Oohapu dhaJehova odhi na omwenyo
Omanenedhiladhilo okuza moontumwafo dha nyolelwa Aagalati, Aaefeso, Aafilippi nAakolossa
SHO omuyapostoli Paulus u uvu kutya Aakriste yamwe otaya thigi po elongelokalunga lya yela omolwokunwethwa mo kAajuda yamwe megongalo mboka ya li aalongi aafundja, okwa li a nyolele “omagongalo agehe gomuGalatia” ontumwafo tayi ga ladhipike. (Gal. 1:2) Okwa li e yi nyola okuza mo 50 sigo 52 E.N. lwaampono noyi na omayele gu ukilila nekumagidho lya kola.
Konima yomimvo omulongo lwaampono sho Paulus a li “onkwatwa molwaJesus Kristus” muRoma, okwa nyolele omagongalo gomuEfeso, muFilippi nomuKolossa noku ga pa omayele omawanawa neladhipiko lyopahole. (Ef. 3:1) Otatu vulu okumona uuwanawa kunena metumwalaka ndyoka li li mAagalati, Aaefeso, Aafilippi nAakolossa.— Heb. 4:12.
ONGIINI ‘OMUNTU TA VULU OKUNINGA OMUYUUKI?’
Paulus okwa li a gamene ondondo ye e li omuyapostoli mokugandja uuyelele wontumba wonkalamwenyo ye, molwaashoka aalongi aafundja oya li ya kambadhala okunyateka edhina lye. (Gal. 1:11–2:14) Paulus okwa li a pataneke omalongo giifundja sho a ti: “Omuntu ota ningi omuyuuki koshipala shaKalunga keitaalo okwiitaala Jesus Kristus, hamolwokugwanitha shoka tashi pulwa kompango.”—Gal. 2:16.
Paulus okwa ti kutya Kristus okwa “mangulula mboka ya kala kohi yompango,” opo ya nyanyukilwe emanguluko lyOpakriste. Okwa kumagidha Aagalati a mana mo a ti: “Ikoleleni ano, oshoka omwa manguluka, ne inamu zimina we, mu ninge aapika.”—Gal. 4:4, 5; 5:1.
Omapulo gopamanyolo taga yamukulwa:
3:16-18, 28, 29—Mbela ehangano lyaAbraham otali longo nokunena? Eeno, otali longo. Ehangano lyOmpango kalya li lya pingene po ehangano lyaKalunga naAbraham, ihe olya li lya gwedhwa ko. Onkee ano, ehangano lyaAbraham olya li tali longo natango konima sho Ompango ya ‘hanagulwa po.’ (Ef. 2:15) Omauvaneko galyo oga pewa Kristus Jesus ngoka oye omutango ‘gwoluvalo’ lwaAbraham lwashili nosho wo ‘mboka yaKristus.’
6:2—“Ompango yaKristus” oshike? Ompango ndjika oya thikama po momalongo nomalombwelo gaJesus agehe. Oya kwatela mo unene oshipango ‘shokuholathana.’—Joh. 13:34.
6:8—Ongiini hatu “kunu mOmbepo”? Ohatu shi ningi mokukala neihumbato ndyoka tali pitike ombepo ondjapuki yaKalunga yi longe mutse. Okukuna pambepo osha kwatela mo okukutha ombinga nomutima aguhe miilonga mbyoka tayi ningitha ombepo ondjapuki yi kunguluke mutse.
Iiyilongomwa kutse:
1:6-9. Aakuluntugongalo oye na okukatuka onkatu meendelelo uuna uupyakadhi wa holoka megongalo. Mokugandja omatompelo gopamanyolo, otaya vulu okutompa omapopyo ngoka ga puka.
2:20. Iikulila omagano ngoka Kalunga a pa kehe gumwe. Otu na okwiilonga oku yi tala ko momukalo ngoka.—Joh. 3:16.
5:7-9. Eendathano ewinayi otali vulu oku tu “ethitha okuvulika koshili.” Oshi li pandunge ngele tatu li henuka.
6:1, 2, 5, NW. Mboka ya “pyokoka pambepo” otaya vulu oku tu kwathela tu humbate omitenge ngele tu li moonkalo oondhigu moka tatu iyadha molwaashoka twa katuka papuko inaatu shi tseya. Ngele tashi ya pokuhumbata omutenge gwiinakugwanithwa yetu yopambepo, otu na oku shi ninga tse yene.
‘OKUHANGANITHA AYIHE KUMWE MUKRISTUS’
Mokutsa omuthindo enenedhiladhilo lyuukumwe wopaKriste montumwafo ye ndjoka a nyolela Aaefeso, Paulus okwa li a popi “[okuhanganitha] ayihe kumwe muKristus, . . . ngaashi she mu opalela okwiiyuthila muye mwene elelo lyegumbo lye, a hala, e li tsakanithe, omathimbo nge ga thikana.” Kristus okwa gandja “aantu omagano” ya kwathele ayehe ‘ya hangane muukumwe womeitaalo.’—Ef. 1:9, 10, OB-1954; 4:8, 13.
