Ontopolwa 23
Ehangano lyaKalunga Li Wetike
1. Ombimbeli otayi ti ngiini kombinga yehangano lyaKalunga lyaa wetike?
OMOLWASHIKE TATU VULU okukala nuushili kutya Kalunga oku na ehangano li wetike? Etompelo limwe olyo kutya ye oku na ehangano lyaa wetike. Jehova okwa shiti aakerubi, aaserafi naayengeli yalwe oyendji yi ili okulonga ehalo lye megulu. (Genesis 3:24; Jesaja 6:2, 3; Epsalmi 103:20) Jesus Kristus oye Omuyengeli Omukuluntu ngoka a tulwa po kombanda yawo ayehe. (1 Aatessalonika 4:16; Judas 9; Ehololo 12:7) Ombimbeli otayi ti kutya aayengeli oya hanganithwa ‘miipundi yuukwaniilwa nenge muukwaniilwa nomomalelo nenge momapangelo ga kola.’ (Aakolossa 1:16; Aaefeso 1:21) Yo ayehe otaa gwanitha omalombwelo gaJehova nokulonga muukumwe oshilonga shoka e ya pa.—Daniel 7:9, 10; Job 1:6; 2:1.
2. Ongiini omukalo ngoka Kalunga a shiti eshito alihe lyopanshitwe tagu holola nkene ehanganitho lyiinima lya simana kuye?
2 Otatu vulu okuuva ko kashona nkene ehanganitho lyiinima lya simana kuKalunga ngele tatu tala keshito lye lyopanshitwe. Pashiholelwa, oku na omabiliyona goonyothi apuhe ndhoka dha topolwa moongundu oonenenene dhi ithanwa omilalawili. Omilalawili ndhika ohadhi ende mewangandjo pamukalo gwelandulathano, sho osho wo ngaaka oonyothi noopulanete hadhi ende kehe yimwe pehala lyayo momilalawili ndhika. Pashiholelwa, opulanete yetu Evi, ohayi gwanitha olweendo lwayo okudhingoloka etango kehe omumvo, ndyoka onyothi yopooha natse, naanaa momasiku 365, oowili 5, oominute 48 noosekonde 45,51. Eeno, iinima ayihe yopanshitwe oya hanganithwa lela shili!
3. Otatu ilongo shike mehanganitho ewanawa mokati kiishitwa yaKalunga ihaayi monika nomiinima ye ayihe yopanshitwe?
3 Ehanganitho ndika ekumithi lyiishitwa yaKalunga ihaayi monika nolyaambyoka ayihe ye yopanshitwe, otali tu longo sha? Eeno, otali tu longo kutya Jehova oye Kalunga ngoka ta hanganitha. Ano Kalunga ite etha po nando aantu ye kombanda yevi mboka ye mu hole shili ya kale yaa na eenditho nenge ehangano.
EHANGANO LYAKALUNGA LI WETIKE—NALE NONGASHINGEYI
4, 5. Otu shi shi ngiini kutya Kalunga okwa wilike oshigwana she pethimbo lyaAbraham nolyoshigwana she Israel momukalo gwa hanganithwa?
4 Ombimbeli otayi holola kutya Jehova aluhe okwe enditha aapiya ye komukalo gwa hanganithwa. Pashiholelwa, aalumentu yeitaalo ngaashi Abraham oya kwatele komeho omaukwanegumbo naakalele yawo megalikano lyaJehova. Jehova okwa tseyithile Abraham ehalo lye mokupopya naye. (Genesis 12:1) NaKalunga okwe mu lombwele a gandje eyelithilo ndika kuyamwe: “Ongame [nda] lenge [Abraham], opo a lombwele oluvalo lwe negumbo lye komeho ge okudhimbulukwa ondjila yOmuwa.” (Genesis 18:19) Mpaka opwa li elongekidho lyopalandulathano kongundu yaantu okugalikana Jehova nawanawa.
