Ontopolwa 14

Oonkondopangelo dhaLye U Na Okuzimina?

1, 2. Omaludhi agehe goonkondopangelo oge na mbela oshiponga? Shi yelitha.

“OONKONDOPANGELO” osho oshitya kaashi holike kaantu oyendji. Shika oshi shi okuuviwa ko, oshoka oonkondopangelo olundji ohadhi longithwa nayi—kiilonga, muukwanegumbo nokomapangelo. Ombimbeli otayi popi oshili e tayi ti: “Omuntu ta pangele omukwawo noku mu pangelela oshiponga.” (Omuuvithi 8:9) Eeno, oyendji oya pangele yalwe mokukatuka komukalo gwonyanya nogwokwiihola mwene.

² Ihe haonkondopangelo adhihe dhi na oshiponga. Pashiholelwa, otaku vulu ku tiwe kutya omalutu getu ohage tu pangele. Ohage tu “lombwele” tu fudhe, tu lye, tu nwe notu kothe. Shika mbela otashi tu thininike? Aawe. Okutsa kumwe nomaindilo ngaka otashi tu etele uuwanawa. Nokuli nando okuvulika koompumbwe dhetu dhopalutu otashi vulika hatu shi ningi kutse yene, opu na omaludhi galwe goonkondopangelo ngoka taga pula evuliko lyetu nehalo ewanawa. Tala iiholelwa yimwe.

OMUPANGELI OMUKOMBANDAMBANDA

3. Omolwashike Jehova i ithanwa shi li mondjila “Omuwa Omunamapangelo agehe”?

³ Jehova okwi ithanwa iikando yi vulithe 300 mOmbimbeli (NW) “Omuwa Omunamapangelo agehe.” Omunamapangelo agehe oye omuntu ngoka e na oonkondopangelo adhihe. Oshike tashi petha Jehova uuthemba wondondo ndjika? Ehololo 4:11 otali yamukula: “Ongoye Omuwa gwetu noKalunga ketu, wa gwana okutaamba ehambelelo nesimaneko noonkondo, oshoka ongoye wa shiti iinima ayihe, nokehalo lyoye oyi li ko noya shitwa.”

4. Jehova oha longitha ngiini oonkondopangelo dhe?

⁴ E li Omushiti gwetu, Jehova, oku na uuthemba okulongitha oonkondopangelo dhe ngaashi a hala. Shika otashi vulika sha fa oshitilithi, unene tuu uuna tatu dhiladhila kutya Kalunga oku na ‘oonkondo odhindji.’ Ye oti ithanwa “Kalunga Omunankondoawike”—uutumbulilo mboka mOshiheberi tau popi oonkondo odhindjidhindji. (Jesaja 40:26; Genesis 17:1, OB-1986) Ihe Jehova ohu ulike oonkondo dhe komukalo gwopahole, oshoka uukwatya we wa simana owo ohole.—1 Johannes 4:16.

5. Omolwashike kaashi shi oshidhigu okuvulika koonkondopangelo dhaJehova?

⁵ Nonando Jehova okwa londodha kutya ye ota ka geela aayoni mboka inaayi iyela ombedhi, Moses okwa li e mu tseya unene tuu e li ‘Kalunga kashili, Kalunga omudhiginini, ha dhiginine ondjuvanenathana, nomunamutimahenda gwaamboka ye mu hole nohaya tsakanitha iipango ye.’ (Deuteronomium 7:9) Dhiladhila owala! Omupangeli Omukombandambanda gweshito alihe ihe tu thininike tu mu longele. Pehala lyaashono, tse ohatu hililwa kuye molwohole ye. (Aaroma 2:4; 5:8) Okuvulika koonkondopangelo dhaJehova oko nokuli enyanyu, oshoka oompango dhe konahiya ohadhi tu etele aluhe uuwanawa.—Epsalmi 19:8, 9.

6. Ongiini ompata yoonkondopangelo ya holoka po moshikunino shaEden, noshilanduliko osha li shike?

⁶ Aakuluntu yetu yotango oye ekelehi uunamapangelo agehe waKalunga. Yo oya li ya hala okutokola kuyo yene shoka oshiwanawa naashoka oshiwinayi. (Genesis 3:4-6) Oshilanduliko, yo oya li ya tidhwa mo megumbo lyawo lyOparadisa. Konima yaashoka Jehova okwe etha aantu ya ninge po omitungilo dhoonkondopangelo ndhoka dha li tadhi ke ya kwatha okukala muulipamwe u na elandulathano, nonando inau gwanenena. Dhimwe dhomomitungilo ndhika dhoonkondopangelo odhini, nosigo opondondo yini Kalunga a tegelela tu vulike kudho?

