Okukala nekwatathano ewanawa nayalwe oshinima oshiwanawa kutse

1-2. Oshinima shini shoka sha simana kuJehova nokwa hala tu ninge shike?

OMUKALO moka hatu ungaunga naantu ooyakwetu ogwa simana kuJehova. Jesus okwe tu longa kutya natu kale tu hole ooyakwetu ngaashi tu ihole tse yene. (Mat. 22:37-39) Shoka osha kwatela mo okukala tu na ombili nayalwe nokuli naamboka inaaya itaala shoka twa itaala. Uuna tu na ombili nayalwe, otatu holele Jehova Kalunga, ngoka ‘etango lye he li pitithile mboka haya longo uuwinayi naamboka haya longo uuwanawa, nomvula ye ohe yi lokithile mboka aayuuki naamboka kaaye shi aayuuki.’ — Mat. 5:45.

² Nonando Jehova oku hole aantu ayehe, oku hole unene mboka haya longo shoka shi li mondjila. (Joh. 14:21) Okwa hala tu mu holele. Ote tu ladhipike tu kale tu ‘hole nomwenyo aguhe’ aamwatate naamwameme noku ya ulukila ‘ohole yomuule.’ (1 Pet. 4:8; Rom. 12:10) Uuna tatu dhiladhila okuulikila gumwe ohole ya tya ngawo, otashi vulika tu kale tu na momadhiladhilo ohole ya hwama ndjoka tu nine omupambele gwetu omuholike nenge kuume ketu kopothingo.

3. Oshike tu na okudhimbulukwa kombinga yohole?

³ Oku shi popya pathaneko, ngaashi owala okameno, ohole nayo oya pumbwa okupaluthwa, opo yi kale ya kola. Omuyapostoli Paulus okwa li a pe Aakriste omayele taga ti: “Kaleni mu holathane.” (Heb. 13:1) Jehova okwa hala tu tsikile okukokeka ohole yetu yokuhola yalwe. Oshitopolwa shika otashi ka kundathana kutya omolwashike twa pumbwa okukala tu na ekwatathano nooitaali ooyakwetu nankene tatu vulu okutsikila oku shi ninga.

OMOLWASHIKE TU NA OKUKALA NEKWATATHANO NAYALWE?

4. Ngaashi sha popiwa mEpisalomi 133:1, ongiini tatu vulu okutsikila okukala tu na olupandu omolwuumwayinathana wetu wa hangana? (Tala wo omathano.)

⁴ Lesha Episalomi 133:1. Otatu tsu kumwe nomupisalomi ngoka a nyola kutya okupanga uukuume washili naamboka ye hole Jehova, ‘okwa opala nokwa opalelela.’ Ngaashi owala omuntu tashi vulika a kale kee na ko nasha nomuti omunenenene ngoka ha mono esiku kehe, natse otashi vulika tu kale kaatu na ko nasha nuukumwe wetu wOpakriste. Ohatu monathana naamwatate naamwameme olundji, tashi vulika lwiikando moshiwike. Ongiini tatu vulu okutsikila okuulika kutya otwe ya lenga? Ngele otwa dhiladhila kombinga yankene kehe gumwe e na ondilo megongalo nokutse, ohole yetu yokuhola aamwatate naamwameme otayi ka koka.

5. Ohole yuumwayinathana ndjoka yi li mokati ketu ohayi gumu ngiini yalwe?

⁵ Yamwe mboka ya li pokugongala oshikando shotango, ohaya kala ya kuminwa ohole ndjoka hatu ulukilathana. Otashi vulika ya thike pehulithodhiladhilo kutya oya mona oshili mokutala owala kwaashoka. Jesus okwa ti: “Kungawo, aantu ayehe otaya ka tseya kutya ne aalongwa yandje, ngele omu holathane.” (Joh. 13:35) Natu ka taleni koshimoniwa shaChaithra, omunasikola e li kouniveesiti, ngoka a li ta konakona nOombangi dhaJehova. Okwa li a taamba ko ehiyo lyoshigongi shoshitopolwa. Konima yesiku lyotango lyoshigongi, okwa lombwele ngoka ha konakona naye a ti: “Aavali yandje kaye na esiku ya papatela ndje. Ihe poshigongi sheni, onda papatelwa iikando 52 mesiku owala limwe. Onda mona ohole yaJehova okupitila muukwanegumbo mbuka wopambepo. Onda hala okukala oshitopolwa shuukwanegumbo mboka.” Chaithra okwa tsikile okuninga ehumokomeho nokwa ninginithwa mo2024. Odhoshili kutya uuna mboka aape ya mono iilonga yetu iiwanawa, mwa kwatelwa ohole ndjoka tu na mokati ketu, olundji ohashi ya inyengitha ya longele Jehova. — Mat. 5:16.

