ONTOPOLWA 10
Ngele oshilyo shimwe shuukwanegumbo tashi ehama
1, 2. Satana okwa longitha ngiini oonkalo dhiyemateka nosho wo omukithi okukambadhala okuteya po uudhiginini waJob?
OMULUMENTU Job oku li gumwe gwomwaamboka ya li ye na uukwanegumbo wu na ombili. Ombiimbeli otayi mu popi kutya okwa li “omuyamba e vule aauzilo ayehe.” Okwa li e na aanona aamati yaheyali naakadhona yatatu, ayehe kumwe oya li omulongo. Okwa li wo e na iiniwe yokusila oshimpwiyu uukwanegumbo we. Shoka sha simana noonkondo osho kutya okwa li ha kwatele komeho omaipyakidhilo gopambepo guukwanegumbo we nokwa li e na ko nasha nuupambepo woyana koshipala shaJehova. Ayihe mbika oya li ya ningitha uukwanegumbo we wu kale wu na ekwatathano lyopothingo nowu na ombili.—Job 1:1-5.
2 Onkalo ombwanawa yaJob kaya li ando kaayi wetike kuSatana ngoka e li omutondi omunene gwaJehova Kalunga. Satana ngoka ha kongo aluhe omikalo moka ta vulu okuteya po uudhiginini waapiya yaKalunga, okwa li a ponokele Job mokuhanagula po uukwanegumbo we wu na ombili. Opo nduno okwa li u “umbu Job iitumbuka molutu aluhe.” Ano Satana okwa li a longitha oonkalo dhiyemateka nosho wo omukithi nelalakano lyokuteya po uudhiginini waJob.—Job 2:6, 7.
3. Job okwa li te ehama ngiini?
3 Ombiimbeli inayi popya kutya Job okwa li te ehama omukithi guni. Ihe oye tu lombwela nkene a li te ehama. Olutu lwe olwa li lwu udha omazinyo noshipa she osha li tashi natuka omakoko nosho ola. Omufudho gwe nolutu lwe olwa li lwa nika nayi. Okwa li u uvite uuwehame uunene. (Job 7:5; 19:17, OB-1954; 30:17, 30) Omolwuuwehame mboka, Job okwa li a kuutumba momutoko nokwa li ti iyaga noshikangwa. (Job 2:8) Ka li tuu monkalo yietitha ohenda!
4. Oshike hashi ningilwa uukwanegumbo kehe omathimbo nomathimbo?
4 Ando ongoye wa li wu na omukithi gwa kwata miiti gwa tya ngaaka, ando owi inyenge ngiini? Kunena Satana ihu umbu aapiya yaKalunga omikithi ngaashi a li e shi ningile Job. Ihe nonando ongaaka, molwokwaahagwanenena kwopantu, omathininiko gonkalamwenyo yesiku kehe nosho wo enyateko lyomidhingoloko moka tu li, osha tegelelwa kutya omathimbo nomathimbo iilyo yuukwanegumbo otayi ka kala tayi ehama. Nonando ohatu ningi oonkambadhala okwiigamena komikithi, atuheni otatu vulu okukwatwa kudho, nonando aashona taye ke ehama noonkondo ngaashi Job. Ngele gumwe gwomuukwanegumbo wetu ta kwatwa komukithi, otashi vulika shi kale lela eshongo. Onkee ano natu taleni nkene Ombiimbeli tayi tu kwathele mokuungaunga nomutondi nguka gwaantu ngoka he tu ponokele aluhe.—Omuuvithi 9:11; 2 Timoteus 3:16.
NGOYE OWU SHI UVITILE NGIINI?
