Nkene wu na okugandja omayele

1. Olye a pumbwa okugandja omayele? Shi yelitha.

MBELA owu uvitile ngiini okugandja omayele kuyalwe? Yamwe ohaya kala ya nyanyukwa oku ga gandja. Yalwe ihaya kala ya hala okugandja omayele, noihaya kala ya manguluka uuna taye ga gandja. Nonando ongawo, atuheni otwa pumbwa okugandja omayele omathimbo nomathimbo. Omolwashike mbela? Omolwaashoka Jesus okwa popi kutya aalanduli ye yashili otaya ka dhimbululwa mo omolwohole ndjoka haya ulukilathana. (Joh. 13:35) Omukalo gumwe ngoka hatu ulike ohole ndjoka omo ku pa aamwatate naamwameme omayele uuna sha pumbiwa. Oohapu dhaKalunga otadhi ti kutya, “ohole yakuume” ohayi koko ‘omolwehalo lyokupukulula.’ — Omayel. 27:9.

2. Aakuluntugongalo oye na okukala taya vulu okuninga shike, nomolwashike? (Tala wo oshimpungu “Omayele pokugongala kwomokati koshiwike.”)

² Aakuluntugongalo oye na okukala ye shi nkene ye na okugandja omayele kuyalwe. Okupitila muJesus, Jehova okwa langeka po aalumentu mbaka ya tonatele egongalo. (1 Pet. 5:2, 3) Omukalo gumwe haye shi ningi omokugandja omayele ga kankamena kOmbiimbeli, okupitila miipopiwa mbyoka haya gandja megongalo. Oye na wo okugandja omayele koonzi pauhandimwe, mwa kwatelwa naandhoka dha puguma mo moshigunda. Ongiini aakuluntugongalo nosho wo atuheni tatu vulu okugandja omayele omawanawa?

3. (a) Ongiini tatu vulu okwiilonga okugandja omayele omawanawa? (Jesaja 9:6; tala wo oshimpungu “Holela Jesus uuna to gandja omayele.”) (b) Oshike tatu ka kundathana moshitopolwa shika?

³ Otatu vulu okwiilonga oshindji kombinga yankene tatu vulu okukala hatu gandja omayele omawanawa mokukonakona iiholelwa mbyoka ya popiwa mOmbiimbeli, unene tuu shaJesus. Limwe lyomomadhinasimaneko ngoka hi ithanwa olyo “Omupukululi omukumithi.” (Lesha Jesaja 9:6.) Moshitopolwa shika, otatu ka kundathana shoka tatu vulu okuninga uuna twa pulwa tu gandje omayele, naashoka tatu vulu okuninga uuna twa pumbwa okugandja omayele, nonando inatu pulwa tu shi ninge. Otatu ka kundathana wo nkene sha simana okugandja omayele pethimbo lya opala nomomukalo omwaanawa.

UUNA TWA PULWA TU GANDJE OMAYELE

4-5. Uuna gumwe e tu pula tu mu pe omayele, epulo lini tu na okwiipula tango? Gandja oshiholelwa.

⁴ Uuna gumwe e tu pula tu mu pe omayele, ohatu kala twa hala okuninga shike? Ohatu kala tu uvite shi li uuthembahenda, nohatu kala twa hala oku mu kwathela nziya. Ihe tango otu na okwiipula ngeyi, ‘Mbela ondi na ngaa owino yoku mu pa omayele monkalo ndjino?’ Omathimbo gamwe omukalo dhingi moka tatu vulu oku mu kwathela haku mu pa omayele tse yene, ihe pehala lyaashono otwa pumbwa oku mu lombwela a ye kugulwe ngoka e shi nawa onkalo ndjoka.

⁵ Tala koshiholelwa shika. Natu tye andola kuume koye okwa kwatwa kuuvu wa kwata miiti. Okwe ku lombwele kutya okwa tameka okuninga omapekapeko kombinga yepango ndyoka ta vulu okuhogolola, opo nduno okwe ku pula kutya epango lini wu wete li li hwepo. Nonando owu wete kutya epango lyontumba olyo li li hwepo, ku na ontseyo yopaunamiti noino dheulilwa okupanga uuvu mboka. Monkalo ya tya ngawo, omukalo dhingi to vulu okukwathela kuume koye, omoku mu ambidhidha a mone gumwe ngoka a dheulilwa okupanga uuvu mboka.

6. Omolwashike shi li nawa okutegelela manga inaatu gandja omayele?

⁶ Nonando otu uvite kutya otu na ontseyo mokugandja omayele moshinima shontumba, otwa pumbwa okutegelela uule wokathimbo okafupi manga inaatu yamukula omuntu ngoka e tu pula tu mu pe omayele. Omolwashike mbela? Omayeletumbulo 15:28 otaga ti: ‘Omuyuuki oha ipyakidhile neyamukulo.’ Ongiini ngele otatu dhiladhila kutya otu shi eyamukulo? Natango otashi vulika twa pumbwa ethimbo tu ninge omapekapeko, tu galikane nokutedhatedha. Opo nduno otatu vulu okukala tu na einekelo kutya eyamukulo lyetu oli li metsokumwe nankene Jehova e uvitile oshinima shoka. Natu taleni koshiholelwa shomuhunganeki Natan.

