Mbela osha li ngaa mondjila sho David a li e wete kutya Kalunga ke na oku mu dhimbwa? Mbela Kalunga oku na ko nasha nangoye? Aantu oyendji ohaye shi mono oshidhigu okwiitaala kutya Kalunga omunankondoadhihe okwe ya hokwa. Omolwashike mbela?

Etompelo limwe oondyoka kutya Kalunga omunene noonkondo e vule aantu yowala. Mokutala kondondo ye onenenene, iigwana ayihe “oya faathana neta limwe lyomeya [“tali zi meyemele,” NW], iipuupuka moshiviha ya fa ontsi.” (Jesaja 40:15) Omunyoli gumwe gwokunena ngoka e na omalimbililo ge na ko nasha naKalunga okwa thiki nokuli pehulithodhiladhilo kutya “otashi ulike uuntsa okwiitaala kutya oku na Kalunga ngoka e na ko nasha nangoye paumwene noku na ko nasha naashoka to ningi.”

Mepingathano naashono, aantu yamwe oyu uvite kutya eihumbato lyawo ohali ya ningitha ya kale inaaya gwana okukala ye niwe nayo kuKalunga. Pashiholelwa, omulumentu gumwe gwoomvula dhopokati gwedhina Jim ota ti: “Olundji ohandi galikana ndi kale ndi na ombili neipangelo, ihe nziya nenge konima ongeyo yandje ohayi galuka aluhe. Osho ngaa nda ka thika pehulithodhiladhilo kutya ngame omukolokoshi omunene nosho wo kutya Kalunga ka li ta vulu okukwathela ndje.”

Mbela Kalunga oku li ngaa kokule naantu ngaaka nokukala kee na ko nasha natse? Mbela oku uvitile lela ngiini iishitwa ye mbyoka inaayi gwanenena? Ngele Kalunga ina longa aantu ye mwene kombinga ye, kapu na omuntu ta ka vula oku mu popila nenge okuyamukula omapulo ngoka. Onkee ano, etumwalaka lyaKalunga lya nwethwa mo ndyoka a pa aantu, ano Ombiimbeli, otali tu shilipaleke kutya ke shi Kalunga ngoka e li kokule nayo nokukala kee na ko nasha noohandimwe. Ombiimbeli otayi ti: “Ke li kokule nomuntu nando ogumwe.” (Iilonga 17:27) Miitopolwa ine tayi landula, otatu ka tala kwaashoka Kalunga te tu lombwele kombinga yankene e na ohokwe moohandimwe nankene u ulike ohokwe ndjoka maantu mboka ya li ko nale ngaashi owala ngoye.

ETOMPELO KUTYA OMOLWASHIKE YAMWE YE NA OMALIMBILILO: Pakonakono lyuuyelele mboka opo wa piti, omulalawili gwetu owala gumwe ogu na oopulanete omabiliyona 100 lwaampo. Mokukala ye shi uunene wewangandjo, aantu oyendji ohaya pula, ‘Omolwashike Omushiti omunankondoadhihe e na okukala a tala shoka aantu yowala taya ningi kopulanete onshonanshona?’

SHOKA OOHAPU DHAKALUNGA TADHI TU LONGO: Kalunga ine tu pa owala Ombiimbeli e ta kanitha ohokwe mutse. Pehala lyaashono, Jehova ote tu shilipaleke ta ti: “Otandi ku ulukile ondjila ndjo u na okulandula; otandi ku wilike e tandi ku tonatele.” — Episalomi 32:8.

Dhiladhila kuHagar, omukiintu Omuegipiti ngoka a li ko methelemumvo eti-20 K.E.N. Hagar ka li a simaneka omuhona gwe, Sarai, onkee ano Sarai okwa li e mu ngwandjagula, naHagar okwa li a fadhukile mombuga. Nonando Hagar okwa li a ninga epuko, mbela Kalunga okwa kala kee na ko we nasha naye? Ombiimbeli otayi ti: “Omuyengeli gOMUWA okwa tsakaneke Hagar.” Omuyengeli ngoka okwa li a shilipaleke Hagar, a ti: “OMUWA oku uvu okulila kwoye.” Opo nduno Hagar okwa ti kuJehova ‘ngoye oKalunga ngoka ha mono.’ — Genesis 16:4-13.

“Kalunga ngoka ha mono” ohe ku tonatele wo. Oku shi thaneka: Omuvalakadhi omunahole oha kala unene tuu ta tonatele aanona ye aashona, shi thike ngaa pokukala kwokanona okashona, opo ngaa pu thike okukala ka pumbwa etonatelo lyaavali yako. Sha faathana, Kalunga ohe tu tonatele unene tuu uuna tu wete kaatu na oshilonga notwaa na omukwathi. Jehova ota ti: “Onda kala kombandambanda muuyapuki, ihe onda kala wo paantu mboka yi ifupipika noyi itedhulula, opo ndi talaleke oomwenyo dhaifupipiki nokuhekeleka omitima dha nyanyagulwa.” — Jesaja 57:15.

