa otayi uvithilwa uuyuni awuhe, nondi uvite etumba sho tandi kwathele mokugwanitha po ehunganeko ndika.” Mbela ehunganeko lini lyOmbiimbeli ha li ku inyengitha wu tsikile nokuuvitha?

OKWA LI A INEKELE JEHOVA E MU KWATHELE

11. Omolwashike Jesus a li a pumbwa okwiinekela muJehova e mu kwathele, opo a tsikile okuuvitha nuulaadhi? (Lukas 12:49, 53)

¹¹ Jesus okwa kala a inekela muJehova e mu kwathele, opo a tsikile okuuvitha nuulaadhi. Nonando Jesus okwa li ha hogolola nawa shoka ta ka popya, okwa li e shi kutya onkundana ombwanawa yUukwaniilwa otayi ka eta oontamanana nomapataneko. (Lesha Lukas 12:49, 53.) Omolwoshizemo shiilonga yaJesus yokuuvitha, aawiliki yomalongelokalunga oya kambadhala lwiikando oku mu dhipaga. (Joh. 8:59; 10:31, 39) Ihe Jesus okwa tsikile nokuuvitha, oshoka okwa li e shi kutya Jehova oku li pamwe naye. Okwa ti: “Kandi li ongame awike, ihe Tate, ngoka a tuma ndje, oku li pamwe nangame. . . . Ina ekelahi ndje, molwaashoka ohandi longo aluhe shoka tashi mu nyanyudha.” — Joh. 8:16, 29.

12. Jesus okwa kwathele ngiini aalongwa ye ya tsikile okuuvitha nonando oya taalela omapataneko?

¹² Jesus okwa li a dhimbulukitha aalongwa ye kutya otaya vulu okwiinekela muJehova e ya kwathele. Okwe ya shilipaleke lwiikando kutya Jehova ote ke ya kwathela nuuna ya taalela omahepeko. Onkee ano okwe ya ladhipike ya kale ya kotoka. (Mat. 10:18-20; Luk. 12:11, 12) Okwe ya lombwele kaaya kondjithile etumwalaka lyawo mboka inaaya hala okupulakena. (Luk. 10:10, 11) Okwe ya lombwele ya ye ontuku, uuna taya hepekwa. (Mat. 10:23) Nonando Jesus okwa li omulaadhi nokwa inekela muJehova, mpoka tashi vulika okwa li a yanda okwiiyethela moonkalo dha nika oshiponga. — Joh. 11:53, 54.

13. Omolwashike to vulu okukala nuushili kutya Jehova ote ke ku kwathela?

¹³ Otwa pumbwa ekwatho lyaJehova, opo tu tsikile okuuvitha nuulaadhi, sho twa taalela omapataneko kunena. (Eh. 12:17) Omolwashike to vulu okukala nuushili kutya Jehova ote ke ku kwathela? Natu taleni kegalikano lyaJesus ndyoka ta li adhika muJohannes 17. Jesus okwa li a pula Jehova a tonatele aayapostoli na Jehova okwa yamukula egalikano ndyoka. Embo lyIilonga olya popi nkene Jehova a kwathele aayapostoli nonando otaya hepekwa. Megalikano lye, Jesus okwa pula wo Jehova a tonatele mboka taya ka ulika eitaalo, mwaashoka aayapostoli taya uvitha. Nangoye owa kwatelwa mo. Jehova ka li a hulitha po okuyamukula omagalikano gaJesus, nangoye ote ke ku kwathela ngaashi owala a kwathele aayapostoli. — Joh. 17:11, 15, 20.

14. Otu shi shi ngiini kutya otatu ka vula okuuvitha nuulaadhi? (Tala wo ethano.)

¹⁴ Nokuli nonando oshi ka kale oshidhigu unene okuuvitha onkundana ombwanawa nuulaadhi sho ehulilo ta li hedha popepi, otatu ka kala tu na ekwatho ndyoka twa pumbwa. (Luk. 21:12-15) Ngaashi Jesus nosho wo aalongwa ye, ohatu etha aantu ya hogolole ngele oya hala okupulakena nenge hasho, nohatu yanda oontamanana inaashi pumbiwa. Nokuli nuuna iilonga yetu yokuuvitha ya indikwa, aamwatate oya kala nokuuvitha onkundana ombwanawa, molwaashoka oya inekela muJehova ihe hamoonkondo dhawo yene. Ngaashi owala Jehova a li a pe oonkondo aapiya ye yomethelemumvo lyotango, kunena Jehova ohe tu pe oonkondo, opo ‘tu vule okuuvithila ayehe,’ ngaashi a hala. (2 Tim. 4:17) Oto vulu okukala nuushili kutya, ngele owa inekele muJehova oto ka vula okuuvitha nuulaadhi.

