Mbela natango oto vulu ngaa okwiilonga komalongo gOmbiimbeli gopetameko?

1. Omalongo gOmbiimbeli oge ku guma ngiini, sho wa tameke okwiilonga oshili?

OMALONGO gOmbiimbeli gopetameko oga lundulula onkalamwenyo yetu. Pashiholelwa, sho twi ilongo kutya edhina lyaKalunga oJehova, otwa ningi ookuume ke. (Jes. 42:8) Sho twi ilongo oshili kombinga yonkalo yoonakusa, inatu kala we tu na omaipulo ngele mboka tu hole ya sa otaya mono iihuna. (Omuuv. 9:10) Naasho twi ilongo kombinga yeuvaneko lyaKalunga lyoParadisa kombanda yevi, inatu kala we tu na omalimbililo kombinga yonakuyiwa yetu. Ihe otwa kala tu na einekelo kutya itatu ka kala owala nomwenyo uule wokathimbo okafupi, ano uule womimvo 70 nenge 80, ihe osigo aluhe. — Eps. 37:29; 90:10.

2. 2 Petrus 1:12, 13 ota ulike ngiini kutya nokuli nAakriste ya pyokoka otaya vulu okumona mo uuwanawa momalongo gOmbiimbeli gopetameko?

² Inatu dhimbwa nando kutya omalongo gOmbiimbeli gopetameko oga simana. Montumwafo ye ontiyali, omuyapostoli Petrus okwa li a nyolele Aakriste mboka ya “kolelela moshili.” (Lesha 2 Petrus 1:12, 13.) Nonando ongawo, oya li ya taalela iiponga yopambepo megongalo, mwa kwatelwa aalongi aafundja naalumentu aakeenakonasha naKalunga. (2 Pet. 2:1-3) Petrus okwa li a hala okunkondopaleka aamwahe, opo e ya kwathele ya kondjithe iiponga mbyoka. Opo a ninge ngawo, okwa li e ya dhimbulukitha kombinga yomalongo gamwe ngoka yi ilonga nale. Omalongo ngoka oga li ge ya kwathele ya kale aadhiginini kuJehova sigo okehulilo.

3. Omolwashike Aakriste ayehe ya pumbwa okutsikila nokutedhatedha kombinga yomalongo gOmbiimbeli gopetameko? Shi thaneka.

³ Nonando otu li nale Aakriste ya pyokoka, otatu vulu natango okwiilonga iiyilongomwa iipe komalongo gOmbiimbeli gopetameko. Natu shi thaneke ngeyi: Omuteleki a pyokoka nomuteleki ngoka opo ti ilongo okuteleka, ayehe otashi vulika ya longithe iitowaleki ya faathana sho taya teleke. Ihe mokweendela ko kwethimbo omuteleki ngoka a pyokoka, oha kala e shi nawa okulongitha iitowaleki oyo tuu mbyoka momikalo omipe nodha yoolokathana. Sha faathana, mboka ya longela Jehova ethimbo ele nosho wo aakonakoni yombiimbeli aape, ayehe otashi vulika yi ilonge iiyilongomwa ya yoolokathana komalongo gOmbiimbeli gopetameko. Oonkalo dhetu nenge uuthembahenda mboka tu na miilonga yaJehova, otashi vulika wa lunduluka konima sho twa ninginithwa. Uuna twa dhiladhila kombinga yomalongo gOmbiimbeli ngoka twi ilonga monakuziwa, ohatu mono omikalo omipe nkene taga vulu oku tu kwathela nonkalo ndjoka tu li muyo ngashingeyi. Natu taleni shoka Aakriste ya pyokoka taya vulu okwiilonga komalongo gOmbiimbeli gopetameko gatatu.

