Etumwalaka lyUukwaniilwa waKalunga olyo lya simanenena mOmbiimbeli. Jehova ota ka longitha Uukwaniilwa mboka a ninge evi alihe Oparadisa. Uukwaniilwa waKalunga oshike? Otu shi shi ngiini kutya otawu pangele ngashingeyi? Owa tompola po nale shike, notawu ka gwanitha po shike monakuyiwa? Oshileshwa shika noshi-32 sigo oshi-33, otayi yamukula omapulo ngoka.

1. Uukwaniilwa waKalunga oshike, nolye Omukwaniilwa gwawo?

Uukwaniilwa owo epangelo lya dhikwa po kuJehova Kalunga. Omukwaniilwa gwawo, oJesus Kristus, ngoka ta pangele nale megulu. (Mateus 4:17; Johannes 18:36) Ombiimbeli otayi popi kombinga yaJesus tayi ti: ‘Ota ningi Omukwaniilwa nUukwaniilwa we kawu na mpoka tawu ka hula po.’ (Lukas 1:32, 33) Jesus e li Omukwaniilwa gwUukwaniilwa waKalunga, ota ka pangela ombanda yevi ayihe.

2. Oolye taya ka pangela pamwe naJesus?

Jesus ita ka pangela oye awike. Aantu ya za ‘momaludhi agehe, momalaka agehe, miigwana ayihe nomomihoko adhihe otaya ka pangela kombanda yevi’ ye li aakwaniilwa pamwe naKristus. (Ehololo 5:9, 10) Aantu yangapi taya ka pangela pamwe naye? Okuza sho Jesus e ya kombanda yevi, aantu omamiliyona oya kala nokuninga aalanduli ye. Ihe aantu owala 144 000 taya yi megulu, ya ka pangele pamwe naJesus. (Lesha Ehololo 14:1-4.) Aakriste yalwe ayehe kombanda yevi, otaya ka ninga aalelwa yUukwaniilwa waKalunga. — Episalomi 37:29.

3. Omolwashike Uukwaniilwa waKalunga wu vule omapangelo gopantu?

Nonando aapangeli yopantu ohaya kambadhala okuninga iinima iiwanawa, kaye na oonkondo dhokuninga kehe shoka ya hala. Aapangeli mboka haye ya pingene po, ohashi vulika ya kale yi ihole yo yene, yo ihaya kala ya hala okukwathela aalelwa yawo. Ihe Omupangeli gwUukwaniilwa waKalunga, Jesus, ita ka pingenwa po nando okomupangeli gumwe i ili. Kalunga okwa “dhika po oshilongo shoka shaa na hulilo” nenge tu tye Uukwaniilwa we. (Daniel 2:44) Jesus ota ka pangela evi alihe, noita ka kala e na okatongo. Jesus omunahole, omunahenda, omuyuuki nota ka longa wo aantu ya ungaunge nayakwawo nohole, nohenda nopauyuuki. — Lesha Jesaja 11:9.

4. Uukwaniilwa waKalunga otawu ka pangela ombanda yevi ayihe

Jesus Kristus oku na oonkondo oonene dhokupangela, e vule aapangeli ayehe mondjokonona. Lesha Mateus 28:18, e tamu kundathana epulo tali landula:

• Omukalo gwaJesus gwokupangela ogwa yooloka ko ngiini kwaangoka gwaapangeli yopantu?

Omapangelo gopantu olundji ohaga lunduluka, nakehe limwe ohali pangele owala oshitopolwa shontumba kombanda yevi. Ongiini kombinga yUukwaniilwa waKalunga? Lesha Daniel 7:14, e tamu kundathana omapulo taga landula:

• Omolwashike shi li nawa sho Uukwaniilwa waKalunga ‘itaawu ka hula po’?

• Omolwashike shi li nawa sho tawu ka pangela ombanda yevi ayihe?

5. Omapangelo gopantu otaga ka pingenwa po

Omolwashike Uukwaniilwa waKalunga wu na okupingena po omapangelo gopantu? Dhana OKAVIDIO, e tamu kundathana epulo tali landula.

OKAVIDIO: Uukwaniilwa waKalunga oshike? — Oshitopolwa shokavidio (1:41)

• Omapangelo gopantu oge etitha iinima yini iiwinayi?

Lesha Omuuvithi 8:9, e tamu kundathana omapulo taga landula:

• Sho to tala, Uukwaniilwa waKalunga owa pumbwa ngaa okupingena po omapangelo gopantu? Omolwashike to tile ngawo?

6. Uukwaniilwa waKalunga owu na aapangeli mboka ye shi oonkalo dhetu

Molwaashoka Omukwaniilwa gwetu, Jesus, okwa li omuntu gwopanyama, oha vulu ‘okuuvila uunkundi wetu olukeno.’ (Aahebeli 4:15) Aalumentu naakiintu aadhiginini 144 000 mboka taya ka pangela pamwe naJesus, oya hogololwa kuJehova okuza “momaludhi agehe, momalaka agehe, miigwana ayihe nomomihoko adhihe.” — Ehololo 5:9.