‘AAPANGELI’

7. ‘Aapangeli’ oyo oolye, nondondo yawo oyini shi na ko nasho noonkondopangelo dhaKalunga?

⁷ Omuyapostoli Paulus okwa nyola: “Omuntu kehe na vulike kaapangeli mboka haye mu pangele. Oshoka kapu na nando [oonkondopangelo inadhi, NW] za kuKalunga.” ‘Aapangeli’ oyo oolye? Oohapu dhaPaulus moovelise tadhi landula otadhi ulike kutya oyo aapangeli yopantu. (Aaroma 13:1-7, KB; Titus 3:1) Jehova haye e eta po aapangeli yopantu, ihe oye li po kepitikilo lye. Ano Paulus okwa li a vulu okunyola ta ti: “Aapangeli mboka ye li po, oya tulwa [poondondo dhawo dhe eleka, NW] kuKalunga.” Shika otashi ulike shike kombinga yoonkondopangelo oonkwavi dha tya ngaaka? Kutya odhi li kohi nenge odhi vulike koonkondopangelo dhaKalunga. (Johannes 19:10, 11) Onkee ano, uuna pokati kompango yomuntu nompango yaKalunga pu na omaipumomumwe, Aakriste oye na okuwilikwa keiyuvo lyawo lya longwa kOmbimbeli. Yo oye na “okuvulika kuKalunga, hakaantu.”—Iilonga 5:29, OB-1986.

8. Oto kwathelwa ngiini kaapangeli, nongiini to vulu okuulika evuliko lyoye kuyo?

⁸ Ihe olundji aapangeli ohaya longo ye li ‘omuyakuli gwaKalunga e lile po uuwanawa wetu yene.’ (Aaroma 13:4, OB-1986) Okomikalo dhini? Dhiladhila kiilonga oyindji mbyoka aapangeli haya longekidha, ngaashi okweeta opoosa, egameno lyopolisi nolyokugamenwa komulilo, uuyogoki nelongo. Paulus okwa nyola: “Onkee nohamu gandja oompale wo. Oshoka aapangeli oyo omalenga gaKalunga; ya pewa oshilonga tuu shino.” (Aaroma 13:6) Shi na ko nasha noompale nenge noshinakugwanithwa shilwe shopaveta, tse otu na “okweenda nuuyuuki.”—Aaheberi 13:18.

9, 10. (a) Aapangeli oye na oshilonga shini melongekidho lyaKalunga? (b) Omolwashike tashi ka kala sha puka okukondjitha aapangeli?

⁹ Omathimbo gamwe, aapangeli ohaya longitha nayi oonkondo dhawo. Shika mbela otashi tu kutha oshinakugwanithwa shetu okukala tatu vulika kuyo? Aawe, hasho. Jehova oku wete iilonga ya puka yaapangeli mbaka. (Omayeletumbulo 15:3) Okutala onteni kwe elelo lyomuntu itaku ti kutya ye ke na ko nasha nokuyonuka kwalyo; noina tegelela natse tu shi ninge wo. Dhoshili, masiku Kalunga ota ka ‘nyanyagula e ta teyagula po omaukwaniilwa agehe ngaka,’ e te ga pingene po nelelo lyepangelo lye lyopauyuuki. (Daniel 2:44, KB) Ihe omanga shika inaashi ningwa, aapangeli oya pumbiwa.

¹⁰ Paulus okwa yelitha ta ti: “Oongoka ta tindi okuvulika kepangelo oye ta tsu ondumbo [nelongekidho, NW] lyaKalunga.” (Aaroma 13:2) Aapangeli oyo ‘elongekidho’ lyaKalunga opo ku dhigininwe elandulathano lyontumba, ndyoka ando kalya li po, ando evundakano nuukakombwiilitha ya kala tayi pangele. Oku ya kondjitha otashi ka kala shaahe li pamanyolo noshaahe li pandunge. Oku shi yelitha: Dhiladhila ando wa tandwa noshilalo osha hondjwa noongodhi. Nonando olutu oongodhi inalu dhi igilila, dho odhi li po nelalakano lyethimbo lya ngambekwa. Oku dhi kutha po mbalambala otashi vulu okweeta oshiponga. Sha faathana, aapangeli yopantu kaya li oshitopolwa shelalakano lyaKalunga lyopetameko. Ihe omanga Uukwaniilwa we inaau tameka okupangela evi thiluthilu, omapangelo gopantu otaga kaleke kumwe uulipamwe waantu, notaga longo oshilonga shoka tashi tsu kumwe nehalo lyaKalunga methimbo lyongashingeyi. Ano otu na okukala tatu vulika kaapangeli, manga tatu pititha komeho ompango yaKalunga noonkondopangelo dhe.