JEHOVA OYE OMUSHITI

4. Sho twi ilongo kutya Jehova oye Omushiti, oshe tu guma ngiini?

⁴ “Ngoka a tungu ayihe, oKalunga.” (Heb. 3:4) Otu shi kutya opulanete yetu niinima ayihe mbyoka yi na omwenyo, oya shitwa kOmushiti omunankondo nomunandunge. Molwaashoka oye e tu shita, oku tu shi nawa lela. Shimwe ishewe, oku na ko nasha natse, noku shi shoka sha dhenga mbanda kutse. Onkee ano okukala tu shi oshili ndjoka kutya Jehova oye Omushiti, osha lundulula onkalamwenyo yetu momikalo odhindji omiwanawa, nosha ningitha onkalamwenyo yetu yi kale tayi ti sha.

5. Oshili yini tayi vulu oku tu kwathela tu kokeke eifupipiko? (Jesaja 45:9-12)

⁵ Sho tu shi kutya Jehova oye Omushiti, ohashi tu kwathele tu kale aaifupipiki. Konima sho Job a kala ta gandja unene eitulomo kuye mwene nosho wo kuyalwe, Jehova okwa li e mu dhimbulukitha kutya oye Omushiti Omunankondoawike. (Job 38:1-4) Shoka osha li sha kwathele Job a mone kutya oondjila dhaKalunga odhi vule kokule oondjila dhaantu. Metsokumwe naashoka, lwanima omuhunganeki Jesaja okwa nyola oohapu tadhi ti: “Eloya otali pula tuu omuhongi gwiiyuma shoka ta ningi?” — Lesha Jesaja 45:9-12.

6. Uunake unene sha simana okudhiladhila kombinga yankene Omushiti gwetu e li omunandunge nomunankondo? (Tala wo omathano.)

⁶ Uuna gumwe a kala ta longele Jehova uule wethimbo, otashi vulika a tameke okukala i inekela unene moondunge dhe mwene, pehala lyokukonga ewiliko kuJehova nomOohapu dhe. (Job 37:23, 24) Ihe mbela ohashi mu kwathele ngiini ngele okwa dhiladhila muule kombinga yOmushiti, Jehova nosho wo kombinga yankene e li omunandunge nomunankondo? (Jes. 40:22; 55:8, 9) Oshili ndjoka ya simanenena otayi ke mu kwathela a kale omwiifupipiki, noku mone kutya etaloko lyaJehova olya simana unene li vule lye.

7. Rahela okwa ningi po shike, opo a taambe ko elunduluko ndyoka lya li lya ningwa mehangano lyaJehova?

⁷ Omumwameme Rahela, ngoka ha zi moSlovenia, okwa mona kutya okudhiladhila kombinga yOmushiti gwe oshe mu kwathela a taambe ko elunduluko ndyoka lya li lya ningwa mehangano lyaJehova. Okwa ti: “Omathimbo gamwe, kasha shi hashi kala oshipu kungame okutaamba ko omatokolo ngoka ga ningwa kwaamboka taya kwatele komeho. Pashiholelwa, konima sho nda tala, Omatseyitho okuza kOlutuwiliki gomo 2023, okavidio oka-8, onda li nda kumwa sho nda mono oshikando shotango omumwatate ta gandja oshipopiwa e na oombenzi. Onkene onda galikana kuJehova a kwathele ndje ndi taambe ko elunduluko ndyoka.” Rahela okwa li a ndhindhilike kutya molwaashoka Jehova oye Omushiti gwegulu nogwevi, ota vulu okuwilika ehangano lye momukalo gwa dhenga mbanda. Ngele oho mono oshidhigu okutaamba ko euvoko nelunduluko epe, oto vulu okutedhatedha neifupipiko koonkondo dhOmushiti nosho wo kuunongo we mboka wa shiga ko. — Rom. 11:33-36.

OMOLWASHIKE KALUNGA A ETHA OKUMONA IIHUNA KU KALE PO?