5. Olundji iilyo yuukwanegumbo ohayi inyenge ngiini ngele gumwe gwomuyo te ehama ethimbo efupi?
5 Oshi li aluhe oshidhigu ngele onkalamwenyo yuukwanegumbo ya piyaganekwa kusha, kutya nduno oshike she shi etitha, nohashi ningwa unene tuu ngele oshilyo shimwe tashi ehama ethimbo ele. Nokuli nonando omuntu ote ehama owala okathimbo, otashi pula pu ningwe omalunduluko nomaiyambo noku mu yaalela. Iilyo yuukwanegumbo mbyoka itaayi ehama otashi vulika yi na okukala itaayi kudhile opo ngoka te ehama a vule okuthuwa. Tashi vulika yi na okweetha po omaipyakidhilo gamwe. Nokuli momaukwanegumbo ogendji aanona aashona nayo ohaya kala ye uvitile ohenda mukwawo nenge omuvali gwawo ngoka te ehama, nonando omathimbo nomathimbo oye na okudhimbulukithwa okukala taye mu yaalele. (Aakolossa 3:12) Ngele oshilyo shuukwanegumbo otashi ehama ethimbo efupi, olundji uukwanegumbo ohawu kala wa hala oku shi ningila kehe shoka sha pumbwa. Kakele kaashono, oshilyo kehe shuukwanegumbo ohashi kala sha hala okuyaalelwa ngele nasho tashi ehama.—Mateus 7:12.
6. Omathimbo gamwe uukwanegumbo ohawu inyenge ngiini ngele oshilyo shimwe shuukwanegumbo tashi ehama omukithi gwa kwata miiti nogwethimbo ele?
6 Ihe ongiini ngele uuwehame owa kwata miiti noonkondo notashi pula uukwanegumbo wu ninge omalunduluko omanene notaga kalelele? Pashiholelwa, ongiini ngele gumwe muukwanegumbo okwa kwatwa kombanda nenge te ehama omukithi gwo-AIDS nenge omukithi gulwe gwa kwata miiti? Nenge ongiini ngele oshilyo shuukwanegumbo osha kwatwa komukithi gwopamadhiladhilo? Olundji petameko iilyo iikwawo ohayi kala yi uvitile omuholike gwayo ngoka te ehama ohenda noya yemata. Ihe otashi vulika konima yethimbo yi ki inyenge shi ili. Ngele oya mono kutya oshe ya guma unene nonokutya inayi manguluka we naanaa molwomukithi gwasho, otashi vulika yi kale ya lulilwa. Otashi vulika yi ipule tayi ti: “Omolwashike shika tashi tu ningilwa?”
7. Omukulukadhi gwaJob okwa li i inyenge ngiini komukithi gwomusamane gwe, nosha yela kutya okwa li a dhimbwa shike?
7 Otashi vulika omukulukadhi gwaJob naye osho a li ti ipula ngawo. Dhimbulukwa kutya okwa li a silwa nale oyana ayehe. Kapu na omalimbililo kutya okwa li a gwilililwa po kiiningwanima yinikitha oluhodhi mbyoka ye mu ningilwa. Lwahugunina, sho a li a mona omusamane gwe ngoka a li nale a ndjanga a kwatwa komukithi gweehama nogutonditha, okwa li a dhimbwa kutya ekwatathano ewanawa ndyoka ye nomusamane gwe ya li ye na naKalunga olya li oshinima sha simana noonkondo. Ombiimbeli otayi ti: “Omukulukadhi [gwaJob] okwa ti kuye: ‘Natango owa hala ngaa okukala omuyuuki? Sheka Kalunga u se.’ ”—Job 2:9.
8. Uuna oshilyo shimwe shuukwanegumbo tashi ehama, enyolo lini tali ka kwathela iilyo iikwawo okukala netaloko ewanawa lyaashoka?
8 Oyendji ohaya kala ya yemata noya geya nokuli sho onkalamwenyo yawo ya lundululwa thiluthilu komukithi gwagumwe i ili. Nonando ongaaka, Omukriste ngoka ta dhiladhila nawa kombinga yonkalo ndjika oku na okutseya kutya otayi mu pe ompito okuulika kutya ohole ye oyashili. Ohole yashili “ohayi idhidhimikile ayihe noyi na olukeno [noihayi] kongo shayo yene . . . Ohole ihayi tonyala, ihe otayi itaale, tayi tegamene e tayi idhidhimike sigo okehulilo.” (1 Aakorinto 13:4-7) Onkee ano, pehala lyokweetha omaiyuvo omawinayi ga pangele omadhiladhilo getu, osha simanenena opo tu ninge kehe shoka tatu vulu oku ga pangela.—Omayeletumbulo 3:21.