7. Oshike to ilongo koshiholelwa shomuhunganeki Natan?

⁷ Sho a li ta popi nomuhunganeki Natan, omukwaniilwa David okwa li e mu lombwele kutya okwa hala okutungila Jehova otempeli. Natan okwe mu lombwele nziya e shi ninge. Ihe Natan okwa li e na okupopya tango naJehova. Omolwashike mbela? Omolwaashoka, Jehova ka li a hala David oye a tunge otempeli. (1 Ondjal. 17:1-4) Ngaashi twe shi mono moshiholelwa shoka, uuna twa pulwa tu gandje omayele, otashi ka kala pandunge ‘okwiikwata mokupopya.’ — Jak. 1:19.

8. Omolwetompelo lini ishewe tu na okukala twa kotoka, uuna tatu gandja omayele?

⁸ Natu taleni ishewe ketompelo limwe kutya omolwashike tu na okukala twa kotoka, uuna tatu pe gumwe omayele. Ngele otwa pe gumwe omayele ga puka, otashi vulika tu ka pewe ombedhi ngele opwa ningwa oshinima oshiwinayi. Onkee ano, osha simana lela tu dhiladhile nuukeka manga inaatu gandja omayele.

OKUGANDJA OMAYELE, NONANDO INATU PULWA TU SHI NINGE

9. Aakuluntugongalo oya pumbwa okukala ye na uushili wuni, manga inaaya gandja omayele? (Aagalati 6:1)

⁹ Ethimbo nethimbo, aakuluntugongalo oye na okukatuka onkatu yotango ya gandje omayele komumwatate nenge komumwameme ngoka a “katuka kaashi li pandunge.” (Lesha Aagalati 6:1.) Omuntu otashi vulika a kale ta ningi omatokolo kaage li pandunge, ngoka lwanima tage ke mu ningitha a yone eyono lya kwata miiti. Elalakano lyaakuluntugongalo okukwathela omuntu a tsikile okukala mondjila ndjoka tayi fala komwenyo gwaaluhe. (Jak. 5:19, 20) Ihe opo omayele gawo ga vule oku mu kwathela, oye na okushilipaleka tango kutya omuntu ngoka okwa katuka shili kaashi li pandunge. Jehova okwe tu pitika atuhe tu ninge omatokolo gi ikolelela keiyuvo lyetu. (Rom. 14:1-4) Ongiini nduno ngele omumwatate okwa katuka shili kaashi li pandunge naakuluntugongalo oya tokola okukatuka onkatu yotango noye mu pe omayele?

10-12. Oshike aakuluntugongalo ye na okuninga uuna taya gandja omayele, nonando inaya pulwa ye shi ninge? Shi thaneka. (Tala wo omathano.)

¹⁰ Aakuluntugongalo mboka haya gandja omayele uuna inaaya pulwa ye shi ninge, ohaya kala ya taalela eshongo lyontumba. Ngiini mbela? Omuyapostoli Paulus okwa ti kutya omuntu otashi vulika a katuke kaashi li pandunge inee shi nongela. Onkee ano, opu na iinima yimwe mbyoka aakuluntugongalo ye na okuninga manga inaaya gandja omayele, opo shi ka kale oshipu komuntu ngoka taya ka pa omayele, a pulakene kuyo.

¹¹ Okugandja omayele, nonando inatu pulwa tu shi ninge, otashi vulu okuyelekanithwa nokukuna iimeno mevi ekukutu. Manga omunamapya inaa tameka okukuna, oha papula nokulongekidha nawa evi. Shoka ohashi kwathele evi li kale epu nawa, noku li longekidha manga inaa tameka okukuna. Opo nduno oha tameke okukuna. Nohugunina oha tekele opo oombuto dhi koke. Sha faathana, manga omukuluntugongalo inaa gandja omayele, nonando ina pulwa e shi ninge, oha longekidha nawa evi, oku shi popya pathaneko. Pashiholelwa, pethimbo tali opalele, omukuluntugongalo oha shilipaleke omumwatate kutya oku na ko nasha naye, nokwa hala okupopya naye kombinga yoshinima shontumba. Ngele ngoka ta gandja omayele oku shiwike nawa e li omunahole nomunambili, otashi ka kala oshipu kuyalwe ya taambe ko omayele ge.

¹² Pethimbo lyoonkundathana dhawo, omukuluntugongalo ota vulu okutsikila okuninga evi epu, oku shi popya pathaneko, moku mu lombwela kutya kehe gumwe oha ningi omapuko noha pumbwa omayele ethimbo nethimbo. (Rom. 3:23) Omukuluntugongalo okwa pumbwa okupopya newi etalala nonesimaneko, sho te mu ulukile okupitila mOmanyolo nkene a katuka kaashi li pandunge. Uuna omumwatate a zimine kutya okwa ninga epuko, omukuluntugongalo oha “kunu ombuto” moku mu yelithila momukalo gwa yela shoka e na okuninga opo a lundulule. Hugunina, omukuluntugongalo oha “tekele” ombuto mokupandula omumwatate tashi zi komutima nokugalikana pamwe naye. — Jak. 5:15.