8. Otwa mona uuwanawa wuni, sho twi ilonga kutya omolwashike Kalunga a etha okumona iihuna ku kale po?

⁸ Omolwashike Kalunga a etha okumona iihuna ku kale po? Yamwe mboka inaaya vula okumona eyamukulo kepulo ndyoka, ohaya kala ya geela Kalunga nenge ya thike pehulithodhiladhilo kutya ke ko. (Omayel. 19:3) Mepingathano naashoka, ngoye owi ilonga kutya uulunde nosho wo okwaagwanenena hoka twa thigulula, oko haku etitha okumona iihuna, ihe ke shi Jehova. Owi ilonga wo kutya sho Jehova hi idhidhimikile aantu, osha kwathela aantu omamiliyona ye mu tseye nokumona yoyene nkene ta ka hulitha po thiluthilu okumona iihuna. (2 Pet. 3:9, 15) Iinima mbyoka oye ku hekeleka, noye ku hedhitha popepi naye.

9. Omoonkalo dhini tashi vulika tu dhimbulukwe omatompelo kutya omolwashike Jehova a etha okumona iihuna ku kale po?

⁹ Otu shi kutya omolwashike twa pumbwa okwiidhidhimika, manga twa tegelela Jehova a hulithe po okumona iihuna. Ihe uuna tse nenge mboka tu hole, twi iyadha twa yemata, twa ningilwa okwaanuuyuuki nenge twa silwa, otashi vulika tu ipule kutya omolwashike Jehova itaa hulitha po okumona iihuna meendelelo. (Hab. 1:2, 3) Moonkalo dha tya ngawo, oshi li pandunge ngele otwa dhiladhila komatompelo kutya omolwashike Jehova ha etha aayuuki ya mone iihuna.a (Eps. 34:19) Otatu vulu wo okudhiladhila kombinga yelalakano lye lyokuhulitha po okumona iihuna sigo aluhe.

10. Anne okwa li i idhidhimikile ngiini eso lyayina?

¹⁰ Oshili kombinga yokumona iihuna otayi vulu oku tu kwathela tu idhidhimike. Anne, ngoka ha zi mokantuntu kedhina Mayotte, ke li mefuta lyaIndia, okwa ti: “Sho meme a hulitha konima yomimvo omishona dha ka pita, osha li sha uvitha ndje nayi noonkondo. Ihe onda kala nokwiidhimbulukitha pandjigilile kutya Jehova haye ha etitha okumona iihuna. Okwa halelela okuhulitha po okumona iihuna koludhi kehe nokuyumudha aantu mboka tu hole ya sa. Okutedhatedha kiinima mbyoka, okwa kwathela ndje ndi kale ndi na ombili yopamadhiladhilo, naashoka ohashi nyanyudha ndje.”

11. Ongiini okukala tu shi kutya omolwashike Jehova a etha okumona iihuna ku kale po, haku tu kwathele tu tsikile nokuuvitha?

¹¹ Okukala tu shi kutya omolwashike Kalunga a etha okumona iihuna ku kale po, otaku vulu oku tu inyengitha tu tsikile nokuuvitha. Konima sho a yelitha kutya eidhidhimiko lyaJehova otali ti ehupitho kwaamboka yi itedhulula, Petrus okwa nyola a ti: “Ne aantu omu na okwaadhika mwa tya ngiini? Omu na okwiiyapulila Kalunga noku mu igandjela [nokulonga iilonga yometilokalunga, NW].” (2 Pet. 3:11) ‘Iilonga mbyoka yometilokalunga’ oya kwatela mo iilonga yetu yokuuvitha. Ngaashi owala Tate yetu, natse otu hole aantu. Otwa hala ya ka kale muuyuni waKalunga moka tamu ka kala uuyuuki. Jehova okwa gandja ompito neidhidhimiko kaantu yomoshitopolwa sheni ye mu longele. Kashi li tuu uuthembahenda okukala omulongi pamwe naKalunga, nokukwathela aantu oyendji ngaashi tashi vulika yi ilonge kombinga ye manga ehulilo inaali ya! — 1 Kor. 3:9.