OKWA KALA E NA ETALOKO EWANAWA

15. Oshike tashi ulike kutya Jesus okwa li e na etaloko ewanawa kombinga yuukalele?

¹⁵ Jesus okwa li e na etaloko ewanawa kombinga yiilonga yokuuvitha. Shoka oshe mu kwathele a kale ha nyanyukilwa iilonga ye yokuuvitha. Pashiholelwa, konima yomumvo 30 E.N, lwaampono, sho Jesus a tameke okuuvitha, okwa mono kutya aantu oyendji oya li ya halelela okupulakena konkundana ombwanawa nokwe ya yelekanitha nepya ndyoka lya adha okutewa. (Joh. 4:35) Konima yomumvo gumwe lwaampono, okwa li a lombwele aalongwa ye a ti: “Iilonga yokuteya oyindji.” (Mat. 9:37, 38) Opo ihe lwanima, okwa endulula oshinima shoka nomuthindo sho a ti: “Iilonga yokuteya oyindji. . . Indileni mwene gweteyo, a tume aaniilonga keteyo lye.” (Luk. 10:2) Jesus okwa kala e na einekelo kutya aantu otaya ka pulakena konkundana ombwanawa nokwa li a nyanyukwa sho ye shi ningi. — Luk. 10:21.

16. Ongiini omathaneko gaJesus ga ulike etaloko ewanawa kombinga yuukalele? (Lukas 13:18-21) (Tala wo ethano.)

¹⁶ Jesus okwa longo aalongwa ye ya kale ye na etaloko ewanawa kombinga yetumwalaka lyawo, shoka sha li tashi ke ya kwathela ya kale ye na uulaadhi. Pashiholelwa, tala komathaneko ge gaali. (Lesha Lukas 13:18-21.) Jesus okwa longitha omuma yosinapi, a longe aalongwa ye kutya etumwalaka lyUukwaniilwa, ota li ka indjipala momukalo omukumithi nokapu na shoka tashi yi etumwalaka ndyoka moshipala. Okwa li wo a longitha efulika, a thaneke nkene etumwalaka lyUukwaniilwa tali ka indjipala apuhe nota li ka e ta omalunduluko ngoka itaaga ka monika nziya kuyalwe. Onkene Jesus okwa kwathele aalongwa ye ya mone kutya etumwalaka ndyoka haya uvitha, ota li ka eta iizemo iiwanawa.

17. Omatompelo geni tu na gokukala netaloko ewanawa kombinga yuukalele?

¹⁷ Uuna tu wete nkene iilonga yokuuvitha tayi tompola kunena muuyuni awuhe, ohashi tu inyengitha tu tsikile okuuvitha nuulaadhi. Omumvo kehe, aantu omamiliyona mboka ye na ohokwe oha ye ya kEdhimbuluko noha ya konakona Ombiimbeli natse. Aantu omayovi omathele ohaya ninginithwa, noku tu wayimina miilonga yokuuvitha. Natango katu shi kutya aantu yangapi taya ka inyenga ketumwalaka lyetu, ihe otu shi kutya Jehova ota gongele engathithi lyaantu, ndyoka tali ka hupa puudhigu uunene, mboka wu li pokuya. (Eh. 7:9, 14) Mwene gweteyo oku na einekelo kutya aantu oyendji otaya ka taamba ko onkundana ombwanawa, onkene otu na etompelo ewanawa lyokutsikila nokuuvitha.

18. Oshike twa hala yalwe ya ndhindhilike kombinga yetu?

¹⁸ Aalongwa yaJesus oya li haya dhimbululwa mo aluhe, omolwuulaadhi wawo wokuuvitha. Sho aantu ya mono aayapostoli taya popi nuulaadhi, “oya mono kutya oya li haya kala naJesus.” (Iil. 4:13) Natse otwa hala okuuvitha onkundana ombwanawa, tu na omukumo nuulaadhi, noshizemo, aantu otaye ke shi ndhindhilika mo kutya otatu landula oshiholelwa shaJesus shuulaadhi.