13. Ongiini aakuluntugongalo taya vulu okushilipaleka kutya omuntu oku uvite ko omayele ngoka ta pewa?

¹³ Omathimbo gamwe, omuntu otashi vulika a kale kee uvite ko nawa omayele ngoka ta pewa. Aakuluntugongalo otaya vulu okuninga po shike, opo shoka kaashi ningwe? Aakuluntugongalo otaya vulu okupopya naye nombili moku mu pula omapulo, ya tale ngele omuntu oku uvite ko omayele ngoka ye mu pa, noku shi shoka e na okuninga opo e ga tule miilonga. — Omuuv. 12:11.

OKUGANDJA OMAYELE PETHIMBO LYOOPALA NOMOMUKALO OMWAANAWA

14. Omolwashike kaatu na okugandja omayele uuna twa geya? Shi yelitha.

¹⁴ Atuheni inatu gwanenena, onkee omathimbo gamwe ohatu ningi nohatu popi iinima mbyoka hayi uvitha nayi yalwe. (Kol. 3:13) Oohapu dhaKalunga otadhi ti kutya, omathimbo gamwe otashi vulika tu geyithe yalwe. (Ef. 4:26) Ihe otwa pumbwa okuyanda okugandja omayele uuna twa geya. Omolwashike mbela? Oshoka “ondjahi yomuntu ihayi longo shoka shu uka koshipala shaKalunga.” (Jak. 1:20) Ngele otwa gandja omayele uuna twa geya, otashi vulika tu ka nayipaleke onkalo. Shoka inashi hala kutya katu na okuhololela ngoka e tu uvitha nayi omadhiladhilo nosho wo omaiyuvo getu. Ihe otwa pumbwa okutegelela sigo oosho twa ngungumana, opo tu popye nomuntu ngoka e tu uvitha nayi. Otatu vulu okwiilonga sha kuElihu, ngoka a li a pe Job omayele omawanawa.

15. Oshike tatu ilongo koshiholelwa shaElihu? (Tala wo ethano.)

¹⁵ Elihu okwa kala ta pulakene kuJob uule womasiku, sho a kala ti ipopile komalundilo gaahekeleki ye aaniifundja. Elihu okwa li e uvitile Job olukeno. Ihe Elihu okwa li wo a geya sho Job a ndopa okupopila edhina lyaJehova, nokwa li a gandja unene eitulomo kuye mwene. Nonando ongawo, Elihu okwa li a tegelele ompito ye yi thike, nokwa li a popi naJob a ngungumana nonesimaneko sho te mu pe omayele. (Job 32:2; 33:1-7) Oshiholelwa shaElihu otashi tu longo oshili ya simana kutya: Oshiwanawa okugandja omayele pethimbo lya opala nomomukalo omwaanawa, to shi ningi nesimaneko nonohole. — Omuuv. 3:1, 7.

TSIKILA OKUGANDJA NOKUTAAMBA KO OMAYELE

16. Oshike wi ilonga mEpisalomi 32:8?

¹⁶ Enenedhiladhilo lyoshitopolwa shika otali ti kutya ‘Jehova ote tu wilike e te tu tonatele.’ (Lesha Episalomi 32:8.) Shoka otashi ulike kutya ota kala aluhe noku tu ambidhidha. Ihe tu pe owala omayele, ihe ohe tu kwathele wo tu ga tule miilonga. Shoka kashi shi tuu oshiholelwa oshiwanawa kutse! Uuna tu na uuthembahenda wokupa yalwe omayele, natu holele Jehova moku ya tonatela, noku ya pa ekwatho mpoka tatu vulu, opo tu ya kwathele ya pondole.

17. Aakuluntugongalo ohaye tu ningitha tu kale tu uvite ngiini, uuna taye tu pe omayele ga kankamena kOmbiimbeli? Shi yelitha. (Jesaja 32:1, 2)

¹⁷ Ngashingeyi otwa pumbwa okugandja nokutaamba ko omayele omawanawa shi vulithe nale. (2 Tim. 3:1) Sho aakuluntugongalo haya gandja omayele gokondandalunde, ga kankamena kOmbiimbeli, oya “fa omilonga dhomeya tadhi tondoka mombuga.” (Lesha Jesaja 32:1, 2.) Ookuume mboka ye shi shoka twa hala okuuva, ihe ohaye tu lombwele shoka twa pumbwa okuuva, ohaye tu pe omagano ge na ondilo ga fa “iiyapula yoshingoli moshiyaha shoshisiliveli.” (Omayel. 25:11) Atuheni natu tsikileni okukala tu na owino ndjoka twa pumbwa, opo tu gandje nokutaamba ko omayele omawanawa.