5 Konima, sho Aaisrael yi indjipala e taa ningi omamiliyona, Jehova ine etha kehe gumwe a galikane momukalo gwe mwene, nopwaa na elongekidho lya hanganithwa. Aawe, Aaisrael oya li ya ningwa oshigwana nenge aagalikani ya hanganithwa. Oshigwana shAaisrael oshi ithanwa “egongalongundu lyOmuwa.” (Numeri 20:4; 1 Ondjalulahokololo 28:8) Andola ongoye wa li omugalikani gwashili gwaJehova pethimbo ndyoka, andola owa li u na okukala ombinga yaagalikani yegongalongundu ndyoka, hakwiikalela kulyo.—Epsalmi 147:19, 20.
6. (a) Ongiini Kalunga a holola kutya aalanduli aadhiginini yaKristus oya li ya silwa ohenda kuye? (b) Euliko lini po li li po kutya Aakriste oya li ya hangana megalikano?
6 Onkalo oya li ya tya ngiini methelemumvo lyotango? Ombimbeli otayi holola kutya esilohenda lyaJehova olya li kaalanduli yOmwana gwe Jesus Kristus. Jehova okwa tilile ombepo ondjapuki ye kombanda yawo. Ye okwa gandja oonkondo kAakriste yotango yontumba okupanga aavu, okuyumudha aasi nokulonga iikumithalonga yimwe yi ili, opo a holole kutya ye ota longitha ngashingeyi ehangano ndika lyopakriste pehala lyoshigwana shaIsrael. Omuntu ito vulu okulesha Omanyolo gOshigreka noino kuminwa uushili mbuka kutya Aakriste oya li ya hanganithwa megalikano. Dhoshili, yo oya lombwelwa ya gongale nelalakano ndika. (Aaheberi 10:24, 25, OB-1986) Ngele ngoye owa li omugalikani gwashili gwaJehova methelemumvo lyotango, andola ngoye owa li u na okukala gwehangano lye lyopakriste.
7. Otu shi shi ngiini kutya Jehova ina longitha nale omahangano ogendji ge vulithe limwe pethimbo limwe?
7 Jehova okwa longitha ngaa nale omahangano ogendji ge vulithe pulimwe pethimbo limwe? Pethimbo lyaNoa, oNoa owala naamboka ya li pamwe naye metembameya ya li megameno lyaKalunga e taa hupu mEyelu. (1 Petrus 3:20) Nomethelemumvo lyotango inaku kala omahangano gopakriste gaali nenge ogendji ge vule mpoka. Kalunga okwe endathana owala nalimwe. Opwa kala owala “Omuwa gumwe, eitaalo limwe, neninginitho limwe.” (Aaefeso 4:5, NW) Sha faathana, Jesus Kristus okwa hunganeke kutya pethimbo lyetu opwa li tapu ka kala owala onza yimwe yelongo yopambepo koshigwana shaKalunga.
8. Ongiini Jesus a holola kutya pethimbo lyetu otapu ka kala owala ehangano limwe lyaKalunga kombanda yevi?
8 Sho Jesus a popi kombinga yekalopo lye moonkondo dhUukwaniilwa, ye okwa ti: “Olye ano omumati omudhiginini nomunandunge, omuwa gwe kwe mu pe elelo lyaalelwa ye, e ya pe oondya pethimbo lyadho? Omumati ngu e na elago, omuwa gwe nge ta galuka te mu adha a ningi ngeyi. Oshili tandi mú lombwele: oye te mu pe eutho lyiinima ye ayihe.” (Mateus 24:45-47) Kristus negaluko lye moonkondo dhUukwaniilwa momvula 1914, okwa adha tuu ongundu ‘yomumati omudhiginini nomunandunge’ ndjoka tayi gandja “oondya” dhopambepo nenge omayelithilo? Eeno, ye okwa adha “omumati” a tya ngaaka a thikama moshihupe ‘shaamwahe’ ye 144 000 kombanda yevi. (Ehololo 12:10; 14:1, 3) Nokuza mo 1914 aantu omamiliyona oya taamba “oondya” ndhoka yo taa gandja noya tameke okulonga aluhe palongelokalunga lyashili pamwe nayo. Ehangano ndika lyaapiya yaKalunga olya tseyika Oonzapo dhaJehova.