Opo Aakriste ya simaneke Kalunga nokuhumitha komeho uukumwe mokati kawo, oye na ‘okuzala omuntu omupe’ nosho wo ‘okwiilonga evuliko mokati kawo omolwetilo okutila Kristus.’ Oya pumbwa wo “okukandeka omakotokelo omawinayi gomuhindadhi” mokuzala iikondjitho ayihe yopambepo.—Ef. 4:24; 5:21; 6:11.
Omapulo gopamanyolo taga yamukulwa:
1:4-7—Ongiini Aakriste aagwayekwa ya li ya nunwa nale manga inaaya valwa? Oya li ya nunwa ye li ongundu, ihe hapauhandimwe. Shika osha li sha ningwa nale manga aakuluntu yetu yotango inaaya mona aanona nokutaandelitha uulunde muuyuni. Ehunganeko ndyoka li li muGenesis 3:15 olya li lya popiwa manga inaapu valwa omuntu omulunde, nolya kwatela mo elalakano lyaKalunga pu kale aalanduli yamwe yaKristus mboka taya ka pangela pamwe naye megulu.—Gal. 3:16, 29.
2:2—Ongiini ombepo yuuyuni ya fa ndjoka yomewangandjo, nongiini tayi pangele uuyuni? ‘Ombepo yuuyuni’ oyo ombepo yemanguluko noyokwaahavulika noyi li apuhe ngaashi ndjoka hatu fudhile mo. (1 Kor. 2:12) Otayi pangele uuyuni molwaashoka otayi tsikile nopwaahe oluthuwo okunwetha aantu noonkondo.
2:6—Ongiini Aakriste aagwayekwa taku vulu okutiwa oye li “megulu” omanga ye li natango kombanda yevi? Mpaka uutumbulilo “megulu” itawu ulike kuuthiga wawo womegulu mboka yu uvanekelwa. Pehala lyaashono, otawu ulike kekwatathano lyawo lyopambepo naKalunga okuza sho ‘ya ndhindhilikwa oshihako shombepo ondjapuki ndjoka e yu uvanekela.’—Ef. 1:13, 14, OB-1954.
Iiyilongomwa kutse:
4:8, 11-15, yelekanitha OB-1954. Jesus Kristus “okwa faalele oonkwatwa,” sha hala okutya, okwa kutha aantu mepangelo lyaSatana e ya longithe ye li omagano okutunga egongalo lyopaKriste. Otatu vulu ‘okukoka momikalo adhihe muKristus’ mokuvulika kwaamboka taya kwatele komeho nokulongela kumwe nomalongekidho ngoka taya ningi megongalo.—Heb. 13:7, 17.
5:22-24, 33. Kakele kokukala mepangelo lyomusamane, omukulukadhi oku na okusimaneka omusamane gwe. Ote shi ningi mokuulika ‘ombepo yombili noyengungumano’ nomoku mu popya nawa nosho wo okulongela kumwe naye opo a pondole mwaashoka a tokola okuninga.—1 Pet. 3:3, 4; Tit. 2:3-5.
5:25, 28, 29. Ngaashi owala omusamane hi ‘ipalutha,’ oku na wo okukala ha sile oshimpwiyu omukulukadhi gwe palutu, pamadhiladhilo nopambepo. Oku na wo oku mu ulukila ohole mokukala naye ethimbo lya gwana nokuungaunga naye nolukeno moohapu nomiilonga.
6:10-13. Opo tu kondjithe oombepo dhoompwidhuli, otwa pumbwa okukala twa tokola toko okuzala iikondjitho ayihe yopambepo mbyoka Kalunga a gandja.
“NATU HUMENI KOMEHO NONDJILA”
Paulus montumwafo ye ndjoka a li a nyolele Aafilippi okwa li ta tsu omuthindo ohole. Okwa ti: “Egalikano lyandje olyo ndika kutya Kalunga a kokithe nokutaneka ohole yeni mokutseya nomokuninga omatokolo ge na oondunge.” Moku ya kwathela ya henuke omwigo gokukala yi iyinekela sha pitilila, okwe ya kumagidha a ti: “Kaleni tamu longo nokutila nokukakama molwehupitho lyeni.”—Fil. 1:9; 2:12.
Paulus ota ladhipike mboka ya pyokoka pambepo ya lalakanene ‘okumatuka yu ukilila kethikilo, ya ka likole ondjambi yesindano ndyoka Kalunga e yi ithanene.’ Okwa ti: “Natu humeni owala komeho nondjila naanaa ndjoka twe ende nayo sigo oompaka.”—Fil. 3:14-16.
