Omaupyakadhi ngoka ge li muuyuni otage tu kwathele tu kale tu na etegameno

‘Momasiku gahugunina otaku ke ya omathimbo omadhigu.’—2 TIMOTEUS 3:1, yelekanitha KB.

MBELA owu uva nale nenge wa mona yimwe yomiiningwanima yiyemateka mbika tayi landula?

● Omukithi omudhipagi ngoka gwa faalela oomwenyo dhaantu omilongo dhontumba.

● Ondjala ndjoka ya dhipaga aantu omathele gontumba.

● Ekakamo lyevi ndyoka lya dhipaga aantu omayuvi gontumba nolya thiga aantu oyendji noonkondo kaaye na omahala gokukala.

Miitopolwa tayi landula, otatu ka konakona kombinga yomauyelele gamwe ge li paushili ge na ko nasha niiningwanima ya fa mbyoka. Oto ka mona wo kutya Ombiimbeli oya hunganeka oonkalo ndhoka tadhi ka kala ko uule wethimbo hadhi ithanwa ‘omasiku gahugunina.’a

Ihe elalakano lyiitopolwa mbika kali shi oku ku tompa kutya otu li muuyuni wu udha omaupyakadhi. Otashi vulika omaupyakadhi ngaka wu gi iwetele mwene. Pehala lyaashono, iitopolwa mbika oya nuninwa oku ku pa etegameno. Otayi ke ku ulukila kutya okugwanithwa kwomahunganeko ngaka gahamano otaku ti kutya “omasiku gahugunina” masiku otaga ka hula po. Iitopolwa mbika ya landulathana otayi ka kundathana wo kombinga yomapopyo gamwe ngoka ge li apuhe kutya omolwashike tu na etompelo ewanawa okukala netegameno li na ko nasha niinima iiwanawa mbyoka tatu ka nyanyukilwa monakuyiwa.

[Enyolo lyopevi]

Ehunganeko 1. Omakakamo gevi

“Otaku ke ya omakakamo gevi omatilithi.”—LUKAS 21:11.

● Okanona kedhina Winnie koomwedhi 16 oka li ka hupithwa mekakamo lyevi moHaiti. Aatoolinkundana yoko-TV oya li yu uvu sho taka keme ke li kohi yomakuma giimbonyokela. Oka li ka kuthwa ko kohi yomakuma, ihe aavali yako kaya li ya hupu.

MBELA UUSHILI OTAWU ULIKE SHIKE? Sho ekakamo lyevi lyuunene woshiyelekitho 7.0 lya li ningwa muHaiti muJanuali 2010, okwa li kwa tengenekwa kutya olya dhipaga aantu ye thike 300 000 lwaampoka. Kakele kaashono, meni lyokathimbo aantu emiliyona 1.3 oya li ya thigwa kaaye na omagumbo. Nonando ekakamo lyevi ndyoka lya li lya ningwa moHaiti olya li enene, halyo owala ekakamo lyevi enene lya li lya ningwa. Opwa li nokuli pwa ningwa omakakamo gevi omanenenene ge li 18 muuyuni auhe pokati kaApilili mo 2009 naApilili mo 2010.

OMAPOPYO GENI GE LI APUHE KUNENA? Kunena ihapu ningwa omakakamo gevi ogendji, otwe ga kotokela tu vulithe aantu yopethimbo lyonale, molwaashoka otwa huma komeho muuteknologi.

MBELA EPOPYO NDYOKA OLYOSHILI NGAA? Ombiimbeli inayi tsa omuthindo kutya omakakamo gevi gangapi taga ka ningwa momasiku gahugunina. Ihe otayi popi kutya “omakakamo omadhigu gevi” otaga ka ningwa “koombinga noombinga,” naashoka osho she ga ningitha ga kale iiningwanima iindhindhilikwedhi methimbo ndika lituntula.—Markus 13:8; Lukas 21:11.

NGOYE OTO TI NGIINI? Mbela otu wete omakakamo gevi omanene taga ningwa ngaashi naanaa Ombiimbeli ya hunganeka?

Omakakamo gevi ogo ageke otashi vulika itaaga tompo lela omuntu i itaale kutya otu li momasiku gahugunina. Ihe nonando ongaaka, oge li gamwe gomomahunganeko ngoka taga gwanithwa. Ngashingeyi natu ka kundathaneni ehunganeko etiyali.

