OMAPULO GA ZA KAALESHI
Oohapu dhaDavid ndhoka dhi li mEpisalomi 37:25, nodhaJesus ndhoka dhi li muMateus 6:33, mbela odha hala okutya Jehova ke na nando esiku e ethe Omukriste a kale kee na iipalutha ya gwana?
David okwa nyola a ti: “Inandi mona nando olumwe omuyuuki e ethiwa kOmuwa, nenge oyana taa hehela iikulya.” Oshinima shoka okwa li e shi popi shi ikolelela kwaashoka a mona monkalamwenyo ye mwene. Okwa li e shi shi nawa kutya Kalunga oha sile aluhe oshimpwiyu aapiya ye. (Eps. 37:25) Ihe oohapu dhaDavid inadhi hala okutya aapiya yaKalunga kaye na siku ye ki iyadhe ye li mompumbwe yiikulya.
Poompito dhimwe, David naye okwa li moonkalo oondhigu noonkondo. Oshikando shimwe sho a li ta yi ontuku omukwaniilwa Saul, David ka li e na iipalutha ya gwana. Okwa li indile iikwiila, opo ye naamboka e li nayo ya lye. (1 Sam. 21:1-6) Onkee ano, oshikando shoka David okwa li ta “hehela iikulya.” Ihe nonando okwa li e li monkalo ondhigu, okwa li e shi kutya Jehova ine mu thiga po. Uushili owo kutya David ka li ha ka hehela iikulya mbyoka a li a pumbwa esiku nesiku, opo a kale nomwenyo.
Jesus okwa gandja eshilipaleko muMateus 6:33 kutya Kalunga ota ka pa aapiya ye aadhiginini oompumbwe dhawo, ngele taya pititha komeho iinima yUukwaniilwa monkalamwenyo yawo. Okwa ti: “Tangotango kongeni Oshilongo shaKalunga nuuyuuki we, nena mbika ayihe [mwa kwatelwa iikulya, iikunwa niizalomwa] otamu yi gwedhelwa ko.” Ihe Jesus okwa popi kutya omolwomahepeko, ‘aamwahe’ otashi vulika ya kale kaaye na iipalutha omathimbo gamwe. (Mat. 25:35, 37, 40) Omuyapostoli Paulus naye okwe shi ningilwa. Oshikando shimwe, okwa li a sa ondjala nenota. — 2 Kor. 11:27.
Jehova ohe tu lombwele kutya otatu ka hepekwa momikalo odhindji. Otashi vulika e ethe tu patanekwe, opo tu yamukule ompata ndjoka ye etwa po kOndiyapoli. (Job 2:3-5) Pashiholelwa, Aakriste ooyakwetu yamwe, ngaashi mboka ya li ya tulwa mookamba dhaNazi, oyi iyadha moothina molwomapataneko. Kaya li haya pewa iikulya ya gwana, ngoka gwa li omukalo gumwe Ondiyapoli ya li ya longitha yi teye po uudhiginini wawo. Jehova ina thiga po Oonzapo dhe ndhoka dha kala nokuvulika kuye. Okwa etha aapiya ye aadhiginini ya pite memakelo ndika, ngaashi owala ha etha aapiya ye ayehe ya adhike komamakelo gi ili nogi ili. Ihe kapu na omalimbililo kutya Jehova ota ka ambidhidha ayehe mboka taya hepekelwa edhina lye. (1 Kor.10:13) Natu kaleke momadhiladhilo oohapu ndhoka dhi li mAafilippi 1:29 tadhi ti: “Oshoka ne omwa pewa ohenda yokuyakula Kristus, hamoku mu itaala akuke, ihe nomoku mu hepekelwa wo.”
Jehova oku uvaneka kutya ota ka kala pamwe naapiya ye. Pashiholelwa, Jesaja 54:17 ota ti: “Oshikondjitho kehe tashi hambulwa shi ku kondjithe, itashi tompola sha.” Euvaneko ndika nosho wo omauvaneko galwe, otage tu pe eshilipaleko kutya Kalunga oha gamene oshigwana she shi li ongundu. Ihe nonando ongaaka, Omukriste pauhandimwe ohashi vulika a makelwe, sigo omeso nokuli.