6. Ongiini okukala nekwatathano ewanawa naamwatate naamwameme haku tu gamene?

⁶ Okukala nekwatathano ewanawa naamwatate naamwameme oshi li egameno. Paulus okwa kumagidha ooitaali ooyakwawo a ti: “Kumagidhathaneni esiku kehe. . . opo kwaa kale nando ogumwe ta fundjalekwa kuulunde e ti ikukutike.” (Heb. 3:13) Ngele otwa kala twa teka omukumo e tatu kala tu wete oshidhigu okuninga shoka shi li mondjila, Jehova otashi vulika a inyengithe omwiitaali omukwetu e tu pe ekwatho ndyoka twa pumbwa. (Eps. 73:2, 17, 23) Etsomukumo ndyoka olyi li shili oshinima oshiwanawa kutse.

7. Ohole oya pambathana ngiini nuukumwe? (Aakolossa 3:13, 14)

⁷ Otu li oshitopolwa shongundu yaantu mboka haya longo nuudhiginini ya ulukilathane ohole, onkene ohatu nyanyukilwa omalalekonuuyamba ogendji. (1 Joh. 4:11) Pashiholelwa, ohole ohayi tu inyengitha tu ‘kwathathane’ nenge tu idhidhimikilathane, naashono ohashi tu kwathele tu kale twa hangana. (Lesha Aakolossa 3:13, 14; Ef. 4:2-6) Onkene pokugongala kwetu, ohatu kala twa nyanyukwa nokapu na aantu yalwe kombanda yevi haya nyanyukilwa oshinima shoka.

SIMANEKATHANENI

8. Onkandangala yini Jehova ta dhana, e tu kwathele tu kale twa hangana?

⁸ Uukumwe mboka tu na muuyuni auhe owu li oshikumithalonga. Jehova ohe shi ningitha tashi wapa tu kale twa hangana nonando inatu gwanenena. (1 Kor. 12:25) Ombiimbeli otayi ti kutya, ‘Kalunga ote tu longo, tu kale tu holathane.’ (1 Tes. 4:9) Niitya yimwe, okupitila mOmbiimbeli, Jehova ote tu lombwele kondandalunde shoka twa pumbwa okuninga, opo tu kale tu na ekwatathano ewanawa nayalwe. Otatu vulu ‘okulongwa kuKalunga,’ mokukonakona omalongo ge nuukeka noku ga tula miilonga. (Heb. 4:12; Jak. 1:25) Naashoka osho naanaa Oombangi dhaJehova hadhi kambadhala okuninga.

9. Oshike tatu ilongo mAaroma 12:9-13, kombinga yokusimanekathana?

⁹ Oohapu dhaKalunga otadhi tu longo ngiini tu kale tu na ekwatathano ewanawa nayalwe? Tala kwaashoka Paulus a li a popi kombinga yoshinima shoka mAaroma 12:9-13. (Lesha.) Ndhindhilika shoka a ti: “Kaleni one hamu katuka tango mú ulukile yalwe esimaneko.” Mbela shoka osha hala okutya shike? Otwa pumbwa okukatuka onkatu yotango tu ulukile yalwe ‘olukeno,’ mokukala hatu dhimine po, mokuyakula aayenda nomokukala hatu gandja nehalo ewanawa. (Ef. 4:32) Onkene ino pumbwa okutegelela omumwatate nenge omumwameme oye a hedhe popepi nangoye tango. Oto vulu ‘okukatuka tango’ wu hedhe popepi naye. Jesus okwa popi sha ukilila a ti: “Okugandja ohaku eta enyanyu enene ku vule okutaamba.” — Iil. 20:35.