9. Omanyolo geni taga vulu okukwathela uukwanegumbo pambepo nopamaiyuvo ngele oshilyo shimwe tashi ehama noonkondo?
9 Oshike tashi vulu okuningwa opo onkalonawa yopambepo noyopamadhiladhilo yuukwanegumbo yi gamenwe ngele oshilyo shimwe shomuwo tashi ehama noonkondo? Osha yela kutya kehe omukithi ohagu pangwa momukalo gwi ili, noitashi ka kala shi li mondjila okupopila epango lyontumba nenge omukalo gwesiloshimpwiyu gwomegumbo membo ndika. Ihe nonando ongaaka, Jehova “ota yambula po aapunduki” momukalo gwopambepo. (Episalomi 145:14) Omukwaniilwa David okwa nyola a ti: “Aanelago oomboka ye na oshimpwiyu noohepele; OMUWA ote ya kwatha, uuna ye li muudhigu. OMUWA ote ya gamene e te ya shigi kiiponga . . . OMUWA ote ya kwatha uuna ye li muuvu note ya galulile uukolele wawo.” (Episalomi 41:1-3) Jehova oha kaleke nomwenyo aapiya ye pambepo, nokuli nando otaya hepekwa pamaiyuvo shi vulithe poonkondo dhawo. (2 Aakorinto 4:7) Iilyo oyindji yomaukwanegumbo moka mu na gumwe ngoka te ehama noonkondo oyu uvite ngaashi omupisalomi ngoka a popi a ti: “OMUWA, onda hepekwa nayi; tula ndje omwenyo, ngaashi wu uvaneke.”—Episalomi 119:107.
OMBEPO NENGE IIKALA MBYOKA TAYI KWATHELE
10, 11. (a) Ngele uukwanegumbo owa hala okuungaunga nomupondo nomukithi gwoshilyo shagwo shimwe, owa pumbwa okukala niikala yini? (b) Oshike sha li sha kwathele omukiintu gumwe a vule okuungaunga nomukithi gwomusamane gwe?
10 Eyeletumbulo lyOmbiimbeli otali ti: “Ombepo yoshilumentu otayi mu ambidhidha muuvu we, ihe olye ta vulu okutula omukumo momwenyo gwa nyanyagulwa?” (Omayeletumbulo 18:14) Okumona iihuna otaku vulu okweehameka ombepo nenge iikala yuukwanegumbo nosho wo “ombepo yoshilumentu.” Ihe “omutima gwa gundjila ogwo omwenyo gwolutu.” (Omayeletumbulo 14:30) Opo uukwanegumbo wu shi pondole mokuungaunga noshilyo shawo shoka tashi ehama noonkondo, oshi ikolelela unene kiikala nenge kombepo yiilyo yawo.—Yelekanitha Omayeletumbulo 17:22.
11 Omukulukadhi gumwe Omukriste okwa li e na okwiidhidhimikila okutala omusamane gwe ta hepekwa kuuvu wombanda mboka wa li we mu kwata konima sho ya hokana owala uule woomvula hamano. Okwa ti: “Omusamane gwandje okwa li ihaa vulu we okupopya nawa molwombanda ndjoka nosha li she shi ninga oshidhigu noonkondo okupopya naye. Osha li sha vulitha ndje unene pamadhiladhilo okukambadhala okuuva ko shoka a li ta popi.” Dhiladhila wo kombinga yuuwehame neyeme ndyoka omusamane ngoka a li e na. Aaihokani mboka oya li ya ningi po shike? Nonando oya li ya kala kokule negongalo lyopaKriste, omumwameme okwa li a ningi ngaashi ta vulu okukala a kola pambepo mokukala he endele pamwe nuuyelele auhe wehangano mboka wu li pethimbo nosho wo okwiipalutha aluhe niikulya yopambepo mbyoka yi li moshifo Oshungonangelo nosho wo Awake! Shika osha li she mu koleke pambepo opo a vule okusila oshimpwiyu omusamane gwe omuholike sigo ooshono a si konima yoomvula ne.