OONKONDOPANGELO MUUKWANEGUMBO

11. Oto fatulula ngiini ekotampango lyuukwamutse?

¹¹ Uukwanegumbo owo okangundukankameno kuulipamwe waantu. Muwo omusamane nomukulukadhi otaya vulu okumona uukuume tau ti sha, naanona otaya vulu okugamenwa nokuputudhilwa uukuluntu. (Omayeletumbulo 5:15-21; Aaefeso 6:1-4) Elongekidho ewanawa lya tya ngaaka oli na okukala lyu unganekwa komukalo ngoka tagu kwathele iilyo yuukwanegumbo yi kale mombili nomuukumwe. Omukalo gwaJehova gwoku shi ninga ogwo okupitila mekotampango lyuukwamutse, ndyoka lya kwatelwa kumwe moohapu ndhika tadhi adhika mAakorinto yoTango 11:3: “Kristus oye omutse gwakehe omulumentu nomutse gwomukiintu omulumentu nomutse gwaKristus oKalunga.”

12, 13. Olye omutse gwuukwanegumbo, noshike tashi vulu okwiilongwa momukalo gwaJesus gwokukala e li omutse?

¹² Omusamane oye omutse guukwanegumbo. Ihe ye oku na wo omutse—Jesus Kristus. Paulus okwa nyola: “One aalumentu, holeni aakiintu yeni, ongaashi Kristus e hole egongalo nokwi igandja molwalyo.” (Aaefeso 5:25) Omusamane otu ulike evuliko lye kuKristus ngele ta kala nomukulukadhi gwe komukalo ngoka Jesus ha kala aluhe negongalo. (1 Johannes 2:6) Oonkondopangelo oonene odha li dha pewa Jesus, ihe ohe dhi longitha nomwenyo omwaanawa, nohole nonondjeleke. (Mateus 20:25-28) Sho Jesus a li omuntu, ye ina longitha nando nayi ondondo ye yoonkondopangelo. Ye okwa li ‘omunambili nomomutima okwi ishonopeke,’ nokwi ithana aalanduli ye “ookuume” pehala lyoku yi ithana ‘aapiya.’ “Ongame notandi mú pe evululuko,” osho e yu uvanekele, naashika osho a ningi.—Mateus 11:28, 29; Johannes 15:15.

¹³ Oshiholelwa shaJesus otashi longo aasamane kutya uukwamutse wopaKriste kau shi ondondo yokupangela nolungwenye. Pehala lyaashono, oyo yimwe yokusimaneka noyohole yokwiiyamba mwene. Shika itashi kwatele mo nando okuninga nayi kuume kopandjokana palutu nenge pakupopya. (Aaefeso 4:29, 31, 32; 5:28, 29; Aakolossa 3:19) Ngele omusamane Omukriste ta ningi nayi omukulukadhi gwe komukalo nguka, iilonga ye yilwe iiwanawa otayi kala kaayi na ongushu, nomagalikano ge otaga ka piyaganekwa.—1 Aakorinto 13:1-3; 1 Petrus 3:7, OB-1986.

14, 15. Ontseyo okutseya Kalunga otayi kwatha ngiini omukulukadhi a kale ha vulika komusamane gwe?

¹⁴ Uuna omusamane ta holele oshiholelwa shaKristus, otashi kala oshipu komukulukadhi gwe okutsa kumwe noohapu dhAaefeso 5:22, 23: “Aakiintu, vulikeni kaalumentu yeni ongokOmuwa, oshoka omulumentu oye omutse gwomukiintu, ongashika Kristus oye omutse gwegongalo.” Ngaashi naanaa omusamane e na okuvulika kuKristus, omukulukadhi naye osho e na okuvulika komusamane gwe. Ombimbeli otayi shi yelitha wo kutya aakiintweelela oya gwana okusimanekwa nokupandulwa omolwuunongo nuulaadhi wawo wometilokalunga.—Omayeletumbulo 31:10-31.