10. Ongiini tatu vulu okukala aadhiginini ‘mokuulukila yalwe esimaneko’? (Tala wo ethano.)

¹⁰ Shoka oshihokithi, nziya konima sho e tu lombwele tu katuke tango tu ulukilathane ohole, Paulus okwe tu kumagidha tu ‘kale hatu longo nuudhiginini noinatu kala aananyalo.’ Omuntu ngoka omudhiginini, omulaadhi noha longo nuudhiginini. Uuna a pewa oshinakugwanithwa, ohe shi longo nondjungu. Omayeletumbulo 3:27, 28, otage tu ladhipike kutya: “Omuntu ino mu tindila eyakulo ewanawa ndyoka to vulu oku li mu yakulitha.” Onkene uuna twa mono gumwe a pumbwa ekwatho, ohatu ningi ngaashi tatu vulu tu mu kwathele. Ihatu kakadhala nenge tu dhiladhile kutya gulwe ote ke mu kwathela. — 1 Joh. 3:17, 18.

11. Oshike tashi vulu oku tu kwathela tu kale nekwatathano ewanawa nayalwe?

¹¹ Omukalo gumwe ishewe tatu vulu okuulika kutya otwa simaneka yalwe, omokukala hatu ya dhimine po nziya uuna ye tu uvitha nayi. Aaefeso 4:26 otaya ti: “Inamu kala mwa geya esiku alihe.” Omolwashike mbela? Ovelise 27 oya ti kutya ngele otwa ningi ngawo, ‘otatu ka pa omuhindadhi ompito.’ Okupitila mOmbiimbeli, Jehova ohe tu lombwele lwiikando tu dhiminathane po. Aakolossa 3:13, otaye tu ladhipike tu ‘dhiminathane po oondjo ethimbo kehe.’ Okudhimina po yalwe oshinima sha simana nohashi tu kwathele tu kale nekwatathano ewanawa nayalwe. Uuna twe shi ningi, ohatu ‘kokeke uukumwe wetu wOmombepo Ondjapuki omolwombili ndjoka tayi tu mangele kumwe.’ (Ef. 4:3) Osha yela kutya okudhimina po ohaku humitha komeho uukumwe nombili mokati ketu.

12. Jehova ohe tu kwathele ngiini tu kale hatu dhimine po?

¹² Odhoshili kutya otashi vulika shi kale oshidhigu okudhimina po mboka ye tu uvitha nayi. Ihe kekwatho lyombepo yaKalunga otatu vulu okupondola. Konima sho e tu kumagidha tu kale tu “holathane nohole yomuule” ‘nokulonga nuudhiginini,’ Ombiimbeli otayi tu lombwele kutya: “Kaleni mwa udhilila ombepo ondjapuki.” Shoka osha hala okutya ombepo ondjapuki yaKalunga otayi vulu oku tu pa uulaadhi nomukumo. Onkene ombepo yaKalunga otayi vulu oku tu kwathela tu ulike ohole yomuule nokudhimina po yalwe ethimbo kehe. Nomolwaashono hatu pula Jehova twa mana mo e tu kwathele. — Luk. 11:13.

‘INAMU KALA ETOPOKO MOKATI KENI’

13. Oshike tashi vulu okweeta etopoko mokati ketu?

¹³ Egongalo olya thikama po ‘maantu ayehe’ ya za momaputuko ga yoolokathana. (1 Tim. 2:3, 4) Ngele inatu kotoka, iinima ngaashi etokolo lyopaumwene ngele tashi ya pokuzala nokwiiyopaleka, uukolele nosho wo omainyanyudho, otayi vulu okweeta etopoko. (Rom. 14:4; 1 Kor. 1:10) Molwaashoka ‘Kalunga okwe tu longa tu kale tu holathane,’ otwa pumbwa okukala twa kotoka kaatu dhiladhile kutya omatokolo getu gopaumwene oga simana ge vule gayalwe. — Fil. 2:3.