12. Ngaashi twe shi mona moshinima shaJob, poompito dhimwe iikala yaangoka te ehama muukwanegumbo otayi vulu okukwathela yalwe ngiini?
12 Shi na ko nasha naJob, nando oye a li te ehama, okwa kala a kola pambepo. Okwa li a pula omukulukadhi gwe a ti: “Ndishi Kalunga ngele te tu pe uuwanawa, otatu u taamba. Otatu mu pe tuu uusama, ngele te tu pe uudhigu?” (Job 2:10) Itashi kumitha tuu sho omulongwa Jakob konima yethimbo a li a popi kutya Job oku li oshiholelwa sha tongomana sheidhidhimiko! Otatu lesha muJakob 5:11 taku ti: “One omu uvu eidhidhimiko lyaJob nomwa tseya, nkene Omuwa e mu kwatha pehulilo. Oshoka Omuwa oye omunesilohenda nomunalukeno.” Osha faathana nokunena, moonkalo odhindji ngele oshilyo shuukwanegumbo shoka tashi ehama oshi na omukumo, ohashi kwathele yalwe megumbo opo nayo ya kale ye na omukumo.
13. Uukwanegumbo moka mu na oshilyo tashi ehama noonkondo kawu na okuyelekanitha onkalo yawo nashike?
13 Oyendji mboka yu ungaunga nale noshilyo tashi ehama muukwanegumbo oye shi zimina kutya olundji petameko oshidhigu kiilyo yilwe yuukwanegumbo okukala tayi ungaunga nonkalo ndjoka. Oya popya wo kutya omukalo moka yaandjawo haya tala ko onkalo ndjoka otagu ti sha noonkondo. Petameko otashi vulika shi kale oshidhigu kuukwanegumbo okuninga omalunduluko momaipyakidhilo gawo. Ihe ngele omwa ningi lela oonkambadhala, otamu vulu okuninga omalunduluko ngoka mwa pumbwa okuninga shi ikolelela konkalo ndjoka ya holoka po. Ngele tatu shi ningi, osha simana opo kaatu yelekanithe onkalo yetu noyaamboka momaukwanegumbo gawo kaamu na omuntu te ehama, tatu dhiladhila kutya yo onkalamwenyo yawo kayi na naanaa omaupyakadhi nonokutya shika kashi li mondjila. Muushili wo wene, ihatu kala tu shi omaupyakadhi gayalwe. Aakriste ayehe ohaya mono ehekeleko moohapu dhaJesus ndhoka tadhi ti: “Ileni kungame amuhe mwa vulwa nomwa humbatekwa uudhigu, ongame notandi mú pe evululuko.”—Mateus 11:28.
TALENI SHOKA SHI NA OKUNINGWA PO
14. Ongiini uukwanegumbo tawu vulu okutala shoka shi na okuningwa po ngele pu na oshilyo shawo shimwe tashi ehama?
14 Ngele oshilyo shimwe shuukwanegumbo tashi ehama noonkondo, oshi li nawa uukwanegumbo wu dhimbulukwe oohapu dha nwethwa mo tadhi ti: “Omadhiladhilo inaaga kundathanwa nawa otaga ponyo, ihe otaga tompola sha mpoka pe na aagandjindunge oyendji.” (Omayeletumbulo 15:22) Mbela iilyo yuukwanegumbo itayi vulu okukundathana onkalo ndjoka ya holoka po omolwomukithi gwaangoka te ehama? Otashi ka kala shi li nawa lela oku shi ninga pamwe negalikano nokukonga ewiliko mOohapu dhaKalunga. (Episalomi 25:4) Mbela oshike mu na okukundathana pompito ndjoka? Omu na okuninga omatokolo ge na ko nasha nepango lye, oofuto dhalyo nonkene tamu vulu okuungaunga naye. Olye te ke mu sila oshimpwiyu? Uukwanegumbo owu na okulongela kumwe ngiini mokuyambidhidha esiloshimpwiyu ndyoka? Ongiini omalongekidho ngoka ga ningwa taga ka guma oshilyo kehe shuukwanegumbo? Ngoka ta sile oshimpwiyu nakweehama ota ka ambidhidhwa ngiini pambepo nomoompumbwe dhe dhilwe?