[Oohapu dha simana pepandja 4]

“Tse [aatseyivi] otwe ga tala ko ge li omakakamo gevi omanene, ihe aantu kehe pamwe ye ga tala ko ge li iiningwanima yinikitha oluhodhi.”—KEN HUDNUT, US GEOLOGICAL SURVEY.

[Edhina lyomuthaneki gwethano pepandja 4]

© William Daniels/Panos Pictures

Ehunganeko 2. Ondjala

“Otaku ke ya oondjala.”—MARKUS 13:8.

● Omulumentu gumwe okwa li a taukile komukunda Quaratadji, muNiger omolwondjala. Aakwanezimo ye, aamwayinamati naamwayinakadhona oya li wo ya tauka kiitopolwa yilwe yokomikandi omolwondjala. Ihe omulumentu ngoka okwa li ha lala oye awike pemate pevi. Omolwashike mbela a li a lala oye awike? Mwene gwomukunda gwedhina, Sidi okwa yelitha a ti: “Ka li e na sha shokupalutha [uukwanegumbo we] noka li ta vulu we okukala te wu tala tawu si ondjala.”

MBELA UUSHILI OTAWU ULIKE SHIKE? Konyala omuntu gumwe gwomaantu yaheyali muuyuni auhe iha mono iikulya ya gwana yokulya esiku kehe. Aantu oyendji otaya si kondjala noonkondo miilongo yokuumbugantu waSahara muAfrika, moka to adha omuntu gumwe gwomaantu yatatu miilongo moka a konenwa kondjala. Opo wu shi uve ko nawa, natu tye nduno muukwanegumbo omu na omusamane, omukulukadhi nokanona. Ngele uukwanegumbo owu na owala iikulya ya gwana okuliwa kaantu yaali, mbela olye ta ka kala inaa lya? Mbela omusamane, omukulukadhi nenge okanona? Uukwanegumbo mboka owu na okuninga ehogololo esiku kehe kutya olye ta kala inaa lya.

OMAPOPYO GENI GE LI APUHE KUNENA? Evi ohali gandja iipalutha ya gwana kukehe gumwe. Ihe nonando ongawo, oonzo dhevi odhi na okukala hadhi longithwa nawa.

MBELA EPOPYO NDYOKA OLYOSHILI NGAA? Odhoshili kutya kunena aanamapya ohaya vulu okulikola nokulanditha iikulya oyindji shi vulithe shito. Onkee ano, ando omapangelo gopantu oga li hagu unganeke nokutopola nawa iikulya mbyoka hayi likolwa muuyuni, ando kapu na omuntu ta si ondjala. Ihe nonando aantu oya kambadhala uule woomvula omilongo, inaya vula okuhulitha po ondjala.

NGOYE OTO TI NGIINI? Mbela Markus 13:8 oku li ta gwanithwa kunena? Nonando opu na ehumo komeho lyopautekenika, mbela ondjala itayi hepeke aantu muuyuni auhe?

Olundji omakakamo gevi nosho wo ondjala oyo hayi etitha omaupyakdhi ngoka ge li wo oshitopolwa shendhindhiliko lyomasiku gahugunina.

[Oohapu dha simana pepandja 5]

“Uunona wu vulithe poshititatu shimwe mboka wa sa koshihoya, koshimela nosho wo komikithi dhilwe owa li tawu vulu okuhupa ando owa monene iikulya ya gwana.”—ANN M. VENEMAN, EXECUTIVE DIRECTOR OF THE UN CHILDREN’S FUND.

[Edhina lyomuthaneki gwethano pepandja 5]

© Paul Lowe/Panos Pictures

Ehunganeko 3. Omikithi

“Aantu otaya ka . . . hepekwa komikithi ominyanyalithi.”—LUKAS 21:11, pa-Contemporary English Version.