9. (a) Omolwashike aapiya yaKalunga taa humbata edhina Oonzapo dhaJehova? (b) Omolwashike yo ya luku omahala gawo gokugongalela Iinyanga yUukwaniilwa?
9 Oonzapo dhaJehova ohadhi tala kuKalunga nokOohapu dhe molweenditho mwaashihe shoka tadhi ningi. Edhina lyawo lyo lyene Oonzapo dhaJehova otali holola kutya oshilonga shawo sha simana osho okuhokolola edhina nUukwaniilwa waJehova Kalunga, ngaashi naanaa Kristus a ningi. (Johannes 17:6; Ehololo 1:5) Noya luku ehala moka haa gongala molwegalikano Oshinyanga shUukwaniilwa, molwashoka Uukwaniilwa waKalunga moshikaha shaMessias, nenge Kristus, owo ekota lyOmbimbeli ayihe. Oshoka osha yela kutya elongelokalunga lyopakriste lyopethelemumvo lyotango olya li lya ziminwa kuKalunga, Oonzapo dhaJehova otadhi ukitha wo ehangano lyadho sha faathana naandiyaka. Natu taleni ano paufupi kehangano lyotango lyopakriste, nomanga tatu tala, ndhindhilika etsokumwe ndyoka li li mehangano lyonena lyaKalunga li wetike.
OSHIHOLELWA SHOMETHELEMUMVO LYOTANGO
10. Tumbula omadhimbululilo gamwe po kombinga yehangano lyopakriste methelemumvo lyotango?
10 Apuhe mpoka pwa kala Aakriste methelemumvo lyotango, yo oya gongala moongundu molwegalikano. Omagongalo ngaka aluhe oga gongala pamwe molweendathano nomolwekonakono. (Aaheberi 10:24, 25, OB-1986) Oshilonga shawo sha simana osha li okuuvithila yamwe noku ya longa Uukwaniilwa waKalunga, ngaashi naanaa Kristus a ningi. (Mateus 4:17, KB; 28:19, 20) Ngele oshilyo shegongalo sha li sha tameke okukala nomikalo omiwinayi, sho osha kondwa mo megongalo.—1 Aakorinto 5:9-13; 2 Johannes 10, 11.
11, 12. (a) Oshike tashi ulike kutya omagongalo gotango gopakriste oga taamba eenditho newiliko kaayapostoli nokaakuluntu yokuJerusalem? (b) Oshike tashi dhiladhilwa newiliko “lyopakalunga”? (c) Oshike sha li oshilanduliko molwashoka omagongalo ga taamba ko ewiliko ndyoka?
11 Omagongalo ngoka gopakriste methelemumvo lyotango oga li mbela gi ithikamena, opo kehe limwe li ninge omatokolo galyo lyene? Aawe, Ombimbeli otayi holola kutya yo oya li ya hangana meitaalo limwe lyopakriste. Omagongalo agehe oga taamba eenditho newiliko lya za konza yimwe ayike. Ano, sho pwa holokele oontamanana kombinga yepito lyetanda, omagongalo nenge aantu inaa tokola owala kuyo yene shoka ye na okuninga. Aawe, ihe omuyapostoli Paulus, Barnabas nooyakwawo oya lombwelwa ya “ye kaayapostoli nokaakuluntu kuJerusalem omolwepulo ndyoka lya tsilwa oompata.” Konima sho aalumentu mbaka ya pyokoka ya ningi etokolo, kekwatho lyOohapu dhaKalunga ‘nokombepo ondjapuki’ ye, yo oya tumu aalumentu aadhiginini oku ka yelithila omagongalo.—Iilonga 15:2, 27-29, KB.