15. Jehova oha kwathele ngiini omaukwanegumbo ngoka ge na oshilyo shago shimwe tashi ehama noonkondo?
15 Ngele otwa kala hatu galikana Jehova twa mana mo mokupula ewiliko lye, hatu tedhatedha Oohapu dhe, Ombiimbeli, nohatu landula nuulaadhi omayele gadho, ote ke tu laleka nuuyamba. Ngoka te ehama muukwanegumbo otashi vulika a kale itaa hwepopala. Ihe ngele otwi inekela Jehova, otashi tu etele aluhe uuwanawa, kutya nduno otu li monkalo yi li ngiini. (Episalomi 55:22) Omupisalomi okwa nyola a ti: “OMUWA, owa ambidhidha ndje molwohole yoye. Uuna nda tila nonda sa iimpwiyu, oto hekeleke ndje e to nyanyudha ndje.”—Episalomi 94:18, 19; tala wo Episalomi 63:6-8.
KWATHELENI AANONA
16, 17. Oshike tashi vulu okukundathanwa naanona aashona opo yu uve ko onkalo moka mu na mukwawo ngoka te ehama?
16 Ngele muukwanegumbo omu na ngoka te ehama noonkondo, ohashi gumu wo naanona yamo. Osha simana opo aavali ya kwathele aanona yu uve ko kutya ngoka te ehama okwa pumbwa okukwathelwa noshike yo taya vulu okuninga opo ye mu kwathele. Ngele ngoka te ehama okanona, aanona ooyakwawo oye na okukwathelwa yu uve ko kutya nonando otaka pewa eitulomo nesiloshimpwiyu lyi ikalekelwa, itashi ti kutya yo kaye holike. Pehala lyokweetha ya kale ye ka sila efupa nenge ye ka tsila ondumbo, aavali otaya vulu okukwathela aanona yalwe ya kale ye holathane nohole yashili noya longele kumwe mokuungaunga nonkalo ndjoka ya holoka po omolwuuwehame wamukwawo.
17 Aanona aashona olundji ohayi inyenge nawa ngele aavali oye ya pula ya kwathele ngoka te ehama molwaashoka ye mu hole, pehala lyoku ya yelithila wa ya muule kutya ote ehama shike. Onkee ano otaya vulu okukwathelwa yu uve ko kutya omukithi gwamukwawo ogwa kwatela mo shike. Ngele aanona mboka itaaye ehama taya mono kutya mukwawo ngoka te ehama ita vulu okuninga iinima oyindji mbyoka yo haya ningi, nena osha yela kutya ‘ohole yuumwayinathana’ otayi ke yi inyengitha ya kale ye mu uvitile “ohenda.”—1 Petrus 3:8.
18. Ongiini aanona mboka aakuluntu taya vulu okukwathelwa yu uve ko uupyakadhi mboka we etithwa komukithi gwamukwawo, nongiini shika tashi vulu oku ya kwathela?
18 Aanona mboka aakuluntu oye na okukwathelwa ya tseye kutya opwa holoka uupyakadhi wokweehama kwamukwawo nowa pumbwa okuningilwa omaiyambo kukehe gumwe muukwanegumbo. Molwaashoka aavali oye na okufuta oshipangelo nenge oondohotola nomiti dhaangoka te ehama, otashi vulika ya kale itaaya vulu we okusila oshimpwiyu oompumbwe dhaanona yalwe ngaashi ya li haye shi ningi shito. Mbela aanona otashi vulika ya kale ye shi kwatela onkone? Nenge otaye ke shi uva ko e taya ningi omaiyambo ga pumbiwa nehalo ewanawa? Oshindji oshi ikolelela momukalo moka oshinima tashi kundathanwa nayo nomombepo moka uukwanegumbo tawu ungaunga nasho. Odhoshili kutya momaukwanegumbo ogendji moka mu na oshilyo shimwe tashi ehama, aanona oya kwathelwa okutula miilonga omayele gaPaulus ngoka taga ti: “Inamu longa nando osha mombepo yokwiihola nenge yokukonga esimano lyowala, ihe ifupipikeni kiipala yayakweni, ne mwaa dhiladhile kutya one aawanawa mu ya vule. Lalakaneneni uuwanawa wooyakweni wo, haamboka ashike weni yene.”—Aafilippi 2:3, 4.
