Mbela owa dhiladhilile nale wu leshe Ombiimbeli, ihe ino shi ninga we, oshoka nangoye owa li wu uvite ngaashi mboka ya popiwa metetekelo? Aantu oyendji ohaya kala yu uvite kutya okulesha Ombiimbeli oshinima oshidhigu. Ongiini ngele owa tseya kutya Ombiimbeli otayi vulu oku ku kwathela wu kale wa nyanyukwa nowu na onkalamwenyo tayi ti sha? Ongiini ngele owa tseya kutya opu na omikalo dhimwe moka to vulu oku yi lesha, opo wu yi nyanyukilwe? Mbela ino hala okumona nkene Ombiimbeli tayi vulu oku ku kwathela?

Tala shoka sha popiwa kwaamboka ya mona mo uuwanawa mOmbiimbeli, sho ya tameke oku yi lesha.

Omulumentu gwedhina Ezekiel, ngoka e na omimvo 20 nasha, okwa ti: “Nale onda li nda fa omuntu ngoka ta hingi ohauto, ihe ke shi mpoka u uka. Ihe okulesha Ombiimbeli okwa kwathela ndje ndi kale nonkalamwenyo tayi ti sha. Oyi na omayele omawanawa, ngoka tandi vulu okulongitha kehe esiku.”

Omukiintu gwedhina Frieda, ngoka naye e na omimvo 20 nasha, okwa ti: “Onda li handi geye nziya. Konima ondi ilongo okupangela ongeyo yandje, oshoka onda kala handi lesha Ombiimbeli. Shika osha ningila ndje oshipu ndi kale handi longele kumwe nayalwe, nondi na ookuume oyendji ngashingeyi.”

Meme Eunice, ngoka e na omimvo 50 nasha, okwa popi kombinga yOmbiimbeli, a ti: “Otayi kwathele ndje ndi kale omuntu omwaanawa nondi lundulule iinima iiwinayi mbyoka ndi igilila.”

Ngaashi aantu mbaka nosho wo yalwe oyendji ye shi mono, okulesha Ombiimbeli otaku vulu oku ku kwathela wu kale nonkalamwenyo ombwanawa shi vulithe nale. (Jesaja 48:17, 18) Kakele kiinima yilwe, Ombiimbeli otayi vulu oku ku kwathela (1) wu ninge omatokolo gomondjila, (2) wu kale nookuume yashili, (3) wu ungaunge nomaupyakadhi (4)  nosho wo wu ilonge oshili kombinga yaKalunga, oshinima shoka sha simana unene. Omayele gOmbiimbeli oga za kuKalunga. Onkene ngele owe ga landula, ku na esiku wu ye mondjila ya puka. Kalunga iha gandja nando omayele omawinayi.

Shoka sha simana osho okutameka okulesha Ombiimbeli. Mbela omikalo dhini omiwanawa to vulu okulongitha, opo shi ku ningile oshipu wu tameke oku yi lesha nowu yi nyanyukilwe?

Oshike tashi vulu oku ku kwathela wu kale wu hole okulesha Ombiimbeli nowu ilonge mo oshindji? Tala kiinima itano tayi landula mbyoka ya kwathela oyendji.

Leshela pehala li li nawa. Kambadhala okukonga ehala mpoka pwa mwena nawa. Kala kokule niinima mbyoka tayi ku piyaganeke, opo shi ku kwathele wu gandje eitulomo kwaashoka to lesha. Ngele oto leshele pehala pu na uuyelele wu li nawa nopwa talala, otashi ke ku kwathela wu ilonge mo oshindji mOmbiimbeli.

Kala wu na etaloko ewanawa. Ombiimbeli oya za kuTate yetu gwomegulu. Onkee ano, oto ka mona mo owala uuwanawa owundji, ngele owa kala wu na iikala ya fa yokanona hoka ka hala okwiilonga sha komuvali gwako ngoka e ka hole. Ngele owa kala nale wu na omadhiladhilo omawinayi kombinga yOmbiimbeli, kambadhala oku ge ekelahi, opo wu longwe kuKalunga. —  Episalomi 25:4.

Galikana manga inoo tameka okulesha. MOmbiimbeli omu na omadhiladhilo gaKalunga. Onkee ano, itashi kumitha sho twa pumbwa ekwatho lye, opo tu yi uve ko. Kalunga oku uvaneka kutya ota ka “gandja Ombepo Ondjapuki kumboka taye mu indile.” (Lukas 11:13) Ombepo ondjapuki otayi vulu oku ku kwathela wu uve ko omadhiladhilo gaKalunga. Mokweendela ko kwethimbo, otayi ke ku kwathela wu uve ko iinima ‘yomuule womadhiladhilo gaKalunga.’ —  1 Aakorinto 2:10.