OTU LI “MOMASIKU GAHUGUNINA”

12. Okukala tu shi kutya otu li “momasiku gahugunina,” oshe tu etela ngiini uuwanawa?

¹² Ombiimbeli oya popya oshili kombinga yaantu kutya otaya ka kala ya tya ngiini “momasiku gahugunina.” (2 Tim. 3:1-5, yelekanitha NW) Uuna tu wete nkene aantu momudhingoloko gwetu tayi ihumbata, ohatu mono uushili woshinima shoka. Uuna tu wete iikala yaantu tayi ende tayi nayipala, ohatu kala twa tompwa shi vulithe nale kutya Oohapu dhaKalunga odhi shi okwiinekelwa. — 2 Tim. 3:13-15.

13. Metsokumwe nethaneko lyaJesus ndyoka tali adhika muLukas 12:15-21, omapulo geni tashi vulika tu ipule?

¹³ Okukala tu shi kutya otu li momasiku gahugunina ohashi tu kwathele wo tu longithe nawa ethimbo lyetu. Ndhindhilika shoka tatu vulu okwiilonga kombinga yokulongitha nawa ethimbo lyetu kethaneko lyaJesus ndyoka tali adhika muLukas 12:15-21. (Lesha.) Omolwashike omulumentu omuyamba i ithanwa ‘egoyaʼ? Ine mu ula egoya molwaashoka a li omuyamba, ihe omolwaashoka a li a pititha komeho iinima mbyoka inaayi simana. Okwa li i ‘ilikolele omaliko, ihe momeho gaKalunga ka li omuyamba.’ Omolwashike oshinima shoka sha li sha endelela? Kalunga okwa lombwele omulumentu ngoka a ti: “Uusiku mbuka wonena omwenyo gwoye oto gu kuthwa.” Kunena, sho tu wete ehulilo lyuuyuni mbuka tali hedha popepi, otashi vulika tu ipule omapulo ngaka: ‘Mbela omalalakano gandje otaga ulike ngaa kutya otandi longitha nawa ethimbo lyandje? Ohandi kwathele aamwandje yi itulile po omalalakano geni? Mbela ohandi longitha oonkondo dhandje, ethimbo lyandje niiniwe yandje ndi ilikolele omaliko gandje mwene, nenge ondi ilikolele omaliko megulu?

14. Ngaashi twe shi mona moshimoniwa shaMiki, omolwashike shi li pandunge okutedhatedha kOmanyolo ngoka taga ulike kutya otu li momasiku gahugunina?

¹⁴ Etaloko lyetu li na nasha nonkalamwenyo otali vulu okulunduluka, uuna twa dhiladhila kombinga yuumbangi mboka tawu ulike kutya otu li momasiku gahugunina. Shoka osho sha li sha ningilwa omumwameme gwedhina Miki. Okwa ti: “Sho nda mana osikola, onda li nda hala oku ki ilongela okutseya nawa iinamwenyo. Onda li wo ndi na elalakano lyokukokola ondjila pandjigilile, nelalakano lyoku ka longela hoka ku na ompumbwe onene. Ookuume ya pyokoka oya li ya pe ndje omayele ndi dhiladhile nawa ngele otandi ka vula ngaa okwaadha eithano lyandje ndyoka nda li nda hala, nopethimbo opo tuu mpoka otandi gwanitha po omalalakano gandje gopambepo.” Oya dhimbulukitha ndje kutya masiku uuyuni mbuka owu li pokuhula po. Shimwe ishewe, muuyuni uupe, otandi ka kala ndi na ethimbo lya gwana lyokukonakona iinamwenyo oyindji ngaashi nda hala. Onkene onda hogolola eithano limwe ndyoka itaali ka kutha po ethimbo lyandje olindji, nota li ka kwathela ndje ndi kale ndi na uunkulungu mboka tawu ka kwathela ndje monkalamwenyo. Onda li nda mono iilonga mbyoka tayi vulu okwaambidhidha ndje sho tandi kokola ondjila pandjigilile, nolwanima sho nda ka tembukila koEcuador, hoka kwa li ku na ompumbwe onene. Ngashingeyi Miki nomusamane gwe, otaya longo miilonga yuutonatelishikandjo moEcuador.

