ONKALAMWENYO YOPAKRISTE

Oshitopolwa oshipe shokugongala kwomokati koshiwike

Okuza muJanuali 2018, okugongala kwomokati koshiwike otaku ka kala kwa kwatela mo uuyelele wokukonakonwa, uuvidio, iikwamawi nomathano okuza mOmbiimbeli yokukonakonwa yo-New World Translation of the Holy Scriptures (nwtsty), ndjoka yi li kointaneta, nokuli nonando kayi mo melaka lyeni. Uuyelele mbuka otawu ke mu kwathela mu ilongekidhile nawanawa okugongala. Shoka sha simanenena, otawu ke mu hedhitha popepi naTate yetu omunahole, Jehova.

UUYELELE WOKUKONAKONWA

Uuyelele mbuka otawu tu kwathele tu tseye omithigululwakalo, omahala nelaka ndyoka lya longithwa moovelise odhindji dhOmbiimbeli.

Mateus 12:20, OB-1954

Okangodhi taka tsina: Olamba yomegumbo oya li hayi ningwa meloya nohayi tulwa omagadhi gooholivi. Okangodhi komolamba oka li haka nana omagadhi, opo omulilo gu kale gwa tema. Uutumbulilo wOshigreka ‘okangodhi taka tsina’ otashi vulika wu ulike kokangodhi komolamba taka tsina olwithi, oshoka ekala oko li li natango, nonando omulilo ogwa dhima. Jesaja 42:3 okwa hunganeke kutya Jesus okwa li ta ka kala omunalukeno. Ke na nando esiku a ningithe aaifupipiki naamboka taya hepekwa, ya kanithe etegameno lyawo.

Mateus 26:13, OB-1954

Oshili: Oshitya shOshigreka amen osha tolokwa ngaashi shi li okuza koshitya shOshihebeli amen shoka tashi ti “nashi kale ngawo” nenge “oshoshili.” Jesus okwa li ha tameke noshitya shoka uuna ta popi oohapu dhontumba, euvaneko nenge ehunganeko lyontumba, opo a shilipaleke aantu kutya shoka ta popi oshoshili noshi shi okwiinekelwa. MOmbiimbeli oshitya “oshili” nenge amen, Jesus okwe shi longitha owala mOmavaangeli. Uuna tashi longithwa she endululwa (amen amen) ngaashi sha longithwa olundji mEvaangeli lyaJohannes, ohashi tolokwa “oshili, oshili.” — Joh 1:51, OB-1954.

UUVIDIO, IIKWAMAWI NOMATHANO

Omathano nuuvidio wu na owala omathano kaawu na omawi tawu ulike iinima yi ili noyi ili mbyoka ya nyolwa mOmbiimbeli.

Betfage, Ondundu yooholivi nosho wo Jerusalem

Okavidio haka okafupi otaku ulike ondjila yu uka kuJerusalem okuza kuuzilo, ya za momukunda ngoka kunena hagu ithanwa et-Tur, yu uka kOndundu yooholivi, tashi vulika gwa li hagu ithanwa Betfage pethimbo lyOmbiimbeli. Omukunda Betania ogu li kuuzilo waBetfage kuuzilo wesilu lyOndundu yooholivi. Uuna Jesus naalongwa ye ye li muJerusalem oya li haya lala muBetania. Kunena omukunda ngoka ogwa ninga ondoolopa el-Azariyeh (El Eizariya ) mOshiarabia, edhina ndyoka tali ti “Egumbo lyaLasarus.” Osha yela kutya Jesus okwa li ha kala megumbo lyaMarta, Maria naLasarus. (Mat 21:17; Mark 11:11; Luk 21:37; Joh 11:1) Uuna Jesus naalongwa ye taya zi kegumbo hoka yu uka kuJerusalem, otashi vulika ya li haye ende nondjila ndjoka yu ulikwa mokavidio. Sho Jesus a kayile ontana yokasino momasiku 9 Nisan momumvo 33 E.N. ta zi kOndundu yooholivi, u uka kuJerusalem, otashi vulika a li a zi kuBetfage a landula ondjila ndjoka yu uka kuJerusalem.

Ondjila ya za kuBetania yu uka kuBetfage
Betfage
Ondundu yooholivi
Esilu lyaKidron
Mpoka pwa li otempeli

Omboha mesipa lyoshithi shompadhi

Ndika ethano lyoshiyelekela shesipa lyoshithi shompadhi yomuntu shi na omboha yoshitenda yoosentimeta 11,5 ya mbanduka mo. Esipa lyoshithi lyo lyene olya monikile mo 1968, sho aalafululi ya li taya lafulula iikulunima kuumbangalantu waJerusalem, nolya kala ko okuza pethimbo lyAaroma. Otali gandja uuyelele wopandjokonona waalafululi kutya otashi vulika oomboha dha li hadhi longithwa uuna omuntu ta dhipagwa, opo a mbambalelwe koshiti. Omboha ndjika otashi vulika ya faathana naandhoka aakwiita yaRoma ya longithile, opo ya mbambalele Jesus Kristus koshiti. Esipa lyo lyene olya adhikile moshiketha sha hongwa memanya hashi ithanwa ondjugombila, moka mwa li hamu tulwa iipongolo yaantu. Shika otashi ulike kutya omuntu ngoka a alelwa koshiti okwa li ha vulu okutulwa mombila. — Mat 27:35.