Olye a shita Kalunga?

Kala wa fa wu wete omusamane ta popi nokamwanamati koomvula heyali, ta ti: “Nalenale, Kalunga okwa li a shiti evi naashihe shoka shi li ko, okwa shiti etango, omwedhi, noonyothi.” Okamati oka dhiladhila po manga kashona kombinga yaashika e take mu pula taka ti, “Tate, olye a shita Kalunga?”

He yako okwa yamukula a ti: “Kapu na ngoka a shita Kalunga. Oko a kala nale.” Eyamukulo ndyoka lyanathangwa olya mbilipaleke okanona pethimbo mpoka. Ihe nonando oongawo, sho taka koko, oka kala ke na ohokwe noka kala ka hala okuuva oshindji kombinga yepulo ndyoka. Osha kala oshidhigu kuye okuuva ko kutya ongiini omuntu ta kala kee na etameko. Omolwashike, nokuli newangandjo oli na etameko. Oha kala e na omaipulo kutya ‘Kalunga okwa za peni?’

Ombiimbeli otayi yamukula ngiini epulo ndyoka? Omomukalo naanaa ngaashi ngoka gwomusamane gwomoshiholelwa shetu. Moses okwa nyola a ti: ‘OMUWA manga inoo shita oondundu nomanga inoo holola po uuyuni, ngoye Kalunga kaaluhe oko wa li noto ka kala aluhe sigo aluhe.’ (Episalomi 90:1, 2) Sha faathana, omupolofeti Jesaja okwa popi a ti: ‘Ku shi shi nani? Nani ino shi uva kutya OMUWA oye Kalunga kaaluhe? Oye a shiti omakankameno gevi.’ (Jesaja 40:28) Niishewe, ontumwafo yaJudas otayi popi kutya Kalunga oko a kala “okuza komathimbo gonale.” — Judas 25.

Omanyolo ngoka otage tu ulukile kutya Kalunga oye “omukwaniilwa gwaaluhe,” ngaashi omuyapostoli Paulus e mu popi. (1 Timoteus 1:17) Shika otashi ti kutya Kalunga oko a kala aluhe, kashi na nduno mbudhi kutya otu dhiladhile kiinima yonalenale. Oko wo ta ka kala aluhe monakuyiwa. (Ehololo 1:8) Onkee ano, okukala kwe sigo aluhe okwo uukwatya wa simanenena wOmunankondoadhihe.

Omolwashike hatu mono oshidhigu okuuva ko oshinima shika? Omolwaashoka ethimbo lyokukala kwetu momwenyo olya yooloka ko thiluthilu kethimbo ndyoka Jehova a kala ko. Molwaashoka Kalunga oko ta kala aluhe, oomvula eyuvi kuye odha fa esiku limwe. (2 Petrus 3:8) Oku shi thaneka: Mbela ombahu ndjoka hayi kala nomwenyo omasiku 50 lwaampono, oyi shi shi ngaa kutya tse ohatu vulu okukala nomwenyo oomvula 70 nenge 80? Aawe! Ihe Ombiimbeli otayi ti kutya tse otwa faathana noombahu okuyelekanithwa nOmushiti gwetu Omunenenene. Nokuli okudhiladhila kwetu kaku thike pukwe. (Jesaja 40:22; 55:8, 9) Onkee ano itashi kumitha sho meshito lyaJehova mu na iinima mbyoka aantu itaaya vulu okuuva ko thiluthilu.

Nonando edhiladhilo kutya Kalunga ota kala aluhe edhigu okuuva ko, otatu vulu okumona kutya oshi shi okuuviwa ko. Ngele opu na gulwe ngoka a shita Kalunga, omuntu ngoka ota ka kala Omushiti. Ihe Ombiimbeli otayi ti kutya, Jehova oye “a shiti iinima ayihe.” (Ehololo 4:11) Shimwe ishewe, otu shi shi kutya eshito opu na ethimbo kaalya li ko. (Genesis 1:1, 2) Mbela olya za peni? Omushiti gwalyo oye a kala ko tango. Oko wo a kala manga kaakwa li nando iishitwa iinandunge, ngaashi Omwana awike nosho wo aayengeli. (Job 38:4, 7; Aakolossa 1:15) Osha yela kutya ye oko a kala tango oye awike. Ka li a shitwa, nokapu na shoka sha ka kala ko inaashi shitwa kuye.

Okukala po kwetu nosho wo kweshito alihe otaku ulike kutya Kalunga kaaluhe oko e li. Kalunga ngoka a shita ewangandjo hali inyenge, ngoka a tula po oompango dhoku li pangela, oku na okukala oko a kala aluhe. Molwaashoka oko a kala nale, oye owala a li ta vulu okupa iinima yilwe ayihe omwenyo. — Job 33:4.