12 Oshilanduliko osha li shike sho omagongalo ga taamba ko eenditho newiliko ndyoka lya gandjwa kuKalunga? Ombimbeli otayi ti: “Sho [omuyapostoli Paulus nooyakwawo] ye endaenda iilando niilando, oye ya pe oompango ndhoka dha ziminwa kaayapostoli nokaakuluntu yokuJerusalem, ye dhi dhiginine wo. Omagongalo noga kolekelwa meitaalo, nomwaalu gwaakwanegongalo ogwa koko omasiku agehe.” (Iilonga 16:4, 5) Eeno, omagongalo agehe oga longo pamwe naashoka sha tokolwa kolutu lwaakuluntu yokuJerusalem, noya kolekelwa meitaalo.
EENDITHO LYOPAKALUNGA PETHIMBO LYETU
13. (a) Okehala lini po kombanda yevi nokongundu yaantu yini po ehangano li wetike lyaKalunga tali taamba eenditho? (b) Ekwatathano lini po li li pokati kolutuwiliki ‘nomumati omudhiginini nomunandunge’?
13 Ehangano lyaKalunga lyonena li wetike otali taamba wo eenditho newiliko lyopakalunga. Kombelewa onene yOonzapo dhaJehova muBrooklyn, New York, oku na olutuwiliki lwAakriste aalumentu aakuluntu ya za koombinga dhi ili nodhi ili dhevi mboka taa tonatele iilonga yoshigwana shaJehova muuyuni auhe. Olutuwiliki nduka olwa thikama miilyo ‘yomumati omudhiginini nomunandunge.’ Otalu longo olwo omupopili ‘gwomumati’ omudhiginini ngoka.
14. Okushike olutuwiliki lwoshigwana shaKalunga halu inekele uuna yo taa ningi omatokolo?
14 Aalumentu mboka taa ningi olutuwiliki oya longo oomvula odhindji miilonga yaKalunga, ngaashi naanaa aayapostoli naakuluntu yokuJerusalem. Ihe yo ihaa inekele uunongo waantu uuna taa ningi omatokolo. Aawe, molwashoka yo otaa wilikwa kuKalunga, yo otaa landula oshiholelwa sholutuwiliki lwotango muJerusalem, ndoka omatokolo galwo ga li ga kankamekwa kOohapu dhaKalunga noga ningwa kohi yewiliko lyombepo ondjapuki.—Iilonga 15:13-17, 28, 29.
EHANGANO MUUYUNI AUHE
15. Omolwashike oohapu dhaJesus muMateus 24:14 tadhi holola kutya Kalunga okwa li ta ka kala e na ehangano enene kombanda yevi pethimbo lyehulilo?
15 Jesus Kristus okwa gandja edhiladhilo kuunene wehangano ndyoka Kalunga a li ta ka kala e na kombanda yevi pethimbo ndika lyehulilo sho ye a ti: “Evaangeli ndika [lyuukwaniilwa] otali ku uvithilwa nuuyuni auhe, li ningile iigwana ayihe ehokololo; notaku ya ihe ehulilo.” (Mateus 24:14, faathanitha KB.) Dhiladhila koshilonga oshinenenene okulombwela aantu omamiliyona omayuvi yokevi kombinga yUukwaniilwa waKalunga mboka wa dhikwa. Ehangano lyopakriste lyonena, ndyoka tali wilikwa kolutuwiliki, olya gwanenena moshilonga shika oshinene?
16. (a) Omolwashike Oonzapo dhaJehova dha dhika po iinyanyangidho oyindji iinene? (b) Oshike hashi nyanyangidhwa miinyanyangidho mbika?
16 Oonzapo dhaJehova otadhi uvitha ngashingeyi etumwalaka lyUukwaniilwa miilongo nomoontuntu yi vulithe 200 kombanda yevi alihe. Okukwatha aauvithi yUukwaniilwa ye vulithe 3 500 000 (mo 1988) okulonga oshilonga shika, opwa dhikwa iinyanyangidho iinene miilongo oyindji. Mpaka ohapu nyanyangidhwa Oombimbeli niinyolwa yOmbimbeli muuwindji uunene. Kehe esiku ohapu nyanyangidhwa nohapu tumwa uupokati wiifo yoWatchtower naAwake! yi vulithe omamiliyona gaali moofabulika ndhika.