Omapulo gopamanyolo taga yamukulwa:
1:23—‘Omoombinga mbali’ dhini Paulus a li ta thiminikwa, nokwa li a hala okuninga shike? Paulus moonkalo moka a li, okwa li a taalelwa komathiminiko gaali: omwenyo nenge eso. (Fil. 1:21) Nonando inaa popya shoka ta ka hogolola, oku ulike shoka a li a halelela, sha hala okutya, ‘okuthiga po onkalamwenyo ndjika a ka kale puKristus.’ (Fil. 3:20, 21; 1 Tes. 4:16) Ehalo ndika olya li lya gwanithwa pethimbo lyokukala po kwaKristus sho Paulus a li a pewa ondjambi ye ndjoka Jehova a li e mu longekidhila.—Mat. 24:3.
2:12, 13—Omomukalo guni Kalunga ha pendutha mutse “ehalo” lyokulonga? Ombepo ondjapuki yaJehova otayi vulu okulonga momitima dhetu nomomadhiladhilo getu, okuhumitha komeho ehalo lyetu okulonga ngaashi tatu vulu miilonga ye. Onkee ano, otu na omukwathi sho tatu tsikile ‘okulonga omolwehupitho lyetu.’
Iiyilongomwa kutse:
2:5-11. Ngaashi oshiholelwa shaJesus tashi ulike, okukala omwiifupipiki kashi li uunkundi, ihe oshi li euliko kutya owu na omikalo omiwanawa. Kakele kaashono, Jehova oha yele pombanda aaifupipiki.—Omayel. 22:4.
3:13. “Shoka shi li konima” otashi vulu shi kale iinima ngaashi iilonga hayi futu nawa, okukala wu uvite wa gamenwa omolwokukala wu li muukwanegumbo wu na sha nenge omolwomayono ga kwata miiti ngoka wi iyela ombedhi mugo noga ‘yogwa po.’ (1 Kor. 6:11) Otu na okudhimbwa iinima mbika, sha hala okutya, twaa kale tatu ipula nayo unene ‘opo tu adhe shoka shi li komeho.’
4:14-16. Nonando Aafilippi oya li ya hepa pamaliko, oye tu tulila po oshiholelwa oshiwanawa mokuulika ombepo yokugandja nuupu.—2 Kor. 8:1-6.
KALENI MWI ‘IKOLELELA MEITAALO’
Montumwafo ye ndjoka a nyolela Aakolossa, Paulus okwa li a yaneke pomutenya omataloko ga puka gaalongi aafundja. Okwa yelitha kutya ehupitho olyi ikolelela mokukala ‘twa dhiginina eitaalo,’ ihe hamiitegelelwa yOmpango. Paulus okwa ladhipike Aakolossa a ti: “Kaleni ihe muukumwe [naKristus]. Dhameni muye ne mu itungile muye. Kaleni [mwi ikolelela meitaalo, OB-1954].” Ongiini okwiikolelela kwa tya ngawo ku na oku ya guma?—Kol. 1:23; 2:6, 7.
Paulus okwa nyola a ti: “Kumbika ayihe gwedhii ko ohole, oshoka ohole oyo epaya tali vulu okumangela iinima ayihe kumwe. Ombili ndjoka Kristus te yi gandja na yi mú pangele.” Omuyapostoli okwe ya lombwele a ti: “Shaa shoka tamu shi longo, shi longeni nomwenyo aguhe ongaamboka itaamu longele aantu, ihe Omuwa ye mwene.” Shi na ko nasha naamboka ye li pondje yegongalo, okwa ti: “Kaleni mu na oondunge mokukalathana kweni” nayo.—Kol. 3:14, 15, 23; 4:5.
Omapulo gopamanyolo taga yamukulwa:
2:8—Paulus okwe tu londodha tu yande iinima yini? Okwe tu londodha tu yande iinima yuuyuni waSatana, sha hala okutya, omakotampango ngoka tage wu wilike nenge tage wu humitha komeho. (1 Joh. 2:16) Mumbyoka omwa kwatelwa uufilosofi, ohole yokuhola omaliko nomalongelokalunga giifundja guuyuni mbuka.
4:16—Omolwashike ontumwafo ndjoka ya nyolelwa Aalaodikea kaayi li oshitopolwa shOmbiimbeli? Shika otashi vulika molwaashoka ontumwafo ndjoka kaya li yi na uuyelele wa pumbiwa kunena. Nenge otashi vulika tayi endulula uuyelele womoontumwafo dhimwe ndhoka dhi li nale mOmbiimbeli.
Iiyilongomwa kutse:
1:2, 20. Ekulilo ndyoka li li euliko lyesilohenda inaali longelwa lyaKalunga otali vulu oku tu pa eiyuvo lya yela nombili yokomutima.
2:18, 23. Okukala ‘neifupipiko lyiifundja’ ndyoka li li okwiiningitha wa fa wu na eifupipiko mokutinda iinima yopamaliko nenge okwiiyehameka mwene, otashi ulike kutya omuntu ‘okwa tuwalalekwa komadhiladhilo ge gopantu.’