● Ndohotola gumwe gwepangelo gwedhina Bonzali, gwomoshilongo shimwe shomuAfrika shoka sha monithwa iihuna kiita yopashigwana, okwa li a ningi ngaashi ta vulu opo a pange aalongi yomomina yomondoolopa yawo mboka ya li ya kwatwa komukithi ngoka hagu etithwa koolunkima hagu ithanwa Marburg.a Okwa li a pula ekwatho kaanambelewa yomoshilando oshinene shawo, ihe kaya li ye mu yamukula. Lwahugunina, konima sho pwa piti oomwedhi ne, ekwatho olya li lya tumwa, ihe Bonzali okwa adhika a sa nale. Naye okwa li a kwatwa komukithi nguka Marburg sho a li a kambadhala okukwathela aalongi yomomina.

OSHILI OTAYI ULIKE SHIKE? Oshimela, o-HIV/AIDS, o-TB, malaria nosho wo omikithi dhimwe ndhoka hadhi gumu iifudhitho (ngaashi oshihoya) odho dhimwe dhomomikithi dha nika oshiponga ndhoka dha kala tadhi hepeke aantu noonkondo. Otaku tengenekwa kutya omikithi ndhoka dhi li moondondo ntano odha dhipaga aantu omamiliyona 10,7 lwaampono omvula ya zi ko. Oku shi popya momukalo gulwe, omikithi ndhoka odha kala tadhi dhipaga omuntu gumwe muule woosekonde ndatu muule womvula ayihe.

OMAPOPYO GENI GE LI APUHE? Mpo ngaa pu thike omwaalu gwaantu tagu ende tagu indjipala muuyuni, opo ngaa pu thike omikithi tadhi indjipala. Onkee ano, aantu oyendji otaya vulu okukwatwa komikithi dha tya ngaaka.

MBELA EPOPYO NDYOKA OTA LI TI SHA NGAA? Eindjipalo lyaantu muuyuni olya londa pombanda noonkondo. Kakele kaashono, aantu oya ninga ehumokomeho lyopaunamiti, taya vulu okukonakona omikithi, oku dhi keelela noku dhi panga. Mbela kashi li pandunge okuthika pehulithodhiladhilo kutya omikithi nokutaandela kwadho ando ku shonopekwe? Ihe nonando aantu oya ninga ehumokomeho lyopaunamiti, inaya vula okuhulitha po omikithi nenge oku dhi keelela opo kaadhi taandele.

NGOYE OTO TI NGIINI? Mbela aantu otaya hepekwa shili komikithi ominyanyalithi ngaashi sha hunganekwa kOmbiimbeli?

Omakakamo gevi, ondjala nosho wo omikithi odha faalela oomwenyo dhaantu omamiliyona. Aantu omamiliyona ogendji ohaya monithwa iihuna kaantu ooyakwawo, sha hala okutya, haya ningwa nayi kwaamboka ye na andola oku ya gamena. Natu ka tale kwaashoka Ombiimbeli ya hunganeka moshitopolwa tashi landula.

[Enyolo lyopevi]

[Oohapu dha simana pepandja 6]

“Ngaashi owala hashi kala shiyemateka okulika po konkoshi nenge koshiyamakuti shontumba, ohashi kala wo shiyemateka okukwatwa komukithi gwontumba omudhipagi okuza meni lyolutu nokutala nkene tagu mana po olutu lwoye aluhe.”—EPIDEMIOLOGIST MICHAEL OSTERHOLM.

[Edhina lyomuthaneki gwethano pepandja 6]

© William Daniels/Panos Pictures

Ehunganeko 4. Aantu otaya ka kala kaaye na ohole yopaunshitwe

“Aantu otaa ka . . . kala kaaye na ohole yopaunshitwe momaukwanegumbo gawo.”—2 Timoteus 3:1-3, pa-God’s Word Bible

● Chris ngoka ha longele ehangano lyokukwathela mboka ya ninga iihakanwa yelongithonkondo lyomomaukwanegumbo kUumbangalantu waWales, okwa ti: “Otandi dhimbulukwa sho omukulukadhi gumwe a li e ya mombelewa yetu a dhengwa shinyanyalitha nokanda li nokuli nda vula okudhimbulukwa kutya oye ngaa nda monene oshikando shimwe. Aakiintu yalwe ohaya kala ye ehamekwa nayi pamaiyuvo noihaya kala nokuli taya vulu okutala aantu kiipala.”