17. (a) Omolwashike iinyolwa yOmbimbeli mbino hayi longekidhwa? (b) Oto hiywa okuninga shike?
17 Iinyolwa yOmbimbeli ayihe mbika, ohayi longekidhwa okukwatha aantu ya koke montseyo kombinga yoompangela oonkumithi dhaJehova. Dhoshili, oohapu “Uvitha Uukwaniilwa waJehova” odho ombinga yedhina lyoshifo The Watchtower. Tse otatu ku hiya okukwathela okutaandelitha iinyolwa yOmbimbeli mbika nokuyelithila yamwe uushili wOmbimbeli mboka u li mo. Pashiholelwa, opu na tuu gumwe ngoka to vulu okutopolelathana naye omayelithilo ga simana monkalamwenyo ngoka wi ilongo membo ndika, Ngoye Oto Vulu Okukala Sigo Aluhe mOparadisa Kombanda yEvi?
18. (a) Ehangano lyaKalunga nena ehangano lyoludhi luni po? (b) Omolwashike oshigwana shaKalunga tashi pumbwa eladhipiko enene ngashingeyi?
18 Ngaashi methelemumvo lyotango ehangano lyaKalunga lyonena olyo ehangano lyaauvithi yUukwaniilwa aaigandji naaninginithwa. Olya dhikwa po okukwatha iilyo ayihe okulonga oshilongauvitho shika. Aantu mbaka oya pumbwa eladhipiko nokukolekwa unene pambepo oshoka Satana naamboka ha nwetha mo, otaa pataneke etumwalaka lyUukwaniilwa. Aapataneki ya tya ngaaka oya dhipaga Jesus molwashoka okwe li uvitha, nOmbimbeli otayi londodha kutya aalanduli ye nayo wo otaa ka tidhwatidhwa.—Johannes 15:19, 20; 2 Timoteus 3:12.
19. (a) Olye a gandjwa ngashingeyi okukwatha nokukoleka oshigwana shaKalunga? (b) Ongiini egongalo tali gamenwa kenwethomo ewinayi ndyoka tali vulu oku li nyateka?
19 Ngaashi methelemumvo lyotango, “aakuluntu” yegongalo oya tulwa po okukwatha nokukoleka egongalo kehe. Otaa vulu wo oku ku kwatha nepukululo lyOmbimbeli okusinda omaupyakadhi gi ili nogi ili. Aakuluntugongalo mbaka otaa gamene wo “oshigunda shaKalunga.” Ngele oshilyo shegongalo tashi tameke omikalo omiwinayi e tashi tindi okulundulula, aakuluntugongalo otaa si oshimpwiyu ano kutya ye a kondwe mo megongalo. Osho ngaaka egongalo tali kala lya aluka, lya yogoka pambepo.—Titus 1:5; 1 Petrus 5:1-3; Jesaja 32:1, 2; 1 Aakorinto 5:13.
20. (a) Oolye ya tuminwe methelemumvo lyotango kolutuwiliki lwokuJerusalem, nomolwashike? (b) Oolye taa tumwa kolutuwiliki nena?
20 Nongaashi olutuwiliki muJerusalem lwa tumine aakalelipo yi ikalekelwa, ngaashi Paulus naSilas, okufala neladhipiko omalombwelo koshigwana shaKalunga, osho tuu ngeyi olutuwiliki talu ningi ngashingeyi methimbo ndika lyehulilo. (Iilonga 15:24-27, 30-32) Konyala lwaali omumvo kehe omukalele a pyokoka, a tseyika omutonatelishikandjo, oha tumwa oku ka kala oshiwike pamwe negongalo kehe moshikandjo she.