Kakele kaashono, otashi vulika wu kale wu na omaipulo kutya: ‘Kalunga oha tonatele ndje ngiini? Mbela oha konakona ndje shi ikolelela keholokopo lyandje, nenge oha tala muule shi vulithe pwaashoka nokukala u uvite ndje ko?’

ETOMPELO KUTYA OMOLWASHIKE YAMWE YE NA OMALIMBILILO: Aantu oyendji oyu uvite kutya Kalunga okwa tala ko owala aantu ye li aalunde, ano inaaya yogoka noinaya gwana okupewa eitulomo kuye. Kendra, ngoka a li e na uuvu wepolimano, okwa li u uvite ondjo noonkondo molwaashoka ka li ta vulu okugwanitha po iitegelelwa yaKalunga momukalo gwa gwanenena. Oshizemo, okwa ti, “Onde etha po okugalikana.”

SHOKA OOHAPU DHAKALUNGA TADHI TU LONGO: Jehova oha kaleke momadhiladhilo okwaagwanenena kwoye noku ku uvite ko kutya ongoye lye lela. Ombiimbeli otayi ti: “Okwa tseya kutya otwa shitwa nashike; oku shi shi kutya otse ontsi yevi.” Shimwe ishewe, iha ungaunga natse shi ikolelela “pamayono getu,” ihe ohe tu dhimine po pahenda uuna twi iyela ombedhi. — Episalomi 103:10, OB-1954, 14.

Dhiladhila kuDavid, omukwaniilwa gwaIsraeli ngoka a tumbulwa moshitopolwa shotango shomiitopolwa mbika ya pambathana. Megalikano lye, David okwa ti: ‘Owa mono ndje, manga inaandi valwa. Niitopolwa yandje ayihe oya li ya nyolelwa membo lyoye. Konakona ndje, Kalunga, ngoye u tseye omutima gwandje.’ (Episalomi 139:16, 23, yelekanitha NW.) Eeno, David okwa li a tompwa kutya nokuli nando okwa longa uulunde, nokuli naamboka wa kwata miiti omathimbo gamwe, Jehova okwa li ta vulu okumona momutima gwe kutya okwi iyela ombedhi.

Jehova oku uvite ko onkalo yoye shi vulithe omuntu kehe. ‘Omuntu oha tala kombanda, ihe Jehova oha mono momutima.’ (1 Samuel 16:7, yelekanitha NW.) Kalunga oku shi kutya oshike hashi ku ningitha wu ihumbate momukalo ngoka, ano uukwatya mboka wa thigulula, eputuko, omudhingoloko nosho wo uukwatya woye ohawu ku ningitha wu kale ngaashi wu li. Oha mono kutya owa hala okukala omuntu e li ngiini noha kala e ku lenga nokuli, nando oho ningi omapuko.

Kalunga oha longitha nduno ngiini euvoko ndyoka e na shi na ko nasha nankene wu li lela opo e ku hekeleke?

ETOMPELO KUTYA OMOLWASHIKE YAMWE YE NA OMALIMBILILO: Nokuli nuuna ya pumbwa ehekeleko noonkondo, aantu yamwe oyu uvite kutya otashi ulike okwiihola mwene okupula Kalunga a ye mo olunyala momaupyakadhi gawo noku ya kwathela ye ga idhidhimikile. Omukiintu gwedhina Raquel okwa ti: “Uuna tandi tala kaantu ayehe muuyuni, nosho wo omaupyakadhi ga kwata miiti ngoka ye na, ohandi kala ndi wete uupyakadhi wandje inaawu simana nohashi ningitha ndje kaandi pule ekwatho kuKalunga.”

SHOKA OOHAPU DHAKALUNGA TADHI TU LONGO: Kalunga okwa ya mo nale olunyala momukalo gwa dhenga mbanda a kwathele nokuhekeleke aantu. Kehe gumwe kombanda yevi okwa thigulula uulunde, mboka we mu ningitha a kale itaa vulu okuvulika thiluthilu kiitegelelwa yaKalunga momukalo gwa gwanenena. Ihe nonando ongawo, “Kalunga oye kwa li e tu hole tango nokwa tumu Omwana [Jesus Kristus], a ninge eyambo lyokudhima po oondjo dhetu.” (1 Johannes 4:10) Okupitila meso lyaJesus lyopayambo, Kalunga okwe shi ningi tashi wapa tu dhiminwe po oondjo dhetu, tu kale tu na eiyuvo lya yela, nosho wo etegameno lyomwenyo gwaaluhe muuyuni uupe wombili.a Ihe mbela eyambo ndyoka olyaantu ayehe, nenge mbela otali ulike kutya Kalunga okwe ku hokwa paumwene?

