ONTOPOLWA 9

Omaukwanegumbo ngoka ge na omuvali gumwe awike otaga vulu oku shi pondola

1-3. Oshike shi indjipaleka omwaalu gwomaukwanegumbo ngoka ge na omuvali gumwe awike, nongiini shoka sha guma mboka ya kwatelwa mo?

OMAUKWANEGUMBO ngoka ge na omuvali gumwe awike “otagi indjipala neendelelo” mIilongo yaHangana yaAmerika. Onkalo oya faathana noyokiilongo yilwe oyindji. Aavali naanona omamiliyona ohaya mono iilanduliko yiyemateka noonkondo molwokwiindjipala kokwiihenga paveta nokutopoka owala ngeya, okuthiga po ookuume kopandjokana nokumona aanona pondje yondjokana.

² Omuvali gumwe okwa nyola a ti: “Ngame omuselekadhi gwoomvula 28 ndi na aanona yaali. Onda polimana noonkondo molwaashono inandi hala okuputudha aanona kaatu li nahe. Oshi li sha fa kaapu na ngoka e na ko nasha nangame. Olundji ohandi lili montaneho yaamwandje, naashika ohashi yu uvitha nayi.” Kakele kokwiidhidhimikila ongeyo, okwiipa uusama nezaza, aavali oyendji mboka taya putudha oyana ye li oyo ayeke oya taalelwa keshongo lyokulonga iilonga yokwiikongela omboloto nosho wo okulonga iilonga yomegumbo. Gumwe gwomaavali ya tya ngaaka okwa ti: “Okuputudha aamwoye ongoye awike oku li oshinima oshidhigu noonkondo. Konima yokuninga oonkambadhala dha mana mo, oho tameke okugwanitha po iinakugwanithwa yoye oyindji. Ihe sho ngaa wu wete to shi enditha nawa, po otapu holoka natango iinakugwanithwa yilwe.”

³ Aanona yomomaukwanegumbo ge na omuvali gumwe awike olundji oye na omaupyakadhi gi ili nogi ili. Otashi vulika ya yemata omolwomuvali gwawo gumwe ngoka kee po we nenge molwaashoka a sa. Onkalo ya tya ngaaka ohayi ningitha aanona oyendji ya kale ya polimana.

4. Otu shi shi ngiini kutya Jehova oku na ko nasha nomaukwanegumbo ngoka ge na omuvali gumwe awike?

⁴ Omaukwanegumbo ge na omuvali gumwe awike oko ga li nopethimbo lyOmbiimbeli. Omanyolo oga popya lwiikando uutumbulilo “othigwa” nosho wo “omuselekadhi.” (Eksodus 22:22; Deuteronomium 24:19-21; Job 31:16-22) Jehova Kalunga okwa kala e na ko nasha nonkalo yawo. Omupisalomi okwi ithana Kalunga “he yoothigwa nomugameni gwaaselekadhi.” (Episalomi 68:5) Odhoshili kutya nokunena Jehova oku na ko wo nasha nomaukwanegumbo ngoka ge na omuvali gumwe awike. Oohapu dhe odhi na omakotampango ngoka taga vulu oku ga kwathela ge shi pondole.

NKENE TO VULU OKUUNGANEKA OMAIPYAKIDHILO MEGUMBO

5. Omaupyakadhi geni petameko haga kala ga taalela aavali ye li oyo ayeke mboka taya putudha oyana?

⁵ Dhiladhila kokuunganeka omaipyakidhilo megumbo. Ohapu kala oompito odhindji ndhoka omukulukadhi ha kala ta dhiladhila kutya ando okwa li e na omusamane, ando ote mu kwathele ngaa. Ngaashi uuna egumbo li li monkalo ombwinayi, oomeme oyendji ihaya kala ye shi kutya naya ninge ngiini. Sha faathana, aasamane mboka opo ya henge aakulukadhi yawo nenge opo ya silwa, petameko ohaya kala yu uvite ya gwilililwa po kiilonga yomegumbo. Aanona ohaya kala yu uvite kaaye li we megameno noihaya kala yu uvite uugumbo ngele ye li monkalo ya tya ngaaka.