14. Otu na aluhe okukambadhala okukala twa tya ngiini, nomolwashike?

¹⁴ Otatu vulu wo okuyanda etopoko megongalo mokukambadhala okutsa yalwe omukumo nokuyapa epepelelo ethimbo alihe. (1 Tes. 5:11) Omathimbo opo ga zi ko, aantu mboka ya li inaaya ipyakidhila we nenge mboka ya kuthwa mo megongalo, oya galukile kegongalo. Otwe ya taamba ko nomaako agehe. (2 Kor. 2:8) Ndhindhilika shoka sha li sha ningilwa omumwameme gumwe ngoka a galukile kegongalo, konima sho a kala inaa ipyakidhila we uule woomvimvo omulongo. Okwa ti, “Kehe gumwe okwa li ta imemeha nokuminika ndje.” (Iil. 3:19) Mbela shoka oshe mu gumu ngiini? Okwa ti: “Onda li ndi wete oshikaha shaJehova sha fa tashi wilike ndje ndi kale ishewe nda nyanyukwa.” Onkene ngele otwa kala hatu tsu yalwe omukumo, Kristus ota vulu oku tu longitha tu gandje epepelelo kwaamboka ‘ya vulwa noya humbatekwa uudhigu’. — Mat. 11:28, 29.

15. Omomukalo guni ishewe tatu vulu okuhumitha komeho uukumwe? (Tala wo ethano.)

¹⁵ Omukalo gumwe ishewe tatu vulu okuhumitha komeho uukumwe, okupitila moohapu dhetu. Job 12:11 ota ti: “Ngaashi okutsi ku hole okuuva, osho wo elaka li hole okulola iikulya.” Ngaashi owala omuteleki ha lolo aluhe iikulya ye, opo a shilipaleke kutya oya towala nawa manga ineeyi pa yalwe, natse manga inaatu popya sha, otwa pumbwa okudhiladhila nawa kombinga yaashoka tatu ka popya. (Eps. 141:3) Elalakano lyetu na li kale aluhe okushilipaleka kutya shoka tu li pokupopya otashi tsu omukumo, otashi gandja epepelelo notashi ‘hokitha kaapulakeni.’ — Ef. 4:29.

16. Oolye unene ye na okukala ye na ohokwe mokupopya oohapu tadhi tsu omukumo?

¹⁶ Aasamane nosho wo aavali, oyo unene ye na okukala ya kotoka, opo oohapu dhawo dhi kale tadhi tsu omukumo. (Kol. 3:19, 21; Tit. 2:4) Aakuluntugongalo oye na wo okukala onzo yepepelelo nehekeleko, ye li aasita yoshigunda shaJehova. (Jes. 32:1, 2; Gal. 6:1) Eyeletumbulo limwe lyOmbiimbeli ota li tu dhimbulukitha kutya: ‘Ohapu oyo opala ngiini pethimbo lyu uka!’ — Omayel. 15:23.

ULIKA OHOLE ‘MIILONGA NOMOSHILI’

17. Ongiini tatu vulu okuulika kutya otu hole shili aamwatate naamwameme?

¹⁷ Omuyapostoli Johannes ote tu ladhipike tu ‘ulike ohole miilonga nomoshili, ihe hamoohapu nomokupopya.’ (1 Joh. 3:18) Otwa hala okukala tu hole aamwatate naamwameme tashi zi komutima. Ongiini tatu vulu okuninga ngawo? Ngele otwa kala hatu kala naamwatate naamwameme ethimbo olindji, otatu ka hedha popepi nayo notatu ka kokeka ohole yetu yokuholathana. Onkee ano konga oompito wu kale ethimbo pamwe nayalwe ngaashi pokugongala nomiilonga yokuuvitha. Kala ho talele po yalwe. Ngele otwe shi ningi, otatu ka ulika kutya ‘otwa longwa kuKalunga tu kale tu holathane.’ (1 Tes. 4:9) Onkee ano otatu ka tsikila okumona nkene “sho opalelela aantu ayehe ngele taa kala ye holathane ngaashi aamwayinathana.” — Eps. 133:1.