Omaimbilo ngoka tage tu hedhitha popepi naKalunga

Omusika omagano omawanawa ga za kuJehova. Ohayi vulu okuguma omadhiladhilo getu, okulundulula nkene tu uvite noku tu tsa omukumo. Shono osho shi li ngawo nomaimbilo getu gokOpolohalama yotiivii JW. Omaimbilo ngoka otaga vulu nokuli oku tu hedhitha popepi naJehova.

Okuza mo 2014, omaimbilo ngoka haga kala kOpolohalama yotiivii JW ge vulithe po 70 oga totwa, nongashingeyi limwe lyomomaimbilo ngoka olya tolokwa momalaka ge vulithe po 500. Ihe otashi vulika wi i pule to ti: ‘Oolye haya longekidha omaimbilo ngoka nohaga nyanyangidhwa ngiini?’

Ilonga nkene aamwatate haya longekidha omaimbilo

Omaimbilo gokOpolohalama yotiivii JW ohaga nyanyangidhwa kosipana yomusika yi li mOshikondo shokukwata omawi nuuvidio, ndjoka hayi longo kohi yewiliko lyOkomitiye yOkulonga yOlutuwiliki. Osipana yomusika oya thikama po maamwatate naamwameme 13, mboka haya kwathele mokutota omaimbilo, mokukwata omusika, mokutula iinima pomahala nosho wo mokukwathela niilonga yilwe yi nako nasha nomusika. Shimwe ishewe, Okomitiye yOkulonga aantu oya gandja epitikilo, opo aaiyambi mboka haya longo ye li komahala gawo muuyuni awuhe ya kwathele mokutota omaimbilo, mokuhika uuhumba nomokwiimba. Aamwatate naamwameme mbaka ohaya longitha iipewa yawo neifupipiko nopwaa na okwiikongela esimano.

Mbela eimbilo lyokOpolohalama yotiivii JW ohali longekidhwa ngiini? Tango, Okomitiye yOkulonga aantu ohayi tokola kutya eimbilo oli na okukala lya kankamena komanyolo geni nonokutya oli na okuguma ngiini aapulakeni. Osipana yomusika ohayi longekidha iinyangadhalwa yokutota omusika nosho wo oohapu dheimbilo. Ohapu kwatwa eimbilo lyomalolelo, ndyoka hali ka pulakenwa kOkomitiye yOkulonga aantu nongele oye yi pulakene, ohayi gandja ihe omaetopo ga gwedhwa po. Osipana yomusika ohayi pukulula eimbilo, e tayi li kwata oshikando shahugunina. Omaimbilo ngaka ohaga kwatelwa momahala ga yoolokathana, ngaashi momatungo giitayimbelewa nosho wo momagumbo.

Aamwatate ohaya longitha oopolohalama dhi ili nodhi ili dhokompiuta ya tote omaimbilo noku ga kwata. Ohaya longitha wo iinima ngaashi iihikomwa, omambako nosho wo iikwaniipangitho yilwe yokunyanyangidha omaimbilo. Omambako ohaga vulu okukotha N$ 1 519.27 sigo N$ 15 213.00. Mo 2020 otwa longitha N$ 1 753 920.00 miikwaniipangitho yokukwata omusika.

Mbela oonkambadhala dhini hadhi ningwa, opo omayambidhidho ga longithwe nawa? Pehala lyokukala nosipana yomusika onene moBetel, aaiyambi mboka haya longo ye li komahala gawo, oyo haya longithwa. Shimwe ishewe, aamwatate ohaya longitha opolohalama yokompiuta ndjoka hayi vulu okutota oomusika dha yoolokathana, pehala lyokwiithana aahiki yuuhumba oyendji koBetel ye ya kwatwe.

“Omaimbilo ngaka ohaga koleke eitaalo lyandje”

Aamwatate naamwameme oye hole okupulakena komaimbilo ngoka haga kala kOpolohalama yotiivii JW. Omumwameme Tara, ngoka ha zi moNdowishi ota ti: “Omaimbilo ohaga kwathele ndje ndi kale nda ngungumana, uuna tandi ipula unene. Oku ga pulakena melaka ndyoka nda yama, osha fa owala Jehova ta papatele ndje.” Omumwatate Dmitry gwokoKazakhstan, ota ti: “Ondi hole okupulakena komaimbilo ngoka ge li metsokumwe nomithikampango dhOmbiimbeli, oshoka omuntu iho kala we ga limbililwa. Ohaga kwathele ndje wo ndi kale tandi gandja eitulomo kekwatathano lyandje naJehova.”

Omumwameme Delia gwomoSouth Afrika ota hokolola nkene ha kala e uvitile omaimbilo gokOpolohalama yotiivii JW. Ota ti: “Omaimbilo ngaka ohaga koleke eitaalo lyandje. Uuna nda yemata nenge nda taalela eshongo lyontumba, ohapu kala aluhe eimbilo ndyoka tali kwathele ndje lela monkalo yandje. Okupulakena owala koongowela dhomaimbilo, olundji ohaku vulu okulundulula nkene ndi uvite.”

Omaimbilo gokOpolohalama yotiivii JW oge holike kaantu oyendji. Omumwameme Lerato gwomoSouth Afrika ota ti: “Eimbilo Oparadisa oyi li popepi nosho wo Otwa tegelela uuyuni uupe, ohaga kwathele ndje ndi thaneke momadhiladhilo tandi hambelele meme a yumudhwa. Uuna aluhe tandi pulakene komaimbilo ngoka, ohandi kala nda fa ndi mu wete ta matuka u uka kungaye a papatele ndje.”

Eimbilo limwe olya li lya kwathele lela omugundjuka gumwe gwomoSri Lanka. Ota ti: “Omulongi gwetu gwiinima yuunongononi okwa li a ula ndje nayi komeho gaanasikola ooyakwetu, molwaashoka owala ndi li Onzapo yaJehova. Onda li nda kwatwa kuumbanda nokanda li ndi shi kutya nandi tye shike. Sho nda yi kegumbo meme okwa ladhipike ndje ndi pulakena keimbilo ‘Study Makes You Strong.’ Olya kwathele ndje ndi mone kutya onda pumbwa okuninga omapekapeko nokukala ndi ilongekidha oku mu yamukula. Esiku lya landula ko onda li nda popi nomulongi gwandje. Okwa li a pulakene ndje nokwa ti kutya ngashingeyi oku uvite ko nawa eitaalo lyOonzapo dhaJehova. Otandi pandula ehangano lyaJehova sho hali tu pe omaimbilo taga tsu omukumo.”

Iimaliwa mbyoka hatu longitha tu nyanyangidhe omaimbilo ngaka ohayi zi peni? Omomayambidhidho gomuuyuni awuhe, ngoka hamu gandja tamu longitha omikalo dha yoolokathana ndhoka dhi li ko-donate.jw.org. Otwa pandula komayambidhidho geni gehalo ewanawa.