6, 7. (a) “Omukulukadhi omwaanawa” gwomOmayeletumbulo okwe tu tulila po oshiholelwa oshiwanawa shini? (b) Okugwanitha po nuudhiginini iinakugwanithwa yomegumbo ohaku kwathele ngiini momagumbo moka mu na omuvali ta putudha oyana e li oye awike?

⁶ Oshike tashi vulu oku ya kwathela? Tala oshiholelwa shoka sha tulwa po ‘komukulukadhi omwaanawa’ ngoka a hokololwa mOmayeletumbulo 31:10-31. Omukulukadhi nguka okwa li ha longo nuudhiginini iilonga yokulanda nokulanditha iinima, okuhondja, okuteleka, okulonga mepya nosho wo okungeshefa. Oshike sha li she mu kwathele mokulonga kwe? Okwa li ha meneka ongula onene ta longo nuudhiginini sigo okongulohi kwa toka. Okwa li hi iyunganeke nawa, mokuninga iinima yimwe kuye mwene nomokupula yalwe ye mu kwathele muyilwe. Onkee ano itashi kumitha sho a li a pandulwa kuyaandjawo.

⁷ Ngele owu li omuvali ta putudha oyana e li oye awike, ninga oonkambadhala dha mana mo wu gwanithe po iinakugwanithwa yoye yomegumbo. Kala ho yi nyanyukilwa, molwaashoka shika otashi kwathele aamwoye ya kale ye uvite ombili. Ihe osha simanenena okukala ho unganeke nawa iilonga yoye. Ombiimbeli otayi ti: “Oompangela dhomunandjungu otadhi mu etele eliko.” (Omayeletumbulo 21:5) Omusamane gumwe ta putudha oyana e li oye awike ota ti: “Ihandi kala ndi na ehalo lyokuteleka nenge ndi dhiladhile kutya otatu ka lya shike, shila ongele owala nda sa ondjala.” Ihe iikulya ya dhiladhilwa nawa komeho gethimbo ohayi tungu olutu niiwanawa yi vulithe mbyoka to teleke meendelelo. Otashi vulika wu kale wa pumbwa okwiilonga iilonga yilwe yomegumbo. Omuvalakadhi ta putudha oyana e li oye awike, ota vulu okwiilonga okutunga nokukumba oondunda nosho wo okulitha iimuna.

8. Ongiini aanona taya vulu okukwathela aavali yawo mboka taye ya putudha ye li oyo ayeke niilonga yomegumbo?

⁸ Mbela oshi li mondjila okupula aanona ye ku kwathele niilonga yomegumbo? Meme gumwe okwa ti: “Omuntu oho kala wa hala oku shi ninga oshipu kaanona opo kaaya mone kutya omuvali gwawo gumwe ke po.” Nonando omadhiladhilo ngono oge shi okuuviwa ko, okulela aanona yoye ondembula itashi ke ye etela uuwanawa washa. Aagundjuka aatilikalunga yopethimbo lyOmbiimbeli oya li haya pewa iilonga mbyoka ye ye eleka. (Genesis 37:2; Ondjimbolela 1:6) Onkee ano, nonando aavali oye na okukala ya kotoka opo kaaya ndumbile oyana iilonga, otashi ka kala pandunge oku ya pa iilonga ngaashi okuyoga iiyaha yokulila nokwoopaleka ondunda yawo yokulala. Omolwashike mbela itoo longo pamwe nayo iilonga yimwe yomegumbo? Shika otaye ke shi nyanyukilwa noonkondo.