Lesha nelalakano lyoku yi uva ko. Ino lesha owala nelalakano lyokumana ko Ombiimbeli. Dhiladhila muule kombinga yaashoka to lesha. Ipula omapulo ngaashi: ‘Omaukwatya geni nda mono momuntu ngoka nda li tandi lesha kombinga ye? Ongiini tandi vulu okutula miilonga shoka nda lesha?’

Itulila po omalalakano gokondandalunde. Itulila po elalakano lyokwiilonga sha, shoka tashi ke ku kwathela monkalamwenyo. Otashi ke ku kwathela wu mone mo uuwanawa mOmbiimbeli, sho to yi lesha. Oto vulu okwiitulila po omalalakano ngaashi: ‘Onda hala okwiilonga oshindji kombinga yaKalunga.’ ‘Onda hala okukala omuntu omwaanawa, omusamane nenge omukulukadhi omwaanawa.’ Opo nduno hogolola omanyolo mOmbiimbeli ngoka tage ke ku kwathela wu adhe omalalakano ngoka.a

Iinima mbyoka itano otayi vulu oku ku kwathela wu tameke okulesha Ombiimbeli. Oshike to vulu okuninga, opo okulesha kwoye ku kale okuhokithi unene? Oshitopolwa sha landula ko osha gandja omayele gontumba.

Uuna to lesha Ombiimbeli, mbela oho kala we yi hokwa nenge oho kala wa sa uunye? Shoka oshi ikolelela komukalo moka to yi lesha. Natu tale kwaashoka to vulu okuninga, opo okulesha kwoye ku kale taku hokitha notaku ku nyanyudha.

Hogolola etoloko li shi okwiinekelwa noli na elaka epu okuuviwa ko. Ngele owa lesha Ombiimbeli yi na iitya oyindji iidhigu nenge yonkuluyonale mbyoka kuu shi, ito ka nyanyukilwa oku yi lesha. Onkee ano, konga Ombiimbeli ndjoka ya longitha elaka epu okuuviwa ko notali gumu omutima gwoye. Yo nayi kale ya tolokwa mondjila.a

Longitha iikwaelektronika. Kakele kOmbiimbeli ndjoka ya pilintwa hatu mono kunena, otatu vulu wo oku yi adha kointaneta. Oombiimbeli dhimwe otadhi vulu okuleshwa kointaneta nenge okutapelwa mookompiuta, muutableta nenge moongodhi dhopeke, opo omuntu e dhi leshe. Opu na dhimwe dhi na iilongitho ya gwedhwa po, mbyoka tayi ku kwathele nziya wu tale oovelise ndhoka dha pamba shoka to lesha. Otayi vulu wo oku ku kwathela wu dhi yelekanithe nomatoloko galwe. Ombiimbeli oya kwatwa wo momalaka gamwe, noto vulu oku yi pulakena pehala lyoku yi lesha. Aantu oyendji oye hole okupulakena, uuna ye li miiyenditho yaayehe, taya yogo nenge taya ningi iinima yilwe mbyoka tayi ya pitike ya pulakene. Omolwashike itoo longitha omukalo ngoka gwe ku opalela?

Longitha iilongitho yokukonakona Ombiimbeli. Iilongitho yokukonakona Ombiimbeli otayi vulu oku ku kwathela wu ilonge mo oshindji mwaashoka to lesha. Opu na uualita tawu ulike omahala ngoka ga tumbulwa mOmbiimbeli, shoka tashi ke ku kwathela wu mone mpoka pwa li omahala ngoka to lesha kombinga yago. Otashi ku kwathele wo wu mone kutya iiningwanima mbyoka to lesha oya pambathana ngiini. Iitopolwa ngaashi mbyoka yi li moshifo shika nenge mbyoka yi li kepandja lyetu lyokointaneta, jw.org, otayi vulu oku ku kwathela wu uve ko iinima oyindji mOmbiimbeli.

Lesha momikalo dha yoolokathana. Ngele oshidhigu kungoye okulesha Ombiimbeli melandulathano, omolwashike itoo tameke niitopolwa mbyoka wu hole unene, opo kuu kanithe ohokwe? Ngele owa hala okwiilonga oshindji kombinga yaantu mboka taya dhana onkandangala mOmbiimbeli, oto vulu okulesha omahokololo kombinga yawo. Omukalo gumwe moka to vulu oku shi ninga ogu ulikwa moshimpungu: “Konakona Ombiimbeli muule wu tseye aantu mboka ya popiwa mo.” Otashi vulika wu kale wa hala okulesha Ombiimbeli oshitsa noshitsa nenge melandulathano moka iiningwanima ya ningilwe. Omolwashike itoo kambadhala omikalo ndhoka?

