Masiku Jehova ota ka longitha Uukwaniilwa we a kandule po omaupyakadhi getu agehe. Onkundana ndjika ombwanawa unene, onkee ano, kehe gumwe okwa pumbwa oku yi uva. Jesus okwa li a hala aalanduli ye ya lombwele kehe gumwe etumwalaka ndika! (Mateus 28:19, 20) Mbela Oonzapo dhaJehova ohadhi gwanitha po ngiini elombwelo ndika lyaJesus?

1. Mateus 24:14 ota gwanithwa ngiini kunena?

Jesus okwa hunganeke a ti: “Elaka ndika etoye lyOshilongo otali ka uvithilwa aantu ayehe.” (Mateus 24:14) Oonzapo dhaJehova ohadhi kala dha nyanyukwa sho hadhi kutha ombinga miilonga mbika ya simana. Ohatu uvitha onkundana ombwanawa muuyuni awuhe momalaka ge vulithe 1 000! Ihe iilonga mbika iinene ohayi pula oonkambadhala dha mana mo nokuunganekwa nawa. Onkee ano, itayi vulu okulongwa pwaa na ekwatho lyaJehova.

2. Oonkambadhala dhini hatu ningi, opo tu uvithile aantu?

Ohatu uvithile aantu kehe mpoka tatu ya adha. Ngaashi Aakriste yomethelemumvo lyotango, natse ohatu uvithile aantu ‘momagumbo’ gawo. (Iilonga 5:42) Omukalo nguka ohagu tu kwathele tu popye naantu omamiliyona omumvo kehe. Molwaashoka aantu ihaya kala aluhe momagumbo, ohatu uvithile wo momahala gaayehe ga yoolokathana. Ohatu kongo aluhe oompito tu lombwele yalwe kombinga yaJehova nomalalakano ge.

3. Olye e na oshinakugwanithwa shokuuvitha onkundana ombwanawa?

Aakriste ayehe yashili oye na oshinakugwanithwa shokuuvithila yalwe onkundana ombwanawa, noshilonga shika otwe shi tala ko sha simana lela. Onkee ano, ohatu ningi ngaashi tatu vulu tu uvithile aantu ayehe, opo ya vule oku ka hupithwa. (Lesha 1 Timoteus 4:16.) Ihatu futwa sho tatu longo iilonga mbika, oshoka Ombiimbeli otayi ti: “One omwa pewa oshindji, gandjeni wo omagano.” (Mateus 10:7, 8) Haantu ayehe haya taamba ko etumwalaka lyetu, ihe ohatu tsikile okuuvitha, molwaashoka oshi li oshitopolwa shokulongela Jehova nohashi mu nyanyudha.

ILONGA OSHINDJI

4. Ohatu longo nuudhiginini tu uvithile aantu ayehe

OKAVIDIO: Tayu uvitha sigo “okooha dhuuyuni” (7:33)

• Oshike hashi ku kumitha kombinga yoonkambadhala ndhoka Oonzapo dhaJehova hadhi ningi, opo dhi uvithile aantu?

Lesha Mateus 22:39 nosho wo Aaroma 10:13-15, e tamu kundathana omapulo taga landula:

• Iilonga yetu yokuuvitha ohayi ulike ngiini kutya otu hole aantu ooyakwetu?

• Jehova oha kala u uvitile ngiini mboka haya uvitha onkundana ombwanawa? — Tala ovelise 15.

5. Tse aalongi pamwe naKalunga

Iimoniwa oyindji ohayi ulike kutya Jehova oye ta wilike iilonga yetu. Pashiholelwa, moNew Zealand, omumwatate Paul, esiku limwe pethimbo lyomutenya okwa tsakaneke omukulukadhi gumwe sho tu uvitha egumbo negumbo. Ongula yesiku ndyoka, omukulukadhi ngoka okwa li a galikana kuKalunga, ta longitha edhina lyaKalunga, Jehova, te mu pula opo gumwe e ye e mu talele po. Paul okwa ti: “Konima owala yoowili ndatu, onda li nda thiki pegumbo lyomukulukadhi ngoka.”

Lesha 1 Aakorinto 3:9, e tamu kundathana epulo tali landula:

• Ongiini iiholelwa ngaashi shoka shomoNew Zealand tashi ulike kutya Jehova ota wilike iilonga yokuuvitha?

Lesha Iilonga 1:8, e tamu kundathana epulo tali landula:

• Omolwashike twa pumbwa ekwatho lyaJehova, opo tu gwanithe po iilonga yetu yokuuvitha?

Owe shi tseya ngaa?