NKENE TO VULU OKUUNGAUNGA NONKALO YOPAMAHUPILO

9. Omolwashike oomeme mboka taya putudha oyana ye li oyo ayeke olundji haya mono iihuna yopamahupilo?

⁹ Aavali oyendji taya putudha oyana ye li oyo ayeke ohaya mono oshidhigu okusila oshimpwiyu omaukwanegumbo gawo pamahupilo, unene tuu aagundjuka mboka ya ninga omategelelo.a Miilongo moka aantu haya pewa ekwatho kepangelo, otashi vulika shi li pandunge okulongitha ekwatho ndyoka sigo taya mono iilonga. Ombiimbeli oya pitika Aakriste ya longithe omasiloshimpwiyu ngoka mpoka sha pumbiwa. (Aaroma 13:1, 6) Aaselekadhi noonakuhengwa nayo oya taalela uupyakadhi owo tuu mboka. Oyendji yomuyo ohaya thininikwa konkalo opo ya ka konge iilonga, ihe ohaya mono owala mbyoka tayi ya futu oshimaliwa oshishona. Yamwe ohaya hwepopaleke oonkalo dhawo mokuninga ookersesa dhontumba ndhoka tadhi ya monitha iilonga iiwanawa.

10. Ongiini meme ngoka ta putudha oyana e li oye awike ta vulu oku ya yelithila kutya omolwashike e na oku ka konga iilonga?

¹⁰ Inashi ku kumitha noino kala wu uvite wu na ondjo ngele aamwoye kaye uvite ombili uuna to ka konga iilonga. Pehala lyaashono, ya yelithila kutya omolwashike wa pumbwa okulonga noku ya kwathela yu uve ko kutya Jehova okwa tegelela wu ya sile oshimpwiyu. (1 Timoteus 5:8) Aanona oyendji konima yethimbo ohaye ende taye shi igilile. Ihe nando ongaaka, kambadhala okukala ho kala pamwe nayo ethimbo lya gwana shi thike mpoka onkalo yoye yi ipyakidhila tayi shi pitike. Ngele to ya pe eitulomo lyopahole lya tya ngaaka, otashi vulu oku mu kwathela kaamu kale tamu ipula unene naashoka itaamu vulu okuninga omolwompumbwe yoshimaliwa.—Omayeletumbulo 15:16, 17.

OLYE E NA OSHINAKUGWANITHWA SHOKUSILA MUKWAWO OSHIMPWIYU?

11, 12. Aavali mboka taya putudha oyana ye li oyo ayeke oye na okudhimbulukwa shike, nongiini taya vulu oku shi tula miilonga?

¹¹ Oshi li paunshitwe kaavali mboka taya putudha oyana ye li oyo ayeke okukala ye na uukuume nayo wopothingo. Ihe nonando ongaaka, oye na okudhimbulukwa kutya Kalunga okwe ya pa oshinakugwanithwa shokusila oshimpwiyu oyana. Aanona hayo ye na oku shi ya ningila. Pashiholelwa, muukwanegumbo otashi vulika mu holoke omaupyakadhi ga kwata miiti ngele meme ngoka e li oye awike oha kala a tegelela okamwanamati oko ka tonatele iinakugwanithwa mbyoka ya li hayi tonatelwa komutse gwegumbo nenge a kale ha lombwele okamwanakadhona omaupyakadhi ge ngoka kaage na okuuviwa kaanona. Inashi opala okuninga ngaaka nohashi etele aanona euvonayi lyokomutima nenge nokuli shi ya ngwangwaneke.

¹² Shilipaleka aamwoye kutya wu li omuvali gwawo, ongoye wu na oku ya sila oshimpwiyu, ihe hayo ye na oku ku sila oshimpwiyu. (Yelekanitha 2 Aakorinto 12:14.) Omathimbo gamwe otashi vulika wu kale wa pumbwa omayele gontumba nenge eyambidhidho. Ga konga kaakuluntugongalo nenge tashi vulika kaakiintu Aakriste mboka ya pyokoka pambepo, ihe hakaamwoye aashona.—Titus 2:3.

KALA HO PE AAMWOYE EGEELOPUTUDHO

13. Uupyakadhi wuni wu na ko nasha nokugandja egeeloputudho meme ta putudha oyana e li oye awike tashi vulika a kale e na?