• Mbela itashi ku hekeleke tuu sho Jesus naayehe mboka taya ka pangela pamwe naye, ye shi oonkalo dhaantu? Omolwashike to tile ngawo?

7. Uukwaniilwa waKalunga owo owala wu na oompango dha dhenga mbanda

Aapangeli yopantu ohaya toto po oompango ndhoka ye wete kutya otadhi gamene notadhi etele aakwashigwana yawo uuwanawa. Uukwaniilwa waKalunga nawo owu na oompango ndhoka aakwashigwana yawo ye na okulandula. Lesha 1 Aakorinto 6:9-11, e tamu kundathana omapulo taga landula:

• Sho to tala, uuyuni otawu ka kala wa tya ngiini ngele kehe gumwe oha vulika koompango dhaKalunga?a

• Mbela sho to tala, Jehova oku na ngaa uuthemba wokukala a tegelela aapangelwa yUukwaniilwa we ya vulike koompango ndhika? Omolwashike to tile ngawo?

• Oshike tashi ulike kutya aantu mboka ihaaya vulika koompango ndhika otaya vulu okulunduluka? — Tala ovelise 11.

OWI ILONGO SHIKE?

Uukwaniilwa waKalunga epangelo lyolela li li megulu, ndyoka tali ka pangela ombanda yevi ayihe.

Omapulo geendululo

• Oolye aapangeli mUukwaniilwa waKalunga?

• Uukwaniilwa waKalunga owu vule ngiini epangelo kehe lyopantu?

• Iinima yimwe yini Jehova a tegelela aakwashigwana yUukwaniilwa we ya ninge?

UUYELELE WA GWEDHWA PO

Lesha wu uve kutya Jesus okwa ti Uukwaniilwa owu li peni.

“Mbela Uukwaniilwa waKalunga oshinima shi li momutima gwoye?” (Oshitopolwa shi li kepandja lyetu lyokointaneta)

Omolwashike Oonzapo dhaJehova hadhi vulika kUukwaniilwa waKalunga, pehala lyokuvulika kaapangeli yopantu?

Oya kala aadhiginini kUukwaniilwa waKalunga (1:43)

Tala shoka Ombiimbeli tayi ti kombinga yaantu 144 000, mboka Jehova a hogolola ya ka pangele pamwe naJesus.

“Oolye taya yi megulu?” (Oshitopolwa shi li kepandja lyetu lyokointaneta)

Oshike sha tompo omukiintu gumwe sho e li mondholongo a mone kutya Kalunga oye owala te ke eta uuyuuki muuyuni?

“Nkene nda mono eyamukulo kombinga yokwaanuuyuuki” (Penduka mo! Novomba 2011)

Jesus okwa li a longo aalanduli ye kutya yo kaye shi ‘yomuuyuni.’ (Johannes 15:19) Shika otashi ti kutya kaye na okukutha ombinga mopolotika nomiita. Uushili owo kutya okukala ihaatu shi ningi, ihashi kala aluhe oshipu. Otashi vulika tu shekwe, sho ihaatu shi ningi. Ongiini tatu vulu okukala ihaatu kutha ombinga nokukala aadhiginini kuJehova Kalunga?

1. Aakriste yashili oya tala ko ngiini omapangelo gopantu?

Aakriste yashili oya simaneka omapangelo. Ohatu ningi ngaashi Jesus e tu lombwela kutya ‘shoka shomupangeli natu shi pe omupangeli,’ sha hala okutya, ohatu vulika koompango dhoshilongo, ngaashi okufuta iifendela. (Markus 12:17) Ombiimbeli otayi ti kutya aapangeli yopantu otaya pangele owala molwaashoka Jehova e ya etha ya pangele. (Aaroma 13:1) Onkee ano, omapangelo gopantu kage na oonkondo dhi vule dhaKalunga, nomolwaashono twa tegelela Kalunga ketu e ete epangelo lye lyomegulu, olyo li ye li kandule po omaupyakadhi agehe gaantu.

2. Ongiini tatu vulu okuulika kutya ihatu kutha ombinga mopolotika?

Ngaashi Jesus, ihatu kutha ombinga mopolotika. Oshikando shimwe, sho aantu ya mono oshikumithalonga shaJesus, oya li ya kambadhala oku mu ninga omukwaniilwa kombanda yevi, ihe ye ine shi pitika. (Johannes 6:15) Omolwashike mbela? Omolwaashoka okwa popile ta ti: “Uukwaniilwa wandje kau shi womuuyuni mbuka.” (Johannes 18:36) Ngaashi aalongwa yaJesus, natse ihatu kutha ombinga miinima yopapolotika. Pashiholelwa, ihatu yi kiita. (Lesha Mika 4:3.) Ohatu simaneke omandhindhiliko gopashigwana, ngaashi omapandela, ihe ihatu ga salutile, oshoka kungawo otatu ga galikana. (1 Johannes 5:21) Ihatu yambidhidha oongundu dhopapolotika nenge mboka taya hogololwa. Momikalo ndhika nadhilwe, ohatu ulike kutya otu li aadhiginini thiluthilu kepangelo lyaKalunga, ano kUukwaniilwa we.

