Hopaenena Omutumwa munenenene

‘Kaleni ovahopaeleli vange ngaashi ame omuhopaeleli waKristus.’ — 1 KOR. 11:1.

1. Omolwashike tu na okuhopaenena Jesus Kristus?

OMUYAPOSTOLI Paulus okwa li ha hopaenene Omutumwa munenenene, Jesus Kristus, nokwa li a ladipika Ovakriste vakwao a ti: ‘Kaleni ovahopaeleli vange ngaashi ame omuhopaeleli waKristus.’ (1 Kor. 11:1) Konima eshi Jesus a li a tulila po ovayapostoli vaye oshihopaenenwa shelininipiko mokukosha eemhadi davo nelininipiko, okwa li e va lombwela a ti: “Ame nde mu pa oshihopaelelwa, nye mu ninge yo ngaashi Ame nde mu ningila.” (Joh. 13:12-15) Tu li Ovakriste kunena, otu na oshinakuwanifwa shokuhopaenena Jesus Kristus mokupopya kwetu, moilonga nosho yo moikala yetu. — 1 Pet. 2:21.

2. Nonande ino nangekwa po kOlutuwiliki u li omutumwa, oto dulu okukala u na oikala ilipi?

² Moshitukulwa sha tetekela, otwe lihonga kutya omutumwa omunhu oo ha tumwa e li omuudifi wevangeli, omunhu oo ha ka udifila vamwe onghundana iwa. Paulus okwa li a pula omapulo mahokwifa shi na sha noilonga oyo yokuudifa. (Lesha Ovaroma 10:11-15.) Didilika kutya omuyapostoli okwa li a pula a ti: “Ndele tava udu ngahelipi ngenge kape nomuudifi?” Opo nee okwa tofa mexunganeko laJesaja eendjovo edi tadi ti: “Eemhadi oda fewa ngahelipi daava hava udifa eenghundana diwa.” (Jes. 52:7) Nonande otashi dulika ino tumwa u ka longe u li omutumwa koilongo i lili, oto dulu okukala omuudifi wevangeli omuladi, to hopaenene Jesus oo a li omuudifi omuladi wonghundana iwa. Omudo wa dja ko, ovaudifi vOuhamba ve li 6 957 852 ova longa “oshilonga shomuudifi wevangeli” moilongo 236. — 2 Tim. 4:5.

“Otwa fiya ko oinima aishe, notwe ku shikula”

3, 4. Jesus okwa li a fiya po shike meulu, noshike tu na okuninga opo tu ninge ovashikuli vaye?

³ Opo Jesus a wanife po oshilonga osho kwa li e uya okulonga kombada yedu, okwa li e “lidula Ye mwene nokwa djala olupe lomupika,” a fiya po onghalamwenyo yaye yomeulu nefimano laye. (Fil. 2:7) Omaliyambo keshe hatu ningi mokuhopaenena Kristus itaa dulu okuyelekwa nomaliyambo oo a li a ninga opo e uye kombada yedu. Ndele nande ongaho, ohatu dulu okukala tu li ovashikuli vaKristus ovadiinini, nopehe na okukala twa hala oinima oyo twa fiya mounyuni waSatana. — 1 Joh. 5:19.

⁴ Pomhito imwe, omuyapostoli Petrus okwa li a lombwela Jesus a ti: “Tala, fye otwa fiya ko oinima aishe, notwe ku shikula.” (Mat. 19:27) Petrus, Andreas, Jakob nosho yo Johannes ova li va fiya po diva oiyulifo yavo eshi Jesus a li e va ifana ve mu shikule. Ova li va fiya po ongeshefa yavo yokuyula eeshi ndele tava lalakanene oilonga yokuudifa. Pahokololo lEvangeli laLukas, Petrus okwa ti: “Tala, ofye otwa fiya ko aishe, ndele otwe ku shikula.” (Luk. 18:28) Vahapu vomufye inatu ‘fiya po oinima’ yetu aishe opo tu shikule Jesus. Ndele nande ongaho, otu na ‘okulixupula fye vene’ opo tu dule okuninga ovashikuli vaKristus novapiya vaJehova nehalo liwa. (Mat. 16:24) Mokuninga ngaho, ohatu ka mona omanangeko noupuna mahapu. (Lesha Mateus 19:29.) Okukala hatu hopaenene Kristus mokuudifa evangeli nouladi otashi ke tu etela ehafo, naunene tuu ngeenge otwa dula okukwafela umwe a ehene popepi naKalunga nosho yo nOmona waye omuholike.