¹³ Otashi vulika shi kale oshipu kaanona okutaamba ko egeeloputudho ndyoka taya pewa kuhe, omanga tashi vulika ya kale haya dhini lyayina. Meme gumwe okwa ti: “Aamwandjemati oye na omalutu nomawi ga fa gaalumentu aanene. Omathimbo gamwe ohashi kala oshidhigu kungame okupopya nayo nda kwata miiti.” Niishewe, otashi vulika wu kale wa yemata natango omolweso lyakuume koye kopandjokana nenge tashi vulika to ipe uusama nenge wa geya natango omolwokutopoka kweni. Ngele oveta oya tokola kutya okanona omathimbo gamwe naka kale kungoye nomathimbo gamwe okungoka a li kuume koye kopandjokana, otashi vulika wu kale wa tila kutya pamwe otaka ka kala ka hala okukala kwaangoka a li nale kuume koye kopandjokana. Onkalo ndjoka otayi vulu oku shi ninga oshidhigu okugandja egeeloputudho li li pandjele.

14. Ongiini aavali mboka taya putudha oyana ye li oyo ayeke taya vulu okukala nondjele shi na ko nasha nokugandja egeeloputudho?

¹⁴ Ombiimbeli otayi popi kutya “omumati ngoka a lelwa ondembula, ota sitha yina ohoni.” (Omayeletumbulo 29:15) Jehova Kalunga ote ku ambidhidha mokutulila po uukwanegumbo woye omithikampango, onkee ano ino kala to ipe ombedhi, wu shi uvitile nayi nenge wa tila oku shi ninga. (Omayeletumbulo 1:8) Ino pitika nando aanona ya ninge sha shoka itaashi tsu kumwe nomithikampango dhOmbiimbeli. (Omayeletumbulo 13:24) Kambadhala okukala wu na ondjele, ihoo lundulula omadhiladhilo goye noihoo tengauka. Mokweendela ko kwethimbo, aanona oyendji otaye ki inyenga nawa. Ihe nonando ngaaka, owu na okuyaalela omaiyuvo gaamwoye. Tate gumwe okwa ti: “Molwaashoka aamwandje oya li ya yemata natango omolweso lyayina, onda li ndi na okulongitha oondunge uuna tandi ya pe egeeloputudho. Ohandi popi nayo ethimbo kehe. Uuna tatu teleke uulalelo, ohatu kala tu na ompito yokukundathana tashi zi komutima. Olyo ethimbo ndyoka haya lombwele ndje iiholekwa yawo.”

15. Mboka yi ihenga oye na okuyanda okupopya shike kombinga yaamboka ya li nale ookuume kawo kopandjokana?

¹⁵ Ngele omwi ihenga, itashi kwatha sha ngele to dhini ngoka a li nale kuume koye kopandjokana montaneho yaamwoye. Oontamanana dhaavali ohadhi uvitha nayi aanona nolwahugunina ohadhi ya ningitha ya kale itaaye ya simaneke we. Onkee ano, iyageka okupopya oohapu tadhi yemateke ngaashi: “Ngoye kwi ivule naho!” Kutya nduno ngoka a li nale kuume koye kopandjokana okwe ku yemateka shi thike peni, oye ngaa natango omuvali gwokamwoye, hoka ka pumbwa ohole, eitulomo negeeloputudho lyaavali yako ayehe yaali.b

16. Egeeloputudho lyomegumbo moka mu na omuvali ta putudha aanona e li oye awike olya kwatela mo omalongekidho geni gopambepo ngoka ge na okuningwa aluhe?

