Jeremia 36:22) Itashi kumitha ano sho aasita mboka ya li haya kala momudhingoloko gwaBetlehem muDesemba ya li haya si oshimpwiyu opo kaaya kale miihwa nosho wo iimuna yawo yi kale ye edhililwa.

Ihe Ombiimbeli otayi ti kutya aasita oya li taya tonatele iimuna yawo miihwa uusiku mboka Jesus a valwa. Omunyoli gwOmbiimbeli Lukas okwa popi kutya pethimbo ndyoka, aasita oya li “kelundu ya langela iimuna yawo uusiku” popepi naBetlehem. (Lukas 2:8-12) Ndhindhilika kutya aasita yiimuna oya li ya langela iimuna yawo miihwa, ihe kaya li taye endaenda pondje omutenya. Oya li ye li niimuna yawo miihwa uusiku. Mbela oshiningwanima shika shokulangela iimuna miihwa oshe eleka ngaa okutiwa kutya osha li sha ningwa muDesemba pethimbo mpoka haku kala ku na uutalala nomvula muBetlehem? Hasho, inashi ningwa pethimbo ndyoka. Onkee ano, onkalo yopethimbo lyokuvalwa kwaJesus otayi ulike kutya ka li a valwa muDesemba.a

Oohapu dhaKalunga otadhi tu lombwele kondandalunde kutya Jesus okwa sa uunake, ihe itadhi gandja uuyelele oundji u na ko nasha nokutya okwa valwa uunake. Shoka otashi tu dhimbulukitha oohapu dhomukwaniilwa Salomo, tadhi ti: “Edhina lya simana oli vule omugwayo gwa nika nawa, nesiku lyokusa oli vule esiku lyokuvalwa.” (Omuuvithi 7:1) Ano itashi kumitha sho Ombiimbeli tayi gandja uuyelele oundji kombinga yuukalele waJesus neso lye, ihe otayi gandja uuyelele uushona kombinga yethimbo moka a valwa.

OMBIIMBELI hayo onzo yomasiku gomafudho gopalongelokalunga nosho wo ngoka kaage shi gopalongelokalunga, ngoka haga dhanwa nena miilongo oyindji muuyuni. Ano omadhano ngoka oga za peni? Ngele oto vulu okuya kongulu yomambo, oto ka mona omauyelele omahokithi mokutala kwaashono omambo guuyelele taga popi shi na ko nasha nomasiku gomafudho ngoka haga dhanwa moshilongo sheni. Tala iiholelwa yontumba.

“Easter.” Omathimbo gamwe oshitya “Opaasa” ohashi longithwa okuulika koshituthi shoka hashi ithanwa Easter mOshiingilisha. Embo The Encyclo­pædia Britannica otali popi shi na ko nasha noshituthi shika tali ti: “Kapu na nando euliko lyasha mEtestamendi Epe kutya oshituthi shika sho-Easter osha li sha dhanwa.” Oshituthi sho-Easter osha tameke ngiini? Osha tameke momalongelokalunga goshipagani. Nonando esiku lyefudho ndyoka ohali dhanwa okudhimbulukwa aniwa eyumuko lyaJesus, omikalondjigilile dhi na ko nasha no-Easter, ngaashi omayi nuulimba mbyoka olundji hayi kala molupe lwuuleke nosho wo uumboloto wa thanekwa omishigakano kombanda, kadhi shi dhopaKriste. Pashiholelwa, shi na ko nasha nelongitho “lyokalimba ko-Eas­ter,” ndyoka lya taambwa ko apuhe, embo The Catholic Encyclopedia otali ti: “Okalimba oke li endhindhiliko lyoshipagani noka kala aluhe ke li endhindhiliko li na ko nasha noluvalo.”

Edhano lyOmumvo Omupe. Esiku nomikalondjigilile ndhoka dhi na ekwatathano nedhano lyOmumvo Omupe oya yoolokathana moshilongo noshilongo. Shi na ko nasha naampoka pwa tamekela edhano ndyoka, embo The World Book Encyclopedia otali ti: “Omupangeli Omuroma Julius Caesar okwa li a toto po esiku 1 Januali, li li Esiku lyOmumvo Omupe, mo 46 E.N. Aaroma oya li ya yapulile esiku ndyoka Janus, oshikalunga shomiyelo nosho wo omatameko giinima. Omwedhi Januali ogwa lukilwa oshikalunga Janus, shoka sha li shi na iipala iyali, shimwe osha tala komeho noshikwawo osha tala konima.” Onkee ano edhano lyOmumvo Omupe olya kankamena komikalondjigilile dhonale dhoshipagani.

Esiku ‘lyo-Valentine.’ Embo The World Book Encyclopedia otali ti: “Esiku lyo-Valentine ohali dhanwa mesiku limwe noshituthi shoka hashi dhanwa okudhimbulukwa Aakriste yaali mboka ya li ya hepekelwa eitaalo lyawo mboka ayehe yaali ya li yi ithanwa Valentine. Ihe omikalondjigilile ndhoka hadhi longithwa mesiku ndyoka odha tamekela moshituthi shonale shAaroma sha li hashi ithanwa Lupercalia shoka sha li hashi dhanwa omvula kehe mo 14 Febuluali. Oshituthi shika osha li hashi simaneke Juno, oshikalungakiintu shAaroma shoka sha li shi lile po aakiintu noondjokana, nosho wo Pan, oshikalunga shuunshitwe.”

Omasiku galwe gomafudho. Itashi wapa okukundathana omadhano agehe ngoka haga dhanwa muuyuni auhe. Ihe omasiku gomafudho ngoka taga simaneke aantu nenge omahangano gopantu inaga hokiwa kuJehova. (Jeremia 17:5-7; Iilonga 10:25, 26) Dhimbulukwa wo kutya mpoka pwa tamekela omadhano gopalongelokalunga ngoka opo tapu utha kutya oga hokiwa kuKalunga nenge ine ga hokwa. (Jesaja 52:11; Ehololo 18:4) Omakotampango gOmbiimbeli ngoka ga tumbulwa mOntopolwa onti-16 yembo ndika otage ke ku kwathela u tseye kutya Kalunga oha tala ko ngiini okudhana omasiku gomafudho ngoka kaage shi gopalongelokalunga.