ILONGA OSHINDJI

3. Aakriste yashili ihaya kutha ombinga mopolotika

Jesus naalanduli ye, oye tu tulila po oshiholelwa. Lesha Aaroma 13:1, 5-7 nosho wo 1 Petrus 2:13, 14. Opo nduno dhana OKAVIDIO, e tamu kundathana omapulo taga landula.

OKAVIDIO: Aakriste yashili ihaya kutha ombinga mopolotika — Oshitopolwa 1 (4:28)

• Omolwashike tu na okusimaneka omapangelo gopantu?

• Omiinima yini tatu vulu okuulika kutya ohatu vulika kugo?

Uuna pu na iita, iigwana yimwe ohayi ti kutya ihayi kutha ombinga, ihe ohayi yambidhidha omaipumomumwe. Mbela okukala ihoo kutha ombinga mopolotika okwa kwatela mo lela shike? Lesha Johannes 17:16. Opo nduno dhana OKAVIDIO, e tamu kundathana epulo tali landula.

OKAVIDIO: Aakriste yashili ihaya kutha ombinga mopolotika — Oshitopolwa 2 (3:11)

• Otashi ti shike okwaakutha ombinga mopolotika?

Ongiini ngele omapangelo oga hala tu kuthe ombinga moshinima shoka shi li ompinge nompango yaKalunga? Lesha Iilonga 5:28, 29. Opo nduno dhana OKAVIDIO, e tamu kundathana omapulo taga landula.

OKAVIDIO: Aakriste yashili ihaya kutha ombinga mopolotika — Oshitopolwa 3 (1:18)

• Ngele ompango yopantu otayi kondjithathana nompango yaKalunga, otu na okuvulika kompango yalye?

• Sho to tala, mbela omoonkalo dhini Omukriste ta vulu okukala inaa vulika komapangelo gopantu?

4. Ino kutha ombinga mopolotika pamadhiladhilo nomiilonga

Lesha 1 Johannes 5:21. Opo nduno dhana OKAVIDIO, e tamu kundathana omapulo taga landula.

OKAVIDIO: Omolwashike Aakriste yashili ya pumbwa omukumo — Kaaya kuthe ombinga miinima yopapolitika? (2:49)

• Mokavidio hano, omolwashike Ayenge a tokola kaa wayimine ongundu yopapolotika nenge a kuthe ombinga miinima ngaashi okusalutila epandela?

• Sho to tala, mbela okwa ninga ngaa etokolo lyopandunge?

Oonkalo dhilwe dhini tadhi vulu oku tu ningitha tu kuthe ombinga mopolotika? Dhana OKAVIDIO, e tamu kundathana omapulo taga landula.

OKAVIDIO: Iiyilongomwa okuza mOshungolangelo: Ino gama ombinga miinima yopapolotika yuuyuni mbuka wa topoka (5:16)

• Ongiini tatu vulu okukala ihaatu gama ombinga, uuna tatu tala omaudhano gopashigwana?

• Ongiini tatu vulu okukala ihaatu kutha ombinga, nonando otwa gumwa komatokolo ga ningwa kaanapolotika?

• Ongiini iikundaneki naamboka hatu endathana, nayo taya vulu oku tu nwetha mo tu game ombinga?

OWI ILONGO SHIKE?

Aakriste ohaya kambadhala ya mana mo, opo kaaya kuthe ombinga miinima yopapolotika pamadhiladhilo, moohapu nomiilonga.

Omapulo geendululo

• Omiinima yini hatu vulika komapangelo gopantu?

• Omolwashike ihaatu kutha ombinga miinima yopapolotika?

• Oonkalo dhini tashi vulika dhi tu ningithe tu kale twa hala okukutha ombinga mopolotika?

UUYELELE WA GWEDHWA PO

Omaiyambo geni tatu vulu okuninga, opo kaatu kuthe ombinga mopolotika?

Jehova ine tu etha nando (3:14)

Oshike aanegumbo ye na okuninga yi ilongekidhe manga kuyele, kaaya ka kuthe ombinga mopolotika?

Ino kutha ombinga miinima yopapolotika piiningwanima yopashigwana 4:25

Omolwashike okupopila oshilongo sheni, itaaku vulu oku ku ningitha wu kale omuntu a simanenena?

“Kalunga iha nyengwa kusha” (5:19)

Tala nkene to vulu okukala kuu shi oshitopolwa shuuyuni, uuna to ningi omatokolo kombinga yiilonga.

“Kehe gumwe oku na okuhumbata ye mwene omutenge gwe” (Oshungolangelo, 1 Apilili 2006)