5. Hokolola oshimoniwa osho tashi ulike kutya ovanhu ovo va tembukila koilongo imwe otava dulu okuninga po shike ngeenge ove lihongo oshili yOmbibeli.

⁵ Omulumenhu umwe Omubrasilia wedina Valmir oo ha kala moshitukulwa shi li pondingandinga yaSuriname okwa li e na omina yoshingoli. Okwa li ombuvi yoikolwifa nokwa li e na onghalamwenyo inai koshoka. Pomhito imwe fimbo a li moshilando, Eendombwedi daJehova oda li da hovela okukonakona naye Ombibeli. Okwa li ha konakona efiku keshe ndele ta ningi omalunduluko mahapu, nolwanima okwa ka ninginifwa. Eshi a mona kutya oilonga yaye otai mu imbi a kale metwokumwe nomahongo Ombibeli, okwa landifa po ongeshefa yaye oyo ya li tai ende nawa ndele ta shuna koBrasilia a ka kwafele oukwaneumbo waye u mone oshili. Ovanhu vahapu ovo va li va tembukila koilongo imwe eshi ve lihonga oshili yOmbibeli ova fiya po oilonga yavo nehalo liwa moilongo oyo ya hepuluka ndele tava shuna koilongo yavo opo va ka kwafele ovapambele vavo nosho yo ovanhu vamwe va ehene popepi naJehova. Ovaudifi vOuhamba va tya ngaho ova ulika kutya ove na ehalo lokuudifa evangeli.

6. Ohatu dulu okuninga shike ngeenge itatu dulu okuya koitukulwa oko ku na omhumbwe inene yovaudifi vOuhamba?

⁶ Eendombwedi dihapu oda dula okuya koitukulwa oko ku na omhumbwe inene yovaudifi vOuhamba. Dimwe oda ka longa nokuli koilongo imwe i lili. Otashi dulika fye pauhandimwe itatu dulu okuya koitukulwa ya tya ngaho, ndele ohatu dulu okuhopaenena Jesus mokukufa alushe ombinga moukalele ngaashi hatu dulu.

Jehova ohe tu pe edeulo olo twa pumbwa

7. Eefikola dilipi hadi deula ovo va hala okuxwepopaleka ounghulungu wavo ve li ovaudifi vOuhamba?

⁷ Ngaashi ashike Jesus a deulwa kuXe, nafye ohatu dulu okumona ouwa mehongo olo Jehova he tu pe kunena. Jesus okwa ti: “Movaprofeti mwa shangwa: Ndele aveshe tava ningi va longwa kuKalunga.” (Joh. 6:45; Jes. 54:13) Kunena, oku na eefikola odo da nuninwa oku tu kwafela tu li ovaudifi vOuhamba. Nopehe na omalimbililo, atusheni ohatu mono ouwa meenghedi donhumba mOfikola yOukalele woPauteokratika meongalo letu. Ovakokolindjila ove na oufembanghenda wokuya kOfikola yOilonga yOvakokolindjila. Ovakokolindjila vahapu ovo va kala moukokolindjila efimbo lile ova hafela okuya kofikola oyo oshikando oshitivali. Ovakulunhuongalo novayakuliongalo ohava deulwa kOfikola yOukalele wOuhamba opo va xwepopaleke ounghulungu wavo wokuhonga nosho yo onghedi omo hava yakula ovaitaveli vakwao. Ovakulunhuongalo novayakuliongalo vahapu ovo inava hombola ohava deulwa kOfikola yOkudeula mOukalele, oyo hai va deula va dule okukwafela ovanhu vakwao moilonga yokuudifa. Ovamwatate novamwameme vahapu ovo ve li ovatumwa koilongo ihe fi yavo ova deulwa kOfikola yOmbibeli yoWatchtower yaGilead.

