Ekwatho lyopaunamiti — Shoka Uukwaniilwa waKalunga tawu ka ninga

Momasiku 22 Mei 2023, Dr. Tedros Adhanom Ghebreyesus, omuwiliki omukuluntu gwEhangano lyUundjolowele mUuyuni, okwa ti: “Itashi ti kutya sho ngashingeyi omukithi gwoCOVID-19 gwa talika ko muuyuni kaagu li we oshinima sha kwata miiti, itagu vulu okutula uukolele waantu moshiponga. . . . Otatu vulu okukala nuushili kutya komasiku gokomeho otaku ka holoka omikithi dhilwe dhekomba, notwa pumbwa okukala twe dhi ilongekidhila.”

Aantu oyendji onkee ngaa taya tsikile okwiidhidhimikila uuwehame wopalutu nowopamadhiladhilo, mboka wa etithwa koshivu sho-corona. Mbela omapangelo nomahangano ngoka haga sile oshimpwiyu uukolele waantu, otaga ka kala ngaa gi ilongekidhila omukithi gwontumba gwekomba ngoka tashi vulika gu ka holoke, noku tu kwathela nomupondo nomaupyakadhi gopalutu nogopamadhiladhilo ngoka tatu kondjo nago ngashingeyi?

Ombiimbeli oye tu lombwela kombinga yepangelo ndyoka tali vulu oku tu pa ekwatho lyopaunamiti ndyoka twa pumbwa. Oya ti kutya “Kalunga komegulu ota ka dhika po oshilongo” nenge tu tye epangelo. (Daniel 2:44) Kohi yelelo lyepangelo ndyoka, “kape na nando ogumwe muSion ta ka tya: ‘Otandi ehama.’” (Jesaja 33:24) Kehe gumwe ota ka kala e na uukolele noku na oonkondo, ngaashi a li pethimbo lyuugundjuka. — Job 33:25.