OSHILI OTAYI ULIKE SHIKE? Moshilongo shimwe muAfrika, omukiintu gumwe gwomaakiintu yatatu otashi vulika a hepekwa pamilalo manga a li okanona, nagumwe gwomaakiintu 4 otashi vulika a ninga oshihakanwa shelongithonkondo. Ekonakono limwe lya ningwa moshilongo omo tuu moka olya mona kutya oopelesenda 60 dhaalumentu otadhi dhiladhila kutya osha taambwa ko okudhenga aakulukadhi yawo. Ihe aakiintu hayo awike ye li iihakanwa yelongithonkondo lyomomagumbo. Pashiholelwa, muKanada aasamane yatatu yomaasamane omulongo oya li haya dhengwa nayi nenge haya hepekwa momikalo dhilwe ishewe kaakulukadhi yawo.

OMAPOPYO GENI GE LI APUHE? Elongithonkondo momaukwanegumbo olya kala ko okuza nale. Aantu ohaya gandja owala eitulomo olindji kulyo kunena shi vulithe nale.

MBELA EPOPYO NDYOKA OTALI TI SHA NGAA? Aantu oya ndhindhilika kutya opu na elongithonkondo lyomomaukwanegumbo unene tuu moomvula opo dha piti. Ihe nonando aantu oyendji oya ndhindhilika kutya opu na elongithonkondo momaukwanegumbo, mbela shoka osha ningitha ngaa omiyonena dha tya ngaaka dhi shonopale? Hasho nando! Aantu oyendji kunena kaye na we ohole yopaunshitwe.

NGOYE OTO TI NGIINI? Mbela 2 Timoteus 3:1-3 oku li ta gwanithwa? Mbela aantu oyendji kunena ohayu ulukilathana ngaa ohole yopaunshitwe momaukwanegumbo gawo nonando osho ye na okuninga?

Ehunganeko etitano ndyoka tu wete tali gwanithwa kunena olya guma wo evi. Natu ka konakoneni shoka Ombiimbeli tayi popi moshitopolwa tashi landula.

[Oohapu dha simana pepandja 7]

“Elongithonkondo momaukwanegumbo olya kala lya tseyika kutya olyo limwe lyomomiyonena ndhoka hadhi ningwa olundji momaukwanegumbo ihaadhi lopotwa. Aakiintu oyendji ohaya ka lopota owala kopolisi omahepeko nenge omaponokelo ngoka haya ningilwa kaasamane yawo ngele ga adha piikando 35.”—A SPOKESWOMAN FOR WALES DOMESTIC ABUSE HELPLINE.

Ehunganeko 5. Okuyonagula evi

“[Kalunga ota ka] hanagula po mboka taa yonagula po evi.”—EHOLOLO 11:18.

● Omulumentu gumwe gwedhina Pirri omutegi gwomalunga gwomomukunda Kpor muNigeria. Ongeshefa ye yokulanditha omalunga oya li ya yonwa komahooli ngoka ga li ga kungulukile mokampompolonga kaNiger Delta. Okwa ti: “Omahooli ngoka oga li ga dhipaga oohi dhetu, ga yono po iipa yetu noga nyateka omeya gomomilonga dhetu. Ngashingeyi katu na we uuhupilo wu li nawa.”

OSHILI OTAYI ULIKE SHIKE? Aatseyinawa yiinima yamwe oya ti kutya kehe omumvo momafuta ohamu ekelwa ondoya yi thike pootona omamiliyona 6,5. Otaku tengenekwa kutya mokati kiiyagaya mbyoka hayi umbilwa mefuta omwa kwatelwa oopelesenda 50 dhoopulastika ndhoka hadhi kala dhi li kombanda yomeya uule woomvula omathele omanga inaadhi nyanyuka po. Kakele kokunyateka evi, aantu otaya yono po wo oonzo dhopaunshitwe momukalo inaagu monika nando onale. Omakonakono otagu ulike kutya evi olya pumbwa okweethiwa uule womvula yimwe noomwedhi ntano opo li vule okweeta po ishewe shoka hashi hanagulwa po kaantu kehe omumvo. Oshifonkundaneki shokuAustralia shedhina Sydney Morning Herald osha ti: “Ngele omwaalu gwaantu nosho wo gwiipumbiwa otagu tsikile nokwiindjipala, otatu ka kala twa pumbwa evi etiyali okuthika mo 2035.”