21. Ongiini omutonatelishikandjo ta kwatha omagongalo goshigwana shaKalunga?
21 Opu na omagongalo ogendji ge vulithe 60 000 gOonzapo dhaJehova muuyuni auhe, noga topolwa miikandjo konyala omagongalo 20 mukehe shimwe. Uuna omutonatelishikandjo ta talele po omagongalo moshikandjo she, oha tungu oonzapo dhUukwaniilwa mokuya pamwe nayo moshilonga sheuvitho noshelongo. Kakele koku ya ladhipika komukalo nguka, oha gandja wo omayele oku ya kwatha ya hwepopale muukalele wawo.—Iilonga 20:20, 21.
22. (a) Elongekidho ekwawo lini po lya ningwa po okukoleka oshigwana shaKalunga lwaali komvula? (b) Oto hiywa okuninga shike?
22 Niishewe eladhipiko nekoleko ohayi gandjwa uuna omagongalo mukehe oshikandjo pandjigilile taga gongala lwaali momumvo kehe, molwoshigongi shopashikandjo shesiku limwe nenge omasiku gaali. Piigongi mbyoka ohashi vulika pu kale aantu ye thike okuza pomathele gaali nenge gatatu sigo 2 000 nenge ye vulithe. Tse otatu ku hiya okukala po pushimwe tashi landula momudhingoloko gwoye. Tse otwi inekela shili kutya oshigongi otashi ke ku toyaleka pambepo notashi ke ku etela uuwanawa wopaumwene.
23. (a) Iigongi yimwe yini po hayi ningwa lumwe komvula? (b) Shimwe shomiigongi mbino osha li oshinene ngiini?
23 Nalumwe komumvo kehe opwa ningwa oshigongi oshinene shi vulithe shopaikandjo, uule womasiku gontumba. Ninga onkambadhala onene okukala po poshigongi sha tya ngaaka nokumona mwene nkene tashi kala shi hokitha notashi vulu okweeta ondjambi yopambepo. Pehala lyoshigongi shopaikandjo, opwa li wo iigongi iinenenene yopashigwana nenge yuuyuni auhe moomvula dhimwe. Oshigongi oshinenenene shi vulithe shoka inaashi ningilwa nale pehala limwe, osho tuu shoka sha li shomasiku gahetatu mo 1958 pOkapale Yankee nopEhala Polo moshilando New York. Pompito ndjoka aantu 253 922 oyi ile okupulakena koshipopiwa shomontaneho “Uukwaniilwa waKalunga Otau Pangele—Ehulilo lyUuyuni Olya Thikana Tuu?” Okuza pethimbo ndyoka kapwa li we ehala enene lya gwanena omutumba gwaantu oongundu oonenenene ngawo, ano opwa ningwa omalongekidho kutya omahala miilando oyindji ya simana yi longithwe kiigongi iinene.
OKUGONGALA KWOPAGONGALO
24. Okugongala kwopatano kuni po haku ningwa komagongalo goshigwana shaKalunga moshiwike kehe?
24 Olutuwiliki lwOonzapo dhaJehova ohalu utha wo elandulathano lya hangana lyelongo lyOmbimbeli ndyoka hali ningwa momagongalo agehe goshigwana shaJehova. Kehe egongalo oli na okugongala kwopatano moshiwike kehe. Hoka ku li Osikola yUukalele wopaKalunga, Okugongala kwopaIlonga, Okugongala kwoMontaneho, ekonakono lyoWatchtower nEkonakono lyEmbo lyopaGongalo. Molwashoka ngiika ngoye ino kala po nale pokugongala huka, otatu ku hokololele paufupi.
25, 26. Osikola yUukalele wopaKalunga nOkugongala kwopaIlonga oyi na oshilonga shashike?
25 Elalakano lyOsikola yUukalele wopaKalunga olyo okukwatha aalongwa ya hwepopale okupopya nayamwe kombinga yUukwaniilwa waKalunga. Ethimbo nethimbo, mboka yi inyolitha mo ohaa gandja iipopiwa paufupi kombinga yiipalanyolo yOmbimbeli komeho yongundu ayihe. Opo nduno omukuluntugongalo omunawino ta gandja omayele molwehwepopalo.