8. Ovamwatate vamwe ohava yambe po shike nehalo liwa omolwedeulo olo hava pewa kuJehova?

⁸ Vahapu vomEendombwedi daJehova ova ninga omalunduluko opo va dule okuya keefikola odo. Omumwatate umwe wedina Yugu okwa li a efa po oilonga yaye yokulikongela omboloto opo a dule okuya kOfikola yOkudeula mOukalele koKanada, molwaashi omuyandji waye woilonga okwa li e mu anyena efudo. Yugu okwa ti: “Inandi lipa nande oushima eshi nda ninga etokolo la tya ngaho. Ngeno ova pele nge efudo, otashi dulika ngeno ova ka kala va hala ndi kale ashike handi longele ofeema yavo. Paife ondi na omhito okutambula ko oshilonga keshe osho tashi dulika Jehova a pe nge.” Eshi ovapiya vaJehova vahapu va mona ouwa medeulo olo he va pe, ova yamba po nehalo liwa oinima oyo va li va lenga neenghono. — Luk. 5:28.

9. Yandja oshihopaenenwa osho tashi ulike nghee omahongo Ombibeli nokuninga eenghendabala da mana mo hai pondola.

⁹ Okutula moilonga omahongo Ombibeli nokuninga eenghendabala da mana mo otaku dulu okukwafela omunhu a ninge exumokomesho lididilikwedi. (2 Tim. 3:16, 17) Tala kwaasho sha li sha ningwa po shi na sha naSaulo wokuGuatemala. Saulo okwa li a dalwa noulema wonhumba wopamadiladilo, nomuhongi waye umwe okwa li a lombwela ina yaSaulo kutya ine mu kondjifa e lihonge okulesha molwaashi ota ka kala ashike a kenyanana. Saulo okwa li a fiya po ofikola ehe shii okulesha. Ndele nande ongaho, Ondombwedi imwe oya li ya honga Saulo okulesha, ya longifa okabroshure Apply Yourself to Reading and Writing. Mokweendela ko kwefimbo, Saulo okwa li a ninga exumokomesho ndele ta kala ha yandje oipopiwa mOfikola yOukalele woPauteokratika. Konima yefimbo, ina yaSaulo okwa li a shakeneka omuhongi waSaulo moilonga yeumbo neumbo. Eshi omuhongi oo a uda kutya Saulo okwe lihonga okulesha okwa pula ina e uye naye oshivike tashi ya. Eshi Saulo va ka ya naina keumbo lomuhongi, omuhongi okwa li a pula Saulo a ti: “Oshike wa hala okuhonga nge?” Saulo okwe mu leshela okatendo membo Ombibeli otai hongo lela shike? Omuhongi okwa ti: “Onda kumwa eshi oove to hongo nge paife.” Omuhongi okwa li a hovela okulila molwaashi okwa li a hafa, ndele ta papatele Saulo.

Ehongo olo hali kumu omutima

10. Oshilongifo sha denga mbada shilipi hatu dulu okulongifa mokuhonga ovanhu oshili yOmbibeli?

¹⁰ Jesus okwa li ha kanghamekele ehongo laye kwaasho Jehova a li e mu honga odikilila nosho yo komahongo oo e li mOmbibeli. (Luk. 4:16-21; Joh. 8:28) Nafye ohatu hopaenene Jesus mokutula moilonga omayele aye nosho yo ehongo olo le likolelela kOmishangwa. Kungaho, ohatu popi nohatu diladila monghedi ya faafana, naasho ohashi xumifa komesho oukumwe wetu. (1 Kor. 1:10) Otu na olupandu linene eshi “omupiya omudiinini nomunaendunge” ha nyanyangida oishangomwa ye likolelela kOmbibeli opo i tu kwafele tu kale hatu hongo omahongo a faafana notu wanife po oshilonga shetu tu li ovaudifi vevangeli. (Mat. 24:45; 28:19, 20) Shimwe shomoishangomwa oyo osho embo Ombibeli otai hongo, olo paife li li momalaka 179.

11. Omumwameme umwe wokuEtiopia okwa li a finda ngahelipi epataneko mokulongifa embo Ombibeli otai hongo?

¹¹ Okukonakona Omishangwa novanhu hatu longifa embo Ombibeli otai hongo otaku dulu okulundulula omitima dovapataneki vetu. Pomhito imwe, fimbo omukainhu umwe omukokolindjila wokuEtiopia wedina Lula a li ta konakona Ombibeli nomunhu umwe, omupambele womukonakonimbibeli okwe uya mo a handuka ndele ta ti inava konakona vali. Lula okwa tomhafana nengungumano nomupambele womukonakoni waye, a longifa efaneko li na sha noimaliwa yoikengelela olo li li metukulwa eti-15 lembo Ombibeli otai hongo. Omukainhu oo okwa li a lundulula etaleko laye, ndele te va pitike va twikile nekonakono. Oshikando oshitivali naye okwa li pekonakono nokwa li a pula Lula a konakone naye Ombibeli pauhandimwe. Okwa li yo a popya kutya ota ka futila ekonakonombibeli olo. Omukainhu oo okwa hovela okukala ha konakona lutatu moshivike nokwa ninga exumokomesho lopamhepo.