¹⁶ Ngaashi sha kundathanwa moontopolwa dha tetekele, egeeloputudho olya kwatela mo okuputudha nokulonga okanona, kaashi shi owala oku ka geela. Okukala mu na elandulathano ewanawa lyokuputudha aanona pambepo otashi vulu okukeelela omaupyakadhi ogendji muukwanegumbo. (Aafilippi 3:16) Osha simanenena okukala hamu kala aluhe pokugongala kwopaKriste. (Aahebeli 10:24, 25) Osha simana wo okukala mu na ekonakonombiimbeli lyuukwanegumbo. Odhoshili kutya kashi shi oshipu oku li ninga pandjigilile. Meme gumwe e shi okwiinekelwa okwa ti: “Ngele omuntu wa zi kiilonga, oho kala wa hala owala okuthuwa po, ihe ngame ohandi kala ndi ilongekidha pamadhiladhilo opo ndi konakone nokamwandjekadhona, ndi shi kutya olyo oshinima shoka nda pumbwa okuninga. Ohaka nyanyukilwa lela ekonakono lyetu lyuukwanegumbo.”

17. Oshike tatu vulu okwiilonga momukalo omwaanawa moka omulongi pamwe naPaulus, Timoteus, a li a putudhwa?

¹⁷ Osha yela kutya omulongi pamwe nomuyapostoli Paulus, Timoteus okwa li a longwa omakotampango gOmbiimbeli kuyina nokuyinakulu, ihe hakuhe. Nonando ongaaka, Timoteus okwa ka ninga Omukriste a dhenga mbanda! (Iilonga 16:1, 2; 2 Timoteus 1:5; 3:14, 15) Nangoye oto vulu okukala netegameno kutya oto ka mona iilanduliko iiwanawa ngele to kambadhala okuputudha aamwoye “mevuliko nomekumagidho lyOmuwa.”—Aaefeso 6:4, OB-1954.

SINDA EZAZA

18, 19. (a) Ongiini omuvali ta putudha oyana e li oye awike ta vulu okukwatwa kezaza? (b) Omayele geni ga gandjwa okukwathela shi na ko nasha nokupangela okahalu konyama?

¹⁸ Omuvali gumwe okwa li a keme ta ti: “Uuna nde ya pegumbo e tandi mono kutya ongame awike ndi li mo, unene tuu ngele aanona oya ka lala nale, ohandi kala ndi uvite lela ezaza.” Eeno, olundji ezaza oli li uupyakadhi uunene komuvali ta putudha aanona e li oye awike. Oshi li paunshitwe okukala wa hala okuhokana nokukala to nyanyukilwa uukuume wopothingo nosho wo ekwatathano lyopamilalo lyomondjokana. Ihe mbela omuntu oku na okukambadhala okukandula po uupyakadhi mboka kutya nduno otashi pula shike? Pethimbo lyaPaulus, aaselekadhi yamwe aagundjuka oya li ye etha ‘ya thiminikwe kuuhalu nokugamuka ko kuKristus.’ (1 Timoteus 5:11, 12) Okweetha uuhalu wopanyama wu kale wa simana komeho yiinima yopambepo otaku eta oshiponga.—1 Timoteus 5:6.

¹⁹ Omulumentu gumwe Omukriste okwa tile: “Omahalo gopamilalo oge na oonkondo, ihe otaga vulu okupangelwa. Ngele omadhiladhilo ga tya ngaaka oge ya mungoye, ge ekelahi. Otashi ku kwathele wo ngele to kala to dhiladhila kombinga yokamwoye.” Oohapu dhaKalunga otadhi gandja omayele taga ti: ‘Dhipageni uuhalu weni wopavi mboka tau longo mune ngashika oluhondelo.’ (Aakolossa 3:5) Okudhipaga uuhalu woluhondelo otashi ti okuyanda okutala omathano giipala nenge nokuli okweendathana naamboka haya popi aluhe kombinga yomilalo.

20. (a) Oshiponga shini hashi kala sha langela mboka haye endelathana naamboka kaaye shi ooitaali? (b) Ongiini mboka kaaye na ookuume kopandjokana yomethelemumvo lyotango noyokunena haya kondjitha ezaza?

