Embo lyokukonakona Ombiimbeli lya yooloka ko komakwawo

MuJanuali 2021, oshilyo shimwe shOlutuwiliki osha li sha tseyitha kutya otapu ka pita embo epe lyokukonakonwa, li na oshipalanyolo, Kala nonkalamwenyo ombwanawa sigo aluhe.a Mbela owa li wi inyenge ngiini ketseyitho ndyoka? Matthew gwokoKanada okwa ti: “Onda li nda nyanyukwa! Onda li nokuli nda tuntukwa noonkondo sho iipopiwa tayi gandjwa nuuvidio tawu ulikwa, mboka tawu yelitha kutya embo olya nyanyangidhwa nelalakano lyashike nosho wo nkene tali ka ningilwa omalolelo. Onda halelela oku li mona nokutameka oku li longitha.”

Embo Kala nonkalamwenyo ombwanawa sigo aluhe olya unganekwa momukalo gwi ikalekelwa omupe gwokukonakona naantu Ombiimbeli. Ihe omukalo ngoka omupe hago owala gwa yoolola ko embo ndyoka epe kiileshomwa yokukonakona naantu mbyoka tu na nale. Ngele owu na embo lyo lyene, Kala nonkalamwenyo ombwanawa sigo aluhe, otashi vulika wa mona kutya olya yooloka ko wo thiluthilu komakwawo. Opo tu shi moneni, natu ka taleni nkene lya nyanyangidhwa.

Embo epe lya yooloka ko komakwawo

Embo ndyoka oli na omafo omakukutu. Omolwashike omakukutu? Embo Kala nonkalamwenyo ombwanawa sigo aluhe, oli na omathano gomalwaala ga konda po 600, ge vule konyala lwiikando omulongo pwaangoka ge li membo Ombiimbeli otayi tu longo. Pomapandja galyo ogendji opu na wo omahala inaapu nyolwa sha nenge kaapu na omathano. Efo ngele ohali imonikila, oto vulu okumona omathano ngoka ge li kepandja ekwawo nando ino li tala to konenene. Opo shika kaashi kale uupyakadhi, aamwatate yokoshikondo: International Printing, koWallkill, koNew York, moAmerika, oya ningi omalolelo gomaludhi goombapila gane ngoka haga longithwa ngashingeyi miinyanyangidho yetu. Iilyo yOkomitiye yOkunyola yOlutuwiliki oya konakona ombapila kehe, e tayi hogolola po ndjoka hayi imonikila. Nonando ombapila ndjoka oyi na ondilo noopelesenda 16 yi vulithe poombapila ndhoka hatu longitha unene miileshomwa yetu, otayi kwathele aakonakonimbiimbeli ya leshe pepandja kehe lyembo, Kala nonkalamwenyo ombwanawa sigo aluhe, nokaapu na okupiyaganekwa komathano ngoka ge li kepandja ekwawo.

Oshipeko shalyo osha longwa shi ili. Osha yooloka ko kiipeko yomambo getu galwe, molwaashoka okanailona hoka ka laiminwa ko, koku li gamena, inaka fa komambo omakwawo. Pehala lyokulaimina ko okanailona kanathangwa, lyo olya laiminwa hoka ka kola nawa, notaka ningitha ethano ndyoka li li kombanda yoshipeko li kale tali monika nawa. Okanailona otaka kwathele wo oshipeko shi kale sha kola nawa, nando embo oli kale lya longithwa lwiikando. Ihe okanailona hoka ka kola nawa oka pula iimaliwa yi vulithe lwiikando itano pwaambyoka yaahoka inaaka kola. Onkee ano, iitayimbelewa yimwe oya li ya longele kumwe, opo yi lande uunailona mboka kondando yi li pevi.

Omolwashike iilongitho mbyoka yi na ondilo oyo ya hogololwa? Omumwatate ngoka ha longo koshikondo International Printing, okwa ti: “Otwa hala embo ndika li kale tali monika nawa, nokuli nonando omuntu okwe li longitha lwiikando.” Omumwatate Eduardo, ngoka ha longo mOmbelewa yOkupilinta, koshitayimbelewa shaBrazilia, okwa ti: “Otwa nyanyukwa noonkondo okumona nkene ehangano lyaJehova lya longitha iinima yongushu sho tali nyanyangidha embo ndika ewanawa, lya kola noihali tuuka nuupu, shoka sha hupitha omayambidhidho ngoka ga gandjwa.”