Ombiimbeli oyi li embo li ikalekelwa ndyoka li na omayele ga za kOmushiti. (2 Timoteus 3:16) Etumwalaka lyayo otali vulu oku tu nwetha mo noonkondo. Ombiimbeli otayi ti: “Oohapu dhaKalunga odhi na omwenyo nodhi na oonkondo dhokulonga sha.” (Aahebeli 4:12) Ombiimbeli oyi na oonkondo notayi vulu oku tu kwathela tu hwepopaleke onkalamwenyo yetu momikalo mbali dha simana. Otayi tu wilike mokukalamwenyo kwakehe esiku, yo otayi tu kwathele wo tu tseye Kalunga nosho wo omauvaneko ge. — 1 Timoteus 4:8; Jakob 4:8.

Ombiimbeli otayi vulu okuhwepopaleka onkalamwenyo yoye ngashingeyi. Otayi vulu oku ku kwathela miinima yopaumwene. Oyi na omayele omawanawa miinima tayi landula.

• Ekwatathano lyetu nayalwe. — Aaefeso 4:31, 32; 5:22, 25, 28, 33.

• Uukolele wopalutu nowokomwenyo. — Episalomi 37:8; Omayeletumbulo 17:22.

• Omikalo neihumbato. — 1 Aakorinto 6:9, 10.

• Okulongitha iiniwe yetu nawa. — Omayeletumbulo 10:4; 28:19; Aaefeso 4:28.a

Aaihokani yamwe aagundjuka moAsia, oya pandula noonkondo omayele ngoka ge li mOmbiimbeli. Osha li oshidhigu kuyo okwiigililathana nokupopya ya mangulukilathana, ngaashi owala hashi kala olundji naamboka opo ya hokana. Oshike she ya kwathele? Oya tameke okutula miilonga shoka taya lesha mOmbiimbeli. Mbela oshe ye etele iizemo yini? Tate Vicent, okwa ti: “Shoka nda lesha mOmbiimbeli osha kwathela ndje ndu ungaunge nomaupyakadhi gomondjokana momukalo omwaanawa. Sho twa landula shoka Ombiimbeli tayi ti, oshe tu kwathela tu kale nombili.” Omukulukadhi gwe, Annalou, ota tsu kumwe sho a ti: “Okulesha iiholelwa mOmbiimbeli oshe tu kwathela. Ngashingeyi mondjokana yetu otu na ombili notwa gwanenwa notu na omalalakano monkalamwenyo.”

Ombiimbeli otayi tu kwathele tu tseye Kalunga. Kakele kwaashoka tate Vicent a ti kombinga yondjokana, okwa ti ishewe: “Sho nda kala tandi lesha Ombiimbeli, ngashingeyi ondu uvite nda hedha popepyeelela naJehova shi vulithe nale.” Edhiladhilo lyatate Vicent otali holola oshitsa sha simana kutya Ombiimbeli otayi vulu oku ku kwathela wu tseye Kalunga. Moku shi ninga, ito ka mona owala uuwanawa momayele ge, ihe oto ke mu tseya wo e li kuume koye. Oto ka mona wo kutya okwe ku uvanekela “okukalamwenyo kwashili” monakuyiwa, ethimbo ndyoka to ka kala sigo aluhe. (1 Timoteus 6:19) Kapu na embo li na uuyelele wa tya ngawo!

Ngele owa kala aluhe ho lesha Ombiimbeli, otashi ka hwepopaleka onkalamwenyo yoye ngashingeyi noto ka tseya Kalunga. Sho to lesha Ombiimbeli, otashi vulika wu ka kale wu na omapulo ogendji. Ngele osho, dhimbulukwa oshiholelwa oshiwanawa shelenga lyokuEtiopia, ndyoka lya li ko omimvo 2 000 dha ka pita. Olya li li na omapulo ogendji kombinga yOmbiimbeli. Sho lya pulwa ngele oli uvite ko shoka tali lesha, olya ti: “Otandi vulu ngiini okuuva ko, ngele kape na ngoka ta fatululile ndje?”b Opo nduno olya taamba ko neifupipiko ekwatho lyaFilippus, ngoka a li e shi nawa okulonga aantu Ombiimbeli. Filippus okwa li gumwe gwomaalongwa yaJesus yopetameko. (Iilonga 8:30, 31, 34) Ngele nangoye owa hala okutseya oshindji kombinga yOmbiimbeli, udhitha okafooloma hoka ke li kepandja lyetu lyokointaneta, www.pr2711.com nenge wu nyolele koondjukithi ndhoka dhi li moshifo shika. Oto vulu wo okukwatathana nOonzapo dhaJehova moshitopolwa sheni nenge wu talele po Oshinyanga shUukwaniilwa shoka shi li popepi nane. Otashi ka kala shi li nawa ngele owa tameke nena okulesha Ombiimbeli nokweetha yi ku wilike wu kale nonkalamwenyo ombwaanawa.