Ontopolwa 81

Oonkambadhala dhokudhipaga Jesus tadhi tsikile

MOLWASHOKA olyo ethimbo lyokufu, Jesus ote ende moshitopolwa sha gamenwa sha tseyika osho omukala gwa ningwa noongudhi gwaSalomo. Osha tegama notempeli. Mpaka Aajuda otaye mu kondeke notaya tameke taya ti: “Sigo [uunake] to kalitha oomwenyo dhetu momatengeneko? Ongoye ngele Kristus, tu lombwela ano oohapu dhu uka.”

Jesus ota yamukula ta ti: “Onde mú lombwela, ne inaamu itaala.” Jesus ine ya lombwela shu ukilila kutya oye Kristus, ngaashi e shi lombwele omukiintu Omusamaria pomuthima. Ihe muushili wo wene, okwa holola kutya oye lye sho e ya yelithile kutya ye ogwopombanda nomanga Abraham a li kee ko ye oko a kala.

Ihe Jesus okwa hala aantu ya thike kuyo yene pehulithodhiladhilo kutya oye Kristus mokuyelekanitha iilonga ye naambyoka ya hunganekwa kOmbimbeli kutya oyo Kristus a li ta ka longa. Omolwashoka nale a lombwelele aalongwa ye kaaye shi lombwele nando ogumwe kutya oye Kristus. Nosho molwashoka ngashingeyi ta lombwele aatondi mbaka Aajuda ta ti: “Iilonga mbyoka handi yi longo medhina lyaTate, oyo tayi hokolola ndje. Ihe one inaamu itaala.”

Omolwashike mbela inaaye shi itaala? Omolwashoka mbela pwaahe na uunzapo mboka tau ulike kutya Jesus oye Kristus? Aawe, ihe omolwetompelo ndyoka Jesus te ya pe sho ta ti kuyo: “Kamu shi oonzi dhandje. Oonzi dhandje ohadhi uvu ewi lyandje, nangame ndi dhi shi, nohadhi landula ndje. Ongame notandi dhi pe omwenyo gwaaluhe, nokadhi na mpoka tadhi ka kana, nokaku na ngoka te dhi yugu ndje moshikaha shandje. Tate, oonguka e dhi pa ndje, oye e vule ayehe, nokaku na ngoka ta vulu oku dhi hakana mo moshikaha shaTate.”

Jesus ota hokolola nduno ekwatathano lye lyopothingo naHe, ta yelitha ta ti: “Otse naTate yamwe.” Molwashoka Jesus oku li kombanda yevi naHe oku li megulu, osha yela kutya ye ita ti kutya ye naHe yamwe lelalela, nenge yamwe panyama. Mepingathano naashono, okwa dhiladhila kutya yo yamwe melalakako, kutya yo oya hangana.

Aajuda oya geyithwa koohapu dhaJesus notaya toola omamanya ye mu dhipage, ngaashi nokuli ye shi ningile nale pethimbo lyOshituthi shOmatsali. Jesus oku na omukumo sho ta taalele kwaamboka ya hala oku mu dhipaga e ta ti: “Ongame nde mú monithile iilonga oyindji iiwanawa ya zi muTate; omolwoshilonga [shini] po mwa hala okudhipaga ndje?”

Otaya yamukula taya ti: “Otse itatu ku dhipaga molwoshilonga oshiwanawa ando, ihe omolweshekokalunga, eeno, omolwashoka ongoye omuntu gowala, oto iningi kalunga.” (NW) Molwashoka Jesus ina tya nando oye kalunga, omolwashike mbela Aajuda taye shi popile?

Osha yela kutya omolwashoka Jesus ta ti kutya ye oku na oonkondo ndhoka pakudhiladhila kwawo dhi na okukala owala dhi niwe kuKalunga. Pashiholelwa, ye opo a popi kombinga ‘yoonzi’ a ti: “Ongame notandi dhi pe omwenyo gwaaluhe,” sha shoka kaapu na nando omuntu ta vulu oku shi ninga. Ihe Aajuda otayi ipwililikile uushili mbuka kutya Jesus okwa ti oonkondopangelo dhe ohe dhi pewa kuHe.

Jesus ota tsikile tu ulike kutya ye oku vulike kuKalunga mokupula ta ti: “Mompango yeni [mEpsalmi 82:6] inamu shangwa: Ongame nda ti: one ookalunga? Oye ngele ti ithana mbeyaka ookalunga, kwi ya pewa oohapu dhaKalunga . . . otamu ti ngiini kwaanguka He e mu yapula nokwe mu tumu muuyuni: To sheke, ongame sho nda ti: Ongame Omuna gwaKalunga?”

Molwashoka Omanyolo otagi ithana nokuli aapanguli yopantu yaa na uuyuuki “ookalunga,” ano Aajuda mbaka oye wete Jesus e na epuko lini sho ta ti: “Ongame Omuna gwaKalunga”? Jesus ota tsikile ta ti: “Ngele itandi longo iilonga yaTate, inamu itaala ndje. Ihe ngele tandi yi longo, nando inaamu itaala ndje, itaaleni iilonga, opo mu tseye, ne mu uve ko, Tate oku li mungame, nangame ondi li muTate.”

Sho Jesus te shi popi, Aajuda otaya kambadhala oku mu kwata. Ihe ote ya fadhuka po, ngaashi e ya fadhukile po nale pOshituthi shOmatsali. Ota zi mo muJerusalem nota yi handiyaka yomulonga gwaJordan nkoka Johannes a tamekele okuninginitha konyala oomvula ne dha piti. Osha yela kutya ehala ndika kali li kokule nomunkulo gwokolukadhi gwEfuta lyaGalilea, mpoka hapu endwa omasiku gaali konyala okuza muJerusalem.

Aantu oyendji otaye ya mpaka kuJesus notaya tameke taya ti: “Johannes ina longa nando oshilongandhindhiliko, ihe ayihe mbyoka Johannes e mu hokolola, oyoshili.” Onkee ano mpaka aantu oyendji oyi itaale Jesus. Johannes 10:22-42; 4:26; 8:23, 58; Mateus 16:20.

▪ Omokupitila moshike Jesus a hala aantu ye mu dhimbulule kutya oye Kristus?

▪ Ongiini Jesus naHe ye li yamwe?

▪ Osha yela kutya omolwashike Aajuda taya ti kutya Jesus oti iningi ye mwene kalunga?

▪ Oohapu dhaJesus dha kuthwa mEpsalmi otadhi holola ngiini kutya ye ina tya kutya oku thike pamwe naKalunga?