Ontopolwa 15

Natu kale hatu ungaunga nayalwe nohenda

MBELA owu shi kutya okatongotongo oshike?— Okatongotongo oko okukala kuu hole omuntu gwontumba molwaashoka owala ta monika a yooloka ko kuyalwe nenge pamwe molwaashoka ha popi elaka lyi ili. Onkee ano, okukala nokatongotongo oko okukala wu na omaiyuvo nenge omadhiladhilo omawinayi kombinga yomuntu gwontumba omanga inoo mu tseya nawa.

Mbela oto dhiladhila kutya oshi li mondjila okukala wu tonde gumwe manga inoo tseya naanaa kutya oku li omuntu a tya ngiini nenge molwaashoka owala a yooloka ko kungoye?— Aawe, okukala tu na okatongotongo kaku li mondjila noitaku ulike kutya otu na ohenda. Katu na okukala kaatu na ohenda nomuntu gwontumba molwaashoka owala a yooloka ko kutse.

Dhiladhila kwaashika. Mbela owu shi omuntu gwontumba e na olwaala lwa yooloka ko kulwoye nenge ha popi elaka inaali fa lyoye?— Otashi vulika wu shi nokuli aantu mbono haya monika ya yooloka ko kungoye molwaashono taye ehama nenge ya mona oshiponga. Mbela owu na ohenda nohole naamboka ya yooloka ko kungoye?—

Ngele otwa kala hatu pulakene kOmulongi Omunene, Jesus Kristus, otatu ka kala tu na ohenda nakehe gumwe. Katu na okukala hatu yoolola aantu, kutya nduno omuntu ngono okwa za koshilongo shini nenge ogwolwaala luni. Natu kale tu na ohenda naye. Nonando shika hasho aantu ayehe yi itaala, shoka osho oshiilongomwa Jesus a longa aantu. Natu kundathane kombinga yasho.

Omujuda gumwe ngono a li e na okatongotongo nayalwe okwa li e ya kuJesus nokwe mu pula a ti: “Muhongi, ondi na okuninga shike, ndi mone omwenyo gwaaluhe?” Jesus okwa li e shi kutya omulumentu nguka otashi vulika ta kambadhala oku mu ningitha a popye kutya otu na okukala tu na owala ohenda naantu mbono yomuhoko gwetu nenge yuukwashigwana wetu. Onkee ano, pehala lyokuyamukula epulo ndino kuye mwene, Jesus okwe mu pula a ti: ‘Ompango yaKalunga otayi ti otu na okuninga shike?’

Omulumentu okwe mu yamukala a ti: ‘Hola Omuwa Kalunga koye komutima gwoye aguhe, na hola mukweni ngaashi ngoye wi ihole mwene.’ Jesus okwa ti: ‘Owa yamukula mondjila. Shi gwanitha e to ka mona omwenyo gwaaluhe.’

Ihe omulumentu ka li a hala okukala ha sile ohenda nenge e hole aantu mboka ya yooloka ko kuye. Onkee ano, okwa kambadhala okwiipopila. Okwa pula Jesus a ti: “Mukwetu olye?” Otashi vulika a li a hala Jesus a tye: “Ooyakweni ookuume koye” nenge “aantu mboka ye ku fa.” Opo Jesus a yamukule epulo ndino, okwe mu hokololele ehokololo kombinga yOmujuda nOmusamaria. Ehokololo olya li ngaashi tashi landula.

Omulumentu gumwe okwa li te ende nondjila ta zi kuJerusalem u uka kuJeriko. Omulumentu nguka okwa li Omujuda. Manga a li te ende nondjila, aayugi oye mu kwata. Oye mu dhenge e ta gwile pevi noye mu kutha iimaliwa ye noonguwo dhe. Aayugi mboka oye mu ehameke nayi e taye mu thigi a lala pooha dhondjila e na okamwenyo okashona.

Konima yokathimbo okashona, omusaaseri gumwe okwa li te ende nondjila ndjoka. Okwa mono kutya omulumentu ngoka okwe ehamekwa unene. Ando ongoye, ando owa ningi po shike?— Omusaaseri okwa kundulukile owala kombinga onkwawo yondjila. Ina thikama po nokuli. Ina ninga po sha a kwathele omulumentu nguka.

Opo nduno, omulumentu gumwe a lenga elongelokalunga okwa li te ende nondjila oyo tuu ndjoka. Okwa li Omulevi ha longo motempeli muJerusalem. Mbela okwa li a thikama po opo a kwathele omulumentu ngoka?— Aawe. Okwa ningi ngaashi omusaaseri a ningi.