²⁰ Aakriste yamwe oya li ye endelathana naamboka kaaye shi ooitaali. (1 Aakorinto 7:39) Mbela shika osha li sha kandula po uupyakadhi wawo? Aawe, inashi wu kandula po. Omukiintu gumwe Omukriste ngoka a hengwa ota gandja elondodho ta ti: “Opu na oshinima shimwe oshiwinayi noonkondo shi vulithe okukala kuu na kuume kopandjokana. Oshinima shika osho okuhokana nomuntu itoo opalele.” Kapu na omalimbililo kutya aaselekadhi Aakriste yomethelemumvo lyotango oya li haya kala ye uvite ezaza, ihe molwaashoka oya li aanandunge oya li haya kala yi ipyakidhila ‘nokuyakula aayenda, okuyoga oompadhi dhaantu yaKalunga nokukwathela mboka ye li muudhigu.’ (1 Timoteus 5:10) Aakriste aadhiginini kunena mboka ya tegelela uule woomvula odhindji okumona ookuume kopandjokana mboka haya tila Kalunga nayo oya kala yi ipyakidhila niinima mbyoka. Omuselekadhi gumwe Omukriste e na oomvula 68 okwa li a tameke okutalela po aaselekadhi sho a li e uvite ezaza. Okwa ti: “Ondi wete kutya molwaashoka ohandi talele po yalwe, ohandi kala ndi ipyakidhila niilonga yomegumbo nohandi sile oshimpwiyu uupambepo wandje, ihandi si ezaza.” Okulonga aantu kombinga yUukwaniilwa waKalunga osho unene tuu oshilonga oshiwanawa.—Mateus 28:19, 20.

21. Omomukalo guni egalikano nosho wo eendathano ewanawa tali vulu okukutha po ezaza?

²¹ Odhoshili kutya ezaza ihali pangwa pashikumithalonga, ihe ohali vulu okwiidhidhimikilwa kekwatho lyaJehova. Ekwatho lya tya ngawo ohali ya po uuna Omukriste ta ‘dhiginine okwiindila omutenya nuusiku.’ (1 Timoteus 5:5) Uuna ta galikana a mana mo, ta pula ekwatho kuJehova, otashi vulika te shi ningi nokulila nokukuga pombanda. (Yelekanitha Aahebeli 5:7.) Okulombwela Jehova omaupyakadhi goye agehe “omutenya nuusiku” otaku vulu okukwathela lela. Niishewe, okweendathana nookuume aawanawa otaku vulu oku ku kwathela noonkondo wu yande okukala nezaza. Omuntu ota vulu okuladhipikwa ‘koohapu oombwanawa’ ndhoka dha hokololwa mOmayeletumbulo 12:25 okupitila meendathano ewanawa.

22. Oshike tashi vulu oku ku kwathela ngele omathimbo nomathimbo to si ezaza?

²² Ngele omathimbo nomathimbo to si ezaza, dhimbulukwa kutya kapu na ngoka kee na uudhigu monkalamwenyo. Odhoshili kutya “nooitaali ooyakwetu yomuuyuni auhe” otaya mono iihuna momukalo gwontumba nogwongandi. (1 Petrus 5:9) Yanda okukala to dhiladhila unene kethimbo lyonale. (Omuuvithi 7:10) Tala komauwanawa ngoka ho nyanyukilwa. Kakele kaashono, kala wa tokola toko okukala wa kakatela uudhiginini nokunyanyudha omutima gwaJehova.—Omayeletumbulo 27:11.

NKENE YALWE TAYA VULU OKU KU KWATHELA

23. Aakriste oye na oshinakugwanithwa shini shi na ko nasha naavali yomegongalo lyawo mboka taya putudha oyana ye li oyo ayeke?

²³ Ekwatho ndyoka to pewa kAakriste ooyakweni oli na oshilonga oshinene. Jakob 1:27 ota ti: “Elongelokalunga lya yela nolya yogoka koshipala shaKalunga Tate olyo okusila oshimpwiyu oothigwa naaselekadhi muudhigu wawo nokwiikotokela waa nyatekwe kuuyuni.” Eeno, Aakriste oya tegelelwa ya kwathele omaukwanegumbo ngoka ge na omuvali ta putudha oyana e li oye awike. Shika otashi vulu okuningwa momikalo dhini dhi na oshilonga?