Oshiwike kehe, pokugongala kwetu kwomokati koshiwike, ohatu dheulwa nkene tu na okuuvitha. Ngele pokugongala mpoka owa li po oshikando shimwe, oto ti ngiini kedheulo ndyoka?

6. Ohatu vulika kelombwelo lyaKalunga li na ko nasha nokuuvitha

Methelemumvo lyotango, aapataneki oya li ya kambadhala okukeelela aalanduli yaJesus kaaya uvithe. Aakriste yopetameko oya li ya popile uuthemba wawo wokuuvitha ‘mokupopila evaangeli.’ (Aafilippi 1:7 yelekanitha OB-1954) Oonzapo dhaJehova nadho osho hadhi ningi sigo okunena.a

OKAVIDIO: Taya popile onkundana ombwanawa mompangu (2:28)

Lesha Iilonga 5:27-42, e tamu kundathana epulo tali landula:

• Omolwashike kaatu na okweetha po okuuvitha? — Tala ovelise 29, 38 no 39.

OWI ILONGO SHIKE?

Jesus okwa li a lombwele aalanduli ye, yu uvithile aantu yomiigwana ayihe onkundana ombwanawa. Jehova ota kwathele aapiya ye, ya longe iilonga mbika.

Omapulo geendululo

• Onkundana ombwanawa ohayi uvithwa ngiini muuyuni awuhe?

• Iilonga yetu yokuuvitha ohayi ulike ngiini kutya otu hole aantu ooyakwetu?

• Mbela sho to tala, iilonga yokuuvitha otayi vulu ngaa oku tu etela enyanyu? Omolwashike to tile ngawo?

UUYELELE WA GWEDHWA PO

Tala nkene Oonzapo dhaJehova hadhi uvithile aantu miilando iinene.

Uunzapo womontaneho wi ikalekelwa moshilando Paris (5:11)

Oonzapo dhaJehova odha li dha ningi po shike opo dhi kwathele oontauki?

Taya uvithile oontauki ndhoka dha hala okutseya kombinga yaKalunga (5:59)

Pulakena kOnzapo yaJehova yimwe tayi yelitha nkene iilonga yokuuvitha hayi yi etele enyanyu.

Onda nyanyukwa sho nda hogolola iilonga mbika (6:29)

Ilonga kombinga yomatokolo gamwe ga simana ngoka ge shi ningitha oshipu tu uvithe onkundana ombwanawa.

“Aauvithi yUukwaniilwa taya yi kompangu” (Uukwaniilwa waKalunga otawu pangele!, ontopolwa 13)

Jesus okwa ti kutya Aakriste yashili oye na okuninginithwa. (Lesha Mateus 28:19, 20, yelekanitha NW.) Ihe eninginitho oshike? Omuntu oku na okuninga shike tango, opo a kale a gwana okuninginithwa?

1. Eninginitho oli na okuningwa ngiini?

Oshitya “okuninginithwa” osha za koshitya shOshigreka shoka tashi ti “okutula kohi” yomeya. Sho Jesus a ninginithwa okwa li a tulwa kohi yomeya momulonga gwaJordan, oshoka Ombiimbeli otayi ti: ‘Okwa zi momeya.’ (Markus 1:9, 10) Sha faathana, Aakriste yashili ohaya ninginithwa, taya tulwa kohi yomeya.

2. Eninginitho ohali ulike shike?

Uuna omuntu a ninginithwa, ohu ulike kutya okwi iyapulila Jehova Kalunga. Omuntu ohi iyapulile ngiini Kalunga? Manga inaa ninginithwa, oha galikana paumwene ta lombwele Jehova kutya okwa hala oku mu longela sigo aluhe. Ohu uvanekele Jehova kutya okwa hala oku mu longela oye awike. Oha tokola wo kutya okulonga ehalo lyaKalunga, osho tashi ka kala oshinima sha simanenena monkalamwenyo ye. Oha tokola ‘okwiidhimbwa ye mwene nokulandula’ omalongo gaJesus noshiholelwa she. (Mateus 16:24) Eiyapulo neninginitho lye ohali shi ningitha tashi wapa, a kale e na uukuume wopothingo naJehova nosho wo nayalwe mboka haye mu longele.