¹⁵ Evuliko lyomukulukadhi Omukriste komusamane gwe olya ngambekwa. Shika otashi ti kutya oku na okuvulikiwa kuKalunga pehala ando lyokuvulika kaantu ngele okuvulika moshinima shontumba otaku fala mokuyona ompango yaKalunga. Nokuli nonando ongaaka, okukatuka oonkatu dha kola kwomukulukadhi oku na okutsithwa kumwe ‘nombepo yombili noyeimweneno.’ Oshi na okukala sha yela kutya ontseyo okutseya Kalunga oye mu ninga omukulukadhi e li nawa. (1 Petrus 3:1-4) Oshi na okukala sha faathana shi na ko nasha nomusamane Omukriste ngoka omukulukadhi gwe kee shi omwiitaali. Evuliko lye komakotampango gOmbimbeli oli na oku mu ninga omusamane e li nawa.

16. Ongiini aanona taya vulu okuholela oshiholelwa shoka Jesus a tula po sho a li okaana?

¹⁶ Aaefeso 6:1 otayu ulike oshilonga shaanona, taya ti: “Vulikeni kaakuluntu yeni mOmuwa, oshoka osho shu uka.” Aanona Aakriste ohaya landula oshiholelwa shaJesus, ngoka a kala ha vulika kaakuluntu ye mokukoka kwe. E li okamati okavuliki, “okwa koko moondunge nomuukuluntu nomesilohenda puKalunga nopaantu.”—Lukas 2:51, 52.

17. Komukalo hoka aavali taya longitha oonkondopangelo otagu vulu gu kale nenwethomo lini kaanona yawo?

¹⁷ Komukalo hoka aavali taya gwanitha iinakugwanithwa yawo, otagu vulu okunwetha mo aanona yawo ya simaneke oonkondopangelo nenge ye dhi tukuluthile oshipotha. (Omayeletumbulo 22:6) Ano oshi li nawa aavali yi ipule yo yene: ‘Ohandi longitha oonkondopangelo dhandje nohole nenge onolungwenye? Ohandi pitike aanona yandje ya ninge ngaashi ya hala?’ Omuvali omutilikalunga okwa tegelelwa a kale omunahole nomuyawali, ihe nonando ongaaka, ye oku na wo okukala ha dhiginine okukakatela omithikampango dhometilokalunga. Paulus okwa nyola she eleka a ti: “One [oohe, KB], inamu hinda aana yeni noku ya geyitha, aawe, ya putudhileni mevuliko nomekumagidho lyOmuwa.”—Aaefeso 6:4; Aakolossa 3:21.

18. Ongiini aavali ye na okugandja egeeloputudho?

¹⁸ Aavali oye na okukonakona nawa omikalolongo dhawo, unene tuu ngele oya hala aanona yawo ya kale aavuliki nokungawo otaye ya nyanyudha. (Omayeletumbulo 23:24, 25) MOmbimbeli, egeeloputudho olyo unene tuu omukala gwelongo. (Omayeletumbulo 4:1; 8:33, KB) Ohali endele pamwe nohole nosho wo nombili, hanondjahi nonyanya. Onkee ano, aavali Aakriste oye na okukatuka oonkatu ye na uunongo nokukala tayi ipangele yo yene uuna taya pe aanona yawo egeeloputudho.—Omayeletumbulo 1:7, KB.

OONKONDOPANGELO MEGONGALO

19. Ongiini Kalunga a si oshimpwiyu opo megongalo lyopaKriste mu kale elandulathano ewanawa?

¹⁹ Molwashoka Jehova oye Kalunga kelandulathano, oshi li pandunge kutya ye ota gandja oonkondopangelo newiliko yu unganekwa nawa koshigwana she. Onkee ano a langeke po Jesus e li Omutse gwegongalo lyopaKriste. (1 Aakorinto 14:33, 40; Aaefeso 1:20-23) Kohi yewiliko lyaKristus ihaali monika, Kalunga okwa tula po elongekidho moka aakuluntugongalo ya langekwa po megongalo kehe taya litha oshigunda nuulaadhi, nehalo ewanawa nonohole. (1 Petrus 5:2, 3) Aayakuligongalo otaye ya kwathele pamikalo dhi ili nodhi ili notaya longo iilonga yi na ongushu megongalo.—Aafilippi 1:1, NW.