24. Omomikalo dhini omaukwanegumbo ngoka ge na omuvali gumwe awike tashi vulika ge na okukwathelwa?

²⁴ Otaya vulu oku ya pa ekwatho lyopainiwe. Ombiimbeli otayi ti: “Ngele ku na ngoka e na uuyamba wiinima yomuuyuni mbuka, oye nota mono mukwawo a hepa e ta kala inee mu pa sha, omuntu a tya ngaaka ota vulu ngiini okutya, ye oku na ohole yaKalunga momwenyo gwe?” (1 Johannes 3:17) Oshitya shOshigreka sha tolokwa “mono” itashi ti owala okutala omuntu ngeya, ihe oku mu tala nomeho tage mu tongolola. Shika otashi ulike kutya Omukriste omunalukeno otashi vulika tango a kale a hala okutseya onkalo noompumbwe dhuukwanegumbo womuntu ngoka. Otashi vulika uukwanegumbo mboka wa pumbwa iimaliwa. Wumwe otashi vulika wa pumbwa okukwathelwa okwoopaleka iinima mbyoka ya teka maandjawo. Nenge tashi vulika wa pumbwa owala oku wu ithana wu ye wu ku talele po.

25. Ongiini Aakriste taya vulu okuulika kutya oye uvitile ohenda aavali mboka taya putudha oyana ye li oyo ayeke?

²⁵ Kakele kaashono, Petrus gwotango 3:8 ota ti: “Ne omu na okukala mu na edhiladhilo limwe neuvitopamwe. Kaleni mu holathane ongaamwayinathana. Silathaneni ohenda ne mu ifupipikilathane.” Meme gumwe ta putudha oyana yahamano e li oye awike okwa ti: “Oshinima shika kashi shi oshipu nomathimbo gamwe ohashi gwililile ndje po. Ihe omathimbo nomathimbo gumwe gwomaamwatate nenge gwomaamwameme oha tsu ndje omukumo ta ti: ‘Joan, oto ningi nawa. Iizemo yiilonga yoye otayi ka kala iiwanawa.’ Ohashi kwathele noonkondo okutseya kutya yalwe otaye ku dhiladhila nonokutya oye na ko nasha nangoye.” Oomeme Aakriste aakuluntu oyo unene haya kwathele oomeme aagundjuka mboka ye li aavali taya putudha oyana ye li oyo ayeke. Ohaye ya pulakene ngele taye ya lombwele omaupyakadhi gawo ngoka tashi vulika inaaya manguluka naanaa oku ga kundathana nomumwatate.

26. Ongiini aalumentu Aakriste ya pyokoka taya vulu okukwathela aanona mboka ye li oothigwa?

²⁶ Aalumentu Aakriste otaya vulu okukwathela momikalo dhilwe. Omulumentu omuyuuki Job okwa tile: ‘Onda hupitha oothigwa ndhoka kaadhi na omupopili.’ (Job 29:12) Aalumentu yamwe Aakriste nayo ohaya kala ye na ko nasha lela naanona mboka ye li oothigwa nohaye yu ulukile ‘ohole yashili tayi zi momwenyo gwa yela’ kaayi na iihelele. (1 Timoteus 1:5) Nopwaahe na okweetha po ngeya omaukwanegumbo gawo, ohashi vulika ya ninge elongekidho oku ka longa pamwe noothigwa dha tya ngaaka muukalele wopaKriste noku dhi hiya tashi vulika dhi ye dhi kale pekonakono lyuukwanegumbo waandjawo nenge pomainyanyudho gawo gontumba. Olukeno lwa tya ngaaka ohalu vulu okukwathela othigwa kaayi falafalwe kuuyuni.