OMAPOPYO GENI GE LI APUHE KUNENA? Aantu aanandunge notaya vulu okumona nkene ye na okukandula po omaupyakadhi. Otatu vulu okuninga po sha shoka tashi vulu okukandula po omaupyakadhi ngoka e tatu hupitha evi.

MBELA EPOPYO NDYOKA OTALI TI SHA NGAA? Oohandimwe oyendji noongundu ndhoka hadhi longo nuudhiginini kunena odhe eta po omaipulo ge na ko nasha nomaupyakadhi gomudhingoloko. Ihe nonando ongaaka, evi otali tsikile okuyonagulwa inaashi monika nando onale.

NGOYE OTO TI NGIINI? Mbela Kalunga okwa pumbwa ngaa okuya olunyala miinima yaantu nokugamena evi kaali yonwe po, ngaashi naanaa u uvaneka?

Kakele komahunganeko gatano ngoka opo twa konakoneni, Ombiimbeli oya hunganeka wo iinima iiwanawa mbyoka nayo tayi ningwa momasiku gahugunina. Natu taleni koshiholelwa shimwe.

[Oohapu dha simana pepandja 8]

“Ondi uvite nda fa omuntu a tembudhwa moparadisa e ta tulwa mehala moka hamu ekelwa iikwauzigo.”—ERIN TAMBER, A RESIDENT OF THE GULF COAST, UNITED STATES, CONCERNING THE EFFECTS OF THE 2010 OIL SPILL IN THE GULF OF MEXICO.

[Oshimpungu pepandja 8]

Mbela Kalunga oye he etitha omaupyakadhi agehe ngoka tu wete muuyuni kunena?

Molwaashoka Ombiimbeli oya hunganeka oonkalo oombwinayi ndhoka tu wete tadhi ningwa muuyuni kunena, mbela Kalunga oye he etitha omaupyakadhi ga tya ngaaka? Mbela Kalunga oye he etitha okumona iihuna? Ngele owa hala okumona omayamukulo taga mbilipaleke komapulo ngoka, tala ontopolwa 11 yembo Omalongo gashili gOmbiimbeli ogeni naanaa?, lya nyanyangidhwa kOonzapo dhaJehova.

[Edhina lyomuthaneki gwethano pepandja 8]

U.S. Coast Guard photo

Ehunganeko 6. Iilonga yokuuvitha mbyoka tayi longwa muuyuni auhe

“[Onkundana ndjika ombwanawa yuukwaniilwa otayi, NW] ku uvithilwa aantu ayehe.”—MATEUS 24:14.

● Omukulukadhi gwedhina Vaiatea oha kala kiitopolwa yokominkandi kokantuntu ke li moshitopolwa shedhina Tuamotu Archipelago shi li mEfuta lya Mwena. Moshitopolwa shoka Tuamotu omu na uuntuntu uushona wu li 80 lwaampono wi ihanena moshitopolwa shuule wookilometa dhi vulithe po 802 900, nuunene wookilometa 534. Moshitopolwa moka omu na owala aakalimo 16 000 lwaampono. Ihe nonando ongaaka, Vaiatea naakali yokontuntu ndjoka oya li ya talelwa po kOonzapo dhaJehova. Omolwashike mbela? Omolwaashoka Oonzapo odhi hole okukundathana naantu ayehe kombinga yonkundana ombwanawa yUukwaniilwa waKalunga, kashi nduno mbudhi kutya oye li peni.

OSHILI OTAYI ULIKE SHIKE? Etumwalaka lyUukwaniilwa otali uvithilwa aantu muuyuni auhe. Mo 2010 omo amuke, Oonzapo dhaJehova odha li dha longitha oowili dhi vulithe pebiliyona 1,6 mokuuvitha onkundana ombwanawa miilongo 236. Shika otashi ti kutya Onzapo kehe oya li ya longo esiku kehe uupokati wominute 30 miilonga yokuuvitha. Oonzapo odha li dha nyanyangidha nodha li dha gandja iileshomwa ya kankamena kOmbiimbeli yi vulithe pomabiliyona 20 oomvula omulongo dha piti.