Okupilinta iileshomwa pethimbo lyoshivu sho-corona

Otwa li twa tameke okunyanyangidha embo, Kala nonkalamwenyo ombwanawa sigo aluhe, muMaalitsa 2021. Shoka osha ningwa pethimbo lyoshivu sho-corona, shoka sha etitha omashongo muuyuni. Molwaashoka oshitayimbelewa osha li sha pata omolwoshivu shono, katwa li tatu vulu okulongitha aamwatate aaiyambi nenge okutaamba Aabetele aape. Shoka osha li wo sha ningitha iinyanyangidho yi kale kaayi na aalongi ya gwana, nayilwe oya li nokuli ya pata pakathimbo, omolwomangambeko ngoka ga li ga tulwa po komapangelo.

Mbela omashongo ngoka otwa li tu ungaunga nago ngiini? Sho iinyanyangidho ya patuluka, aamwatate naamwameme yokiikondo yilwe moBetel, oya pulwa ya ka kwathele ko pakathimbo. Omumwatate Joel ngoka ha longo koshikondo International Printing, okwa ti: “Ombepo yawo yeiyambo nehalo lyawo okwiilonga iilonga yilwe, osha kwathela lela, opo iilonga yi pwe pethimbo.”

Nonando opwa li omashongo ngoka, otwa pilinta nale omambo omamiliyona: Kala nonkalamwenyo ombwanawa sigo aluhe. Opo tu ga pilinte, otwa li twa pumbwa iilongitho yi ili noyi ili, mwa kwatelwa iinima yokunyanyangidhitha, uunailona wokulaiminwa ko, oombapila, oohinga nosho wo eka lyokutula kumwe omafo. Muule owala woomwedhi dhotango ntano dhokupilinta, otwa li twa longitha iimaliwa ya konda poodola dhaNamibia 34 523 000.00 miilongitho owala. Opo tu hupithe oshimaliwa, otwa li tu na okupilinta owala omiyalu dhomambo ngoka omagongalo ga pumbwa.

“Embo lya longekeka”

Aalongi yOmbiimbeli nosho wo aakonakonimbiimbeli oyu uvitile ngiini embo ndika epe lyokukonakona Ombiimbeli? Omumwatate Paulo gwokuAustralia ota ti: “Ondi hole okukonakona naantu membo, Kala nonkalamwenyo ombwanawa sigo aluhe. Embo olya longekidhwa nawa notali hokitha shili, uuna tamu li kundathana. Oli na uuyelele wa yela nawa, omapulo taga gumu omutima, uuvidio, omathano, uumpungu nosho wo omalalakano ngoka omukonakoni ta vulu okwiitulila po. Embo ndika olya longekeka, nolya kwathela ndje ndi hwepopaleke omukalo gwandje gwokulonga aantu.”

Omukonakonimbiimbeli gumwe gwokoAmerika okwa ti: “Embo epe ondi li hole noonkondo. Omathano ngoka ge li ohaga kwathele ndje ndi uve ko nawa iitsa ya simana. Uuvidio wamo ohawu gumu omutima gwandje nohawu kwathele ndje ndi tule miilonga shoka tandi ilongo.” Omukonakoni nguka oha konakona lwaali moshiwike noha kala aluhe pokugongala.

Ookopi omamiliyona dhembo, Kala nonkalamwenyo ombwanawa sigo aluhe, onkee ngaa tadhi tsikile okupilintwa momalaka ogendji. Sigo oompano, Olutuwiliki olwa gandja epitikilo, opo embo ndika li tolokwe momalaka 710, ge vulithe pomalaka 340 ngoka ga li ga pewa epitikilo ga toloke embo Ombiimbeli otayi tu longo.

Iimaliwa yokupilinta ohayi zi peni? Ohayi zi momayambidhidho giilonga yomuuyuni awuhe, ngoka ogendji haga gandjwa okupitila kepandja, donate.jw.org. Otatu ku pandula sho ho tu pe omayambidhidho nehalo ewanawa, shoka hashi tu kwathele tu nyanyangidhe iileshomwa yokukonakona Ombiimbeli, yaamboka ya hala okwiilonga kombinga yaJehova noya ka kale nonkalamwenyo ombwanawa “sigo aluhe.” — Episalomi 22:26.