26 Olundji ongulohi yimwe ohapu ningwa wo Okugongala kwopaIlonga. Elandulathano molwokugongala huka otali monika mo Our Kingdom Ministry, oshifo shomwedhi kehe shomapandja gaali nenge ge vulithe hashi nyolwa metonatelo lyolutuwiliki. Pethimbo lyokugongala huka ohapu popiwa omayele gokulongitha nomaulikilo momikalo ndhoka tadhi kwatha okupopya nayamwe kombinga yetumwalaka lyUukwaniilwa. Momukalo tuu ngoka, Kristus okwa ladhipike aalanduli ye nokwe ya pe omayelithilo mwaashoka nkene ye na okugwanitha uukalele wawo.—Johannes 21:15-17; Mateus 10:5-14.
27, 28. Okugongala kwoludhi luni po ku li Okugongala kwOmontaneho, kwekonakono lyoWatchtower nokwEkonakono lyEmbo lyopaGongalo?
27 Okugongala kwoMontaneho osho wo ekonakono lyoWatchtower ohayi ningwa pandjigilile Osoondaha kehe. Ohapu ningwa onkambadhala yi ili okwiithana aaitulimo aape okuya kOkugongala kwOmontaneho, hoka kwa thikama moshipopiwa shOmbimbeli hashi gandjwa komukalele a pyokoka. Ekonakono lyoWatchtower olyo onkundathana yepulo neyamukulo yoshinyolwa shOmbimbeli shoka opo sha piti shoshifo oWatchtower.
28 Nonando egongalo alihe hali gongala pamwe mOshinyanga shUukwaniilwa molwokugongala kwa tumbulwa, uungundu ohau gongala momagumbo gowala molwEkonakono lyEmbo lyopaGongalo moshiwike kehe. Ekwatho lyekonakono lyOmbimbeli, ngaashi embo ndika to lesha ngashingeyi, ohali longithwa olyo ekota lyonkundathana yOmbimbeli, ndjoka tayi vulu okukala uule wowili yimwe.
29. (a) Edhimbuluko lini po Aakriste yashili haa ningi omvula kehe? (b) Oolye ye na uuthemba okulongitha oshikwiila nomaviinu?
29 Kakele kokugongala huka kwaaluhe, Oonzapo dhaJehova ohadhi ningi okugongala kwi ikalekelwa omvula kehe okudhimbulukwa eso lyaJesus. Sho Jesus a dhiki po edhimbuluko ndika lyeso lye, ye okwa ti: “Shi ningeni okudhimbulukwa ndje.” (Lukas 22:19, 20) Pethimbo lyedhano ndika li iwetikile, Jesus okwa longitha omaviinu noshikwiila shaa na ontaku oyo endhindhiliko lyomwenyo ngoka a li poku gu yambela uuntu. PEdhimbuluko ndika komvula kehe, iilyo yahugunina yaalanduli aagwayekwa yaKristus 144 000 mboka natango ye li kombanda yevi, otaa holola etegameno lyawo lyomegulu mokulongitha oshikwiila nomaviinu.
30. (a) Oolye ishewe ye na uuthemba okukala po pEdhimbuluko, netegameno lyawo oshike? (b) Ongiini Jesus a hokolola aantu mboka?