20. Omolwashike tu na okukala hatu vulika kaakuluntugongalo Aakriste mboka ya langekwa po, nomolwashike shika tashi tu etele uuwanawa?

²⁰ Shi na ko nasha naakuluntugongalo Aakriste, Paulus okwa nyola: “Vulikeni [kwaamboka haye mu kwatele komeho, NW], ne mu ya landule, oshoka oyo haa tonatele oomwenyo dheni ongaamboka ye na oku dhi yalula, opo ye shi ninge nenyanyu, hanokutonga, oshoka okwo itaku mú opalele.” (Aaheberi 13:17) Kalunga okwi inekelela pandunge aatonateli Aakriste oshinakugwanithwa shokusila oshimpwiyu oompumbwe dhopambepo dhaamboka ye li megongalo. Aakuluntugongalo mbaka kaye li ongundu yaawiliki yopambepo. Yo aapiya naapika yaKalunga mboka taya sile oshimpwiyu oompumbwe dhaalongelikalunga ooyakwawo, ngaashi naanaa Omuwa gwetu, Jesus Kristus, a ningi. (Johannes 10:14, 15) Molwashoka otu shi kutya aalumentu ya pyokoka pamanyolo oye na ko nasha nokuhuma komeho kwetu nokukoka kwetu pambepo, otashi tu ladhipike tu longele kumwe notu kale hatu vulika.—1 Aakorinto 16:16.

21. Aakuluntugongalo ya langekwa po otaya kambadhala ngiini okukwathela Aakriste ooyakwawo pambepo?

²¹ Omathimbo gamwe, oonzi otashi vulika dhi puke nenge dhi tulwe moshiponga kiinima iiwinayi yuuyuni. Kohi yewiliko lyOmusita Omukuluntu, aakuluntugongalo ye li aasita aashona yo otaya tonatele oompumbwe dhaamboka ye li mesiloshimpwiyu lyawo notaye ya pe nuulaadhi eitulomo lyopaumwene. (1 Petrus 5:4) Yo ohaya talele po iilyo yegongalo nohaye yi kumike. Molwashoka aakuluntugongalo oya tseya kutya Ondiaboli oya hala okupiyaganeka ombili yoshigwana shaKalunga, yo ohaya longitha uunongo hau zi pombanda mokupongolola po uupyakadhi kehe. (Jakob 3:17, 18) Yo ohaya longo nuudhiginini opo ya kaleke po uukumwe weitaalo, oshinima shoka Jesus mwene a galikanene.—Johannes 17:20-22; 1 Aakorinto 1:10.

22. Ekwatho lini aakuluntugongalo haya gandja ngele pwa ningwa epuko?

²² Ongiini ngele Omukriste ta hepekwa kuuwinayi wontumba nenge ta teka omukumo molwokuyona kwe? Omayele gOmbimbeli taga hekeleke nomagalikano gaakuluntugongalo taga zi komutima molwe otaga vulu oku mu kwatha a aluke pambepo. (Jakob 5:13-15) Aalumentu mbaka, ya langekwa po kombepo ondjapuki, oye na wo oonkondopangelo okugeela nokupukulula kehe ngoka ta landula ondjila yokuyona nenge ta tula moshiponga uuyogoki wopambepo nowopamikalo wegongalo. (Iilonga 20:28; Titus 1:9; 2:15) Opo ku kalekwe egongalo lya yela, otashi vulika sha pumbiwa opo aantu ya lopote omapuko ga kwata miiti. (Levitikus 5:1) Ngele Omukriste ngoka a ningi epuko lya kwata miiti ta taamba egeeloputudho nepukululo lyopamanyolo e tu ulike eiyelombedhi lyashili, ota ka kwathelwa. Ihe odhoshili kutya mboka taya tsikile okuyona ompango yaKalunga noitayi iyele ombedhi ohaya kondwa.—1 Aakorinto 5:9-13.