27. Aavali mboka taya putudha oyana ye li oyo ayeke oye na uushili kutya otaya ka ambidhidhwa kulye?

²⁷ Aavali mboka taya putudha oyana ye li oyo ayeke oye na ‘okuhumbata yo yene omitenge’ dhiinakugwanithwa yawo. (Aagalati 6:5) Ihe nonando ongaaka, otaya vulu okukala ye holike kaamwatate nokaamwameme nosho wo kuJehova Kalunga. Ombiimbeli otayi popi Jehova tayi ti: “Ota tonatele oothigwa naaselekadhi.” (Episalomi 146:9) Omaukwanegumbo ngoka ge na omuvali gumwe awike otaga vulu oku shi pondola keyambidhidho lyopahole lyaJehova.

[Omanyolo gopevi]

ONGIINI OMAKOTAMPANGO GOMBIIMBELI NGAKA TAGA VULU OKUKWATHELA OMAUKWANEGUMBO NGOKA GE NA OMUVALI GUMWE AWIKE GU UNGAUNGE NOMAUPYAKADHI GAWO?

Jehova Kalunga oye “he yoothigwa nomugameni gwaaselekadhi.”—Episalomi 68:5.

Oompangela oombwanawa odha simana opo omuntu a pondole.—Omayeletumbulo 21:5.

Jehova okwa pa omuvali uuthemba wokugandja egeeloputudho lyu uka.—Omayeletumbulo 1:8.

Aaselekadhi Aakriste aanandunge ohaya kala yi ipyakidhila niilonga iiwanawa nohaya dhiginine megalikano.—1 Timoteus 5:5, 10.

Okuulika kutya owu na ohokwe ‘noothigwa naaselekadhi’ oku li oshitopolwa shelongelokalunga lyashili.—Jakob 1:27.

[Oshimpungu pepandja 112]

SHOKA AANONA TAYA VULU OKUNINGA

Mbela meme gwoye nenge tate gwoye oku li omuvali e li oye awike? Ngele osho, oshike to vulu okuninga opo wu mu kwathele? Oshinima shimwe shoka to vulu okuninga osho okukala ho vulika kuye. Kutya nduno okanona oke thike peni molutu nenge okuukashike kookantu wuni, kake na ‘okweekelahi omapukululo gayina.’ (Omayeletumbulo 1:8) Jehova ota lombwele aanona kutya naya kale haya vulika kaavali yawo, nongele taye shi ningi, otashi ye etele ombili.—Omayeletumbulo 23:22; Aaefeso 6:1-3.

Aanona, kaleni hamu katuka tango oonkatu nokuulika kutya omwa pandula aavali yeni. Omumati gumwe gwedhina Tony okwa ti: “Meme oha longo koshipangelo, noohema dhe dhokiilonga ohadhi pumbwa okukangulwa. Onkee ano, ohandi dhi mu kangulile. Shika ohashi mu kwathele noonkondo.” Oomeme mboka ye li oyo ayeke ohaye shi pandula noonkondo sho haya adha oyanakadhona ya teleka nale uulalelo uuna taye ya kegumbo okuza kiilonga.

Aanona, dhimbulukweni kutya okulongela kumwe naavali yeni okwa simana. Otashi vulika hashi kala oshidhigu kaavali yeni okukwatela komeho ekonakonombiimbeli lyuukwanegumbo ngele ya za kiilonga ya vulwa. Ngele omwa kala itaamu longele kumwe nayo, otamu shi ningi oshidhigu unene kuyo. Kambadhaleni okukala mwa pyakudhukwa nale sho ethimbo lyekonakono tali thiki. Ilongekidheni shoka tashi ka kundathanwa esiku ndyoka komeho yethimbo. Ngele tamu kala hamu vulika kaavali yeni, hamu ya pandula nohamu longele kumwe nayo, nena otamu ke ya nyanyudha. Shoka sha simana unene osho kutya otamu ka nyanyudha Kalunga.

[Ethano pepandja 107]

Longitha ethimbo lya gwana ngaashi tashi vulika okukala pamwe naamwoye

[Ethano pepandja 109]

Aanona, longeleni kumwe naavali yeni mboka taye mu putudha ye li oyo ayeke

[Ethano pepandja 110]

Egongalo ihali ipwililike ‘aaselekadhi noothigwa’