30 Yamwe omamiliyona mboka haa kala pEdhimbuluko ndika mIinyanga yUukwaniilwa kombanda yevi alihe, ohaa nyanyukwa okukala aatali. Yo ohaa dhimbulukithwa wo mwaashoka Jehova Kalunga naJesus Kristus ya longo oku ya hupitha muulunde nomeso. Ihe pehala lyokutegelela omwenyo gwomegulu, yo ohaa nyanyukilwa etegameno lyomwenyo gwaaluhe moparadisa kombanda yevi. Yo ongaashi Johannes Omuninginithi, ngoka i ipopi mwene oye “kuume kombushiki,” hangaashi gumwe gwiilyo 144 000, mbyoka ayihe kumwe oyo omufuko gwaKristus. (Johannes 3:29) Aantu mbaka omamiliyona oyo oshitopolwa ‘shoonzi dhilwe’ ndhoka dha popiwa kuJesus. Yo kaaye shi iilyo ‘yoshigunda oshishona.’ Ihe yo otaa longo muukumwe pamwe niilyo ‘yoshigunda oshishona,’ opo ayehe ya ninge “uusita wumwe,” ngaashi Jesus a ti.—Johannes 10:16, NW; Lukas 12:32.
LONGELA KALUNGA PAMWE NEHANGANO LYE
31. Euliko lini po li li po kutya Kalunga ina hokwa mboka ye li ombinga yelongelokalunga lyiifundja e taa kambadhala wo okukala ombinga yehangano lye?
31 Alikana, osha yela ngiini kutya Jehova Kalunga, ngaashi naanaa methimbo lyonale, oku na ehangano nena li wetike! Ye ote li longitha ngashingeyi okuputudhila aantu omwenyo monkalelo ye ompe yuuyuki. Ihe, tse itatu vulu okukala ombinga yehangano lyaKalunga nokukala ishewe ombinga yelongelokalunga lyiifundja. Oohapu dhaKalunga otadhi ti: “Inamu pitika, mu humbate ondjoko yaa shi yeni pamwe naakaaneitaalo; oshoka uuyuuki u na uukuume washike nuugoyoki? Nenge uuyelele u na ehangano lyashike nomilema? . . . Nenge oitaali nomukeeneitaalo oyo ye na okutopolelathana shike?” Ano Kalunga ota lombwele: “Onkee: Zii mo mokati kawo, ne mu iyoolole muyo.”—2 Aakorinto 6:14-17.
32. (a) Otu na okuninga shike ngele twa hala ‘okuza mo mokati kawo’? (b) Elaleko nuuyamba lini po tatu ka taamba ngele tatu longele Kalunga shili pamwe nehangano lye li wetike?
32 Uutumbulilo “Zii mo mokati kawo” otau ti ngiini? Eeno, itatu vulu okuvulika kelombwelo ndyoka ngele tatu kala mo nenge tatu ambidhidha ehangano lyelongelokalunga li ili ndyoka itaali longithwa kuJehova Kalunga. Ngele opu na gumwe natango e li mehangano lyelongelokalunga lyiifundja lya tya ngaaka, ye e na oku ya tseyithila kutya ota tembuka. Ngele tatu zi mo mokati kaamboka haa longo palongelokalunga lyiifundja, e tatu longele Kalunga shili pamwe nehangano lye li wetike, otatu ka kala yamwe yaamboka Kalunga te ya popi: “Ongame nda hala okukala muyo notandi ende mokati kawo, ongame tandi kala Kalunga kawo, oyo notaa ningi aantu yandje.”—2 Aakorinto 6:16.
[Picture on page 192]
Pethimbo lyEyelu, Kalunga okwa li e na omahangano ogendji ge vulithe pulimwe?
[Pictures on page 196]
OOMBELEWA OONENE DHOONZAPO DHAJEHOVA MUUYUNI AUHE
OMBELEWA YEWILIKO
Ookompiutela
OSHINYANYANGIDHO MUBROOKLYN
Omashina gOkunya-nyangidha
Emango lyOmambo
Etumo lyIinyolwa
[Pictures on page 197]
YIMWE YOMIINYANYANGIDHO OYINDJI YI ILI YOWATCH TOWER
Brasilia
England
South Africa
Wallkill, New York
Kanada
[Pictures on page 198]
Yamwe yo 253 922 moshigongi shOonzapo dhaJehova muNew York
Ehala Polo
Okapale Yankee
[Picture on page 201]
Elandulathano lyelongo lyOmbimbeli ohali nyanyukilwa pokugongala kwOonzapo dhaJehova