Oshileshwa 9
Aapiya yaKalunga Oye na Okukala Ya Yogoka
Omolwashike tu na okukala twa yogoka miinima ayihe? (1)
Otashi ti ngiini okukala wa yogoka pambepo? (2) pamikalo? (3) pamadhiladhilo? (4) palutu? (5)
Omaludhi gokupopya kwa nyata geni tu na okuyanda? (6)
1. Jehova Kalunga oye omuyogoki nomuyapuki. Ye ota tegelele aagalikani ye ya kale ya yogoka—pambepo, pamikalo, pamadhiladhilo nopalutu. (1 Petrus 1:16) Otashi pula onkambadhala yashili okukala twa yogoka momeho gaKalunga. Tse otu li muuyuni wa nyata. Otu na wo ekondjo okukondjitha omahalo getu yene okulonga epuko. Ihe katu na okusholola.
2. Uuyogoki woPambepo: Ngele otwa hala okulongela Jehova, itatu vulu okukakatela elongo lilwe nenge omukalo gulwe gwomalongelokalunga giifundja. Otu na okuza momalongelokalunga giifundja nokatu na oku ga yambidhidha. (2 Aakorinto 6:14-18; Ehololo 18:4) Ngele twi ilongo oshili kombinga yaKalunga, otu na okukala twa kotoka opo twaaha pukithwe kaantu mboka taya longo iifundja.—2 Johannes 10, 11.
3. Uuyogoki woPamikalo: Jehova okwa hala aagalikani ye yi ihumbate ye li Aakriste yashili ethimbo kehe. (1 Petrus 2:12) Ye oha mono kehe shoka tatu ningi, nokuli niinima mbyoka hatu ningi meholamo. (Aaheberi 4:13) Otu na okuyanda onyata yiipala nomikalo omikwawo dha nyata dhuuyuni mbuka.—1 Aakorinto 6:9-11.
4. Uuyogoki woPamadhiladhilo: Ngele otatu udhitha omadhiladhilo getu nomadhiladhilo ga yogoka, eihumbato lyetu otali ka kala wo lya yogoka. (Aafilipi 4:8) Ihe ngele otatu kala nokudhiladhila iinima ya nyata, otashi ke eta iilonga iiwinayi. (Mateus 15:18-20) Otu na okuyanda omaludhi gomainyanyudho ngoka taga vulu okunyateka omadhiladhilo getu. Otatu vulu okuudhitha omadhiladhilo getu nomadhiladhilo ga yogoka mokukonakona Oohapu dhaKalunga.
5. Uuyogoki woPalutu: Molwaashono Aakriste oye lile po Kalunga, oye na okukaleka omalutu nomizalo dhawo dha yogoka. Otu na okuyoga iikaha yetu konima yokulongitha okandjugo, notu na oku yi yoga manga inaatu lya nenge manga inaatu guma iikulya. Ngele ku na okandjugo haka pombwa, iiyekelwahi yomokandjugo oyi na okufumvikwa. (Deuteronomium 23:13, 14) Okukala wa yogoka palutu otashi ku kwathele okukala nuukolele uuwanawa. Egumbo lyOmukriste oli na okukala lyo opala nolya yela meni nopondje. Oli na okukala lyi iwetikile momudhingoloko kutya oli li oshiholelwa oshiwanawa.
6. Okupopya Kwa Yogoka: Aapiya yaKalunga oye na okupopya aluhe oshili. Aafundja itaya ka ya mo mUukwaniilwa waKalunga. (Aaefeso 4:25; Ehololo 21:8) Aakriste ihaya longitha elaka ewinayi. Yo ihaya pulakene nenge ya popye omashendjo ga nyata nenge omahokololo ga nyata. Molwaashono okupopya kwawo okwa yogoka, yo oyi iwetikile kutya oyi ili kiilonga nenge kosikola nopuushiinda.—Aaefeso 4:29, 31; 5:3.
[Pictures on page 18, 19]
Aapiya yaKalunga oye na okukala ya yogoka miinima ayihe