12. Yandja oshihopaenenwa osho tashi ulike nghee ovanyasha tava dulu okupondola mokuhonga oshili yOmbibeli.

¹² Ovanyasha otava dulu okukwafela vamwe tava longifa embo Ombibeli otai hongo. Ofimbo Keanu wokuHawaii womido 11 a li ta lesha embo olo kofikola, omunafikola umwe womongudu yavo okwa li e mu pula a ti: “Omolwashike iho dana omafiku omafudo?” Keanu okwe mu leshela enyamukulo moshiwedelwako shi na oshipalanyole “Mbela otu na okudana omafiku omafudo?” Opo nee okwa ya koshikalimo shembo ndele ta pula okamati oko kutya oshikundafanwa shilipi shihokwifa kuko, nova li va hovela ekonakonombibeli. Omudo woilongo wa pita, Eendombwedi daJehova oda li da ninga omakonakonombibeli 6 561 426 navahapu ova li va longifa embo Ombibeli otai hongo. Mbela oho longifa ngoo embo olo mokuninga omakonakonombibeli?

13. Omonghedi ilipi okukonakona Ombibeli taku dulu okunwefa mo ovanhu neenghono?

¹³ Okukonakona Omishangwa novanhu to longifa embo Ombibeli otai hongo otashi dulu okunwefa mo neenghono ovanhu ovo va hala okulonga ehalo laKalunga. Ovalihomboli vonhumba vokuNorway, ovo ve li ovakokolindjila ve likalekelwa, ova li va hovela ekonakonombibeli noukwaneumbo umwe wa dja koZambia. Ovalihomboli ovo Ovazambia ova li ve na ovanakadona vatatu noka va li vali va hala okudala okaana kamwe. Onghee hano, eshi omukainhu a ninga oufimba ova li va tokola oku ke u kufifa mo. Omafiku manini fimbo inava ya kundokotola, ova li va konakona etukulwa li na oshipalanyole “Etaleko lopakalunga li na sha nomwenyo.” Efano lokaana inaka dalwa olo li li metukulwa olo ola li la kuma ovalihomboli ovo neenghono nova li va tokola vaha kufife mo vali edimo olo. Ova twikila okuninga exumokomesho lopamhepo nova lukila okaana kavo omumwatate oo ha konakona navo.

14. Hokolola oshimoniwa osho tashi ulike kutya okukala metwokumwe naasho hatu hongo otaku dulu okweetifa oidjemo iwa.

¹⁴ Oshinima shimwe sha fimana shi na sha nonghedi yaJesus yokuhonga oshosho kutya okwa li ha kala metwokumwe naasho a honga. Ovanhu vahapu ohava kala va kuminwa elihumbato liwa lEendombwedi daJehova odo hadi hopaenene Jesus mokukala metwokumwe naasho tadi hongo. Pashihopaenenwa, ohauto yomunangeshefa umwe muNew Zealand oya li ya teywa ndele ondjato yaye tai vakwa mo. Oshiningwanima osho okwa li e shi lopota komupolifi umwe, nomupolifi oo okwa ti: “Oinima yoye oto i mono ashike ngeenge oya toolwa kuumwe womEendombwedi daJehova.” Ondombwedi imwe oyo ya li tai twala oifokundaneki keenhele donhumba oya li ya toola ondjato oyo. Eshi mwene wondjato e shi uda okwa ya keumbo lOndombwedi oyo. Mwene wondjato okwa li a hafa eshi a mona kutya ombapila yaye imwe ya fimana neenghono omo i li. Omumwameme okwe mu lombwela a ti: “Oinima yoye ei nda toola oyo ei ngaha; itandi dulu oku i kufa po molwaashi ondi li Ondombwedi yaJehova.” Omunangeshefa oo okwa li a kumwa, molwaashi okwa li a dimbuluka osho omupolifi e mu lombwela ongula yefiku olo. Osho otashi ulike kutya Ovakriste vashili ohava kala metwokumwe nomahongo Ombibeli nohava hopaenene Jesus. — Heb. 13:18.