NKENE EPANGO LI NA OKUTALIKA KO
19, 20. (a) Omitse dhomaukwanegumbo odhi na oshinakugwanithwa shini ngele oshilyo shimwe shomuukwanegumbo wadho tashi ehama? (b) Nonando Ombiimbeli kayi shi embo lyuunamiti, omomukalo guni tayi vulu oku tu kwathela mokuungaunga nomukithi?
19 Aakriste mboka ye na etaloko li li pandjele ihaya tindi epango ndyoka itaali tsu ompinge noompango dhaKalunga. Ngele oshilyo shimwe shuukwanegumbo wawo tashi ehama, ohaya kala ya hala lela oku shi kwathela moku shi kongela ekwatho lyopaunamiti. Nonando ongaaka, otashi vulika aapangi ya kale ye na omadhiladhilo gi ili nogi ili ge na ko nasha nepango ngoka ge na okutalika nawa kutya ogeni tago opalele. Kakele kaashono, oomvula opo dha piti opwa holoka omikithi omipe nodhindji dhomudho kapu na omukalo gwokondandalunde gwoku dhi panga. Nomathimbo gamwe ohashi kala nokuli oshidhigu koondohotola okutseya kutya oshike to ehama. Ano oshike nduno Omukriste e na okuninga po?
20 Nonando omunyoli gumwe gwOmbiimbeli okwa li omupangi nosho wo omuyapostoli Paulus okwa gandja omayele ge na oshilonga gopaunamiti kukuume ke Timoteus, Ombiimbeli kayi shi embo lyopaunamiti, ihe oyi li po oku tu kwathela pamikalo nopambepo. (Aakolossa 4:14; 1 Timoteus 5:23) Onkee ano, miinima yi na ko nasha nuunamiti, omitse dhomaukwanegumbo gopaKriste odhi na okuninga omatokolo gadho ge li pandjele. Otashi vulika dhi pule oondohotola dhi vulithe puyimwe dhi konakone oshilyo shoka tashi ehama. (Yelekanitha Omayeletumbulo 18:17.) Osha yela kutya ohadhi kala dha hala okumonena oshilyo shomuukwanegumbo wadho shoka tashi ehama ekwatho lyepango lya dhenga mbanda ndyoka tali vulu okumonika, nodhindji ohadhi li kongo kiipangelo nenge koondohotola dhopaunamiti. Dhimwe ohadhi li kongo kwaamboka haya panga nomiti dha longwa miigwanga nosho tuu. Shika oshi li etokolo lyopaumwene. Nonando ongaaka, ngele Aakriste tayu ungaunga nuupyakadhi wuukolele, oye na okweetha ‘Oohapu dhaKalunga dhi kale onyeka mokweenda kwawo nuuyelele mondjila yawo.’ (Episalomi 119:105) Ohaya tsikile okulandula omayele ngoka ya pewa mOmbiimbeli. (Jesaja 55:8, 9) Onkee ano, ihadhi kongo omapango koompulile nenge koonganga nohadhi yanda wo omapango ngoka taga tsu ompinge nomakotampango gOmbiimbeli.—Episalomi 36:9; Iilonga 15:28, 29; Ehololo 21:8.
21, 22. Omukulukadhi gumwe Omuasia okwa li a kwathelwa ngiini komakotampango gOmbiimbeli, nongiini etokolo lye lya li li mondjila?