OMAPOPYO GENI GE LI APUHE KUNENA? Etumwalaka lyOmbiimbeli olya kala nokuuvithilwa aantu momukokomoko gwoomvula omayuvi.

MBELA EPOPYO NDYOKA OTALI TI SHA NGAA? Odhoshili kutya aantu oyendji oya kala ngaa hayu uvithile aantu kombinga yetumwalaka lyOmbiimbeli. Ihe oyendji mboka ye shi ninga otashi vulika ye shi ninga owala uule wethimbo efupi nomomahala omashona. Mepingathano naashoka, Oonzapo dhaJehova ohadhi uvithile aantu omamiliyona omathele okupitila moshikonga shu unganekwa nawa muuyuni auhe. Oonzapo otadhi tsikile nuudhiginini niilonga yadho nonando otadhi hepekwa komahangano gamwe gopantu omanankondo noge na onyanya.a (Markus 13:13) Kakele kaashono, Oonzapo dhaJehova ihadhi futwa sho tadhi uvithile aantu. Pehala lyaashono, ohadhi yamba po ethimbo lyadho nohadhi gandja wo iileshomwa yadho oshali. Iilonga yadho ayihe ohayi yambidhidhwa nomayambidhidho gehalo ewanawa.

NGOYE OTO TI NGIINI? Mbela “onkundana ombwanawa yuukwaniilwa” otayi uvithilwa ngaa shili aantu muuyuni auhe kunena? Mbela egwanitho lyehunganeko ndyoka itali ulike kutya opu na iiningwanima yinyanyudha mbyoka yi li pokuningwa?

[Enyolo lyopevi]

[Oohapu dha simana pepandja 9]

“Ngele Jehova e shi pitike, otatu tsikile okuuvitha onkundana ombwanawa yUukwaniilwa nuulaadhi, tatu ningi ngaashi tatu vulu opo tu uvithile aantu oyendji.”—2010 YEARBOOK OF JEHOVAHS WITNESSES.

Omathimbo omawanawa oge li pokuya

“Aadhudhu otaa ka kana po mbala; . . . Aifupipiki otaa ka thigulula evi notaa ka mona uulinawa nombili.”—EPISALOMI 37:10, 11.

MBELA owa hala okumona nkene ehunganeko ndyoka lya tothwa mo li li pombanda tali ka gwanithwa? Kapu na omalimbililo kutya owa hala oku ke li mona. Opu na omatompelo ga kola okwiitaala kutya ehunganeko ndyoka masiku otali ka gwanithwa.

Iitopolwa ya tetekele oya kundathana owala omahunganeko gamwe gOmbiimbeli ngoka tagu ulike sha yela kutya otu li ‘momasiku gahugunina.’ (2 Timoteus 3:1-5, KB) Kalunga okwa nwetha mo aanyoli yOmbiimbeli ya hunganeke iiningwanima mbyoka opo tu kale tu na etegameno. (Aaroma 15:4) Egwanitho lyomahunganeko ngoka otali ulike kutya omaupyakadhi ngoka hatu tsakaneke kunena masiku otaga ka hulithwa po.

Oshike tashi ka ningwa po konima yomasiku gahugunina? Uukwaniilwa waKalunga otawu ka tameka okupangela aantu ayehe. (Mateus 6:9) Natu ka taleni shoka Ombiimbeli tayi ti kombinga yoonkalo ndhoka tadhi ka kala kombanda yevi monakuyiwa:

● Ondjala otayi ka hulithwa po. “Moshilongo namu kale eloolo lyiilya; kiikulundundu naku kale omapya, niiyimati nayi monike ngaashi yokuLibanon.”—Episalomi 72:16.

● Omikithi otadhi ka hulithwa po. “Kape na nando ogumwe muSioni ta ka tya: ‘Otandi ehama.’”—Jesaja 33:24.

● Evi otali ka pepalekwa ishewe. “Ombuga nomalondo otaga ka nyanyukwa, ontale otayi ka tundulukwa nokutemuna oongala.”—Jesaja 35:1.

Ngaka ogo owala gamwe gomomahunganeko gOmbiimbeli ngoka taga ka gwanithwa. Omolwashike itoo pula Oonzapo dhi ku ulukile kutya omolwashike dhi itaala kutya masiku otaku ke ya omathimbo omawanawa?