Kala ho ungaunga novanhu ngaashi Jesus a li ha ungaunga navo

15, 16. Ongahelipi hatu dulu okulinyengifa ovanhu va tambule ko etumwalaka olo hatu udifa?

¹⁵ Onghedi omo Jesus a li ha ungaunga novanhu oya li ye ve linyengifa va tambule ko etumwalaka laye. Pashihopaenenwa, ohole nosho yo elininipiko laye oya li ya nanena ovalininipiki kuye. Jesus okwa li a udila ovanhu olukeno ovo va li ve uya kuye noku va hekeleka neendjovo donghenda, nokwa li a velula ovanaudu vahapu. (Lesha Markus 2:1-5.) Nonande itatu dulu okulonga oikumwifilonga, ohatu dulu okukala ovanahole, ovalininipiki nosho yo ovanalukeno, omaukwatya oo taa dulu okukwafela ovanhu va tambule ko oshili.

¹⁶ Fimbo omukokolindjila e likalekelwa wedina Tariua a li moilonga yomomapya, okwa li a ulikila olukeno omulumenhu omunamido wedina Beere, oo ha kala kokanhunhu ke likalela kaKiribati kOlukadi lEfuta la Mwena. Nonande omunamido oo ka li a hala okupwilikina, Tariua okwa li a didilika kutya omunamido oo okwa li a vela ombada nokwa li e mu uditile olukeno. Tariua okwa pula omunamido oo a ti: “Mbela ou shii ngoo kutya Kalunga okwa udanekela shike ovanhu ovo tava vele nosho yo ovanamido?” Opo nee okwe mu leshela eevelishe donhumba okudja mexunganeko laJesaja. (Lesha Jesaja 35:5, 6.) Omunamido oo okwa popya nehafo a ti: “Onda kala handi lesha Ombibeli oule womido, nonda kala handi talelwa po kovatumwa velongelokalunga letu oule womido dihapu ndele eendjovo odo inandi di mona mo nande onale mOmbibeli.” Okudja opo, Beere okwa hovela okukonakona Ombibeli, nokwa ninga exumokomesho lopamhepo. Nonande Beere okwa lemana neenghono, paife okwa ninginifwa noha kwatele komesho ongudu oyo ihe fi natango eongalo, noha tavakana nokanhunhu oko ta udifa onghundana iwa.

Twikila okuhopaenena Kristus

17, 18. (a) Ongahelipi to dulu okukala omuudifi wevangeli ha pondola? (b) Ovo hava udifa nouladi otava ka mona shike?

¹⁷ Ngaashi oimoniwa ihafifa yomoukalele hai shi ulike luhapu, ohatu dulu okukala ovaudifi vevangeli hava pondola ngeenge otwa kulike nokuulika omaukwatya a fa aJesus. Onghee hano, osha yeleka okuhopaenena Kristus tu li ovaudifi vevangeli ovaladi.

¹⁸ Eshi ovanhu vamwe va li va ninga ovahongwa vaJesus mefelemudo lotete, Petrus okwa li a pula Jesus a ti: “Ohatu mono shike?” Jesus okwe mu nyamukula a ti: “Keshe ou a fiya ko omolwedina lange omaumbo ile ovamwaxe ovalumenhu ile ovamwaina ovakainhu ile xe ile ina ile ovana ile omapya, oye te ke i mona ko ihapu i dule ei, nomwenyo waalushe ote u fyuulula.” (Mat. 19:27-29) Nafye ohatu ka wanifilwa eendjovo odo ngeenge otwa twikile okuhopaenena Omutumwa munenenene, Jesus Kristus.

Oto nyamukula ngahelipi?

• Jehova ohe tu deula ngahelipi tu kale ovaudifi vevangeli?

• Omolwashike okulongifa embo Ombibeli otai hongo haku tu kwafele tu pondole moukalele wetu?

• Ongahelipi hatu dulu okuhopaenena onghedi omo Jesus a li a ungaunga novanhu?

[Omafano pepandja 21]

Eshi Jesus a li a ifana Petrus, Andreas, Jakob naJohannes ve mu shikule, ova li ve mu shikula nopehe na okwoongaonga

[Omafano pepandja 23]

Oishangomwa ngaashi embo “Ombibeli otai hongo” otai tu kwafele tu kale hatu hongo omahongo a faafana