Lwahugunina, Omusamaria okwe ya a landula ondjila ndjoka. Mbela owu mu wete sho te ya te ende nondjila ndjoka ya goyoka?— Okwa mono Omujuda ngoka e ehamekwa noonkondo a lala pooha dhondjila. Ihe Aasamaria nAajuda oyendji kaya li ye holathane nandonando. (Johannes 4:9) Mbela Omusamaria nguno okwa li a piti po pomulumentu nguno inee mu kwathela? Mbela okwa li a ti: ‘Omolwashike ndi na okukwathela Omujuda nguka? Mbela ando ongame nda li nde ehamekwa, ando ota kwathele ndje ngaa?’

Omusamaria okwa tala omulumentu ngoka a lala pooha dhondjila nokwe mu etele ohenda. Okwa li e uvite kutya inashi uka oku mu thiga mpoka nokweetha a sile mpoka. Onkee ano, okwa londoloka kokasino ke nokwa yi kuye e ta panga iilalo ye. Okwe yi tile omagadhi nomaviinu. Shika osha li tashi ka kwathela iilalo yi aluke. Okwe yi manga noshilapi.

Omusamaria okwa yambulile kashona nakashona omulumentu ngono e ehamekwa kokasino ke. Oya yi taye ende kashona ya landula ondjila sigo ye ya pongulu yaayenda. Omusamaria okwe mu monene ehala lyokukala nokwe mu sile nawa oshimpwiyu.

Jesus okwa pula omulumentu ngoka a li ta popi naye a ti: “Oguni po gwaamboka yatatu a kala omukwawo gwaanguka a adhikile kaayugi?” Mbela oto ti ngiini? Mbela Omusaaseri, Omulevi nenge Omusamaria?—

Omulumentu okwa yamukula a ti: ‘Oye ngoka a thikama e te mu kwathele, oye a li mukwawo.’ Jesus okwa ti: ‘Ou li mondjila. Nangoye wo inda, u ka ninge ngaaka.’—Lukas 10:25-37.

Ehokololo ndika kalya li tuu ewanawa! Olye shi yelitha kutya ooyakwetu oyo oolye. Ookuume ketu kopothingo hayo owala ooyakwetu. Kaye shi owala aantu mboka ye na olwaala lwa fa lwetu nenge haya popi elaka ndyoka hatu popi. Jesus okwe tu longa tu kale tu na ohenda naantu kutya nduno oya za peni, oye li ngiini nenge ohaya popi elaka lini.

Jehova Kalunga naye osho e li ngawo. Ke na okatongotongo. Jesus okwa ti: ‘Ho yeni yomegulu etango lye ohe li pitithile aantu aawinayi naawanawa nomvula ohe yi lokithile aawanawa naawinayi.’ Onkee ano otu na okukala tu na ohenda naantu ayehe, ngaashi naanaa Kalunga.—Mateus 5:44-48.

Ngele owa mono gumwe e ehamekwa, mbela oto ka ninga po shike?— Ongiini mbela ngele omuntu ngono okwa za koshilongo shilwe nenge olwaala lwe olwa yooloka ko kulwoye? Oku li mukweni nou na oku mu kwathela. Ngele owu uvite wu li omushona natango noku mu kwathela, pula gumwe ngoka omukuluntu e mu kwathele. Nenge oto vulu okudhengela opolisi nenge omulongisikola. Kungawo, otu ulike kutya owu na ohenda, ngaashi omulumentu Omusamaria.

Omulongi Omunene okwa hala tu kale tu na ohenda. Okwa hala tu kale hatu kwathele yalwe, kashi na nduno mbudhi kutya oyo oolye. Osho molwaashono Jesus a li a hokolola ehokololo lyOmusamaria omunamutimahenda.

Shi na ko nasha noshiilongomwa shika shokukala tu na ohenda nayalwe, kutya nduno oyomuhoko guni nenge oyuukwashigwana wuni, lesha Omayeletumbulo 19:22; Iilonga 10:34, 35, 17:26.

[Omathano pepandja 83]

Otu na okuungaunga ngiini naamboka ya yooloka ko kutse?

[Omathano pepandja 85]

Omolwashike Omusamaria a li mukwawo gwomulumentu nguno?

[Ethano pepandja 86]

Ongiini to vulu okukala mukwawo gwayalwe?