15. Aantu otashi vulika yi inyenge ngiini konkundana ombwanawa? Gandja oshiholelwa. (Tala wo omathano.)

¹⁵ Inatu pumbwa okuteka omukumo, uuna aantu inaaya ulika ohokwe monkundana ombwanawa oshikando shotango. Aantu ohaya vulu okulundulula. Natu taleni koshiholelwa shaJakob, omumwayinamati gwaJesus. Okwa li a mono sho Jesus ta koko, sho a ningi Mesiasa, naasho a li ha longo aantu momukalo dhingi. Ihe uule womimvo, Jakob ka li a landula Jesus. Jakob okwa li owala a ningi omulanduli omulaadhi gwaJesus, konima sho Jesus a yumuka.b (Joh. 7:5; Gal. 2:9) Ino pumbwa okweetha po okuuvithila aakwanezimo yoye mboka kaaye na natango ohokwe, nenge wu ethe po okushuna ko kwaamboka inaaya taamba ko natango etumwalaka lyUukwaniilwa. Dhimbulukwa kutya otu li momasiku gahugunina, onkene iilonga yetu yokuuvitha oya endelela. Shoka to ya uvithile kunena, otashi vulika shi ke ya gume lwanima, tashi vulika nokuli konima ngele uudhigu uunene wa tameke.c

KALA ALUHE HO PANDULA OMADHIMBULUKITHO GAJEHOVA

16. Uuwanawa wuni wa mona mo momadhimbulukitho ga Jehova? (Tala wo oshimpungu “Longitha oshili yOmbiimbeli wu kwathele yalwe.”)

¹⁶ Iikulya yimwe yopambepo mbyoka hatu pewa kehangano lyaJehova, oya longekidhilwa aantu mboka inaaya uva nando onale kombinga yomalongo gOmbiimbeli gopetameko. Pashiholelwa, oshipopiwa shomontaneho shoka hatu pewa oshiwike kehe, iitopolwa yimwe, nuuvidio mboka wu li kepandja lyetu lyokointaneta, jw.org nosho wo iifo yetu yomuukalele, oya nuninwa unene mboka kaaye shi Oombangi. Nonando ongawo, natse ohatu mono wo uuwanawa momadhimbulukitho ngoka. Oshoka ohaga kokeke ohole yetu yokuhola Jehova, haga koleke eitaalo lyetu mOohapu dhe, nohage tu kwathele nkene tatu vulu okulonga yalwe nomupondo omalongo gopetameko. — Eps. 19:7.

17. Omoonkalo dhini tashi vulika wu dhiladhile komalongo gOmbiimbeli gopetameko?

¹⁷ Tu li Oombangi dhaJehova, ohatu kala twa nyanyukwa uuna euvoko lyetu lyoshili yOmbiimbeli lya pupalekwa. Ihe ohatu ulike wo olupandu olunene momalongo gOmbiimbeli ga simanenena, ngoka twi ilonga tango noge tu kwathela tu hedhe popepi naJehova. Uuna twa pewa ewiliko okuza kehangano lyetu, ihe ohatu dhiladhila kutya etaloko nenge omukalo gwetu gwokuninga iinima ogu li hwepo, eifupipiko otali ke tu kwathela tu dhimbulukwe kutya Jehova, Omushiti ngoka omunandunge nomunankondo, oye ta wilike ehangano. Uuna tatu idhidhimikile eshongo, nenge gumwe ngoka tu hole ti idhidhimikile eshongo, otatu vulu okukala tu na eidhidhimiko, nokudhiladhila kutya omolwashike Jehova a etha okumona iihuna ku kale po. Uuna tatu tokola wo nkene tatu ka longitha ethimbo lyetu niiniwe yetu, otwa pumbwa okudhimbulukwa kutya otu li momasiku gahugunina. Omadhimbulukitho gaJehova naga tsikile oku tu nkondopaleka, oku tu ladhipika, noku tu ninga aanandunge.