3. Omuntu okwa pumbwa okuninga shike tango, opo a kale a gwana okuninginithwa?

Oto vulu okwiilongekidhila eninginitho mokwiilonga kombinga yaJehova nomokukokeka eitaalo lya kola. (Lesha Aahebeli 11:6.) Sho ontseyo yoye neitaalo tali ende tali koko, nohole yoye yokuhola Jehova otayi ende tayi koko. Onkee ano, osha yela kutya oto ka kala wa hala okuuvitha kombinga yaJehova nokukala metsokumwe nomithikampango dhe. (2 Timoteus 4:2; 1 Johannes 5:3) Ngele omuntu oha longo shoka sho “opalela” Omuwa, otashi vulika a kale a hala okwiiyapulila Kalunga nokuninginithwa. — Aakolossa 1:9, 10.a

ILONGA OSHINDJI

4. Otatu vulu okwiilonga ko sha keninginitho lyaJesus

Lesha Mateus 3:13-17 wi ilonge oshindji kombinga yeninginitho lyaJesus, e tamu kundathana omapulo taga landula:

• Mbela sho Jesus a ninginithwa okwa li okahanona?

• Okwa li a ninginithwa ngiini? Mbela okwa li a shashaminwa omeya?

Sho Jesus a ninginithwa, okwa tameke oshilonga shi ikalekelwa kombanda yevi, shoka a pewa kuKalunga. Lesha Lukas 3:21-23 nosho wo Johannes 6:38, e tamu kundathana epulo tali landula:

• Konima sho Jesus a ninginithwa, oshilonga shini a li a tula pondondo yotango monkalamwenyo ye?

5. Eninginitho onkatu ndjoka to vulu okwaadha

Petameko, otashi vulika shi kale oshinima oshidhigu kungoye, okwiiyapulila Kalunga nokuninginithwa. Ihe nonando ongawo, oto vulu okuninga ehumokomeho sigo oponkatu mpoka to vulu okukala wu na omukumo gwokuninga etokolo ndyoka lya simana. Opo wu mone yamwe mboka ye shi ninga, dhana OKAVIDIO.

OKAVIDIO: Taya koleke ekwatathano lyawo naJehova (1:11)

Lesha Johannes 17:3 nosho wo Jakob 1:5, e tamu kundathana epulo tali landula:

• Oshike tashi kwathele omuntu a kale a gwana okuninginithwa?

1. Ohatu iyapulile Jehova megalikano tatu mu lombwele kutya otwa hala oku mu longela sigo aluhe

2. Sho tatu ninginithwa, ohatu ulukile aatali nomeho kutya otwi iyapulila Kalunga

6. Uuna wa ninginithwa, oho ningi oshitopolwa shuukwanegumbo waJehova

Uuna twa ninginithwa, ohatu ningi oshitopolwa shuukwanegumbo wa hangana muuyuni awuhe. Nonando otwa za komahala nomomaputuko ga yoolokathana, atuhe otwi itaala iinima ya faathana nohatu kala metsokumwe nomithikampango dhOmbiimbeli. Lesha Episalomi 25:14 nosho wo 1 Petrus 2:17, e tamu kundathana epulo tali landula:

• Eninginitho ohali gumu ngiini ekwatathano lyomuntu naJehova nosho wo nayalwe mboka haye Mu longele?

OWI ILONGO SHIKE?

Jesus okwa ti kutya Aakriste oya pumbwa okuninginithwa. Opo omuntu a adhe elalakano ndyoka, okwa pumbwa okukala e na eitaalo lya kola muJehova, okukala metsokumwe nomithikampango dhe noku mu iyapulila.

Omapulo geendululo

• Eninginitho oshike nomolwashike lya simana?

• Eiyapulo neninginitho oya pambathana ngiini?

• Omuntu okwa pumbwa okuninga shike manga inii iyapulila Jehova nokuninginithwa?

UUYELELE WA GWEDHWA PO

Tala kutya eninginitho oshike nosho wo kutya kali shi shike.

“Eninginitho oshike?” (Oshitopolwa shi li kepandja lyetu lyokointaneta)

Tala kiinima mbyoka tayi vulu okukwathela omuntu, opo a ninge ehumokomeho a ninginithwe.

“Ohole yokuhola Jehova noku mu pandula otayi ke ku inyengitha wu ninginithwe.” (Oshungolangelo, Maalitsa 2020)

Lesha wu uve nkene omulumentu gumwe a tokola a ninginithwe, ihe ine shi ninga owala shi ikolelela komaiyuvo ge.

“Oya li ya hala ndi mone ngame mwene shoka Ombiimbeli tayi ti” (Oshungolangelo, 1 Maalitsa 2013)

Tala kutya omolwashike eninginitho lya simana nankene to vulu oku li ilongekidhila.

“Mbela nandi ninginithwe ngaa?” (Omapulo ngoka aagundjuka haya pula, Embo 2, ontopolwa 37)