21 Tala oshiholelwa shomukiintu omugundjuka Omuasia. Sho opo a tameke okukonakona Ombiimbeli nayimwe yomOonzapo dhaJehova, okwa li a mono okanona kokakadhona ka valwa inaaka kola ke na owala oshiviha shokilograma 1,5. Okwa li a yemata noonkondo sho ondohotola ya li ye mu lombwele kutya okanona ke okakambeli noitaka ka vula okweenda nandonando. Ondohotola oya li ye mu ladhipike a gandje po okanona ke kehangano lyokuputudha aanona ya tya ngaaka. Omusamane gwe ka li e shi kutya naya ninge ngiini. Mbela omukulukadhi openi a li ta vulu okupula omayele?
22 Okwa ti: “Onda li nda dhimbulukwa shoka ndi ilonga mOmbiimbeli kutya ‘aanona oyo omagano ga za kOMUWA; oluvalo olwo eyambeko lyo lyene.’” (Episalomi 127:3) Okwa li a tokola okufala “omagano” ngaka kegumbo e te ga sile oshimpwiyu. Petameko osha li oshidhigu kuye, ihe kekwatho lyookuume ke Aakriste megongalo lyawo lyOonzapo dhaJehova, omukulukadhi nguka okwa li a vulu okusila oshimpwiyu okanona ke nosho wo oompumbwe dhako dhi ikalekelwa. Konima yoomvula 12, okanona oka adhika nale haka yi kokugongala kOshinyanga shUukwaniilwa, naahoka oka li ka nyanyukilwa okweendathana naanona ooyakwawo. Meme gwako nguka okwa ti: “Onda nyanyukwa sho omakotampango gOmbiimbeli gi inyengitha ndje ndi ninge shoka shi li mondjila. Ombiimbeli oya kwathela ndje ndi kale ndi na eiyuvo lya yela koshipala shaJehova Kalunga nokaandi kale tandi ipe uusama onkalamwenyo yandje ayihe.”
23. Ehekeleko lini Ombiimbeli tayi pe mboka taye ehama naamboka taye ya sile oshimpwiyu?
23 Omikithi itadhi kala noku tu hepeka sigo aluhe. Omupolofeti Jesaja okwa li a popi kombinga yethimbo sho ‘itaapu ka kala nando ogumwe ta ka tya: “Otandi ehama.”’ (Jesaja 33:24) Euvaneko ndyoka otali ka gwanithwa muuyuni uupe mboka wu li pokuya. Ihe mongashingeyi ohatu ehama nohatu si. Lago enene, Oohapu dhaKalunga otadhi tu hekeleke notadhi tu kwathele. Omithikampango dhOmbiimbeli dhi na ko nasha neihumbato odhi li po sigo aluhe nodhi li nawa dhi vule omataloko gaantu inaaya gwanenena ngoka haga kala nokulunduluka. Omolwaashono omuntu ngoka omunandunge ta zimine oohapu dhomupisalomi ngoka a ti: “Ompango yOMUWA kaku na we; otayi nyashula omuntu. Omalombwelo gOMUWA oge shi kwiinekelwa, taga gandja uunongo kumboka taa u pumbwa. . . . Omapangulo gOMUWA ogu uka; kage na okatongo . . . Okuvulika kugo oku na ondjambi.”—Episalomi 19:7, 9, 11.
ONGIINI OMAKOTAMPANGO GOMBIIMBELI NGAKA TAGA VULU OKUKWATHELA UUKWANEGUMBO WU UNGAUNGE NOMUKITHI GWA KWATA MIITI NONOMAUPYAKADHI NGONO HAWU ETA?
Ohole ohayi idhidhimikile ayihe noyi na olukeno.—1 Aakorinto 13:4-7.
Osha simana okukala nombepo ombwanawa.—Omayeletumbulo 18:14.
Oshi li pandunge okukonga omayele manga inaatu ninga omatokolo ga simana.—Omayeletumbulo 15:22.
Jehova ohe tu kwathele ngele tu li muudhigu.—Episalomi 55:22.
Oohapu dhaJehova otadhi vulu oku tu kwathela monkalo kehe.—Episalomi 119:105.
[Ethano pepandja 118]
Aakriste ohayu ulukile ookuume kawo kopandjokana ohole yomuule, unene tuu uuna taye ehama
[Ethano pepandja 125]
Uukwanegumbo otawu vulu okukandula po omaupyakadhi ngele otawu longele kumwe