Dhiladhila komuyapostoli Paulus. Okwa li a gumwa lela keyambo lyaJesus noshe mu inyengitha a nyole ta ti: ‘Otandi kala ndi itaala Omuna gwaKalunga, ngoka e hole ndje nokwa gandja omwenyo gwe molwandje.’ (Aagalati 2:20) Eeno shili, Jesus okwa li a si nokuli manga Paulus inaa ninga Omukriste. Ihe nonando ongawo, Paulus okwa li a tala ko eyambo ndyoka li li omagano ngoka Kalunga e mu pa paumwene.       

Eso lyaJesus lyopayambo oli li omagano ngoka Kalunga e ku pa wo paumwene. Omagano ngoka otagu ulike nkene wu na ondilo kuKalunga. Otaga vulu oku ku pa “omukumo gwaaluhe [ehekeleko lyaaluhe, NW] netegameno ewanawa” nokungawo otage ke ku ‘tsa omukumo noku ku koleka, wu longe nowu popye ashike shoka oshiwanawa.’ — 2 Aatessalonika 2:16, 17.          

Ihe Jesus okwa li a gandja po omwenyo gwe gu li eyambo pwa pita ngaashingeyi omimvo tadhi ihilile po 2 000. Uunzapo wuni tawu ulike kutya Kalunga okwa hala okukala e na ekwatathano nangoye kunena?

ETOMPELO KUTYA OMOLWASHIKE YAMWE YE NA OMALIMBILILO: Aantu oyendji mboka yi itaala muKalunga oyu uvite ye li kokule naKalunga. Christina, omukiintu gumwe a za koIreland ngoka ha yi kongeleka oshiwike kehe ota ti: “Onda li owala handi kala nde mu tala ko e li Kalunga ngoka a shita kehe shimwe. Ihe kanda li ndi mu shi. Kapu na nando esiku limwe nda li ndi wete ndi li popepi naye.”

SHOKA OOHAPU DHAKALUNGA TADHI TU LONGO: Uuna tu wete twa fa twa kana, Jehova ihe tu etha po. Jesus okwa li u ulike nkene Kalunga e na ko nasha natse momukalo nguka: “Ngele omuntu e na oonzi ethele limwe, ihe yimwe yomudho tayi kana, ita thigi po ando ndhoka omilongo omugoyi nomugoyi koondundu, a ka konge ndjiyaka ya kana?” Oshiilongomwa? “Onkee ano kali shi ehalo lyaHo megulu, ku kane nando okamwe kaambuka uushona.” — Mateus 18:12-14.

Kehe ‘kamwe kaambuka uushona’ oke na ondilo kuKalunga. Kalunga oha ‘kongo ngiini hoka ka kana’? Pakupopya kwenyolo ndyoka li li petameko, Jehova ohe eta aantu kuye.

Tala kunkene Kalunga a li a katuka onkatu tango e ete kuye aantu mboka ye na omitima omiwanawa. Methelemumvo lyotango E.N., Kalunga okwa li a tumu omulongwa Omukriste Filippus a ye kelenga enene lyokuEtiopia a ka kundathane naye eityo lyehunganeko lyOmbiimbeli ndyoka elenga lya li tali lesha. (Iilonga 8:26-39) Konima, okwa li a tumu omuyapostoli Petrus a ye kegumbo lyomunambelewa gwaRoma Kornelius, ngoka a kala ta galikana nokukambadhala okulongela Kalunga. (Iilonga 10:1-48) Kalunga okwa li wo a wilike Paulus nayakwawo ya ye komulonga gu li kondje yoshilando Filippi. Hoka oya li ya adha ko “nakusimaneka Kalunga,” gwedhina Lidia, Jehova “nokwe egulula omwenyo gwe okutaamba nokwiitaala.” — Iilonga 16:9-15.      

Mompito kehe, Jehova okwa li a shilipaleke kutya mboka ya li taye mu kongo oya mona ompito yoku mu tseya. Oolye kunena haya yi kaantu komagumbo gawo nosho wo pomahala gaayehe ye ke ya lombwele etumwalaka lyOmbiimbeli kombinga yaKalunga? Oyendji otaya ka yamukula kutya, “Oonzapo dhaJehova.” Ipula to ti, ‘Mbela otashi vulika Kalunga te ya longitha a kale e na ekwatathano nangame?’ Otatu ku ladhipike wu galikane kuKalunga e ku kwathele wu inyenge omolwoonkambadhala ndhoka ta ningi e ku ete kuye.a