23. Aatonateli Aakriste ohaya si oshimpwiyu shashike shi na ko nasha nuuwanawa wegongalo?

²³ Ombimbeli oya hunganeke kutya kohi yaJesus Kristus e li Omukwaniilwa, aalumentu ya pyokoka pambepo oya li taya ka langekwa po okugandja ehekeleko, egameno netalaleko koshigwana shaKalunga. (Jesaja 32:1, 2) Yo oya li taya ka kwatela komeho ye li aauvithi yevaangeli, aasita naalongi opo ya humithe komeho ekoko lyopambepo. (Aaefeso 4:11, 12, 16) Nonando aatonateli Aakriste omathimbo gamwe otashi vulika ya pukulule, ya gande noya kumagidhe ooitaali ooyakwawo, okulongitha elongo lyaakuluntugongalo lya kola nolya kankamena kOohapu dhaKalunga otaku kwatha okukaleka ayehe mondjila ndjoka tayi fala komwenyo.—Omayeletumbulo 3:11, 12; 6:23; Titus 2:1.

TAAMBA KO ETALOKO LYAJEHOVA LYOONKONDOPANGELO

24. Ohatu makelwa shi na ko nasha nompata yashike esiku kehe?

²⁴ Omulumentu nomukiintu yotango oya li ya makelwa shi na ko nasha nompata yevuliko koonkondopangelo. Itashi kumitha sho emakelo lya faathana lye tu taalela esiku kehe. Satana Ondiaboli okwa kala ta humitha komeho ombepo yuunashipotha mokati kaantu. (Aaefeso 2:2) Ondjila yemanguluko otayi monithwa pamakoto ya fa yi li nawa yi vule ndjoka yevuliko.

25. Okweekelahi ombepo yuunashipotha yuuyuni nokukala to vulika koonkondopangelo ndhoka Kalunga ta longitha nenge a pitika oshi na omauwanawa geni?

²⁵ Ihe tse otu na okweekelahi ombepo yuunashipotha yuuyuni. Ngele tatu shi ningi, otatu ka mona kutya evuliko lyometilokalunga ohali eta omalaleko nuuyamba. Pashiholelwa, otatu ka yanda iimpwiyu nomayeme mbyoka yi li apuhe mokati kaamboka taya kongo uupyakadhi naapangeli. Otatu ka shonopeka eipumomumwe ndyoka hali holoka momaukwanegumbo ogendji. Notatu ka nyanyukilwa omauwanawa ngoka haga monika meendathano tali nyanyudha nolyopahole nAakriste ooitaali ooyakwetu. Komeho gaayihe, evuliko lyetu lyometilokalunga otali ke eta ekwatathano ewanawa naJehova, Omupangeli Omukombandambanda.

KONAKONA ONTSEYO YOYE

Jehova oha longitha ngiini oonkondopangelo dhe?

‘Aapangeli’ oyo oolye, nongiini tatu vulika kuyo?

Oshinakugwanithwa shini ekotampango lyuukwamutse tali pe oshilyo kehe shuukwanegumbo?

Ongiini tatu vulu okuulika evuliko megongalo lyopaKriste?

[Box on page 134]

ODHO AAVULIKI, KADHI SHI AANASHIPOTHA

Okupitila miilonga yadho yokuuvitha montaneho, Oonzapo dhaJehova ohadhi ulike kUukwaniilwa waKalunga u li etegameno alike lyaantu lyokumona ombili negameno yashili. Ihe aauvithi aalaadhi mbaka yUukwaniilwa waKalunga ihaaya ningi nando oshipotha nomapangelo ngoka tage ya pangele. Mekondjithathano naashika, Oonzapo odho unene aakwashigwana haya simaneke nohaya vulika kompango. Omukwanepangelo gumwe mushimwe shomiilongo yaAfrika okwa ti: “Andola omahangano goongeleka agehe oga li ga fa oonzapo dhaJehova, ando inatu kala tu na omadhipago, omayako gokuteya, omiyonena dhaagundjuka, aanandholongo noomboma dhoatoma. Omiyelo ando ihadhi kala dha patwa aluhe.”

Molwashoka aakwanepangelo miilongo oyindji oye shi tseya, yo oya pitika iilonga yOonzapo yokuuvitha yi tsikile itaayi piyaganekwa. Miilongo yilwe, omaindiko nenge omangambeko oga kuthwa po sho aapangeli ya mono kutya Oonzapo dhaJehova odhi li enwethomo ewanawa. Oshi li ngaashi omuyapostoli Paulus a nyola kombinga yokuvulika kaapangeli: “Longa uuwanawa, ongoye noto pandulwa kulyo.”—Aaroma 13:1, 3.